CHILONGESA 20
Yehova Eji Kutwaminyinanga Ngachilihi Chikungulwilo?
Yehova apwa Kalunga uze alinga vyuma mukulonga. (Wavaka-Kolinde 1, 14:33, 40) Shikaho twafwelela ngwetu navatu jenyi navalinganga vyuma mukulonga. Uno chikungulwilo chavaka-Kulishitu veji kuchitwaminyinanga ngachilihi? Kaha natukafwa ngachilihi chikungulwilo chitambuke mukulonga?
1. Iya apwa mutwe wachikungulwilo?
“Kulishitu ikiye mutwe wachikungulwilo.” (Wavaka-Efwesu 5:23) Atwama mwilu, kaha ali nakutwaminyina milimo vali nakuzata vatu jaYehova mukaye kosena. Yesu atongwele “ndungo wakushishika wakuzangama,” lizavu lyalindende lyavakulwane, lize vavuluka ngwavo Lizavu lyaKutwaminyina. (Tanga Mateu 24:45-47.) Lizavu lyaKutwaminyina lyeji kutetekelanga vikungulwilo mukaye kosena ngana muze valingilenga vaposetolo navakulwane vamulikulukaji lyamyaka lyakulivanga vaze vapwile muYelusalema. (Vilinga 15:2) Ava malunga kavapwa vatwamina valiuka lyetuko. Oloze veji kupendaminanga hali Yehova naMazu enyi, kaha nawa veji kuliluulanga kuwata waYesu.
2. Milimo muka vazata vakulwane muchikungulwilo?
Vakulwane vapwa vaka-Kulishitu vamalunga vakuhya kushipilitu vaze veji kunangulanga vyuma vyamuVisoneka, nakufunga vatu jaYehova hakuvakafwa nakuvakolezeza. Kavavafweta hakuzata mulimo kanako. Veji kuzatanga “nakulisuula kumeso aKalunga, keshi nakufwila kulinganyalisa vaveneko, oloze mukulisakila.” (WaPetulu 1, 5:1, 2) Vakulwane veji kuvakafwanga kuli vaka-kuzachila. Vaka-kuzachila veji kuvatongolanga vapwenga vakulwane nge vanatemo.
Lizavu lyaKutwaminyina lyeji kutongolanga vakulwane vamwe vapwenga tulama vakujinguluka. Tulama vakujinguluka veji kutambukilanga vikungulwilo mangana vavikafwe mwakuzachila milimo nakuvikolezeza. Veji kutongolanga vandumbwetu vamalunga vaze vanatesamo vyuma vyasakiwa muVisoneka mangana vapwenga vakulwane chipwe vaka-kuzachila.—WaChimoteu 1, 3:1-10, 12; WaChituse 1:5-9.
3. Mulimo muka vatwama nawo Vinjiho vosena?
Vatu vosena muchikungulwilo veji ‘kwalisanga lijina lyaYehova’ hakwazanangamo nge vali kukukunguluka chachikungulwilo, nakuzata mulimo wakwambulula kweseka noho hakumina ngolo javo.—Tanga Samu 148:12, 13.
LINANGULE VYAKUJIMINYINA
Wana omwo Yesu eji kutwaminyinanga chikungulwilo, nomwo veji kumulondezezanga vakulwane, nomwo tunahase kusolola ngwetu twamwononoka nakuzachila hamwe navakulwane.
4. Yesu apwa twamina uze eji kuhizumunanga
Yesu atulweza tupandame kuli ikiye mangana atuhizumune. Tangenu Mateu 11:28-30, nakushimutwila hachihula chino:
-
Uno Yesu apwa twamina wakufwana ngachilihi, kaha asaka twivwenga ngachilihi?
Uno vakulwane veji kulondezezanga ngachilihi Yesu? Talenu VINDIYO.
Mbimbiliya yasolola hatoma omwo vakulwane vatela kuzachilamo mulimo wavo.
Tangenu Isaya 32:2 naWaPetulu 1, 5:1-3, nakushimutwila havihula vino:
-
Uno uli nakwivwa ngachilihi hakutachikiza ngwove vakulwane veji kuzatanga nangolo mangana vatuhizumune ngana muze alingilenga Yesu?
-
Jijila jeka muka jize vakulwane veji kulondezezelangamo Yesu?
5. Vakulwane veji kuhananga vandumbwavo chakutalilaho
Uno Yesu asaka vakulwane vamonenga ngachilihi mulimo avahana? Talenu VINDIYO.
Yesu ahakako jishimbi jize vatela kukavangiza vaze vali nakutetekela chikungulwilo. Tangenu Mateu 23:8-12, nakushimutwila havihula vino:
-
Lushimbi muka lwamuMbimbiliya luze vatela kukavangiza vakulwane? Kutala washinganyeka ngwove vakulwane vamumauka akwitava veji kukavangizanga vyuma yahanjika Mbimbiliya tahi?
-
Vakulwane veji kuzatanga nangolo mangana vazamise usoko wavo naYehova nakukafwa nawa jitanga javo jilinge mwomumwe
-
Vakulwane veji kuzakamanga vatu vosena muchikungulwilo
-
Vakulwane veji kuzatanga mulimo wakwambulula lwola lwosena
-
Vakulwane vapwa vaka-kunangula. Kaha nawa veji kuzatanga mulimo wakuwahisa haZuvo yaWangana namilimo yeka
6. Tunahase kuzachila hamwe navakulwane
Mbimbiliya yatulweza ovyo chapwila chachilemu kuzachila hamwe navakulwane. Tangenu WavaHepeleu 13:17, nakushimutwila havihula vino:
-
Kutala chakwoloka Mbimbiliya kutulweza twononokenga nakuliluula kuli vaze vali nakutetekela tahi? Mwomwo ika?
Tangenu Luka 16:10, nakushimutwila hachihula chino:
-
Mwomwo ika chapwila chachilemu kuzachilanga hamwe navakulwane nahavyuma vize navisoloka nge kavyeshi vyavilemuko?
VATU VAMWE NGWAVO: “Mutu katela kupandama kuliuka lyakwitavako.”
-
Kuwaha muka chatwama hakulemesela Kalunga hamwe navakwenu muchikungulwilo?
CHISHINA UNALINANGULA
Yesu ikiye mutwe wachikungulwilo. Tweji kuzachilanga hamwe navakulwane vaze ali nakuzachisa mwomwo veji kutuhizumunanga nakutuhana chakutalilaho chamwaza.
Kuhituluka
-
Iya apwa mutwe wachikungulwilo?
-
Uno vakulwane veji kukafwanga ngachilihi vikungulwilo?
-
Mulimo muka atwama nawo mutu himutu uze eji kulemesanga Yehova?
WANA VYAVIVULU
Wana unjiho wakusolola omwo Lizavu lyaKutwaminyina navakulwane muvikungulwilo vali nakuzakama vakwavo vaka-Kulishitu makumbi ano.
Kukolezeza Vandumbwetu Halwola Vanakanyisa Mulimo Wetu (4:22)
Wana mulimo vazata tulama vakujinguluka.
Tanga wivwenga mulimo vatwama nawo mapwevo muchikungulwilo.
“Uno Vinjiho jaYehova Vatwama naVaka-Kunangula Vamapwevo Tahi?” (Chihande chamuKaposhi Kakutalila)
Wana omwo vakulwane veji kuzatanga nangolo mangana vakolezeze vandumbwavo.
“Tulama Vaka-Kulishitu ‘hiVakwetu Twazata Navo Nakuwahilila’” (Kaposhi Kakutalila, January 15, 2013)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
