Jyobaa ak tukniwits ak tuknimäˈkxë tijaty tmëdaty (1 Korintʉ 14:33). Pääty njënäˈänëm ko nanduˈun ttsoky ets yˈitëdë kyäjpn. ¿Wiˈixë kyäjpn yˈity tukniwits tuknimäˈkxë? ¿Ets ti mbäät nduˈunëm parë duˈun nyëˈëyeˈey tyuˈuyeˈeyët?

1. ¿Pën nyigëbäjkˈäjtypyë Diosë kyäjpn?

“Kristë myëdäjtypy ja kutujkën mä yëˈë mëbëjkpëtëjk” (Éfesʉ 5:23). Desde tsäjpotmë Jesus tˈixy wiˈix nyëˈëyeˈey tyuˈuyeˈeyë Diosë tyuunk abëtsëmy nyaxwinyëdë. Ets yëˈë të ttuknipëky tuk grupë mëjjäˈäytyëjk, mëdiˈibë yajtijtëp ja tuumbë mëdiˈibë kuwijy o pënaty Wyoowˈyoˈoytyëbë Jyobaa tyestiigëty (käjpxë Matewʉ 24:45-47). Yäˈädë nmëguˈukˈäjtëm yëˈë tyam nyëˈëmooy tyuˈumooytyëbë Diosë kyäjpn abëtsëmy nyaxwinyëdë, duˈun extëm ttuundë ja mëjjäˈäytyëjk ets ja apostëlëtëjk mä primer siiglë (Apostʉlʉty o Hechos 15:2). Per kyaj yëˈë tniwintsënˈattë, yëˈë myëmëdoowdëbë Jesus mëdiˈibë nigëbäjkˈäjtëdëp. Yˈëxtääytyëp nanduˈun ja Diosë nyaybyudëkë ets yëˈë pyanëjkxtëp wiˈix ja Biiblyë nyëˈëmoˈoy tyuˈumoˈoyëdë.

2. ¿Pënatyën yajtijtëp mëjjäˈäytyëjk ets ti tyuundëp?

Pënaty tuundëp mëjjäˈäy, myëmëdoowdëbë Jyobaa ets yëˈë yajtuundëbë Biiblyë parë yaˈëxpëktë mä Diosë kyäjpn, pyudëjkëdëp nanduˈun ja myëguˈuktëjk ets myëjääwmooytyëp. Kyaj yajmëjuytyë niˈigyë ‘xondaˈakyˈääw xondaˈakyjyot tyundë, extëmë Dios ttsoky, ets kyaj mët ko të yajtukˈanaˈamdë o myeenyˈookˈattë’ (1 Peedrʉ 5:1, 2). Ta nanduˈun pënaty pyudëjkëdëbë mëjjäˈäytyëjk, mëdiˈibë ok mbäät tyundë mëjjäˈäy.

Pënaty Wyoowˈyoˈoytyëbë Jyobaa tyestiigëty, yëˈë wyinˈijxtëp näägë mëjjäˈäytyëjk parë tyundët sirkuitë. Pënaty duˈun tuundëp, yëˈë kyuˈijxëdëp mäjaty tyuˈukmuktë Jyobaa tyestiigëty parë tmëjääwmoˈoytyë ets tpudëkëdë. Yëˈë nanduˈun yˈijxtëp pën ja nmëguˈukˈäjtëm mëdiˈibë yajtuunkmoˈoyäämp mëjjäˈäy o pyudëjkëbë mëjjäˈäy, jukyˈäjtp extëmë Biiblyë tniˈanaˈamë (1 Timotee 3:1-10, 12; Titʉ 1:5-9).

3. ¿Ti nyikëjxmˈäjtypy ttunët tuˈuk tuˈugë Testiigë?

Niˈamukë Testiigë yajmëjpëtsëëmdëbë “Jyobaa xyëëw”. Duˈun ko nyëjkxtë reunyonk ets ko nyëjkxtë ëwäˈkx käjpxwäˈkxpë (käjpxë Salmo 148:12, 13).

 AK NIJAWË NIˈIGYË

4. Jesus yëˈë tuˈugë wintsën mëdiˈibë jantsy oyjyaˈay

Jesus xywyoˈow xywyijtsëm parë yëˈë nwintsënˈäjtëm. Käjpxtë Matewʉ 11:28-30 ets nimaytyäˈäktë mëdiˈibë yä yajtëëpy:

• ¿Wiˈixë Jesus tniwintsënˈatyë Diosë kyäjpn? ¿Ets wiˈix xyajnayjyäˈäwëm?

5. Mëjjäˈäytyëjk duˈun jyukyˈattë extëm yaˈëxpëktë

1. Mëjjäˈäytyëjk myëwingoondëbë Jyobaa ets pyudëjkëdëp ja fyamilyë parë nanduˈun ttundët.

2. Mëjjäˈäytyëjk myëmääy myëdäjtëp niˈamukë myëguˈuktëjk mëdiˈibë mëët tyuˈukmuktë.

3. Mëjjäˈäytyëjk xëmë yˈëwäˈkx kyäjpxwäˈkxtë.

4. Mëjjäˈäytyëjk yaˈëxpëjktëp, ets tyuundëp nanduˈun oytyim mëdiˈibë tuungëty extëm mä wyaˈatsyë jëën tëjk.

 6. Mbäät nbudëjkëm ja mëjjäˈäytyëjk

Biiblyë nyigajpxypy tiko jyëjpˈamëty nbudëjkëm pënaty tuundëp mëjjäˈäy. Käjpxtë Ebreeʉsʉty 13:17 ets nimaytyäˈäktë mëdiˈibë yä yajtëëpy:

• ¿Tiko Biiblyë xyˈanmäˈäyëm ets nˈëygyupëjk ngajpxykyupëjkëm pënaty xynyëˈëmoˈoy xytyuˈumoˈoyëm? Wiˈix mˈokwinmay, ¿tidaa ko yˈoyëty ets duˈun nduˈunëm?

Käjpxtë Lukʉs 16:10 ets nimaytyäˈäktë mëdiˈibë yä yajtëëpy:

• ¿Tiko yˈoyëty nˈëygyupëjk ngajpxykyupëjkëmë mëjjäˈäytyëjk axtë pën nˈijxëm ko kyaj tyimmëjwiin tyimkajaajëty?

 TI TË NJÄJTËM

Jesus yëˈë nyigëbäjkˈäjtypyë Diosë kyäjpn ets yëˈë të ttuunkmoˈoy ja mëjjäˈäytyëjk. Ets yëˈë net ëtsäjtëm nˈëygyupëjk ngajpxykyupëjkëm mët ko xykyuentëˈäjtëm ets xytyukniˈˈijxëm mëdë yˈijxpajtën.

Ajamyatsë

• ¿Pën nyigëbäjkˈäjtypyë Diosë kyäjpn?

• ¿Wiˈixë mëjjäˈäytyëjk tpudëkëdë ja Diosë kyäjpn?

• ¿Ti mëdiˈibë nyikëjxmˈäjtypy tuˈuk tuˈugë Testiigë?