Yehova, Mulugu owegeredheya. (1 Coríntios 14:33) Bumwahaya sapama nlogo naaye nikale nowegeredheya. Mulogo wegeredhiwe nimakalelo baani? Ki kadda muthu wa iyo anaakavihere aavi wi mulogo okale wowegeredheyene?

1. Namasogolela Mulogo baani?

‘Yesu bi musolo wa mulogo.’ (Efésios 5:23) Yesu, onowasogolela mabasa anikuru na Yehova mwilaboni yatene agaari odhulu. Oliye ohumuthoma ‘mudhaari oororomeleya ni athotho’— nikuru naalobwana athotho, nnithaniwa Nikuru Nolamulela. (Omwileri Mateus 24:45-47.) Nsaka noobajha, arumiwi ni anamaholela oJeruzale yovaha dhoholela mulogo wa mudhidhi yole. Emodhave, Nikuru Nolamulela peeno nnovaha dhoholela mulogo dhatedhene mwilaboni yatene. (Atos 15:2) Mbwenye alobwana ala kahi anamasogolela a nikuru nehu. Aliwa enomuhudhera Bibliya wi enone efunelo ya Yehova, ni enohara oholela wa Yesu.

2. Anamaholela mulogo baani, ki mabasa baani enaapariwa?

Anamaholela mulogo, alobwana athotho enamulabihedha Bibliya wi ehudhihe nlogo na Yehova. Aliwa enakala owiwegeredhene wi yakavihere ni yalibihe ale enamulabela Yehova. Kinaakela korowa. Nahuna, aliwa enomulabela Mulugu “ni murima wewa watene, ehijhehaga oliviwa, mbwenye nuuwivelela wewa.” (1 Pedro 5:1, 2) Anamaholela mulogo enokaviheriwa ni adhaari okavihera, teto wavira mudhidhi adhaari ala ookavihera mowiwanana ni dhoholela dha mBibliyani enothomiwa wi ekale anamaholela Mulogo.

Nikuru Nolamulela nnowathoma anamaholela mulogo amodha wi ekale anameeddela mulogo. Alobwana ayo enowaredhela mulogo wi yavahe addibila dhoholela ni yalibihe. Anameeddela mulogo enosayela dhoholela dha mBibliyani wi ependde akala ddibila anofwanelela okala mudhaari ookavihera obe namaholela Mulogo.— 1 Timóteo 3:1-10, 12; Tito 1:5-9.

3. Kadda Namona a Yehova mutholo baani anniyena?

Aatene mmulogoni ‘enovuwiha ndina na Yehova’ mwaha wodhowa omutugumanoni, olaleya muthenga dhapama mowiwanana ni egumi yewa. — Omwileri Salmos 148:12, 13.

 OHUDHERE DHITHU DHIMODHA

4. Yesu namasogolela apama

Nuudhivela Yesu onoonithana. Mmwileri Mateus 11:28-30, mwamala muthapanyedhe makoho enaharela:

• Yesu namasogolela baani? Ki oliye anafuna nikalege aavi?

5. Anamaholela mulogo enohudhiha wodhela mweddelo wewa

1. Anamaholela mulogo enokanna wandana wooliba ni Yehova ni enowakavihera amudhiwa werana emodhave

2. Anamaholela mulogo enowasamalela addibila aatene ammulogoni

3.   Anamaholela mulogo enolaleya mudhidhi wamutene

4. Anamaholela mulogo enohudhiha dhithu dhiri Mmadhuni a Mulugu. Enokavihera oxela munyumbani Yomwene vamodha ni mabasa mamodha

6. Iyo podi wakavihera anamaholela mulogo

Bibliya onooniva ethu enanithukulela wakavihera anamaholela Mulogo. Mmwileri Hebreus 13:17, mwamala muthapanyedhe nikoho nnaharela:

• Mwahaya bwaddi Bibliya adhe awogege wi nawiwelelege anamaholela Mulogo ni murima watene? We onoonamo aavi?

Mmwileri Lucas 16:10, mwamala muthapanyedhe nikoho nnaharela:

• Mwahaya bwaddi sapama wawiwelela anamaholela mulogo naarive ekalaga ninga ethuya kahi yunlubale?

 OVIRISEDHA

Yesu bi namasogolela mulogo. Anamaholela enohara dhoholela dhaye. Nnohagalala naakaviheraga anamaholela mulogo mwaha aliwa athu apama ni enonihudhiha wodhela mweddelo wewa.

Ogwaddela

• Namaholela mulogo baani?

• Anamaholela mulogo enakavihera aavi mulogo?

• Mutholo baani kadda muthu anniyena mmulogoni?