ယေဟောဝါဟာ စည်းစနစ်ရှိတဲ့ဘုရား ဖြစ်တယ်။ (၁ ကောရိန္သု ၁၄:၃၃) ဘုရားလူမျိုးကိုလည်း စည်းစနစ်တကျ ဖွဲ့စည်းထားမယ်လို့ မျှော်လင့်နိုင်ပါတယ်။ ခရစ်ယာန်အသင်းတော်ကို ဘယ်လို ဖွဲ့စည်းထားသလဲ။ အသင်းတော် စည်းစနစ်တကျ ရှိစေဖို့ ဘယ်လို ကူညီနိုင်ကြသလဲ။

၁။ အသင်းတော်ကို ဘယ်သူ ဦးဆောင်နေသလဲ။

“ခရစ်တော်ဟာ အသင်းတော်ရဲ့ ဦးခေါင်း” ဖြစ်တယ်။ (ဧဖက် ၅:၂၃) ကမ္ဘာတစ်ဝန်းက ယေဟောဝါလူမျိုးရဲ့ လုပ်ဆောင်မှုတွေကို ကောင်းကင်ကနေ ကြီးကြပ်ပေးနေတယ်။ ဝါရင့်အကြီးအကဲတစ်စုကို “သစ္စာနဲ့ သတိပညာရှိတဲ့ကျွန်” အဖြစ် ယေရှု ခန့်အပ်တယ်။ သူတို့ကို အုပ်ချုပ်ရေးအဖွဲ့လို့လည်း ခေါ်တယ်။ (မဿဲ ၂၄:​၄၅-၄၇ ကို ဖတ်ပါ။) ပထမရာစု၊ ဂျေရုဆလင်မှာရှိတဲ့ တမန်တော်တွေနဲ့ အကြီးအကဲတွေလိုပဲ အုပ်ချုပ်ရေးအဖွဲ့ကလည်း ကမ္ဘာတစ်ဝန်းက အသင်းတော်တွေကို လမ်းညွှန်နေတယ်။ (တမန်တော် ၁၅:၂) ဒါပေမဲ့ ဒီညီအစ်ကိုတွေဟာ အဖွဲ့အစည်းကို ဦးဆောင်သူတွေ မဟုတ်ကြဘူး။ ယေဟောဝါရဲ့ လမ်းညွှန်မှု ရဖို့ ကျမ်းစာကို ဖတ်တယ်။ ယေရှုရဲ့ ဦးဆောင်မှုကို လိုက်နာကြတယ်။

၂။ အကြီးအကဲတွေဟာ ဘယ်သူတွေလဲ။ သူတို့ရဲ့တာဝန်က ဘာလဲ။

အကြီးအကဲတွေဟာ ဝါရင့် ခရစ်ယာန်အမျိုးသားတွေပါ။ ဘုရားလူမျိုးကို ကျမ်းစာအကြောင်း သွန်သင်ပြီး အားပေးကူညီတယ်။ လခစားတွေ မဟုတ်ကြဘူး။ ‘ဘုရားရှေ့မှာ စိတ်ပါလက်ပါ လုပ်ဆောင်သူတွေ၊ မသမာတဲ့နည်းနဲ့ အမြတ်ထုတ်ချင်လို့ မဟုတ်ဘဲ စေတနာစိတ်နဲ့ လုပ်ဆောင်သူတွေ’ ဖြစ်တယ်။ (၁ ပေတရု ၅:​၁၊ ၂) အသင်းတော်အမှုထမ်းတွေဆိုတာ အကြီးအကဲတွေကို ကူညီပေးသူတွေ၊ နောင်တစ်ချိန် အကြီးအကဲဖြစ်လာနိုင်သူတွေပါ။

အုပ်ချုပ်ရေးအဖွဲ့က အကြီးအကဲတချို့ကို တိုက်နယ်ကြီးကြပ်မှူးအဖြစ် ခန့်အပ်တယ်။ တိုက်နယ်ကြီးကြပ်မှူးတွေက အသင်းတော်တွေဆီ လည်ပတ်ပြီး လမ်းညွှန်တယ်၊ အားပေးတယ်။ ကျမ်းစာတောင်းဆိုချက် ပြည့်မီသူတွေကို အကြီးအကဲ၊ အသင်းတော်အမှုထမ်းအဖြစ် ခန့်အပ်ပေးတယ်။​—၁ တိမောသေ ၃:​၁-၁၀၊ ၁၂။ တိတု ၁:​၅-၉။

၃။ သက်သေခံတစ်ဦးစီရဲ့ တာဝန်က ဘာလဲ။

အသင်းတော်မှာ ရှိတဲ့သူအားလုံးက အစည်းအဝေးတွေမှာ ပါဝင်ခြင်း၊ အတတ်နိုင်ဆုံး ဟောပြောခြင်းအားဖြင့် ‘ယေဟောဝါရဲ့နာမည်ကို ချီးမွမ်းကြတယ်။’​—ဆာလံ ၁၄၈:​၁၂၊ ၁၃ ကို ဖတ်ပါ။

 ရှာဖွေလေ တွေ့ရှိလေ

၄။ ယေရှုဟာ လန်းဆန်းစေတဲ့ ခေါင်းဆောင်ဖြစ်

ယေရှုရဲ့ လှိုက်လှဲတဲ့ ဖိတ်ခေါ်ချက်ကို မဿဲ ၁၁:၂၈-၃၀ မှာ ဖတ်ပါ။ ပြီးတဲ့နောက် ဒီမေးခွန်းကို သုံးသပ်ပါ။

• ယေရှုဟာ ဘယ်လို ခေါင်းဆောင်မျိုးလဲ၊ ကျွန်တော်တို့ကို ဘယ်လို ခံစားစေချင်သလဲ။

၅။ အကြီးအကဲတွေ ပုံသက်သေနဲ့ သင်ပေးကြ

1. က။ ကိုယ်တိုင်နဲ့ မိသားစု ယုံကြည်ခြင်း ခိုင်မြဲဖို့ အကြီးအကဲတွေ ကြိုးစား

2. ခ။ အသင်းတော်မှာ ရှိတဲ့သူအားလုံးကို အကြီးအကဲတွေ ဂရုစိုက်

3.  ဂ။ အကြီးအကဲတွေ ပုံမှန် ဟောပြောကြ

4. ဃ။ အကြီးအကဲတွေ သွန်သင်ပေးကြ။ သန့်ရှင်းရေးအလုပ်တွေမှာလည်း ကူညီကြ

၆။ အကြီးအကဲတွေနဲ့ ပူးပေါင်းလုပ်ဆောင်ပါ

အကြီးအကဲတွေနဲ့ ပူးပေါင်းလုပ်ဆောင်သင့်တဲ့ အဓိကအကြောင်းရင်းကို ကျမ်းစာမှာ ဖော်ပြတယ်။ ဟီဘရူး ၁၃:၁၇ ကို ဖတ်ပါ။ ပြီးတဲ့နောက် ဒီမေးခွန်းတွေကို သုံးသပ်ပါ။

• ဦးဆောင်သူတွေကို နာခံပါ၊ လက်အောက်ခံပါလို့ ကျမ်းစာ ဘာကြောင့် အားပေးသလဲ။ ဒါနဲ့ပတ်သက်ပြီး ဘယ်လို ခံစားရပါသလဲ။

လုကာ ၁၆:၁၀ ကို ဖတ်ပါ။ ပြီးတဲ့နောက် ဒီမေးခွန်းကို သုံးသပ်ပါ။

• အသေးအဖွဲကိစ္စတွေမှာတောင် အကြီးအကဲတွေနဲ့ ပူးပေါင်းလုပ်ဆောင်ဖို့ ဘာကြောင့် အရေးကြီးသလဲ။

 အနှစ်ချုပ်

ယေရှုဟာ အသင်းတော်ရဲ့ ဦးခေါင်း ဖြစ်တယ်။ ယေရှုလက်အောက်က အကြီးအကဲတွေဟာ လန်းဆန်းစေပြီး ပုံသက်သေနဲ့ သင်ပေးနေတဲ့အတွက် ကျွန်တော်တို့ ပူးပေါင်းလုပ်ဆောင်ကြတယ်။

ပြန်လည်သုံးသပ်ခြင်း

• အသင်းတော်ကို ဘယ်သူ ဦးဆောင်နေသလဲ။

• အသင်းတော်ကို အကြီးအကဲတွေ ဘယ်လို ကူညီပေးသလဲ။

• ယေဟောဝါကို ဝတ်ပြုသူတွေမှာ ဘာတာဝန် ရှိသလဲ။