CIJIJO 20

Ungano yo Cikristu Yakarongeswa Kudini?

RIJANYI

Jehovha ndi Mwari wakarongeka. (1 Vakorinte 14:33) Ngo kudaro, zvinosisira kuti vandhu vake vavevo vakarongeka. Asi ungano yo Cikristu yakarongeswa kudini? Umwe nga umwe anodikana kuitenyi mu ungano?

1. Ndiyani mutungamiriri wo ungano?

‘Kristu ndiyena musoro wo ungano.’ (Vaefeso 5:23) Jesu anotungamirira basa ro vandhu va Jehovha mu nyika yese naari kudenga. Iyena wakagaja “muranda wakagondeka no wakangwara.” Cikwata cidoko co vanarume vanouzivi, ivona vanodanijwazve kuti Mukhumbi Unotonga. (Verenganyi Mateu 24:45-47.) Kareko, vapostori no vakuru vo ku Jerusarema ndivona vaipekeja ndhungamiriro ku ungano jese pa mukuvo wondhowo. (Mabasa o Vapostori 15:2) Mukufananavo, nyamasi uno Mukhumbi Unotonga unopa ndhungamiriro ku ungano jo munyika yese. Asi vanarume ava, asipi vatungamiriri vo sangano redu. Ivona vanojija Bhaibheri kuti vazive zvinoda Jehovha kuti vaite, vecitevejera Jesu mutungamiriri wavo.

2. Vakuru mbhani, vanoita basa renyi?

Vakuru i vanarume vo Cikristu vano uzivi, vanoshandisa Bhaibheri kuti vajijise vandhu va Mwari. Ivonazve vakanasiririka kuti vabesere no kuvangisa vashandiri vamweni va Jehovha. Avapocehwi ngo kuita basa iri. Ivona vanoshandira ‘Mwari ngo mwoyo wese, vacikaiti ngo kuvangirijwa. Vacikazviita ngo kuda kuwana ciro.’ (1 Pedhru 5:1, 2) Vakuru vanobesehwavo ngo vabeseri vo ungano, pakufamba ko nguva, vabeseri ava vanozokwanirisavo zvinodiwa kuti vashande inga vakuru vo ungano.

Mukhumbi Unotonga unogaja vakuru vamweni vo ungano kuti vashande inga vavonereri vo ndharaundha. Vanarume ava vanovhizitari ungano jakawanda kuti vape ndhungamiriro no kuvangisa hama. Ivona vanogaja vabeseri vo ungano no vakuru vo ungano vecisota zvinonangwa mu Soko ra Mwari Bhaibheri.—1 Timoti 3:1-10, 12; Tito 1:5-9.

3. Ngowapi mutoro uno Zvapupu zvese?

Vandhu vese mu ungano vanodikana ‘kusimba zina ra Jehovha,’ ngo kudavira pa musongano no kwenda kocumaera masoko akanaka mukuzwirana no mugariro wavo.—Verenganyi Nduyo 148:12, 13.

NASANYI KUPSAKISISA

Vonanyi kuti Jesu mutungamiriri wakadini, perapo vakuru vangatevejeresa kudini muezaniso wake. Vonanyizve kuti tingaitisa kudini kuti tizwire Jesu no kubesera vakuru.

4. Jesu ndiyena mutungamiriri wakanaka

Jesu wakatikoka ngo rudo hwese. Verenganyi Mateu 11:28-30, perapo bhuisananyi ngo muvhunjo jinotevera:

Jesu ndi mutungamiriri wakadini? Iyena anoda kuti tijizwe kudini?

Vakuru vanotevejeresa kudini muezaniso wa Jesu? Rijanyi VHIDHIYO.

VHIDHIYO: Vakuru Vakabesera Pasure po Mudhuma ngo Pasi ku Napari (4:56)

Bhaibheri rinonanga kuti vakuru vanodikana kuitisa kudini basa ravo.

Verenganyi Isaia 32:2 na 1 Pedhru 5:1-3, perapo bhuisananyi ngo muvhunjo jinotevera:

Munojizwa kudini ngo kuziva kuti vakuru vari kuvangisira kuti vave vakanaka inga ndi Jesu?
Vakuru vangatevejera Jesu ngo njira japi?

5. Vakuru vanoita mukuzwirana no zvavanojijisa

Jesu anoda kuti vakuru vavone kudini basa ravanoita? Rijanyi VHIDHIYO.

VHIDHIYO: Vakuru Vanoita Basa Rokutungamirira! (7:39)

Jesu wakapa ndhungamiriro vaya vanovonerera ungano. Verenganyi Mateu 23:8-12, perapo bhuisananyi ngo muvhunjo jinotevera:

Vakuru vanotevejeresa kudini zvinonangwa mu Bhaibheri? Munorangarira kuti vatungamiriri vo zviara vanoita izvi?

Vakuru vanovangisa ushamwari hwavo na Jehovha no kubesera mbhuri javo kuti jiitevo kudaro
Vakuru vanotaja vandhu vese mu ungano
Vakuru vanocumaera masoko akanaka nguva jese
Vakuru vanojijisa soko ra Mwari. Ivonazve vanobesera pakuita rimpeza pa Nyumba yo Umambo no kuita mabasa amweni

6. Tese tingabesera vakuru

Bhaibheri rinotipa thangwe rinoita kuti tibesere vakuru. Verenganyi Vahebheru 13:17, perapo bhuisananyi ngo muvhunjo jinotevera:

Ngenyi Bhaibheri rinonanga kuti tinodikana kuzwira vakuru ngo mwoyo wese? Imwimwi munorangariravo kudini?

Verenganyi Ruka 16:10, perapo bhuisananyi ngo muvhunjo unotevera:

Ngenyi tinodikana kuzwira vakuru pikija pa zviro zvidoko?

VANDHU VAMWENI VANOTI: “Audikani kuita divi ro ciara ciri cese kuti unamate Mwari.”

Ngenyi tinodikana kunamata Jehovha takabatana pamwepo no vamweni vanomushandira?

ZVOTAJIJA

Jesu ndiyena mutungamiriri wo ungano. Vakuru vanoteveja ndhungamiriro jake. Itusu tinodakara maningi ngo kubesera vakuru ngokuti ivona vakanaka i vanotijijisa ngo muezaniso wavo wo vanotipa.