YOOSOMA 20

Muloko wa ekristu oneetta moota heeni?

PLAY

Yehova Muluku oorehereya. (1 Akorinto 14:33) Mene, tiyeeyo enweeriha weera atthu awe ekhaleke hiiho. Vano muloko orehereñye moota heeni? Ni mutthu ori poothe onkhavihera moota heeni?

1. Taani onhoolela muloko?

‘Kristu tho oraiye muru wa muloko.’ (Aefeso 5:23) Areene wiirimu, Yesu onnawera olonttesa miteko sa arumeyi a Yehova a elapo yootheene. Owo oomuthanla “kaporo oororomeleya ni a miruku”—egrupu ya alopwana vakhaaneene ookumanano itthu sintxipale, nave yaawo aneeriwa Mukuttula Woolamulela. (Mmusome Matheyo 24:45-47.) Muttuli aarummwa ni asitokweene a mmulokoni yannivaha miruku miloko ehuhu ele. Emoha-moharu olelo va, Mukuttula Woolamulela onnavaha miruku miloko sootheene sa elapo ya vathi. (Miteko 15:2) Mene alopwana awo khohiyono weera tanlamulela mareherero ahu. Awo ammusoma Biblya weera esuwele etthu Yehova ontthunaawe weera apake ni annatthara ohoolela wa Yesu.

2. Asitokweene a mmulokoni taani ni eheeni ampakaaya?

Asitokweene a mmulokoni alopwana makristu yaawo aninvarihela muteko Biblya weera exuttihe muloko wa Muluku. Awo-tho, enniivaherera weera yaakhavihere ni waalipiha ale eninvarela muteko Yehova. Awo khenaakhela, opwaha mwa yeeyo, awo ennavara “ni murima worera, ntoko muluku ontthunaiye; kahiyene niwoko na milili sowuliha muru, hoye, mene motthunani mwanyu”. (1 Pedru 5:1, 2) Asitokweene a mmulokoni annakhaviheriwa ni arumeyi oorumeela, moovira ehuhu, awo yakwanihera ele Biblya onhimaawe pooti okhala asitokweene a mmulokoni.

Mukuttula Woolamulela onnaathanla asitokweene akina a mmulokoni, weera ekhale asitokweene a esirikwiitu. Asinna awo annaxekura miloko weera evaheke miruku ni waalipiha asinna. Asitokweene a esirikwiitu annavarela muteko miruku sa mBiblyani weera emuthanle munna omphwanelela okhala murumeyi oorumeela naari mutokweene a mmulokoni.—1 Timotheyo 3:1-10, 12; Tito 1:5-9.

3. Miritti heeni okhalannaawe yoole ori Namoona a Yehova?

Ootheene mmulokoni ‘annattottopela nsina na Yehova’ erowelaka mithukumano ni olaleya mitthenka sooreera moovarihana ni mikhalelo saya.—Musome Nsalmu 148:12, 13.

WEERA MUXUTTERE SINTXIPALE

Moone moota heeni Yesu oraaweno, ntakihero nooreera ni moota heeni asitokweene a mmulokoni aneereraaya etakihe ntakihero nawe. Moone-tho, moota nneeraahu nimwiiweleleke Yesu ni waakha- vihera asitokweene.

4. Yesu namahoolela ooreera murima

Yesu oonipakela nwopelo mwa nsivelo. Mmusome Matheyo 11:28-30, avinyaka mutthekule ni epontu enttharelana:

Yesu namahoolela a moota heeni? Ni owo ontthuna weera hiyo niisooneke hayi?

Moota heeni asitokweene a mmulokoni emmutakihaaya Yesu? Moone EVIIDIYU.

EVIIDIYU: Asitokweene a mmulokoni moowiivaherera annakhavihera asinna evirakaru epheyo oNepal (4:56)

Biblya onnahima moowiiwanyeya moota asitokweene a mmulokoni eneeraaya evareke muteko aya.

Mmusome Yesaya 32:2 ni 1 Pedru 5:1-3, ni avinyaka mutthekule ni ipontu sinttharelana:

Nyuwo munoonela hayi vaavo munoonaanyu wiilipihera wa asitokweene a mmulokoni emutakihaka Yesu weera ekhale ooreera murima?
Moota heeni tho asitokweene a mmulokoni aneeraaya emutakihe Yesu?

5. Asitokweene a mmulokoni annaxuttiha evahaka ntakihero

Moota heeni Yesu ontthunaawe weera asitokweene a mmulokoni yooneleke muteko anvaraaya? Moone EVIIDIYU.

EVIIDIYU: Asitokweene anhoolela mmulokoni (7:39)

Yesu oohavaha ntakihero ale anhoolela mmulokoni. Mmusome Matheyo 23:8-12, avinyaka mutthekule ni epontu enttharelana:

Biblya onhima heeni sa moota asitokweene a mmulokoni eneeraaya yiisooneke? Nyuwo munoona weera ahooleli a ittiini annipaka eyo?

Asitokweene a mmulokoni annalipiha onthamwene aya ni Yehova annikhavihera imusi opaka etthu emoharu
Asitokweene a mmulokoni annaathokorora atthu ootheene a mmulokoni
Asitokweene a mmulokoni khantxompela olaleera
Asitokweene a mmulokoni annaxuttiha masu a Muluku. Awo-tho, annakhavihera oreherera Empa ya Omwene ni miteko mikina

6. Naakhavihereke asitokweene a mmulokoni

Biblya onnanivaha miruku sootthuneya sa moota woowaakhavihera asitokweene a mmulokoni. Mmusome Aheberi 13:17, avinyaka mutthekule ni epontu enttharelana:

Mwaha wa heeni Biblya onhimaawe weera niwiiweleleke asitokweene ni murima wootheene? Nyuwo munoonela hayi eyo?

Mmusome Luka 16:10, avinyaka mutthekule ni epontu enttharelana:

Mwaha wa heeni nintthuneyaahu owiiwelela asitokweene naamwi nihoonaka mwaha owo okhala wootthuneya?

ATTHU AKINA ANEERA: “Nyuwo khontthuneya okhalano ettiini weera mmukokhorele Muluku.”

Mwaha wa heeni munoonaanyu weera tiwootthuneya omukokhorela Muluku ni atthu aninvarela muteko yoowo?

NYAHA SOOTTHUNEYA

Yesu muhooleli a muloko, ni asitokweene a mmulokoni annatthara miruku sawe. Ninnahakalala naakhaviheraka asitokweene a mmulokoni, mwaha wooweera awo tooreera murima annanixuttiha ni matakihero anvahaaya.