LEKSIYON 21
Paano Ibinabalangibog an Maugmang Bareta?
Paagi sa saiyang Kahadian, madali nang tapuson ni Jehova an gabos tang problema. Marahayon nanggad an baretang iyan, kaya dapat maaraman iyan nin mga tawo. Gusto ni Jesus na ipaabot iyan kan saiyang mga parasunod sa gabos na tawo! (Mateo 28:19, 20) Paano inuutob kan mga Saksi ni Jehova an sugong iyan ni Jesus?
1. Paano nauutob ngunyan an Mateo 24:14?
Ihinula ni Jesus: “An maugmang baretang ini kan Kahadian ihuhulit sa bilog na kinaban.” (Mateo 24:14) Maugmang inuutob kan mga Saksi ni Jehova an gibuhon na iyan. Ibinabalangibog mi an maugmang bareta sa bilog na kinaban sa labing 1,000 lengguwahe! Kaipuhan nanggad nin dakulang paghihinguwa asin mahusay na pag-organisar para sa dakulaon na gibuhon na ini. Dai iyan magigibo kun mayo an tabang ni Jehova.
2. Ano an ginigibo ming paghihinguwa para mahulitan an mga tawo?
Naghuhulit kami sain man may tawo. Arog kan mga Kristiyano kan inot na siglo, naghuhulit kami “sa harong-harong.” (Gibo 5:42) Huli sa sistematikong paaging iyan nin paghuhulit, nakakaulay mi an milyon-milyon na tawo kada taon. Huling dai man pirming nasa harong an mga tawo, naghuhulit man kami sa pampublikong mga lugar. Pirmi kaming naghahanap nin mga oportunidad para sabihon sa iba an manungod ki Jehova asin an saiyang mga katuyuhan.
3. Siisay an may responsabilidad na maghulit kan maugmang bareta?
Responsabilidad kan gabos na tunay na Kristiyano na sabihon sa iba an maugmang bareta. Sineseryoso mi an responsabilidad na iyan. Ginigibo mi an samong pinakamakakaya para maghulit sa iba huling buhay an nakataya. (Basahon an 1 Timoteo 4:16.) Mayo kaming suweldo digdi, huling sinasabi kan Bibliya: “Inako nindong daing bayad, itao nindong daing bayad.” (Mateo 10:7, 8) Bako gabos na hinuhulitan mi nag-aako kan samong mensahe. Pero padagos lang kami sa paghulit huling parte ini kan samong pagsamba asin napapaugma kaiyan si Jehova.
ARAMON PA
Aramon pa an ginigibong paghihinguwa kan mga Saksi ni Jehova para makapaghulit sa bilog na kinaban asin kun paano kami tinatabangan ni Jehova.
Paghuhulit sa bilog na kinaban: (A) Costa Rica, (B) Estados Unidos, (C) Benin, (D) Thailand, (E) Yap, (F) Sweden
4. Hinihinguwa ming mahulitan an gabos na tawo
Naghihinguwang marhay an mga Saksi ni Jehova tanganing maihulit an maugmang bareta sa mga tawo sain man na lugar. I-play an VIDEO, dangan pag-ulayan an hapot na ini:
-
Ano an hinahangaan mo sa paghihinguwa kan mga Saksi ni Jehova sa saindang paghuhulit?
Basahon an Mateo 22:39 asin Roma 10:13-15, dangan pag-ulayan an mga hapot na ini:
-
Paano pinapatunayan kan samong ministeryo na namumutan mi an samong kapwa?
-
Ano an paghiling ni Jehova sa mga naghuhulit kan maugmang bareta?—Hilingon an bersikulo 15.
5. Mga kapwa trabahador kami nin Diyos
Dakul na eksperyensiya an nagpapatunay na ginigiyahan ni Jehova an gibuhon mi. Halimbawa, sarong hapon sa New Zealand, mantang naghaharong-harong an brother na si Paul, naabutan niya an sarong babayi. Kan aga kan mismong aldaw na idto, namibi an babayi na inaapod an pangaran kan Diyos. Namibi siya na lugod may magbisita saiya para tabangan siyang mas mamidbid an Diyos. “Pakalihis nin tulong oras,” an sabi ni Paul, “yaon na ako sa may pinto.”
Basahon an 1 Corinto 3:9, dangan pag-ulayan an hapot na ini:
-
Paano pinapatunayan kan mga eksperyensiya, arog kan nangyaring iyan sa New Zealand, na ginigiyahan ni Jehova an paghuhulit?
Basahon an Gibo 1:8, dangan pag-ulayan an hapot na ini:
-
Taano ta kaipuhan ta an tabang ni Jehova sa ministeryo?
Aram mo daw?
Kada semana sa samuyang midweek na pagtiripon, nag-aako kami nin mga pagsasanay na nakakatabang sa samo sa paghuhulit. Kun nakaatender ka na sa arog kaiyan na pagtiripon, ano an masasabi mo sa ginigibong pagsasanay diyan?
6. Sinusunod mi an pagbuot nin Diyos na maghulit
Kan inot na siglo, hininguwa kan mga nagkokontra na papunduhon sa paghuhulit an mga parasunod ni Jesus. Hininguwa kan inot na mga Kristiyano na “makua an legal na deretso para ihulit [an maugmang bareta].” (Filipos 1:7) Arog man kaiyan an ginigibo kan mga Saksi ni Jehova ngunyan. a
Basahon an Gibo 5:27-42, dangan pag-ulayan an hapot na ini:
-
Taano ta dai kita mapundo sa paghuhulit?—Hilingon an bersikulo 29, 38, asin 39.
TIBAAD MAY MAGHAPOT: “Taano ta naghaharong-harong an mga Saksi?”
-
Ano an isisimbag mo?
SUMARYO
Sinugo ni Jesus an saiyang mga parasunod na ihulit an maugmang bareta sa gabos na nasyon. Tinatabangan ni Jehova an saiyang mga lingkod na magibo iyan.
Rebyu
-
Paano naihuhulit an maugmang bareta sa bilog na kinaban?
-
Paano ipinapahiling kan samong ministeryo na namumutan mi an samong kapwa?
-
Sa hiling mo, maugma daw na maghulit? Taano ta nasabi mo iyan?
HILINGON MAN
Aramon kun paano naghuhulit an mga Saksi ni Jehova sa darakulang siyudad.
Ano an ginigibo kan mga Saksi ni Jehova para tabangan an mga refugee?
Pagpanigo sa Espirituwal na Pagkagutom kan mga Refugee (5:59)
Dangugon an sinabi kan sarong full-time na ministro kun gurano siya kaugma sa gibuhon na paghuhulit.
Aramon an pira sa mahalagang mga desisyon kan korte na nakatabang tanganing mas mapadali an paghuhulit kan maugmang bareta.
a An Diyos an nagtao sa samo nin awtoridad na maghulit. Kaya, dai kaipuhan kan mga Saksi ni Jehova an permiso kan gobyerno para ihulit an maugmang bareta.
Puwede Mo Man Magustuhan
PARATING MGA IHINAHAPOT
Ano an Pag-adal sa Bibliya na Iinaalok kan mga Saksi ni Jehova?
Sa interactive na programa nin pag-adal na iinaalok kan mga Saksi ni Jehova, puwede mong gamiton an arin man na traduksiyon nin Bibliya. Dai mag-alangan na imbitaran an saimong bilog na pamilya o an siisay man sa mga amigo mo na umiba saimo.
