Dyììn ɖé ɔ Kã́á-ɓòɖòɔ̀ múɛɛ, Jɛhova mu à fũ̀à-fṹá-ɖɛ̀ séín ɓèɔ̀ dyi ziìn kàùn. Bɔ̃̀ nìà kɛ zi dyíin nɔ̀mɔ̀ùn mìɔ jèɛɛ, nyɔ séín ɓéɖé ɓɛ́ wa kéɛ wɔ̃́. Jízɛ̀ mɔ́ ɓɛ́ ɔ ɖeín-sí-nyɔ̀ ɓèɔ̀ ké ma bɔ̃̀ nìà kɛ nyɔ séín gbo cɛ̃! (Máfíò 28:19, 20) Xwɛ̀ Jɛhova Zàse ɓè nì ɖɛ ɓɛ́ Jízɛ̀ cɛ̃ ma kà kɛɛ nyuɛń nyɛ́?

1. Xwɛ̀ Máfíò 24:14 nì jàà kpáuń zɛ̃̀ɛ̀ kɛ́?

Jízɛ̀ cɛ̃ɛ ma, ké ɔ ɖá: “Wa mu bɔ̃̀ nɔ̀mɔ̀ dyíin ɓá Geɖepɔɔ Kã́á-ɓòɖòɔ̀ jè dyíɛɛ zio mú pòìn ɖé ɓóɖó-kpàà dà séín.” (Máfíò 24:14) Jɛhova Zàse ɓè kpá múàùn ɓó kũ̀à kpa ɖɛ nìà kɛɛ ɖò nyu jè. À nì bɔ̃̀ nɔ̀mɔ̀ dyíinɔ̀ wáɖáuń ɖé ɓóɖó-kpàà dà séín ɖé wuɖu-dù 1,000 zi kɔ̃ ɓè mú! Kũ̀à vɛ̀nɛ̀ nìà kɛ nyu-nyu ɖú dúún-ku-ku kè ɖɛ-paún-po-po dyí cá. Ɔ seɔ́ kpáa mu ɔ jù ké Jɛhova seɔ́ à gbo kpáín.

2. Ðɛ́ mɔ̀ dúún-ku-ku ɔ ɖú dyí ɓɛ́ à ké nyɔ ɓè Geɖepɔɔ-wùɖùɔ̀ gbo wáɖá kɛ́?

À wáɖá Geɖepɔɔ-wùɖùɔ̀ dà séín à ɓɛ́ìn nyɔ ɓè dyéɛ kɛ. Kà Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛɛ nyu ma Geɖepɔɔ-wùɖùɔ̀ wáɖáa kɛɛ, kàà à wáɖáa ɖé nyɔ ɓè “ɓíɖí-taún” ɖekè. (Àpɔ́sò 5:42) Sɛ́ɖɛ́ nɔ̀mɔ̀ dyíin nìà kɛ nyuɛ ɓɛ́ à ké nyɔ méɔ̀ùn ɓè gbo wùɖù ɖé zɔ̃ séín xwíníín. Sepoɛɖe nyɔ ɓè ní nì wa ɓíɖí-taún ti séín jèɛɛ, à wáɖá Geɖepɔɔ-wùɖùɔ̀ dɛ̀ nyɔ pàɖà ɓè nì kɛ. À mɔ́ hwìè ɓè dyi ti séín, ɓɛ́ à ké Jɛhova kè ɔ mɔ́ɔ́-ɖɛ̀ ɓèɔ̀ jè nyɔ tɔ̀ɔ̀ ɓè gbo cɛ̃.

3. Nyɛ́ kɔ̃̀ ɔ ké bɔ̃̀ nɔ̀mɔ̀ dyíinɔ̀ wáɖá kɛ́?

Jàà Kɛ́ɖɛ́ì ɖeín-sí-nyɔ̀ séín ɓè kɔ̃̀ wa ké bɔ̃̀ nɔ̀mɔ̀ dyíinɔ̀ nyɔ tɔ̀ɔ̀ ɓè gbo cɛ̃. Kũ̀à nìà kɛ nyu jè kpa ɖɛ mìɔ ɖé à gbo. À vɔ̃ ɖé à kpé séín mú ɓɛ́ à ké wuɖu nìà kɛ wáɖá, sepoɛɖe à dyuòɛ̀ dyí kà ɔ ɓɛ́ìn nyɔ ɓè póɛ̀n nyɛ. (Zà 1 Tímétè 4:16 wuɖuún.) Wa ní pɛ́ɛ̀ à ɓó kũ̀à nìà kɛ nyu jè, sepoɛɖe Baɓoɔ ɖá: “Ḿ nyí ɓè kpé, ɓɛ́ ɓè ké ɖɛ ɓèɛ̀ nyu. Ɔ jèɛɛ, ɓè mɛ nyuɛ pídyi.” (Máfíò 10:7, 8) Nyɔ ɖíɛ́ ɓè se bɔ̃̀ nɔ̀mɔ̀ dyíin à wáɖáà kɛɛ ɖùù gbo tòɛ̀ mɔ́. Kɛɛ à ku dúún kánáá pu, sepoɛɖe Geɖepɔɔ-wùɖù-wáɖá-wáɖáɔ̀ mɔ̀ à ɓiè-ɓièɔ̀ wáká ɖò, ké ɔ po Jɛhova múàùn.

 ÐE ÐƐ MÚIN CÁ

4. À vɔ̃ kóɖó-kóɖó, ɓɛ́ à ké nyɔ séín gbo wùɖù

6. À nyu Geɖepɔɔ wuɖu dyììn ɖé ɔ wuɖuɔ̀ wáɖá-wáɖá mú

Ðé Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛ nììn tiín nyɛɛ, nyɔ̀ ɓè vɔ̃ ma ɓɛ́ wa ké ma Jízɛ̀ɛ̀ ɖeín-nà-nyɔ̀ ɓèɛ̀ Geɖepɔɔ-wùɖù-wáɖá-kũ̀àɔ̀ ɓɔ́í po. Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛɛ nyànà ma dyi gãun-gãun ɓó Geɖepɔɔ-wùɖùɔ̀ wáɖá jè, ké wa ‘zaìn ma bɔ̃̀ nɔ̀mɔ̀ dyíinɔ̀ jè kɔ̃in, ké wa kùìn ma ɔ dyi’ ɖé gɔ̀mànà wáká kɔ̃. (Fèɖópĩ̀ɔ̀ 1:7) Jɛhova Zàse ɓe nyu ɖɛ dyúáɖòɔ̀ zɛ̃̀ɛ̀. a

 SṸÌN-XWÍNÍÍN

Jízɛ̀ cɛ̃ɛ ma ɔ ɖeín-nà-nyɔ̀ ɓèɔ̀ gbo, ɓɛ́ wa ké bɔ̃̀ nɔ̀mɔ̀ dyíinɔ̀ kpa ɖé ɓóɖó-dù séín gbo. Jɛhova nì ɔ nyɔ ɓèɔ̀ gbo kpáuń, ɓɛ́ wa ké kũ̀à nìà kɛ nyu.

Ðɛ-kɔ̃in-kpa-kpa

• Xwɛ̀ wa nyu bɔ̃̀ nɔ̀mɔ̀ dyíinɔ̀ cɛ̃ɛ ɖé ɓóɖó-kpàà dà séín nyɛ́?

• Xwɛ̀ à Geɖepɔɔ-wùɖù-wáɖá-kũ̀àɔ̀ nyuɛ tɛ̀mɛ̀ìn kà à ɖɛ̀ɓɛ̀ à mùè ɓè múɛ́?

• Nì hwòɖò ɖá Geɖepɔɔ-wùɖù-wáɖá-wáɖáɔ̀ mɔ̀ kũ̀à ɖò ɓɛ́ ɔ dè à hwòɖò dyiɛɛ̀? Xwíníínɔ̀ nyɛ́ kɔ̃̀ jèɛ́?