LISON 21

Koumanniè bon nouvèl-la préché ?

KOUTÉ AN

Talè, Jéova kèy sèvi wayòm-li pou rézoud tout pwoblèm-nou. Mésié, sa sé an bon nouvèl ! Nou pé pa gadé’y ba nou ! Jézi mandé sé disip-li a partajé nouvèl-tala épi tout moun (Matié 28:19, 20). Ki manniè Témwen Jéova ka obéyi koumandman-tala ?

1. Ki manniè Matié 24:14 ka réyalizé jòdi-a ?

Jézi té anonsé : « Bon nouvèl Wayòm-lan, yo kèy préché’y toupatou anlè latè » (Matié 24:14). Sé Témwen Jéova-a bien kontan pran pa adan aktivité enpòwtan-tala. Nou ka préché bon nouvèl-la toupatou anlè latè an plis ki 1 000 lang ! Bidim travay-tala ka mandé anpil éfò épi òwganizasion. Men, si sa posib, sé pas Jéova ka endé nou.

2. Ki éfò nou ka fè pou préché ?

Nou ka préché tout koté ni moun. Kon sé krétjen 1^ié sièk-la té ka fè, nou ka préché « kay-an-kay » (Akt 5:42). Sé pas nou ka sèvi métòd-tala, nou ka rivé jwenn milion moun chak lanné. Kon sé moun-lan pa toujou lakay-yo, nou ka préché osi koté ki ni plas piblik. Nou toujou ka chèché an lòkazion palé di Jéova épi di pwojé’y.

3. Ki moun ki pou préché bon nouvèl-la ?

Tout vré krétjen ni rèsponsabilité fè konnèt bon nouvèl-la. Ba nou, sé an rèsponsabilité ki enpòwtan menm. Nou ka préché tout tan nou pé, pas nou sav sa pé sové lavi moun (li 1 Timoté 4:16). Nou pa ka risivwè piès lajan pou préché, pas Labib ka di : « Yo ba zòt pou ayen, zòt pou ba pou ayen » (Matié 10:7, 8). Sé pa tout moun ki ka kouté, men nou ka kontinié préché pas nou sav, lè nou ka fè sa, sa ka fè pati di ladorasion-nou épi nou ka ba Jéova tjè kontan.

ANNOU PLI LWEN

Annou wè éfò Témwen Jéova ka fè pou préché dan lèmonn antié. Annou wè tou ki manniè Jéova ka endé nou.

Prédikasion adan monn-lan : A) Kòsta Rika, B) Zétazini, C) Bénen, D) Taylann, E) Yap, F) Swèd.

4. Nou ka fè tousa nou pé pou préché ba tout moun

Sé Témwen Jéova-a ka fè anpil éfò pou préché bon nouvèl-la ba tout moun. Gadé VIDÉWO-a épi diskité kèsion-an ka vini an.

VIDÉWO : Yo ka préché « koté-a ki pli lwen anlè latè » (7:33)

Kisa ka kité’w abazoudi adan tout éfò Témwen Jéova ka fè pou préché ?

Li Matié 22:39 épi Women 10:13-15, épi diskité sé kèsion-tala :

Ki manniè prédikasion-nou ka montré nou enmen lézòt ?
Ki manniè Jéova ka wè sé moun-lan ki ka préché bon nouvèl-la ? (gadé vèsé 15-lan).

5. Nou ka travay kantékant épi Bondié

Ni anpil témwayaj ki ka montré sé Jéova ki ka mennen aktivité-nou an. Annou pran an èkzanp. Pa koté Nouvèl-Zélann, frè-nou Pòl té ka alé kay-an-kay, épi, an aprémidi i jwenn an madanm. Mi-anvwala, bonmaten-an menm, madanm-tala té fini prédié Bondié épi non’y, Jéova. I té prédié pou an moun vini wè’y. Pòl di konsa « twazèdtan apré, man té ka kwenyen lapòt-li. »

Li 1 Korentjen 3:9 épi diskité kèsion-tala :

Ki manniè témwayaj, kon ta frè-nou pa koté Nouvèl-Zélann, ka montré sé Jéova ki ka dirijé travay prédikasion-an ?

Li Akt 1:8 épi diskité kèsion-tala :

Poutji nou bizwen Jéova endé nou pou fè travay-tala ?

Ès ou té sav sa ?

Adan réyinion lasimenn-lan, nou ka risivrè an fòwmasion pou préché. Si ou ja vini adan sé réyinion-tala, kisa ou ka pansé di fòwmasion-tala ?

6. Nou ka kouté lòd-la Bondié ba nou

O 1^ié sièk, té ni moun ki té lé anpéché sé disip Jézi-a préché. Kidonk, sé krétjen-an défann dwa-yo di préché lè yo « défann bon nouvèl-la épi fè’y rikonnèt douvan lajistis » (Filipien 1:7). Sé Témwen Jéova-a ka fè menm bagay-la jòdi a.

Gadé VIDÉWO-a.