EHONGWA 21
Omomuano uṋe ombuze ombwa mu i zuvarisiwa?
Okupitira mOuhona we, Jehova ma isa po omauzeu wetu ayehe moruveze rwatjimanga. Indjo ombuze ombwa nu ovandu avehe mave hepa okuizuva. Jesus aa vanga kutja ovemukongorere ve zuvarise ombuze ndji kovandu avehe. (Mateus 28:19, 20) Omomuano uṋe Ovahongonone va Jehova mu ve ṱakamisa erakiza ra Jesus?
1. Omomuano uṋe Mateus 24:14 mu ri yenenisiwa ndino?
Jesus wa hunganeka kutja: “Ombuze Ombwa yOuhona mai zuvarisiwa mouye auhe.” (Mateus 24:14) Ovahongonone va Jehova ve tjaterwa okukara norupa motjiungura otjinanḓengu hi. Eṱe tu zuvarisa ombuze ombwa mouye auhe momaraka wokombanda 1 000. Otjiungura otjinene hi tji hepa ozongondjero, nu otjo kamaatji ungurwa nokuhinombatero ya Jehova.
2. Ozongondjero zeṋe nḓu tu tjita okuzuvarisa ku varwe?
Tu zuvarisa apehe pu twa munu ovandu. Tjimuna Ovakriste veserewondo etenga, eṱe tu zuvarisa “mozondjuwo zovandu.” (Oviungura 5:42) Omuano wokuzuvarisa mbwi, u tjita kutja tu hungire ku novandu ovengi ombura aihe. Mena rokutja ovandu potuingi kave kara pozoyawo, eṱe wina tu zuvarisa potuveze pu pe novandu. Eṱe aruhe tu paha omiano vyokuraera varwe ohunga na Jehova nozondando ze.
3. Ouṋe ngu nomerizirira wokuzuvarisa ombuze ombwa?
Ovakriste avehe vatjiri ve nomerizirira wokuzuvarisa ombuze ombwa ku varwe. Eṱe tu vara omerizirira nga otjotjiṋa otjinanḓengu tjinene. Eṱe tu zuvarisa otja pu matu yenene, mena rokutja tu tjiwa kutja otjiungura tjetu hi matji yenene okuyama omiinyo vyovandu. (Lesa 1 Timoteus 4:16.) Eṱe katu sutwa okuungura otjiungura hi, orondu Ombeibela i tja: “Eṋe mwa pewa uriri, nopu mwa sokuyandja uriri wina.” (Mateus 10:7, 8) Kavandu avehe mbe yakura ombuze yetu. Posi ya eṱe tu kayenda komurungu okuzuvarisa, mena rokutja mokutjita nao tu kara nonḓuviro ku Jehova nu tu yorokisa omutima we.
KONḒONONA OUKOTO
Rihonga ovingi ohunga nozongondjero zOvahongonone va Jehova zokuzuvarisa mouye auhe, nokutja omomuano uṋe Jehova me ve vatera.
Okuzuvarisa mouye auhe: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Eṱe tu ungura oukukutu okuhakaena ku novandu avehe
Ovahongonone va Jehova ve tjita ozongondjero zapeke okuzuvarisa ombuze ombwa kovandu ngamwa akuhe. Nyanda OKAVIDIO, nu okuzambo hungirira kepuriro ndi mari kongorere mba.
-
Otjikwaye tji tji ku tjatera ohunga nozongondjero Ovahongonone va Jehova nḓu ve tjita okuzuvarisa?
Lesa Mateus 22:39 nOvaroma 10:13-15, nu u hungirire komapuriro nga:
-
Omomuano uṋe otjiungura tjetu tjokuzuvarisa mu tji raisa kutja twa suvera ovandu varwe?
-
Jehova u fula vi ohunga na imba mbe zuvarisa ombuze ombwa?—Tara kezeva 15.
5. Oweṱe ovaungure vapamwe na Mukuru
Omahungi omengi wovitjitwa ye raisa kutja, Jehova u hongorera po otjiungura tjetu. Otjotjihorera, moNew Zealand omurumendu omukambure wena Paul, wa hakaena ku nomukazendu indu tjaa zuvarisa okuza kondjuwo nondjuwo momahatenya. Omuhuka omunene mbwo, omukazendu wa kumba ku Mukuru, ama ungurisa ena re Jehova, nu wa ningira kutja pe ye omundu ngu me yekumuvarura. Paul wa tja: “Kombunda yozoiri ndatu ami mba ya koye.”
Lesa 1 Ovakorinte 3:9, nu okuzambo hungirira kepuriro ndi:
-
Omomuano uṋe otjihorera tjimuna ihi otja New Zealand mu tji raisa kutja Jehova u hongorera po otjiungura tjokuzuvarisa?
Lesa Oviungura 1:8, nu okuzambo hungirira kepuriro ndi:
-
Omena raye tji tu hepa ombatero ya Jehova okuyenenisa otjiungura tjokuzuvarisa?
Hapo ove oo tjiwa?
Otjivike atjihe pozombongarero zetu zomokati kotjivike tu hongwa omuano wokuzuvarisa. Ndoovazu ove wa rora okukara pozombongarero nḓa, hapo ove u noumune uṋe ohunga nomahongero ngu tu pewa?
6. Eṱe tu kara nonḓuviro kerakiza ra Mukuru rokuzuvarisa
Meserewondo etenga ovapirukire va kondja okutjaera ovahongewa va Jesus, kutja ave ha zuvarisa. Ovakriste voruveze orukuru aave rwire ousemba wawo wokuzuvarisa ombuze ombwa ‘mokuiyeura mombanguriro.’ (Ovafilipi 1:7) Ovahongonone va Jehova ve tjita nao ndino wina. a
Lesa Oviungura 5:27-42, nu okuzambo hungirira kepuriro ndi:
-
Omena raye tji tu hi nokuisa okuzuvarisa?—Tara kezeva 29, 38, 39.
OMUNDU MAPE YA A PURA KUTJA: “Omena raye Ovahongonone va Jehova tji ve zuvarisa okuza kondjuwo nga kondjuwo?”
-
Ove otjo zira vi?
OKUYARUKIRA PO OUSUPI
Jesus wa rakiza ovemukongorere okuzuvarisa ombuze ombwa koviwaṋa avihe. Jehova u vatera ovakarere ve okuungura otjiungura hi.
Okurizemburukisa
-
Ombuze ombwa i zuvarisiwa vi mouye auhe?
-
Otjiungura tjetu tjokuzuvarisa tji raisa vi kutja twa suvera ovandu varwe?
-
Hapo mo munu kutja otjiungura tjokuzuvarisa matji yenene okutuetera ondjoroka? Omena raye?
RIHONGA OVINGI
Tara komuano Ovahongonone va Jehova mu ve zuvarisa kovandu movihuro ovinene.
Ovahongonone va Jehova, va vatera vi ovataure?
Tara kondjoroka omukambure ngwaa ungura oruveze aruhe ndja muna.
Tara kozondyero nḓa tjitwa i yotjombanguriro kutja i rire oupupu okuzuvarisa.
a Mukuru ongwe tu rakiza okuzuvarisa ombuze ombwa. Mena ranao Ovahongonone va Jehova kave hepa ousemba okuza kovahonapare okuzuvarisa ombuze ombwa.
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
