TOLUMỌYE 21

Tebara Ka Kị Ebi Egberi Gbaa Mịnị A O?

FARỊ

Jehovah daabụọ bị alaghatimi kịmịtọbọụ a bụụdọọn mịnị yebosẹ kọn siin mịnị. Bei ebi egberi mị gbaa akị kịmịsẹ pịrịmọ agbẹị emi. Jesus bịsẹ bara kị dọụ wẹrị emi! (Matthew 28:19, 20) Jehovah Iseriotu tebara ka kị bei fịrị wẹnị mịnị a o?

1. Matthew 24:14 gbaa egberi bị tebara ka kị paabein mịnị a o?

Jesus gbaa wẹrị emi: “Bei Daabụọ ebi egberi mị gbaa akị kiriogbosẹ laa mịnị.” (Matthew 24:14) Jehovah Iseriotu bei yelaa fịrị wẹnị mịnị yọmị pọwẹị nana mịnị. Omịnị kiriogbo bọọ 1000 dẹịn emi bẹẹlịama kọọ ebi egberi gbaa mịnị! Bei opu fịrị mị, omịnị angọtụa bá kẹnịsụọmọ kị dọụ wẹrị emi. Jehovah baratụa wó pịrị mịnị duonị laa fịrị wẹnị mịnị.

2. Omịnị tebara ka kị angọtụa egberi gbaa kịmịama pịrị mịnị a o?

Omịnị kịmịotu emi yọbosẹ ka egberigbaa mịnị. Omịnị kpọ bọlọụ Christ tuuduo-otubo mịẹ bara kị mịẹ mịnị, “warị duo mú warị laa” kọọ ebi egberigbaa mịnị. (Acts 5:42) Mị egberigbaa mịnị bara mị, kụraịbosẹ baratụa wó pịrị wẹrị egberigbaa biin kịmị ịpamụama pịrị dẹ. Kịmịotu biin ifieama warị a fa duonị, omịnị kịmịotu biin emi yọama mú egberigbaa mịnị. Omịnị Jehovah emi bara mọ bá omịnị kiriogbo mịẹ paradise paamọ mịnị bara gbaa kịmịotu pịrị mịnị.

3. Tẹ ụbọ kị egberi gbaa fịrị wẹnịmọ agbẹị emi a o?

Gesii bara akị Christtuuduo mịnị kịmịsẹ ebi egberigbaa agbẹị emi. Mị yelaa dẹịn fịrị má kịmịotu zụọbụọmọ mịnị, anị duonị omịnị angọtụa má ifie mịẹ paamọ wẹrị bei ebi egberigbaa mịnị. (1 Timothy 4:16 goo.) Bei fịrị mị omịnị sịlị akịgha, tuubi Bible gbaa mị: “Ị́mịnị sịlị gbẹghatimi nana duonị, ị́ kpọ sịlị akị kụmọ.” (Matthew 10:7, 8) Mị egberigbaa fịrị bị Jehovah mịẹ pọwẹị mịnị, anị duonị kịmịsẹ kị wó gbaa mịnị egberi kẹrị akịgha kpọ omịnị pẹlẹgha fa.

EBIBARA TUUDỌỤ

Jehovah Iseriotu egberigbaa akị akpọyọrẹịsẹ laa mịnị bara mọ má Jehovah, akị baratụa wó pịrị dẹ bara dii.

Preaching around the world: (A) Costa Rica, (B) United States, (C) Benin, (D) Thailand, (E) Yap, (F) Sweden

4. Omịnị angọ tụa wẹrị mú kịmịsẹ kị laa dọụ mịnị

Jehovah Iseriotu angọsẹ ka kị egberigbaa kịmịsẹ pịrị mịnị. VIDIO farị dá, bei biibịbị kẹrị ẹrẹtei.

VIDIO: “Kiriogbo Bọọ Alaadẹịn Yọ” A Mú Egberi Gbaa Mịnị (7:33)

Jehovah Iseriotu angọtụa egberigbaa mịnị yọmị, tebara ka kị iné angọ a sụọ ma o?

Matthew 22:39 má Romans 10:13-15 goo dá, bei biibịbịmọ kẹrị ẹrẹtei:

Egberigbaa fịrị mị tebara ka kị omịnị kịmịotu tarị wẹrị emi bara mịẹdịa mịnị a o?
Jehovah tebara ka kị ebi egberigbaa mịnị kịmịmọ diimọ wẹrị emi a o?—Goo yọ 15 dii.

5. Omịnị Ọkpọnanaowei mọ kị gbelei fịrị wẹnị mịnị

Biin paadẹ yeama mịẹdịa wẹrị emi bara bị Jehovah kị bọlọụ a timi bei fịrị daa mịnị. Gbaa maba, New Zealand bị Paul tịịn mịnị bịnaowei kẹnị ereinbiri, egberigbaatimi mú kẹnị ere laa mị. Pekei ifie mị, erema tẹẹbịbị mịẹ Jehovah pịrịdẹ wẹrị mị. Amịnị Jehovah kịmị fịrịmọ anị warị a bo bara kpọ bii mị. Paul gbaa mị, “tara awa bụọdẹ bị, ịmịnị mú anị warị laa mị.”

Wẹrị 1 Corinthians 3:9 goo dá, bei biibịbị kẹrị ẹrẹtei:

New Zealand bọọ paa yebi tebara ka kị Jehovah kị egberigbaa fịrị daa mịnị bara mịẹdịa ma o?

Acts 1:8 goo dá, bei biibịbị kẹrị ẹrẹtei:

Tetuu kị duonị Jehovah baratụa dẹ kị omịnị laa egberi gbaa mịnị a o?

Ị́ kpọ nimi ma?

Wiki bosẹ omịnị Kingdom hall a mú egberigbaa mụ bara tolumọ mịnị. Ị́ kpọ kẹnị ifie yetolumọyọ mú dẹ? Tolumọyebo ị́ dịsẹ ma?

6. Omịnị Ọkpọnanaowei gbaa bara kị mịẹ mịnị

Bọlọụ Christtuuduo-otumọ bo egberi gbaatimi bị egiren-otu bo fịrị tịẹmọ dọụ mị. “Amịnị daakụrọ olokobo kọn wẹrị egberigbaa fịrị wẹnị bọlọụ a mú mị.” (Philippians 1:7) Jehovah Iseriotumọ kpọ bịsẹ bara kị mịẹ mịnị. a

VIDIO farị.