DAW 21
Kabu Gara Shiga Hpe Gara Hku Hkaw Tsun Ai Kun?
Yehowa gaw shi a mungdan hku nna anhte a manghkang ni yawng hpe kade n na yang yeng seng kau ya na re. Dai shiga gaw grai kaja ai majaw masha yawng chye ra ai. Yesu gaw dai shiga hpe masha yawng na lu hkra, shi hpang hkan ai ni hpe tsun dan shangun mayu ai. (Mahte 28:19, 20) Yesu a hkang da ai ga hpe Yehowa Sakse ni gara hku hkan sa ai kun?
1. Dai ni aten hta Mahte 24:14 gaw gara hku hpring tsup nga ai kun?
Yesu ndai hku tau hkrau tsun da ai: “Dai mungdan a kabu gara shi ga gaw, . . . mungkan ting hta e hkaw dan lu na rai nga ai.” (Mahte 24:14) Yehowa Sakse ni gaw ndai grai ahkyak ai bungli hpe kabu gara let galaw nga ma ai. Kabu gara shiga hpe mungkan ting hta amyu ga 1,000 jan hte hkaw tsun nga ai. Ndai zawn grai kaba ai bungli hpe galaw na matu, shakut shaja ai lam hte atsawm hpawng de da ai uhpung ra ai. Yehowa a karum shingtau lam n nga yang, galaw lu na n re.
2. Masha ni hpe hkaw tsun na matu gara hku shakut shaja ai kun?
Masha ni hpe mu lu ai shara shagu hta hkaw tsun ai. Tsa ban langai na Hkristan ni zawn, “nta hkan e mung” hkaw tsun ai. (Kasa 5:42) Ndai zawn grai kaja ai ladat a majaw, shaning shagu wan hku law ai masha ni hpe hkaw tsun lu ai. Masha ni gaw aten shagu nta kaw n nga ai majaw, shawa hpawng ni hkan mung anhte hkaw tsun ai. Yehowa hte shi a yaw shada lam hte seng nna, kaga ni hpe hkaw tsun na matu, galoi shagu ahkaw ahkang tam ga ai.
3. Kabu gara shiga hkaw tsun na matu kadai hta lit nga ai kun?
Kaga ni hpe kabu gara shiga hkaw tsun na matu, jet ai Hkristan yawng hta lit nga ai. Anhte a lit hpe ahkyak shatai nna galaw ga ai. Dai gaw masha ni a asak hpe hkye la lu ai hpe chye ai majaw, masa lam jaw shagu dang lu ai daram hkaw tsun ga ai. (1 Timohti 4:16 hpe hti u.) Ndai bungli hpe shabrai lu ai majaw galaw ai n re. Chyum Laika hta ndai hku tsun da ai: “Jahpu n ya ai sha nanhte lu la mu ai rai nna, jahpu n hpyi ai she jaw ya mu.” (Mahte 10:7, 8) Anhte a shiga hpe masha shagu hkap la na n re. Raitim, anhte matut hkaw tsun ai gaw, Yehowa a ga madat ai rai nna, shi a myit hpe shapyaw ya lu ai majaw re.
Kahtap Hkaja
Mungkan ting hkaw tsun na matu, Yehowa Sakse ni gara hku shakut shaja ai lam hte Yehowa gara hku karum ya nga ai lam hpe yu yu ga.
Mungkan ting hta hkaw tsun nga: (A) Kosata Rika, (B) Amerikan, (C) Binin, (D) Htai, (E) Yap, (F) Swidin
4. Masha yawng hpang de du lu na matu shakut shaja
Yehowa Sakse ni gaw, shara shagu hta nga ai masha ni hpe kabu gara shiga hkaw tsun na matu, grai shakut shaja nga ai. VIDEO hpe hpaw, dai hpang, ndai ga san hpe bawngban u.
-
Hkaw tsun na matu Yehowa Sakse ni shakut shaja ai lam hte seng nna gara hpe nang ra sharawng ai kun?
Mahte 22:39 hte Roma 10:13-15 hpe hti nna, ndai ga san ni hpe bawngban u:
-
Hkaw tsun bungli gaw kaga ni hpe tsawra ai lam gara hku madun ai kun?
-
Kabu gara shiga hkaw tsun ai ni hte seng nna Yehowa gara hku hkamsha ai kun?—Roma 10:15 hpe yu u.
5. Anhte gaw Karai a shingdep shingtau ni re
Anhte a bungli hpe Yehowa lam matsun ya nga ai lam mahkrum madup law law gaw madun nga ai. Ga shadawn, Nyu Zilan na hpunau Paw gaw, shani ka-ang hta nta langai hpang langai hkaw tsun sa ai shaloi, num langai hte hkrum ai. Dai jahpawt hta sha, dai num gaw Karai Kasang Yehowa a mying gang nna shi hpang de marai langai ngai sa chyai na matu, Karai Kasang kaw akyu hpyi ai. “Hkying hkum 3 na ai hpang shi nta de ngai du mat ai” ngu Paw tsun ai.
1 Korinhtu 3:9 hpe hti nna, ndai ga san hpe bawngban u:
-
Hkaw tsun bungli hpe Yehowa lam matsun ya nga ai hpe Nyu Zilan na mahkrum madup gaw gara hku madun nga ai kun?
Kasa 1:8 hpe hti nna, ndai ga san hpe bawngban u:
-
Anhte a hkaw tsun bungli ngut kre na matu Yehowa a karum shingtau lam hpa majaw ra ai kun?
Nang chye ai kun?
Hkaw tsun bungli a matu, bat shagu na bat lapran zuphpawng hta shaman shakyang ai lam anhte lu la ai. Dai zuphpawng ni kaw na langai hpe lung ga ai nga yang, dai shaman shakyang ai lam hte seng nna nang gara hku shadu ai kun?
6. Hkaw tsun u ngu ai Karai a lam matsun hpe hkan sa
Tsa ban langai hta, hkaw tsun ai lam hkring mat hkra, Yesu hpang hkan ai ni hpe ninghkap ai ni hkum pat wa ai. Tsa ban langai na Hkristan ni gaw “kabu gara shiga hkaw tsun ai ahkang hpe . . . tara shang galaw ai” hku nna makawp maga wa ai. (Hpilipi 1:7, NWT) Dai ni aten na Yehowa Sakse ni mung dai hte maren sha re. a
Kasa 5:27-42 hpe hti nna, ndai ga san hpe bawngban u:
-
Hkaw tsun bungli hpe hpa majaw n jahkring kau ai kun?—Daw kaji 29, 38 hte 39 hpe yu u.
Nkau Mi San Chye Ai: “Yehowa Sakse ni gaw nta langai hpang langai hpa majaw sa ai kun?”
-
Nang gara hku htai na?
Kadun Dawk
Masha amyu baw shagu hpe kabu gara shiga hkaw tsun na matu, shi hpang hkan ai ni hpe Yesu lam matsun ya ai. Dai bungli hpe galaw lu na matu shi a amyu masha ni hpe Yehowa karum ya ai.
Bai Maram
-
Kabu gara shiga hpe mungkan ting hta gara hku hkaw tsun ai kun?
-
Hkaw tsun bungli gaw kaga masha ni hpe tsawra ai lam gara hku madun ai kun?
-
Hkaw tsun bungli gaw ngwi pyaw lam jaw lu ai ngu nang shadu ai kun? Hpa majaw kun?
Sawk Sagawn
Mare kaba ni hta nga ai masha ni hpe, Yehowa Sakse ni gara hku hkaw tsun wa ai lam hpe yu yu u.
Perit Mare A Masha Law Ai Shara Ni Hta Laksan Hku Nna Shawa Hpawng Man Sakse Hkam Ai Lam (5:11)
Hpyen yen ni hpe hkaw tsun na matu, Yehowa Sakse ni gara hku galaw wa ai kun?
Hkaw tsun magam hpe aten hpring galaw wa ai majaw, ngwi pyaw lam lu la wa ai marai langai tsun dan ai hpe madat yu u.
Kabu gara shiga hkaw tsun ai hpe grau loi shangun ai, tara rung a ahkyak ai dawdan lam nkau mi hte seng nna hkaja yu u.
a Hkaw tsun bungli hte seng nna ahkang aya nga ai wa gaw, Karai Kasang langai sha re. Dai majaw, Yehowa Sakse ni gaw kabu gara shiga hkaw tsun na matu, ahkang aya nga ai shinggyim masha ni kaw na ahkang n hpyi ra ai.
You May Also Like
SAN CHYE AI GA SAN NI
Yehowa Sakse Ni Saw Shaga Ai Chyum Laika Hkaja Lamang Ngu Ai Gaw Hpa Rai Kun?
Manu jahpu n jaw ra ai Chyum Laika hkaja ai lamang hpe Yehowa Sakse ni saw shaga ai shaloi, gara Chyum Laika hpe raitim, nang mai lang ai. Na nta masha ni, manang ni, kadai hpe raitim, saw shaga mai ai.
