SUƐI LEBOLII 21
Vɛɛ Yooŋgu Kɛndɔɔ Cho yɛ Dimiŋndo?
Chɛhowa cho hunɔɔ suŋ Masale ndɔleŋ soliŋ kpeku, le bahawɛila naalaŋ kpou faŋaa. Yooŋgu kɛndɔɔ pila cho hoo ni! Nduyɛ, wana o wana nɔ mbo tuei a ndu okɔɔ. Mi Chiisu dimul buɛiyaa nduaa le ma dimul waŋnda kpou a yooŋgoo hoo okɔɔ! (Maatiu 28:19, 20) Vɛɛ Seiyaa Chɛhowaa cho yɛ tosaa nyɛ Chiisu dimi hoo wo?
1. Vɛɛ nyɛ dimiŋ o Maatiu 24:14 niŋndo cho yɛ hau yɔŋnɔŋndo?
Mi Chiisu dimi aa: “Yooŋgu kɛndɔɔ hoo a Masale Mɛlɛkaleŋ okɔɔ cho dimiŋ ba o ba fee o chieeŋndo choo.” (Maatiu 24:14) Seiyaa Chɛhowaa cho bɔɔ a kɔl kɛndɛ le wali sɔviɔɔ hoo tosaa. Chieeŋndo balɔɔ silɔ, ŋ cho yooŋgu kɛndɔɔ dimioo o sɔɔŋ maŋgalaŋ niŋ hiouwɔɔ 1,000! Wali bɛndoo pila cho hoo ni. Nduyɛ le ndu tosaa, mɛɛ miŋ wou yoomuaŋ mi sɔɔŋ wa ŋkɔɔnaa. Te o ve a mala Chɛhowaa le, ŋ nɔla miŋ tiu ndu ba le.
2. Vɛɛ naŋ cho yɛ kindiŋndo le waŋnda yooŋgu kɛndɔɔ dimullo?
Ba o ba naŋ komal pɛ waŋnda, miŋ dimul nda yooŋgu kɛndɔɔ. Maa Kilisiɔŋnda o wɔsiŋ kɛmɛ tasoŋ niŋ, naa bɛɛ miŋ kuɛ “chiɛiyo a chiɛiyo” le yooŋgu kɛndɔɔ dimioo. (Walta Kiilaa 5:42) Hei mala naa miŋ dimul waŋnda yooŋgoo hoo o miiliɔŋndaŋ niŋ iwɔsi o iwɔsi. Le mɛɛ naŋ komal waŋnda lepum o la ndalo bɛɛ le yɛ, miŋ dimi vɛlɛ yooŋgu kɛndɔɔ o fondaŋnda waŋnda hiau tau laŋ. Miŋ nuuviaa nɛilaŋ teleŋ o teleŋ le waŋnda dimullo a Chɛhowa okɔɔ, vɛlɛ a sɔɔŋ o dimi le tosaa woŋ.
3. Nɛɛ yaa nɔ yɛ ma dimi yooŋgu kɛndɔɔ?
Kilisiɔŋaa tonyaa kpou nɔ ni ma dimul waŋnda yooŋgu kɛndɔɔ. Ŋ chua bɔɔ wali Chiisu ke naa hoo wo o sɔvɛ. Le hei, miŋ kindiŋ le yooŋgu kɛndɔɔ dimioo mɛɛ kpɛ naŋ nɔla yɛ kanifuule, ŋ sina maa mbo piŋi yoomula waŋnda. (Nuawɔ 1 Timoti 4:16.) O cho paawa le nda cho naa le wallo hoo tosaa le. Baabuiyo dimi pɛŋ aa: “Fondo nya sɔla ni, nya bɛɛ la yɔŋgu fondo.” (Maatiu 10:7, 8) O cho waŋnda kpou le chɛl miŋ dimul nda yooŋgu kɛndɔɔ le. Kɛ miŋ hiou lachi a ndu dimioo kanifuule, nɛi naŋ saŋgala Chɛhowa wo opilɛ cho hoo ni. Nduyɛ, mbo naŋ kɔl tau te o che naa pɛ wallo hoo tosaa.
CHƆƆLU YAASIAA
Pɛɛku ma sina mɛɛ kpɛ Seiyaa Chɛhowaa cho sɛmbɔɔ dɔwɔɔ, le yooŋgu kɛndɔɔ dimioo chieeŋndo balɔɔ silɔ yɛ. Nduyɛ ma che mɛɛ Chɛhowa cho naa tooloo yɛ.
Yooŋgu kɛndɔɔ dimioo chieeŋndo balɔɔ silɔ: (A) Kosta Luika, (B) Amɛlika, (C) Bɛniŋ, (D) Tailaŋ, (E) Yapi, (F) Suidiŋ
4. Miŋ kindiŋ kpoke le waŋnda suu o suu yooŋgu kɛndɔɔ dimullo
Mi Seiyaa Chɛhowaa tosa wallo kalaŋ le waŋnda yooŋgu kɛndɔɔ dimullo ba o ba fee. Handu VIDUEIYO, okoŋ mi la suukaŋ o nyunaa hoo choo:
-
Yɛɛ hɛnaŋ yɛ num a kindiŋ Seiyaa Chɛhowaa cho le yooŋgu kɛndɔɔ dimioo wo?
Nuawɔ Maatiu 22:39 a Luomaŋnda 10:13-15, okoŋ mi la suukaŋ o nyunalaŋ ndaŋ choo:
-
Vɛɛ wali naa dimiaa yooŋgu kɛndɔɔ chɔm yɛ maa, ŋ kaala chaaŋaa naa waŋnda chieeya?
-
Vɛɛ Chɛhowa che yɛ wanaa dimi yooŋgu kɛndɔɔ wa?—Tofa sɔɔŋ 15.
5. Wanaa walla naŋ cho latulu a Mɛlɛka ni
Sɔɔŋ yɔŋnuŋ o wali dimiaa yooŋgu kɛndɔɔ niŋndoŋ chɔm maa Chɛhowa cho wali naa nɛiyo chɔmndo ni. Le tamaseliiyo, tofawɔ nyɛ yɔŋnuŋ puaapilɛnɔɔ diolaŋ aa Pɔɔl o lɛŋnde Niu Silaŋ ndeŋ niŋndo. Paale pilɛ, o wa yooŋgu kɛndɔɔ dimioo chiɛiyo a chiɛiyo mbo komal chuaa ipalaa. Idii koŋ, mi chuaa hoo soliŋ diola Chɛhowalaŋ kpeku o piɛileŋ niŋ. Mbo nyuna ndu le mi waŋndo kɔ dimul ndu yooŋgu kɛndɔɔ. Mi Pɔɔl dimi aa: “Mɛɛ hawɛilaŋ la hiou la yaa, mi fuuluu o ndu lo bɛɛ.”
Nuawɔ 1 Kɔliŋtiaŋ 3:9, okoŋ mi la suukaŋ o nyunaa hoo choo:
-
Vɛɛ nyɛ yɔŋnuŋ hoo o lɛŋnde Niu Silaŋ ndeŋ niŋndo chɔm yɛ maa, Chɛhowa cho nɛi chɔmaa yɔŋgoo ni le wali dimiaa yooŋgu kɛndɔɔ?
Nuawɔ Walta Kiilaa 1:8, okoŋ mi la suukaŋ o nyunaa hoo choo:
-
Le yɛɛ naŋ yeema yɛ mala Chɛhowaa le wali dimiaa yooŋgu kɛndɔɔ tosaa?
A sina pa?
O lɔɔ o lɔɔ bɛŋgu, ma pɛɛku naa mɛɛ wana dimi yooŋgu kɛndɔɔ yɛ o bɔŋaŋnda naŋ bii o lɔɔ tɛɛŋ ndaŋ. Te o yɔŋ pɛ maa a kuɛ niŋ paandu o bɔŋaŋndaŋ ndaŋ, vɛɛ ŋ che yɛ pɛɛku naŋ sɔla koŋ ndo?
6. Mɛlɛka vem naa yooŋgu kɛndɔɔ dimioo ni
O wɔsiŋ kɛmɛ tasoŋ niŋ, mi waŋnda apum kindiŋ le buɛiyaa Chiisuaa kuunaa yooŋgu kɛndɔɔ dimioo. Mi Kilisiɔŋnda haa kindiŋ kpoke le ma sɔla dioo le mi yooŋgu kɛndɔɔ hoo “sim yi.” (Filipiaŋnda 1:7) Hau bɛɛ lende koni Seiyaa Chɛhowaa cho tosaa ni. a
Nuawɔ Walta Kiilaa 5:27-42, okoŋ mi la suukaŋ o nyunaa hoo choo:
TE WAŊNDO NYUNA PƐ AA: “Le yɛɛ Seiyaa Chɛhowaa dimi yɛ yooŋgu kɛndɔɔ chiɛiyo a chiɛiyo?”
-
Vɛɛ ŋ cho yɛ muli?
SƆƆŊ KULLOŊ
Mi Chiisu dimul tol kɔɔliaa nduaa le ma dimi yooŋgu kɛndɔɔ o lelɛŋ o lelɛŋ niŋ. Chɛhowa cho hau wanaa nduaa malaa le wallo hoo tosaa.
Nyunala miiŋgaa choo laŋ
-
Yɛɛ chɔm yɛ maa yooŋgu kɛndɔɔ cho hau dimiŋndo chieeŋndo balɔɔ silɔ?
-
Vɛɛ wali naa dimiaa yooŋgu kɛndɔɔ chɔm yɛ maa ŋ kaala waŋnda chieeya?
-
A yiyaŋ pa maa yooŋgu kɛndɔɔ dimioo tosa miŋ wa a nyaale? Le yɛɛ ŋ dimi yɛ lende?
CHƆƆLU SƆƆŊ PUM TOFA
Tofawɔ ma che mɛɛ Seiyaa Chɛhowaa dimul waŋnda yooŋgu kɛndɔɔ o chieeŋ bɛndoŋ niŋ yɛ.
Yɛɛ Seiyaa Chɛhowaa tosa yɛ niŋ le Luɛfichiiya malaa?
Tofawɔ ma che nyaale wɛɛŋ pum sɔla wo, mɛɛ o soliŋ yoomu ndɔɔ kpou kpeku o wali Mɛlɛkaa niŋ.
Ŋ sɔla niŋ dilaŋ tau o chiɛi lasawaa niŋ le yooŋgu kɛndɔɔ dimioo. Pɛɛku wɔ ma che mɛɛ hei mala niŋ naa le yooŋgu kɛndɔɔ dimioo fɛɛsɛŋ yɛ.
“Wanaa Dimiaa Yooŋgu Kɛndiaa Kuɛ a Suɛi Ndɛi o leMasa” (Masale Mɛlɛkaleŋ Le Cho Wallo!, buŋgɛi 13)
a Mɛlɛka vem naa le yooŋgu kɛndɔɔ dimioo ni. Lelaŋ, Seiyaa Chɛhowaa nɔ lɛ ma soli layau masaa waa o ba le yooŋgu kɛndɔɔ dimioo le.
Naapum a Yeema Dɔɔ Vɛlɛ
NYUNALA WAŊNDA NYUNA LƆƆLƆƆ LAŊ
Yɛɛ Cho yɛ Pɛɛku Baabuiyo?
Sɔla mulilaŋ o nyunala nyunaŋ a mɛɛ naŋ tosa pɛɛku Baabui ŋ paawa nyɛ o nyɛ le wo okɔɔ wo.
