XNAQʼTZBʼIL 21
¿Alkye tten in xi pakbʼet tbʼanel tqanil?
Toj chʼintl ambʼil kʼelel tiʼn Tkawbʼil Dios tkyaqil nya bʼaʼn ex qaj tuʼn t-xi qqʼamaʼn tbʼanel tqanil lu kye kykyaqil xjal. Tajtoq Jesús tuʼn t-xi kyqʼamaʼn t-xnaqʼtzbʼen tqanil lu twitz tkyaqil Txʼotxʼ (Mateo 28:19, 20). ¿Tiʼ o bʼant kyuʼn testigos de Jehová tuʼn t-xi kybʼiʼn kawbʼil kyaj tqʼamaʼn Jesús?
1. ¿Tzeʼn in japun twi yol tkuʼx toj Mateo 24:14 toj ambʼil jaʼlo?
Kyaj tqʼamaʼn Jesús jlu: «Aju tqanil bʼaʼn lu tiʼj tkawbʼil Dios kxel pakbʼet tuj tkyaqil twitz txʼotxʼ» (Mateo 24:14). In qo tzalaje tuʼn qonine tiʼj aqʼuntl lu. In qo pakbʼane tiʼj tbʼanel tqanil twitz tkyaqil Txʼotxʼ toj mas te mil yol. Noqtzun tuʼnj, oʼkx jaku bʼant tkyaqil jlu quʼne noq tuʼn tonbʼil Jehová.
2. ¿Tiʼ in bʼant quʼne tuʼn t-xi qpakbʼane tbʼanel tqanil kye xjal?
Ik tzeʼn bʼant kyuʼn okslal te tnejel syent abʼqʼi, in qo pakbʼane jatumel ateʼ nim xjal ex ttziyele ja (Hechos 5:42). Tuʼntzunju, tkyaqil abʼqʼi in qo pakbʼane kye nim millón xjal. At maj mintiʼ in che kanet xjal quʼne kyja, tuʼntzunju, in qo pakbʼane kyoj lugar jatumel in che ikʼ nim xjal. In nok tilil quʼne tuʼn qyoline kyukʼil xjal toj alkyexku ambʼil tiʼj Jehová ex tiʼjju t-ximbʼetz at tiʼj Txʼotxʼ.
3. ¿Alkyeqe at kyoklen tuʼn kypakbʼan tiʼj tbʼanel tqanil?
Kykyaqil axix tok okslal il tiʼj tuʼn kypakbʼan tiʼj tbʼanel tqanil. Tuʼntzunju in nok tilil quʼne tuʼn qpakbʼane, tuʼnju at nim xjal tuʼn kyklet (uʼjinktza 1 Timoteo 4:16). Ni jun in tzaj chjonte twi qkʼuʼje aj qpakbʼane tuʼnju in tzaj tqʼamaʼn Tyol Dios jlu: «Noq kukx ma kykʼame kyoklene lu, ax ikx aju ma txi nmaʼne kyeye, noq kukx kybʼinchame» (Mateo 10:7, 8). Maske mintiʼ in qo ok bʼiʼne kyuʼn kykyaqil xjal, kukx in nok tilil quʼne tuʼn qpakbʼane tuʼnju in jaw qnimsaʼne Jehová ex in tzalaj quʼne.
QO JYON MAS TQANIL
Qo xnaqʼtzan tiʼj tiʼ in bʼant quʼne tuʼn qpakbʼane twitz tkyaqil Txʼotxʼ ex tzeʼn in nonin Jehová qiʼje.
In qo pakbʼane twitz tkyaqil Txʼotxʼ: A) Costa Rica, B) Estados Unidos, C) Benín, D) Tailandia, E) Yap (Micronesia) ex F) Suecia.
4. In nok tilil quʼne tuʼn qpakbʼane kye kykyaqil xjal
In nok tilil quʼne tuʼn qpakbʼane kye kykyaqil xjal noq jaxku tumel ateʼ. Kyqʼonke kywitze tiʼj VIDEO ex che yoline tiʼj xjel lu:
-
¿Alkye jun tiʼ mas tbʼanel in nela toj twitza tiʼjju in bʼant kyuʼn testigos de Jehová tuʼn kypakbʼan?
Kyuʼjinktze Mateo 22:39 ex Romanos 10:13 a 15, ex che yoline kyiʼj xjel lu:
-
¿Tzeʼn in kubʼ qyekʼine qa kʼujlaʼn qe xjal quʼne aj qpakbʼane kye?
-
¿Alkye t-ximbʼetz Jehová at kyiʼj qeju in che pakbʼan tiʼj tbʼanel tqanil? (Kyqʼonke kywitze tiʼj versículo 15).
5. In qo onine tiʼj Dios
Jaku tzʼok qeʼ qkʼuʼj tiʼj qa a Jehová nejni twitz pakbʼabʼil. Qo xnaqʼtzan tiʼjju bʼaj atz Nueva Zelanda. Jun qʼij, jun testigo de Jehová Paul tbʼi, xiʼ pakbʼal ttziyele ja ex ok ttokʼchaʼn ttzi tja jun xuʼj. Otoq txi tqanin xuʼj toj tnaʼj Dios te Jehová tuʼn tpon jun xjal visitarilte toj prim aju ex tuʼn tonin tiʼj tuʼn tel tnikʼ tiʼj Biblia. Tqʼama Paul jlu: «Tzmatoq in nikʼ oxe or tbʼajlen naʼn xuʼj Dios tej npone tokʼchal ttzi tja».
Kyuʼjinktze 1 Corintios 3:9 ex che yoline tiʼj xjel lu:
-
¿Tzeʼn in tzaj tyekʼin aju bʼaj tiʼj Paul qa a Jehová nejni twitz pakbʼabʼil?
Kyuʼjinktze Hechos 1:8 ex che yoline tiʼj xjel lu:
-
¿Tiquʼn il tiʼj tuʼn qtzaj tonin Jehová tuʼn qpakbʼan?
¿Ojtzqiʼn jlu tuʼna?
Kyoj qchmabʼile in che ok txolekxi qʼij, in tzaj yekʼin qeye tzeʼn tuʼn tbʼant qpakbʼane. Qa o tena toj jun chmabʼil lu, ¿tzeʼn ela toj twitza?
6. O tzaj tqʼamaʼn Dios qeye tuʼn qpakbʼane
Toj tnejel syent abʼqʼi, el kyiʼn aj qʼoj ambʼil kye t-xnaqʼtzbʼen Jesús tuʼn kypakbʼan. Noqtzun tuʼnj, ok tilil kyuʼn t-xnaqʼtzbʼen Jesús tuʼn ttzaj qʼoʼn ambʼil kye kyuʼn aj kawil tuʼn kypakbʼan (Filipenses 1:7). Ex ax jlu in bʼant kyuʼn testigos de Jehová toj ambʼil jaʼlo. a
Kyuʼjinktze Hechos 5:27 a 42 ex che yoline tiʼj xjel lu:
-
¿Tiquʼn mintiʼ in kyaj qkoline tuʼn qpakbʼane? (Kyqʼonke kywitze kyiʼj versículo 29, 38 ex 39).
AJU IN KUBʼ KYXJELIN JUNJUN XJAL: «¿Tiquʼn in che ikʼ testigos de Jehová kyja xjal?».
-
¿Tiʼ teya jaku txi ttzaqʼweʼn?
TOJ CHʼIN YOL
Kyaj tqʼamaʼn Jesús kye t-xnaqʼtzbʼen tuʼn kypakbʼan tiʼj tbʼanel tqanil twitz tkyaqil Txʼotxʼ. In nonin Jehová kyiʼj tmajen tuʼn tbʼant aqʼuntl lu kyuʼn toj ambʼil jaʼlo.
Aju ma qo yolin tiʼj
-
¿Alkye tten in xi pakbʼet tbʼanel tqanil twitz tkyaqil Txʼotxʼ?
-
¿Alkye tten in kubʼ qyekʼine qa kʼujlaʼn qe xjal quʼne aj qpakbʼane kye?
-
¿In kubʼpe t-ximen teya qa in kubʼ qnaʼn tzalajbʼil aj qpakbʼan? ¿Tiquʼn?
OJTZQINKA CHʼINTL
Ojtzqinka tzeʼn in che pakbʼan testigos de Jehová kyoj matij tnam.
Pakbʼabʼil kyoj tnam jatumel ateʼ nim xjal atz París (5:11)
¿Tzeʼn o che pakbʼan testigos de Jehová kye xjal in che pon klol kyibʼ toj juntl tnam?
In qo pakbʼan kye xjal in che pon klol kyibʼ toj juntl tnam (5:59)
Ojtzqinka tiquʼn in tzalaj jun xuʼj tuʼnju pakbʼan toj tkyaqil ambʼil.
Ojtzqinka tzeʼn o qo kambʼane kyoj junjun juicio ex tzeʼn o tzʼonin jlu tuʼn t-xi pakbʼet tbʼanel tqanil tiʼj Tkawbʼil Dios.
a A Dios in tzaj qʼamante qeye tuʼn qxiʼye pakbʼal, tuʼntzunju, nya il tiʼj tuʼn t-xi qqanine permis kye aj kawil tuʼn ttzaj kyqʼoʼn ambʼil qeye tuʼn qpakbʼane.
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
