TLAMACHTILI 21
¿Kenijkatsa titlajtolmoyauaj ipan nochi Tlaltipaktli?
Jehová nechka kitekiuis iTlanauatijkayo uan kiampa kitlamiltis nochi tlen techtlaijiyouiltia. ¡Tlauel kuali tlen toTeotsij kichiuas, yeka nochi maseualmej moneki kimatisej! Jesús kinekiyaya itokilijkauaj ma kimoyauakaj nopa kuali tlamachtili ipan nochi Tlaltipaktli (Mateo 28:19, 20). ¿Tlake kichiuaj Jehová itlajtoltemakauaj pampa kinekij kichiuasej tlen Jesús tlanauatik?
1. ¿Kenijkatsa moaxitia Mateo 24:14 ipan ni tonali?
Jesús kiijtok nopa “kuali tlamachtili tlen kejatsa eltos kema toTeko tlanauatia” kimoyauaskiaj “kampa ueli” (Mateo 24:14). Nochi Jehová itlajtoltemakauaj tlauel techpaktia titlajtolmoyauasej. Titlajtolmoyauaj ipan nochi Tlaltipaktli ipan kipano 1,000 tlajtoli. Moneki tijchiuasej se ueyi kampeka uan timosentikapaleuisej, kiampa uelis tijchiuasej ni ueyi tekitl. Tlaj Jehová amo techpaleuiskia amo ueliskia tijchiuasej.
2. ¿Tlake tijchiuaj pampa tijnekij tikinkamanaljuisej nochi maseualmej?
Titlajtolmoyauaj kampa uelis tikinpantisej maseualmej. Uan kej kichijkej Cristo itokilijkauaj tlen achtoui siglo, nojkia titlajtolmoyauaj kajkalpa (Hechos 5:42). Kiampa sejse xiuitl ueli tikinkamanaljuiaj tlauel miakej maseualmej. Kemantika amo itstokej ininchaj, yeka nojkia titlajtolmoyauaj kampa nemij miakej. Nochipa tijtemoliaj kenijkatsa tikinkamanaljuisej sekinok tlen Jehová uan tlen mosentlalijtok kichiuas.
3. ¿Ajkia inijuantij moneki tlajtolmoyauasej?
Nochi katli nelnelia elij Cristo itokilijkauaj moneki tlajtolmoyauasej. Tojuantij tlauel tijpatiitaj ni tekitl, yeka tijchiuaj se ueyi kampeka titlajtolmoyauasej pampa kiampa maseualmej uelis momanauisej (xijpoua 1 Timoteo 4:16). Amo aka techtlaxtlauia kema tijchiuaj ni tekitl pampa Biblia kiijtoua: “Axkema xitlainamakaj kema intepaleuisej” (Mateo 10:7, 8). Maske amo nochi maseualmej kinekij techtlakakilisej, nojua titlajtolmoyauaj pampa kiampa tijueyichiuaj Jehová uan tijyolpakiltiaj.
KUALI XIMOMACHTI
Ma tikitakaj kenijkatsa Jehová itlajtoltemakauaj titlajtolmoyauaj ipan nochi Tlaltipaktli uan kenijkatsa Jehová techpaleuia.
Titlajtolmoyauaj ipan nochi Tlaltipaktli: A) Costa Rica, E) Estados Unidos, l) Benín, J) Tailandia, K) Yap (Micronesia), L) Suecia.
4. Tijchiuaj kampeka tikinkamanaljuisej nochi maseualmej
Nochi Jehová itlajtoltemakauaj tijchiuaj se ueyi kampeka tijmoyauasej nopa kuali tlamachtili kampa ueli kampa itstokej maseualmej. Xikitakaj nopa VIDEO uan xijnankilikaj ni tlajtlanili:
-
¿Tlake tlamantli tlen tikitak tijchiuaj tlauel mitspaktik?
Xijpouakaj Mateo 22:39 uan Romanos 10:13-15 uan xijnankilikaj ni tlajtlanili:
-
¿Kenke kema titlajtolmoyauaj tijnextiaj tikinikneliaj maseualmej?
-
¿Kenijkatsa kinita Jehová katli tlajtolmoyauaj? (Xikitakaj versículo 15).
5. Titekitij iuaya toTeotsij
Tlen pano kinextia Jehová techyakana kema titlajtolmoyauaj. Ma tikitakaj tlen panok ipan Nueva Zelanda. Se tonali ika tiotlak, se Jehová itlajtoltemajka katli itoka Paul kipantik se siuatl kema tlajtolmoyauayaya kajkalpa. Ika ijnalok, nopa siuatl kitekiuik toTeotsij itoka kema momaijtok uan kiiljuik se akajya ma kipaxaloti ichaj. Paul kiijtok: “Kema panok eyi hora, nikaltajtakaniyaya ichaj”.
Xijpouakaj 1 Corintios 3:9 uan xijnankilikaj ni tlajtlanili:
-
¿Kenke tlen panok kinextia Jehová kiyakana tlajtolmoyaualistli?
Xijpouakaj Hechos 1:8 uan xijnankilikaj ni tlajtlanili:
-
¿Kenke moneki ma techpaleui Jehová uan kiampa uelis titlajtolmoyauasej?
¿Tijmajtoya?
Ipan tlanechikoli tlen mochiua ipan semana nochipa techmachtiaj kenijkatsa uelis titlajtolmoyauasej. Tlaj ta tiajtok ipan nopa tlanechikoli, ¿kenijkatsa tikita tlen techmachtiaj?
6. Kema titlajtolmoyauaj tijchiuaj nopa tekitl tlen toTeotsij techmakatok
Ipan achtoui siglo, katli kinkualankaitayayaj Cristo itokilijkauaj amo kinekiyayaj ma tlajtolmoyauakaj. Yeka nopa achtoui Cristo itokilijkauaj yajkej “ininixpa tekiuejmej” pampa kinekiyayaj kimanauisej “itlajtol toTeko” (Filipenses 1:7). Ipan ni tonali Jehová itlajtoltemakauaj nojkia kiampa tijchiuaj. a
Xijpouakaj Hechos 5:27-42 uan xijnankilikaj ni tlajtlanili:
-
¿Kenke nojua titlajtolmoyajtosej maske sekij amo kinekisej? (Xikitakaj versículos 29, 38 uan 39).
TLEN SEKINOK KINEKIJ KIMATISEJ: “¿Kenke Jehová itlajtoltemakauaj tlajtolmoyauaj kajkalpa?”.
-
¿Tlake titlanankiliskia?
TLEN TIMOMACHTIJKEJ
Jesús kiniljuik itokilijkauaj ma kimoyauakaj nopa kuali tlamachtili ipan nochi Tlaltipaktli. Jehová kinpaleuia itekipanojkauaj ma kichiuakaj nopa tekitl.
¿Tlake tijyekok?
-
¿Kenijkatsa momoyaua nopa kuali tlamachtili ipan nochi Tlaltipaktli?
-
¿Kenke kema titlajtolmoyauaj tijnextiaj tikinikneliaj maseualmej?
-
¿Timoiljuia kema titlajtolmoyauaj kichiua ma tiyolpakikaj? ¿Kenke kiampa timoiljuia?
NOJKIA XIKITA NI
Xikita kenijkatsa toikniuaj tlajtolmoyauaj ipan uejueyi altepemej.
Tlajtolmoyauaj kampa nemij miakej maseualmej ipan París (5:11)
¿Tlake kichijtokej Jehová itlajtoltemakauaj pampa kinekij kiniljuisej tlen Biblia tlamachtia katli momanauiaj ipan seyok altepetl?
Tikinpaleuiaj ma kiixmatikaj Jehová katli momanauiaj ipan seyok altepetl (5:59)
Xikita kenke se tosiuaikni tlauel yolpaki pampa mosentlalik tlajtolmoyauas.
Xikita kenijkatsa tlen kitlapejpenijtokej tlanauatianij kinpaleuijtok Jehová itlajtoltemakauaj nojua ma tlajtolmoyauakaj.
a ToTeotsij technauatia ma titlajtolmoyauakaj, yeka maske tekichiuanij amo techkauaj, tojuantij nojua titlajtolmoyauaj.
Tlen nojkia mitspaktis tikitas
TLEN KINEKIJ KIMATISEJ
¿Kenijkatsa Jehová itlajtoltemakauaj tlamachtiaj ika Biblia?
Kema Jehová itlajtoltemakauaj mitsmachtisej ika Biblia amo mitsinamasej uan uelis tijtekiuis Biblia tlen ta tijnekis. Nojkia uelis tikintlaneuis sekinok kej mochampoyouaj o mouampoyouaj.
