OSHILESHWA 21
Onkundana ombwanawa ohayi uvithwa ngiini?
Masiku Jehova ota ka longitha Uukwaniilwa we a kandule po omaupyakadhi getu agehe. Onkundana ndjika ombwanawa unene, onkee ano, kehe gumwe okwa pumbwa oku yi uva. Jesus okwa li a hala aalanduli ye ya lombwele kehe gumwe etumwalaka ndika! (Mateus 28:19, 20) Mbela Oonzapo dhaJehova ohadhi gwanitha po ngiini elombwelo ndika lyaJesus?
1. Mateus 24:14 ota gwanithwa ngiini kunena?
Jesus okwa hunganeke a ti: “Elaka ndika etoye lyOshilongo otali ka uvithilwa aantu ayehe.” (Mateus 24:14) Oonzapo dhaJehova ohadhi kala dha nyanyukwa sho hadhi kutha ombinga miilonga mbika ya simana. Ohatu uvitha onkundana ombwanawa muuyuni awuhe momalaka ge vulithe 1 000! Ihe iilonga mbika iinene ohayi pula oonkambadhala dha mana mo nokuunganekwa nawa. Onkee ano, itayi vulu okulongwa pwaa na ekwatho lyaJehova.
2. Oonkambadhala dhini hatu ningi, opo tu uvithile aantu?
Ohatu uvithile aantu kehe mpoka tatu ya adha. Ngaashi Aakriste yomethelemumvo lyotango, natse ohatu uvithile aantu ‘momagumbo’ gawo. (Iilonga 5:42) Omukalo nguka ohagu tu kwathele tu popye naantu omamiliyona omumvo kehe. Molwaashoka aantu ihaya kala aluhe momagumbo, ohatu uvithile wo momahala gaayehe ga yoolokathana. Ohatu kongo aluhe oompito tu lombwele yalwe kombinga yaJehova nomalalakano ge.
3. Olye e na oshinakugwanithwa shokuuvitha onkundana ombwanawa?
Aakriste ayehe yashili oye na oshinakugwanithwa shokuuvithila yalwe onkundana ombwanawa, noshilonga shika otwe shi tala ko sha simana lela. Onkee ano, ohatu ningi ngaashi tatu vulu tu uvithile aantu ayehe, opo ya vule oku ka hupithwa. (Lesha 1 Timoteus 4:16.) Ihatu futwa sho tatu longo iilonga mbika, oshoka Ombiimbeli otayi ti: “One omwa pewa oshindji, gandjeni wo omagano.” (Mateus 10:7, 8) Haantu ayehe haya taamba ko etumwalaka lyetu, ihe ohatu tsikile okuuvitha, molwaashoka oshi li oshitopolwa shokulongela Jehova nohashi mu nyanyudha.
ILONGA OSHINDJI
Ilonga oshindji kombinga yoonkambadhala ndhoka Oonzapo dhaJehova hadhi ningi, opo dhi uvithile aantu muuyuni awuhe nankene Jehova he dhi kwathele.
Iilonga yokuuvitha muuyuni awuhe: (1) Costa Rica, (2) Amerika, (3) Benin, (4) Thailand, (5) Yap, (6) Sweden
4. Ohatu longo nuudhiginini tu uvithile aantu ayehe
Oonzapo dhaJehova ohadhi ningi oonkambadhala dha mana mo, opo dhi uvithile aantu onkundana ombwanawa kehe mpoka tadhi ya adha. Dhana OKAVIDIO, e tamu kundathana epulo tali landula.
-
Oshike hashi ku kumitha kombinga yoonkambadhala ndhoka Oonzapo dhaJehova hadhi ningi, opo dhi uvithile aantu?
Lesha Mateus 22:39 nosho wo Aaroma 10:13-15, e tamu kundathana omapulo taga landula:
-
Iilonga yetu yokuuvitha ohayi ulike ngiini kutya otu hole aantu ooyakwetu?
-
Jehova oha kala u uvitile ngiini mboka haya uvitha onkundana ombwanawa? — Tala ovelise 15.
5. Tse aalongi pamwe naKalunga
Iimoniwa oyindji ohayi ulike kutya Jehova oye ta wilike iilonga yetu. Pashiholelwa, moNew Zealand, omumwatate Paul, esiku limwe pethimbo lyomutenya okwa tsakaneke omukulukadhi gumwe sho tu uvitha egumbo negumbo. Ongula yesiku ndyoka, omukulukadhi ngoka okwa li a galikana kuKalunga, ta longitha edhina lyaKalunga, Jehova, te mu pula opo gumwe e ye e mu talele po. Paul okwa ti: “Konima owala yoowili ndatu, onda li nda thiki pegumbo lyomukulukadhi ngoka.”
Lesha 1 Aakorinto 3:9, e tamu kundathana epulo tali landula:
-
Ongiini iiholelwa ngaashi shoka shomoNew Zealand tashi ulike kutya Jehova ota wilike iilonga yokuuvitha?
Lesha Iilonga 1:8, e tamu kundathana epulo tali landula:
-
Omolwashike twa pumbwa ekwatho lyaJehova, opo tu gwanithe po iilonga yetu yokuuvitha?
Owe shi tseya ngaa?
Oshiwike kehe, pokugongala kwetu kwomokati koshiwike, ohatu dheulwa nkene tu na okuuvitha. Ngele pokugongala mpoka owa li po oshikando shimwe, oto ti ngiini kedheulo ndyoka?
6. Ohatu vulika kelombwelo lyaKalunga li na ko nasha nokuuvitha
Methelemumvo lyotango, aapataneki oya li ya kambadhala okukeelela aalanduli yaJesus kaaya uvithe. Aakriste yopetameko oya li ya popile uuthemba wawo wokuuvitha ‘mokupopila evaangeli.’ (Aafilippi 1:7 yelekanitha OB-1954) Oonzapo dhaJehova nadho osho hadhi ningi sigo okunena. a
Lesha Iilonga 5:27-42, e tamu kundathana epulo tali landula:
-
Omolwashike kaatu na okweetha po okuuvitha? — Tala ovelise 29, 38 no 39.
GUMWE OTASHI VULIKA A PULE TA TI: “Omolwashike Oonzapo dhaJehova hadhi uvitha egumbo negumbo?”
-
Oto ke mu yamukula ngiini?
OWI ILONGO SHIKE?
Jesus okwa li a lombwele aalanduli ye, yu uvithile aantu yomiigwana ayihe onkundana ombwanawa. Jehova ota kwathele aapiya ye, ya longe iilonga mbika.
Omapulo geendululo
-
Onkundana ombwanawa ohayi uvithwa ngiini muuyuni awuhe?
-
Iilonga yetu yokuuvitha ohayi ulike ngiini kutya otu hole aantu ooyakwetu?
-
Mbela sho to tala, iilonga yokuuvitha otayi vulu ngaa oku tu etela enyanyu? Omolwashike to tile ngawo?
UUYELELE WA GWEDHWA PO
Tala nkene Oonzapo dhaJehova hadhi uvithile aantu miilando iinene.
Oonzapo dhaJehova odha li dha ningi po shike opo dhi kwathele oontauki?
Taya uvithile oontauki ndhoka dha hala okutseya kombinga yaKalunga (5:59)
Pulakena kOnzapo yaJehova yimwe tayi yelitha nkene iilonga yokuuvitha hayi yi etele enyanyu.
Ilonga kombinga yomatokolo gamwe ga simana ngoka ge shi ningitha oshipu tu uvithe onkundana ombwanawa.
“Aauvithi yUukwaniilwa taya yi kompangu” (Uukwaniilwa waKalunga otawu pangele!, ontopolwa 13)
a Kalunga oye mwene e tu pa uuthemba wokuuvitha. Onkee ano, Oonzapo dhaJehova inadhi pumbwa okupewa epitikilo kaakwanepangelo dhi uvithe onkundana ombwanawa.
Opu na ishewe uuyelele mbuka
OMAPULO NGOKA HAGA PULWA OLUNDJI KOMBINGA YOONZAPO DHAJEHOVA
Ekonakonombiimbeli ndyoka hali ningwa kOonzapo dhaJehova oshike?
Oto vulu okulongitha Ombiimbeli kehe mootundi dhopaMbiimbeli dhoshali, ndhoka hadhi ningwa kOonzapo dhaJehova. Oto vulu okuhiya aantu yaandjeni nenge ookuume koye.
