LONGO DIA 21
Luholo Lutshi Lukuma Luabonga Luana Longesewa?
Gualeha ndo, Yehowa udi muza mumanesela malamba etu agasue mu njila ya Ufumu wenji. Ndaga eyi idi diago lumene luabonga, muthu wagasue udi naye guyijiya. Yesu wana tshigina egi alandudi enji alongese lukuma elu luabonga gudi muthu wagasue! (Matayo 28:19, 20) Luholo lutshi Matemue a Yehowa ana tumagela mukhuala owu wa Yesu?
1. Luholo lutshi ndaga jidi mu Matayo 24:14 jidi mutagenesewa mangino?
Yesu wazuelele egi: “Lukuma elu luabonga lua Ufumu mbalulongesewa nji ha mavu agasue.” (Matayo 24:14) Matemue a Yehowa ana suanguluga diago gulongesa lukuma elu lua ndando. Tuana longesa lukuma luabonga ha mavu agasue mu mazuelelo gubalega 1 000! Mudimo owu wakoma wana toga ngolo jiavula nu ulondegi wabonga. Gula ukuateshi wa Yehowa ndo, mudimo owu wajiyilego gukalegewa.
2. Ndaga jitshi tuana tshita ha gulongesa athu lukuma luabonga?
Tuana longesa mafundo agasue tuana sanga athu. Gifua Aklisto a mu siekle ya thomo, tuana longesa “inzo nu inzo.” (Makalegelo 5:42) Gutshita ngenyi guana gutukuatesa ha gulongesa bamilio a athu mu givo gimoshi. Luholo athu avula ana khala ndo gu jinzo jiawo, tuana longesa nji ha mafundo a athu avula. Tuana kamba ba okazio a gulongesa athu ako ndaga jiatadila Yehowa nu mafelela enji.
3. Nanyi udi nu ginemo gia gulongesa lukuma luabonga?
Aklisto agasue a giamatshidia adi nu ginemo gia gulongesa lukuma luabonga gudi athu ako. Tuana zula ginemo giene nu ndando yavula. Tuana longesa muavula gula luholo ludi guene handaga tudi mujiya egi mudimo wene mbawuhuluisa monyo wa athu. (Tanga 1 Timote 4:16.) Tuana futshiwago mukunda nu mudimo wene, handaga Biblia yana zuela egi: “Muahetele ya khenda, hanenu nji ya khenda.” (Matayo 10:7, 8) Uvi athu ako ana tshigina ndo lukuma luene. Ikhale athu ene atshigina nga ndo, tuana landula gulongesa handaga mudimo wene wana monesa egi tudi mukombelela Yehowa nu wana gumusuanguluisa.
TUKAMBE GUJIYA NDAGA JIAVULA
Longuga ha gujiya luholo Matemue a Yehowa ana tshita ngolo ha gulongesa lukuma luabonga ha mavu agasue, nu luholo Yehowa wana gutukuatesa.
Mudimo wa gulongesa lukuma luabonga ha mavu agasue: A) Costa Rica, B) États-Unis, C) Bénin, D) Thaïlande, E) Yap, F) Suède
4. Tuana tshita ngolo ha gulongesa athu avula
Matemue a Yehowa ana tshita ngolo ha gulongesa lukuma luabonga gudi athu a mu ifutshi yagasue. Tala VIDEO, gungima zuelelenu muhu owu walandula.
-
Ndaga itshi idi guguyitugisa ha gumona luholo Matemue a Yehowa adi mutshita ngolo ha gulongesa lukuma luabonga?
Tanga Matayo 22:39 nu Roma 10:13-15, gungima zuelelenu mihu eyi yalandula:
-
Luholo lutshi mudimo wetu wa gulongesa wana monesa egi tuana zumba athu ako?
-
Luholo lutshi Yehowa wana gudivua mukunda nu athu anyi ana longesa lukuma luabonga?—Tala verse 15.
5. Tudi mafuta a mudimo a Nzambi
Tudi nu ndaga jiavula jidi mumonesa egi Yehowa udi mutuameza mudimo wetu. Ha gufezegesa, phangi Paul gu Nouvelle-Zélande watagenele nu mukhetu mumoshi tangua akhalele mulongesa inzo nu inzo mu ngueze. Mu gimenegena gia lusugu luene, mukhetu muene watshitshile gisambu, watangele jina dia Yehowa, wamutogele hagula muthu mumoshi aye amutale. Phangi Paul udi muzuela egi: “Gungima dia matangua thathu, ngahetele gu mufulo wenji wa inzo.”
Tanga 1 Kolinto 3:9, gungima zuelelenu muhu owu walandula:
-
Luholo lutshi lumene lulu tuamona gu Nouvelle-Zélande ludi mumonesa egi Yehowa wana tuameza mudimo wa gulongesa?
Tanga Makalegelo 1:8, gungima zuelelenu muhu owu walandula:
-
Mukunda natshi tudi nu funu ya ukuateshi ha gutagenesa mudimo wetu wa gulongesa?
Wana guyijiya ba?
Phoso nu phoso, tuana heta formasio mu gudibungisa gua mukatshi dia phoso, formasio yene yana gutukuatesa ha gutshita mudimo wa gulongesa. Gula wayile gale mu gudibungisa guetu gua mukatshi dia phoso, itshi udi mutangiza mukunda nu formasio yene?
6. Tuana tumagela mukhuala wa Nzambi ha gulongesa
Mu siekle ya thomo, mbalagaji jiakambele gutunyisa alandudi a Yesu ha gulongesa. Aklisto a mu siekle ya thomo akhalele “mumonesa gutuama dia mafumu egi lukuma luabonga ludi naye gulongesewa.” (Filiphi 1:7) Mangino, Matemue a Yehowa ana tshita nji luholo lumoshi. a
Tanga Makalegelo 5:27-42, gungima zuelelenu muhu owu walandula:
ATHU AKO AJIYA GUHULA EGI: “Mukunda natshi Matemue a Yehowa ana longesa inzo nu inzo?”
-
Mvutu itshi wajiya guahana?
NDAGA WALONGUGA
Yesu watumile alandudi enji ha guya mulongesa lukuma luabonga ha mavu agasue. Yehowa wana kuatesa akombeledi enji ha gutshita mudimo wene.
Mihu ya Guvutugila
-
Luholo lutshi lukuma luabonga luana longesewa ha mavu agasue?
-
Luholo lutshi mudimo wetu wa gulongesa wana monesa egi tuana zumba athu ako?
-
Udi mutangiza egi gulongesa lukuma luabonga guajiya gutusuanguluisa ba? Mukunda natshi?
NDAGA JIKO JIA NDANDO
Tala luholo Matemue a Yehowa ana longesa lukuma luabonga gudi athu a mu membo akoma.
Paris: Témoignage public spécifique aux grandes villes (5:11)
Itshi Matemue a Yehowa atshitshile ha gukuatesa athu alengele membo awo mukunda nu ita?
Ils étanchent la soif spirituelle d’hommes et de femmes réfugiés (5:59)
Tegelela lumene lua muthu mumoshi udi mumonesa egi gulongesa lukuma luabonga tangua diagasue guana gumuhana gusuanguluga guavula.
Tala luholo ba desizio ako abonga ana zula mafumu a leta ana gutukuatesa ha gulongesa lukuma luabonga.
“Les prédicateurs se défendent devant les tribunaux” (Le Royaume de Dieu en action! mukhapho 13)
a Nzambi wana gutuhana njila ha gulongesa. Matemue a Yehowa ashigo nu funu egi mafumu a ha mavu awa a ahane njila ha gulongesa lukuma luabonga.
