IREN MEHN KASUKUHL 21
Ia Duwen Rongamwahwo Eh Kin Lohkseli?
Ni ahnsou keren, Siohwa pahn ketin doadoahngki sapwellime Wehio pwehn kamwomwala atail kahpwal koaros. Rohng wet me inenen mwahu, kahrehda koaros anahne ese met. Sises kupwurki sapwellime tohnpadahk kan ren ehukihong aramas koaros rohng wet! (Madiu 28:19, 20) Ia duwen Sounkadehdehn Siohwa kan ar kin kapwaiada sapwellimen Sises kehkehliko?
1. Ia duwen Madiu 24:14 eh kin pweida rahnwet?
Sises ketin kohpada: “Rongamwahu en Wehio pahn lohkseli wasa koaros me aramas kin mi ie nin sampah.” (Madiu 24:14) Sounkadehdehn Siohwa kan kin perenki wia doadoahk kesempwal wet. Se kin kalohkiseli rongamwahwo nan sampah pwon ni lokaia tohtohsang 1,000! Doadoahk laud wet kin anahne ahnsou, kehl oh soandi mwahu. E sohte kak pweida ma sohte sapwellimen Siohwa sawas.
2. Dahme se kin nantihong wia pwe sen kalohk ong aramas akan?
Se kin kalohk wasa koaros me se kak tuhwong aramas. Duwehte tepin Kristian kan, se kin kalohk “sang ihmw lel ihmw.” (Wiewia 5:42) Wiepe wet kahrehiong at kak kalohkohng aramas rar kei nan ehuehu pahr. Pwehki aramas tohto sohte kin kalapw mi ni imwarail kan, se pil kin kalohk wasa tohto me aramas akan kin pokonpene ie. Ahnsou koaros se kin rapahki ahnsou mwahu kan me se kak koasoiaiong aramas akan duwen Siohwa oh kupwure kan.
3. Ihs me pwukoahki kalohki rongamwahwo?
Kristian mehlel koaros me pwukoahki ehukihong meteikan rongamwahwo. Se uhdahn kesempwalki at pwukoa. Se kin kalohk ni uwen me se kak koaros, pwehki se ese me met kak doarehla mour en aramas akan. (Wadek 1 Timoty 4:16.) Se sohte kin ale pweinen doadoahk wet, pwehki Paipel mahsanih: “Kumwail aleier ni sohte pweipwei, kumwail pil kihwei ni sohte pweipwei.” (Madiu 10:7, 8) Aramas tohto sohte kin rong kiht. Ahpw se kin pousehlahte kalokalohk, pwehki ni at kin wia met se kin peikiong Siohwa oh kaperenda kupwure.
KALAUDEHLA OMW ESE MET
Kalaudehla omw ese duwen Sounkadehdehn Siohwa kan ar kin nannanti kalohk nan sampah pwon, oh duwen Siohwa eh kin ketin sewesei kiht.
Kalohk nan sampah pwon: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Se kin nantihong lella rehn aramas koaros
Sounkadehdehn Siohwa kan kin nantihong lohkihong aramas akan rongamwahwo wasa koaros. Kilang KISIN KASDO, oh mwuri koasoiapene peidek wet.
-
Dahme ke medewehki duwen Sounkadehdehn Siohwa kan ar kin nantihong kalohk ong aramas koaros?
Wadek Madiu 22:39 oh Rom 10:13-15, oh mwuri koasoiapene peidek pwukat:
-
Ia duwen at doadoahk en kalohk eh kin kasalehda me se poakohng aramas akan?
-
Ia sapwellimen Siohwa pepehm duwen irail kan me kin kalohki rongamwahwo?—Kilang iretikitik 15.
5. Se kin iang Koht doadoahk
Mie soahng tohto me kin wiawi me kasalehda Siohwa kin ketin kaweid at doadoahk. Karasepe, nan New Zealand, mie brother men me adaneki Paul me tuhwongedi lih emen ni eh kalohkseli ni ihmw kan ni mwurin souwas ehu. Nimensengo, liho kapakapohng Koht, ni eh doadoahngki mwaren Koht, Siohwa, oh peki emen en kalohkla reh. Paul nda, “Awa siluh mwuri, I lella ni imweo.”
Wadek 1 Korint 3:9, oh mwuri koasoiapene peidek wet:
-
Ia duwen soahng kan me duwehte me wiawi nan New Zealand eh kin kasalehda me Siohwa kin ketin kaweid doadoahk en kalohk?
Wadek Wiewia 1:8, oh mwuri koasoiapene peidek wet:
-
Pwe sen kapwaiada at doadoahk en kalohk, dahme kahrehda sapwellimen Siohwa sawas anahn?
Ke ese met?
Nan ehuehu wihk nan at mihting en wihk kan, se kin alehdi kasukuhl me kin sewese at doadoahk en kalohk. Ma ke iangehr towehda ehu mihting pwukat, dahme ke medewehki duwen kasukuhl wet?
6. Se kin peikiong sapwellimen Koht kehkehlik en kalohk
Ni mwehin tepin Kristian kan, irail me uhwong kan kin song kauhdi sapwellimen Sises tohnpadahk kan ren dehr kalohk. Tepin Kristian kan kin pere oh “alehdi pwuhng en kalohki rongamwahu sang rehn irail kan me ahneki manaman.” (Pilipai 1:7) Sounkadehdehn Siohwa kan kin wia soahngohte rahnwet. a
Wadek Wiewia 5:27-42, oh mwuri koasoiapene peidek wet:
-
Dahme kahrehda se sohte pahn uhdihsang doadoahk en kalohk?—Kilang iretikitik 29, 38 oh 39.
MA EMEN IDEK: “Dahme kahrehda Sounkadehdehn Siohwa kan kin kalohk sang ihmw lel ihmw?”
-
Ia duwen omw pahn sapeng?
DAHME KE SUKUHLKIER
Sises ketin kehkehlingkihong sapwellime tohnpadahk kan ren lohki rongamwahwo nan sampah pwon. Siohwa kin ketin sewese sapwellime aramas akan ren wia doadoahk wet.
Kousapahl
-
Ia duwen rongamwahwo eh kin lohkseli nan sampah pwon?
-
Ia duwen at doadoahk en kalohk eh kin kasalehda me se poakohng aramas akan?
-
Ke medewe me doadoahk en kalohk kak wiahiong kitail en peren? Dahme kahrehda?
PIL TEHK
Kilang duwen Sounkadehdehn Siohwa kan ar kin kalohk ong aramas akan nan kahnimw laud kan.
Dahme Sounkadehdehn Siohwa kan wia pwehn sewese irail kan me tangasang ar wasa?
Rong duwen emen me kawehwehda dahme kahrehda e nsenamwahu ni eh doadoahngki eh mour en kalohkseli.
Kilang ekei pilipil kesempwal kan me mwoalen kopwung wiahda me kamengeila at doadoahk en kalohk.
“Kingdom Preachers Take Their Case to Court” (God’s Kingdom Rules!, chapter 13)
a Koht me ketin mahsanih sen wia doadoahk en kalohk. Kahrehda, Sounkadehdehn Siohwa kan sohte anahne alehdi mweimwei sang koperment pwe ren kalohki rongamwahwo.
