APII 21
Akapeea te Nuti Meitaki me Tutu Aereia?
Kare e roa atu ana ka takore a Iehova i to tatou manamanata, na roto i tona Patireia. E nuti meitaki teia kia akakiteia ki te katoatoa. Ka inangaro a Iesu i tana au pipi kia akakite i teia nuti ki te katoatoa! (Mataio 28:19, 20) Akapeea te Au Kite o Iehova me ariu ki ta Iesu akaue anga?
1. Akapeea a Mataio 24:14 te akatupuia anga i teia tuatau?
Kua totou a Iesu: “E tutu aereia te evangelia o te basileia nei, e kako rava ake te ao katoa nei.” (Mataio 24:14) Mataora te Au Kite o Iehova i te rave i teia angaanga puapinga. Te tutu aere nei matou i te nuti meitaki ki te ao katoa tere atu i te 1,000 reo! Ka anoanoia te maroiroi e kia akaaere meitakiia teia angaanga maata. Kare rava teia angaanga e tupu me kare te tauturu a Iehova.
2. Eaa ta matou e rave nei no te tutu aere ki te tangata?
Te tutu aere nei rai matou ki te tangata. Mei te au Kerititiano o te anere mataiti mua, ka tutu aere matou “i tera are i tera are.” (Angaanga 5:42) Na roto i teia ravenga mako kua rauka ia matou te tutu aere ki te mirioni ua atu tangata. Me kare e tangata i te kainga, ka tutu aere matou ki te au ngai tangata. Ka kimi matou i te au atianga no te akakitekite ia Iehova e tona au akakoroanga.
3. Naai teia apainga kia tutu aere i te nuti meitaki?
E apainga teia na te au Kerititiano mou kia tutu aere i te nuti meitaki ki tetai ke. Ka rave meitaki matou i te reira. Ka tutu aere matou noatu to matou turanga tukeke, no te mea ka akaora te reira i te tangata. (E tatau ia 1 Timoteo 4:16.) Kare matou e tutakiia ana no teia angaanga tutu aere, karanga te Pipiria: “E mea o mai ua to kotou, e oronga ua atu oki kotou.” (Mataio 10:7, 8) Kare te katoa anga o te tangata e āriki i ta matou karere. Inara ka rave ua atu matou no te mea e tuanga teia no ta matou akamorianga e ka mataora a Iehova.
KIMI OONU
Apii kia kite maata atu akapeea te Au Kite o Iehova me tutu aere i te ao katoa, e akapeea a Iehova te tauturu anga ia ratou.
Tutu aere anga i te ao katoa: (A) Costa Rica, (E) Marike, (NG) Benin, (I) Thailand, (K) Yap, (M) Sweden
4. Angaanga pakari matou kia tutu aere ki te katoatoa
Angaanga maroiroi te Au Kite o Iehova kia tutu aere i te nuti meitaki ki te tangata ravarai. Akatangi i te VITIO, e oti uriuri i te uianga ka aru mai.
-
Eaa taau e umere ra i te maroiroi o te Au Kite o Iehova no te tutu aere?
E tatau ia Mataio 22:39 e Roma 10:13-15, e oti uriuri i teia au uianga:
-
Akapeea ta matou angaanga tutu aere te akaari anga e te aroa ra matou i to matou tangata tupu?
-
Eaa to Iehova manako no te aronga e tutu aere ra i te nuti meitaki?—Akara i te irava 15.
5. E oa rave angaanga matou no te Atua
E maata te au tua te akaari maira e te arataki nei a Iehova i ta matou angaanga. Ei akaraanga, i Nu Tireni kua aravei te taeake ko Paul i tetai vaine i te ngutupa, iaia e tutu aere ra i te avatea. I te reira popongi tikai, kua pure te reira vaine ki te Atua, te kapiki anga i to te Atua ingoa, ko Iehova, te pati anga kia atoro mai tetai tangata iaia. “E toru ora i muri mai,” i na Paul ei, “kua tae au ki tona ngutupa.”
E tatau ia 1 Korinetia 3:9, e oti uriuri i teia uianga:
-
Akapeea teia au tua mei to Nu Tireni, te akaari anga e te arataki nei a Iehova i te angaanga tutu aere?
E tatau ia Angaanga 1:8, e oti uriuri i teia uianga:
-
Eaa matou i anoano ei i te tauturu a Iehova no te akaoti i ta matou angaanga tutu aere?
Kua kite ainei koe?
I te au epetoma ravarai, i ta matou uipaanga epetoma, ka tereniia matou no te tutu aere. Me kua aere ana koe ki tetai o ta matou uipaanga, eaa toou manako i te tereni anga tei orongaia?
6. Akarongo matou ki te akaue anga a te Atua kia tutu aere
I te anere mataiti mua, kua tauta te aronga patoi i te arai i te au pipi a Iesu kia tutu aere. Kua paruru te au Kerititiano mua i to ratou tika anga no “te akamou anga i te evangelia nei.” (Philipi 1:7) Te rave nei rai te Au Kite o Iehova i te reira i teia tuatau. a
E tatau ia Angaanga 5:27-42, e oti uriuri i teia uianga:
-
Eaa tatou ka kore ei e akamutu i te angaanga tutu aere?—Akara i te irava 29, 38, e te 39.
KARANGA TE TANGATA: “Eaa te Au Kite o Iehova i tutu aere ei mei tera are ki tera are?”
-
Akapeea koe me pau?
APIIANGA
Kua akaue a Iesu i tana au pipi kia tutu aere i te nuti meitaki ki te ao katoa. Te tauturu nei a Iehova i tona iti tangata kia rave i teia angaanga.
Uriurianga
-
Akapeea te nuti meitaki te tutu aereia anga i te ao katoa?
-
Akapeea te angaanga tutu aere te akaari anga e te aroa ra tatou i to tatou tangata tupu?
-
I toou manako e angaanga mataora ainei te angaanga tutu aere? No teaa ra?
KIMI KIMI
Akara akapeea te Au Kite o Iehova me tutu aere ki te tangata i te au oire mamaata.
Akapeea te Au Kite o Iehova te tauturu anga i te aronga tuitarere?
Akara akapeea tetai tuaine te rave maroiroi anga i te angaanga tutu aere e kua mataora aia.
Akara kia kite i te au tukuanga tika a te akavaanga tei akamaata atu i te angaanga tutu aere o te nuti meitaki.
a Na te Atua i akaue ia matou kia tutu aere. No reira kare te Au Kite o Iehova e anoanoia kia pati i te tikaanga a te kavamani kia tutu aere i te nuti meitaki.
Ka Reka Katoa Koe i Teia
AU UIANGA A TE TANGATA
Eaa te Uriurianga Apii Pipiria Tei Orongaia e te Au Kite o Iehova?
Na roto i te uriurianga apii kare e tutaki tei orongaia e te Au Kite o Iehova, ka rauka ia koe i te taangaanga i tetai ua atu urianga o te Pipiria. E pati atu i toou ngutuare tangata me kore tetai au oa kia kapiti mai kia koe.
