ЛЕКЦИЈА 21
Сар проповединела пе о шукар хабери?
Панда хари, о Јехова преку пло Царство ка решинел са амаре проблемија. Акава шукар хабери на ваљани те гарава ле само аменге. О Исус мангља лескере следбеникија те вакерен акава хабери сариненге! (Матеј 28:19, 20). Сар е Јеховаскере сведокија икерена адава со заповединѓа о Исус?
1. Сар о лафија таро Матеј 24:14 исполнинена пе авдиве?
О Исус пророкујнѓа: „Акава шукар хабери башо Царство ка проповединел пе ко цело свето“ (Матеј 24:14). Е Јеховаскере сведокија тане бахтале со шај те учествујнен ко акава проповедничко дело. Амен проповединаја о шукар хабери ко цело свето хем адава ко повише таро 1.000 чхибја! Те шај те керел пе акава бут баро дело ваљани бут време, сила хем ваљани шукар те организиринел пе. Бизо е Јеховаскири помош акава нашти те керел пе.
2. Со са кераја те шај те проповедина е манушенге?
Амен проповединаја сегде коте со шај те аракха мануша. Исто сар со керена сине о христијања таро прво веко, амен да проповединаја „таро кхер ко кхер“ (Дела 5:42). Преку акава начин амен шај те кера лафи милиоња манушенцар секова берш. Адалеске со нашти е манушен секогаш те аракха кхере, амен исто аѓаар проповединаја ко бут прометна тхана. Секогаш родаја прилике те вакера е јаверенге башо Јехова хем башо адава со ов ка керел е манушенге.
3. Кој ваљани те проповединел о шукар хабери?
Са е чачутне христијанен иси лен одговорност те проповединен о шукар хабери е јаверенге. Амен сериозно дикхаја ки акаја задача. Адалеске со сием свесна кај акава хабери шај те спасинел е манушенгоро живото, даја амендар са те проповедина кобор со шај спрема амаре околностија. (Читин 1. Тимотеј 4:16.) Амен на добинаја паре башо адава со проповединаја, соске и Библија вакерела: „Бизо паре добинѓен, бизо паре ден“ (Матеј 10:7, 8). Иако бут мануша на мангена те шунен, амен понадари да проповединаја соске аѓаар служинаја е Јеховаске хем кераја ле бахтало.
ДОЗНАЈН ПОВИШЕ
Сикљов повише башо адава кобор е Јеховаскере сведокија трудинена пе те проповединен ко цело свето хем сар о Јехова поможинела аменге.
Проповединела пе ко цело свето: (1) Костарика, (2) САД, (3) Бенин, (4) Тајланд, (5) Јап, (6) Шведска
4. Амен бут трудинаја амен те реса џи ко са о мануша
Е Јеховаскере сведокија бут трудинена пе те проповединен о шукар хабери е манушенге ко секова тхан. Дикх о ВИДЕОКЛИПИ, а пало адава керен лафи башо акава пучибе:
-
Со мислинеа башо адава со е Јеховаскере сведокија бут трудинена пе те проповединен?
Читин Матеј 22:39 хем Римјаните 10:13-15, а пало адава керен лафи башо акала пучиба:
-
Сар адава со проповединаја сикавела кај мангаја амаре пашутнен?
-
Сар дикхела о Јехова ко окола со проповединена о шукар хабери? (Дикх о стихо 15.)
5. Амен сием е Девлескере соработникија
Бут искуствија сикавена кај о Јехова водинела амаро проповедибе. На пример, џикоте проповединела сине палоручко таро кхер ко кхер, о пхрал о Пол таро Нов Зеланд аракхља јекхе џувља. Адаја џувли сабајле молинѓа пе е Девлеске те бичхалел некас таро пле слуге. Ки молитва ој користинѓа е Девлескоро анав, Јехова. О Пол вакерела: „Трин саатија покасно ме аљум ко лакоро удар“.
Читин 1. Коринќаните 3:9, а пало адава керен лафи башо акава пучибе:
-
Сар сикавена о искуствија, сар на пример адава таро Нов Зеланд, кај о Јехова водинела о проповедибе?
Читин Дела 1:8, а пало адава керен лафи башо акава пучибе:
-
Соске ваљани аменге е Јеховаскири помош те шај те проповедина?
Дали џанљан?
Секова курко ко јекх таро амаре состанокија амен сикљоваја сар те проповедина. Ако сиан сине присутно ко јекх асавко состанок, со мислинеа ту баши адаја обука со добинаја?
6. Послушна сием ки е Девлескири заповед те проповедина
Ко прво веко о противникија мангле те чхинавен е Исусескере следбеникон те проповединен. Ама, о прва христијања англо закони бранинѓе пумаро право те проповединен о шукар хабери (Филипјаните 1:7). Авдиве, е Јеховаскере сведокија керена о исто. a
Читин Дела 5:27-42, а пало адава керен лафи башо акава пучибе:
-
Соске нане те чхинава те проповедина? (Дикх о стихија 29, 38 хем 39.)
НЕСАВЕ ШАЈ ПУЧЕНА: „Соске е Јеховаскере сведокија џана таро кхер ко кхер?“
-
Сар ка одговорине ту?
СО СИКЛИЛЕМ
О Исус вакерѓа пле следбениконге те проповединен о шукар хабери ко цело свето. О Јехова поможинела пле народо те керел адаја задача.
Сар ка одговорине?
-
Сар проповединела пе о шукар хабери ко цело свето?
-
Соске амаро проповедибе сикавела кај мангаја амаре пашутнен?
-
Со мислинеа, дали о проповедибе шај те керел амен бахтале? Соске мислинеа аѓаар?
ИСТРАЖИН
Дознајн саво бахталипе анѓа јекхе пхењаке адава со посветинѓа цело пло живото ко проповедибе.
Читин башо несаве важна судска одлуке кола со керѓе полокхо те проповединел пе о шукар хабери.
„Законско потврдување на нашето право да проповедаме“ (Божјето Царство владее!, поглавје 13)
a И задача те проповединел пе авела таро Девел. Адалеске е Јеховаскере сведоконге на ваљани дозвола таро манушикане владе те проповединен о шукар хабери.
Шај исто ка интересинел тут
НАЈЧЕСТА ПУЧИБА
Сар изглединела о библиско курси со нудинена е Јеховаскере сведокија?
Џикоте икерела пе о бесплатно библиско курси, шај те користине било кова превод тари Библија. Ко курси шај те канине некас тари тли фамилија или несаве амале.
