ITYOUGH 21
Ka Pasen Loho u Dedoo Nena?
Ica a kera gba ga tsô Yehova una va a Tartor na, nahan ua bee a mbamzeyol asev cii. Loho la doo je ka u se ôr mbagenev kpaa. Yesu yange soo ér mbadondon un ve pase hanma or loho ne! (Mateu 28:19, 20) Mbashiada mba Yehova mba eren kwagh u Yesu ôr ne nena?
1. Mateu 24:14 ngu kuren sha mi sha ayange a ase nena?
Yesu yange tsenga ôron ér, “a pase loho u dedoo u Tartor ne a tser tar.” (Mateu 24:14) Mbashiada mba Yehova mba eren tom u injaa ne saan saan. Se mba pasen loho u dedoo sha tar cii ken ijô i hemban 1,000! Ka i gba u se nôngo kwagh kpoghuloo shi se sôr akaa vough vough ve se fatyô u eren zegetom ne ye. Man ka sha iwasen i Yehova tseegh se fatyô u eren u ye.
2. Ka nyi ka se er sha er se pase ior kwagha?
Hanma ijiir i se zough a ior cii ka se pase ve kwagh. Se mba pasen kwagh “sha uya uya” er Mbakristu mba sha ayange a mbaapostoli la kpa eren nahan. (Aerenakaa 5:42) Gbenda u se pasen kwagh ne na yô, hanma inyom ka se pase ior umiliôn kwagh. Nahan kpa, er ashighe agen ior ka ve lu hen uya vev ga yô, ka se pase kwagh sha ajiir kpishi a ior ve banen her ga yô. Hanma shighe yô, ka se keren aan a se ôr ior kwagh u Yehova kua akaa a a we ishima u eren la.
3. Ka an i gbe u nana pase loho u dedoo?
Gba u Mbakristu mba mimi cii vea pasen ior loho u dedoo. Se mba nengen tom wase ne beelee ga. Ka se pase kwagh sha afatyô wase cii, sha ci u se fa ser kwaghpasen ne una fatyô u waren ior. (Ôr 1 Timoteu 4:16.) Mba kimbin se sha tom ne ga, sha ci u Bibilo kaa ér: “Ne ngohol gbilin, nahan na nen gbilin.” (Mateu 10:7, 8) Kpa ka hanma or nan keghen ato a loho u se pasen ne ga. Nahan kpa se mba gbe uwer u pasen kwagh ga, sha ci u se fa wang ser ka sea eren nahan yô, se ungwan imo i Yehova shi se na i saan un iyol.
HEN KWAGH I ZA SHIMI
Seer fan er Mbashiada mba Yehova ka ve nôngo kwagh kpoghuloo sha er vea pase kwagh sha tar cii yô, shi nenge er Yehova a lu wasen se yô.
Mba pasen kwagh sha tar cii: (A) Costa Rica, (B) Amerika, (C) Benin, (D) Thailand, (E) Yap, (F) Sweden
4. Ka se nôngo kpoghuloo ser se pase ior cii kwagh
Mbashiada mba Yehova ka ve nôngo kwagh kpoghuloo sha er vea pase ior loho u dedoo hanma ijiir cii yô. Nenge VIDIO i i lu heen ne, maa lam nen sha mpin u a dondo ne.
-
Ka nyi i doo u sha tom u Mbashiada mba Yehova ve lu eren kpoghuloo sha er vea pase ior kwagh laa?
Ôr Mateu 22:39 man Mbaroma 10:13-15, maa lam nen sha mbampin mban:
-
Tom wase u pasen kwagh ne tese ér ior mba ve we ndor a vese doo se ishima nena?
-
Yehova nengen ior mba ve pasen loho u dedoo la nena?—Nenge ivur 15.
5. Se mba mbaeren tom a Aôndo imôngo
Akav nga kpishi a a tese ér Yehova ngu hemen tom wase ne yô. Ikyav i tesen yô, anmgbian ugen ken tar u New Zealand u i yer iti na ér Paul yô, yange due lu pasen kwagh sha uya uya atetan maa za zua a kwase ugen. Sha iyange shon la pepe, kwase la er msen hen Aôndo, yila un sha iti na i Yehova la jighilii ér ma a tindi or ma nan va pase un kwagh. Paul kaa ér: “Yange ahwa nga karen atar maa m za nyôr hen hunda na.”
Ôr 1 Mbakorinte 3:9, maa lam nen sha mpin ne:
-
Ikyav i ken tar u New Zealand la kua akaa agen a a er yô, tese er Yehova a lu hemen tom u pasen kwagh ne nena?
Ôr Aerenakaa 1:8, maa lam nen sha mpin ne:
-
Er nan ve i gbe u saa Yehova una wase se ve se fatyô u eren tom wase u pasen kwagh nee?
U fa kpa?
Hanma kasua ka i tese se igbenda i se seer fan u pasen kwagh yô, ken mkombo u se eren ken atô u kasua la. Aluer u vande zan mkombo ne yô, u nenge akaa a i tesen se ken mbamkombo mban la nena?
6. Se mba kor tindi u Aôndo a we ér se pase kwagh la
Sha ayange a mbaapostoli la, mbaahendanev nôngo ér vea yange mbadondon Yesu ve de u pasen kwagh. Mbakristu mba tsuaa mban yange ve ‘ôr ajir kpoghuloo’ sha er vea “zua a ian i pasen loho u dedoo” yô. (Mbafilipi 1:7) Nyian ne kpa, kape Mbashiada mba Yehova ve eren je la. a
Ôr Aerenakaa 5:27-42, maa lam nen sha mpin ne:
ALAGHGA ORGEN NANA PINE ÉR: “Er nan Mbashiada mba Yehova ve pasen ior kwagh sha uya uya?”
-
We u kaa wer nyi?
KA NYI U HENE?
Yesu yange kaa a mbadondon un ér ve za pase akuraior cii loho u dedoo. Yehova ngu wasen ior nav u eren tom ne.
Mbampin mba umbur kwagh u i hen yô
-
Mba pasen loho u dedoo sha tar cii nena?
-
Loho u dedoo u se pasen ne tese ér ior mba ve we ndor a vese doo se ishima nena?
-
U nenge wer tom u kwaghpasen ua fatyô u nan or msaanyolo? Er nan u ôr nahana?
SEER HENEN KWAGH
Nenge er Mbashiada mba Yehova ve pasen ior kwagh sha ugeri mba vesen yô.
Ka nyi Mbashiada mba Yehova ve er sha er vea wase ior mba yevese ityava?
Ungwa er kwase ugen a pase er un ne uma na cii u pasen kwagh ve i saan un iyol yô.
Hen kwagh u ajir a vesen a se hembe ken koti, nahan a wase se se ze hemen u pasen loho u dedoo yô.
“Mbapasen Kwagh u Tartor Za Wa Ajir ken Koti” (Tartor u Aôndo Ngu Hemen!, ityough 13)
a Ka Aôndo a ne se ian i pasen kwagh ye. Sha nahan yô, gba u Mbashiada mba Yehova vea tôô ian hen ugomoti mba uumace cii ve vea pase loho u dedoo ga.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
