NGUDO 21
Mafhungo Maḓifha A Khou Ḓivhadzwa Hani?
Hu si kale, Yehova u ḓo shumisa Muvhuso wawe u itela u fhelisa thaidzo dzashu dzoṱhe. Enea ndi mafhungo maḓifha ane muṅwe na muṅwe u tea u a pfa. Yesu o vha a tshi ṱoḓa uri vhatevheli vhawe vha vhudze vhathu vhoṱhe enea mafhungo! (Mateo 28:19, 20) Ṱhanzi dza Yehova vha ita hani zwe Yesu a laedza?
1. Zwi re kha Mateo 24:14 zwi khou itea hani ṋamusi?
Yesu o dzula o amba uri: “Mafhungo maḓifha a Muvhuso a ḓo ḓivhadzwa ḽifhasini ḽoṱhe.” (Mateo 24:14) Ṱhanzi dza Yehova vha takalela u ita wonoyu mushumo wa ndeme. Ri khou ḓivhadza mafhungo maḓifha u mona na ḽifhasi ḽoṱhe nga nyambo dzi fhiraho 1 000! Hu ṱoḓea uri ri ite zwoṱhe zwine ra nga kona na u dzudzanyea u itela u ita wonoyu mushumo muhulwane. Ri nga si kone u ita wonoyu mushumo arali ri sa thusiwi nga Yehova.
2. Ri ita mini u itela u ḓivhadza vhathu mafhungo maḓifha?
Ri ḓivhadza mafhungo maḓifha huṅwe na huṅwe hune ra nga wana hone vhathu. U fana na Vhakriste vha ḓanani ḽa u thoma ḽa miṅwaha, ri ḓivhadza mafhungo maḓifha “nnḓu nga nnḓu.” (Mishumo 5:42) Yeneyi nḓila yo dzudzanyeaho i ita uri ri kone u swikelela vhathu vhanzhi-vhanzhi ṅwaha muṅwe na muṅwe. Ri dovha ra ḓivhadza mafhungo maḓifha fhethu ha vhomuthumunzhi nga nṱhani ha uri vhathu vha vha vha siho mahayani nga zwiṅwe zwifhinga. Ri dzula ri tshi ṱoḓa zwibuli zwa u vhudza vhathu nga ha Yehova na zwine a ṱoḓa u zwi ita.
3. Ndi vhonnyi vhane vha tea u ḓivhadza mafhungo maḓifha?
Vhakriste vhoṱhe vha vhukuma vha na vhuḓifhinduleli ha u vhudza vhaṅwe mafhungo maḓifha. Ri dzhiela nṱha mushumo washu. Ri ita zwoṱhe zwine ra nga kona u itela u ḓivhadza vhaṅwe mafhungo maḓifha ngauri zwi nga ita uri vha tshidzwe. (Vhalani 1 Timotheo 4:16.) A ri badelwi u ita wonoyu mushumo ngauri Bivhili i ri: “No ṋewa mahala, ṋeani nga mahala.” (Mateo 10:7, 8) Vhathu vhanzhi a vha ri thetshelesi musi ri tshi vha ḓivhadza mafhungo maḓifha. Fhedzi ri bvela phanḓa ri tshi ḓivhadza mafhungo maḓifha ngauri musi ri tshi ita zwenezwo, ri vha ri tshi khou thetshelesa Yehova nahone zwi ita uri a takale.
GUDANI ZWO ENGEDZEAHO
Gudani zwo engedzeaho nga ha nḓila ine Ṱhanzi dza Yehova vha khou ḓivhadza ngayo mafhungo maḓifha ḽifhasini ḽoṱhe, ni vhone na uri Yehova u ri thusa hani.
U ḓivhadza mafhungo maḓifha shangoni ḽoṱhe: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Ri shuma nga maanḓa u itela u swikelela vhathu vhoṱhe
Ṱhanzi dza Yehova vha ita zwoṱhe zwine vha nga kona u itela u ḓivhadza mafhungo maḓifha kha vhathu hoṱhe-hoṱhe. Ṱalelani VIDIO, ni kone u fhindula mbudziso i tevhelaho.
-
Ndi mini zwine zwa ni takadza nga ha zwine Ṱhanzi dza Yehova vha zwi ita u itela u ḓivhadza mafhungo maḓifha?
Vhalani Mateo 22:39 na Vharoma 10:13-15, ni kone u fhindula mbudziso dzi tevhelaho:
-
U ḓivhadza hashu mafhungo maḓifha zwi sumbedza hani uri ri funa vhahura vhashu?
-
Yehova u ḓipfa hani nga vhane vha ḓivhadza mafhungo maḓifha?—Vhalani vese 15.
5. Ri vhashumisani na Mudzimu
Hu na zwithu zwinzhi zwine zwa khou itea zwine zwa sumbedza uri Yehova u khou livhisa mushumo washu. Sa tsumbo ngei New Zealand, Vho-Paul vho dzhena muḓini wa muṅwe mufumakadzi nga masiari musi vha tshi khou ḓivhadza mafhungo maḓifha nnḓu nga nnḓu. Nga ḽeṋeḽo ḓuvha nga matsheloni, onoyo mufumakadzi o rabela a tshi shumisa dzina ḽa Mudzimu ḽine ḽa vha Yehova, a humbela uri muṅwe muthu a mu dalele. Vho-Paul vho ri: “Ndo swika muḓini wawe nga murahu ha awara tharu.”
Vhalani 1 Vhakorinta 3:9, ni kone u fhindula mbudziso i tevhelaho:
-
Zwe zwa itea New Zealand, zwi sumbedza hani uri Yehova u khou livhisa mushumo wa u ḓivhadza mafhungo maḓifha?
Vhalani Mishumo 1:8, ni kone u fhindula mbudziso i tevhelaho:
-
Ndi ngani ri tshi ṱoḓa u thusiwa nga Yehova uri ri kone u ita mushumo washu wa u ḓivhadza mafhungo maḓifha?
Naa no vha ni tshi zwi ḓivha?
Vhege iṅwe na iṅwe kha muṱangano washu wa vhukati ha vhege, ri gudiswa uri ri nga ḓivhadza hani mafhungo maḓifha. Arali no no vhuya na vha hone kha muṅwe wa yeneyi miṱangano, ni vhona hani nḓila ine ra gudiswa ngayo?
6. Ri thetshelesa ndaela ya Mudzimu ya u ḓivhadza mafhungo maḓifha
Ḓanani ḽa u thoma ḽa miṅwaha, vhapikisi vho lingedza u thivhela vhatevheli vha Yesu uri vha si ḓivhadze mafhungo maḓifha. Vhakriste vha u thoma vho lwela ndugelo yavho ya u ḓivhadza mafhungo maḓifha nga u “imelela mafhungo maḓifha nga lwa mulayo.” (Vhafilipi 1:7) Ṱhanzi dza Yehova vha ita zwi fanaho ṋamusi. a
Vhalani Mishumo 5:27-42, ni kone u fhindula mbudziso i tevhelaho:
MUṄWE MUTHU A NGA VHUDZISA URI: “Ndi ngani Ṱhanzi dza Yehova vha tshi ya nnḓu nga nnḓu?”
-
Inwi ni nga ri mini?
NO GUDA MINI?
Yesu o vhudza vhatevheli vhawe uri vha ḓivhadze mafhungo maḓifha kha tshaka dzoṱhe. Yehova u khou thusa vhathu vhawe uri vha ite wonoyu mushumo.
Ni Kha Ḓi Zwi Humbula?
-
Mafhungo maḓifha a khou ḓivhadzwa hani ḽifhasini ḽoṱhe?
-
Mushumo une ra u ita u sumbedza hani uri ri funa vhahura vhashu?
-
Naa ni vhona u nga u ḓivhadza mafhungo maḓifha zwi nga ita uri ri takale? Ndi ngani ni tshi ralo?
WANANI ZWO ENGEDZEAHO
Vhonani uri Ṱhanzi dza Yehova vha ḓivhadza hani mafhungo maḓifha ḓoroboni khulwane.
Fulo Ḽo Khetheaho Ḽa U Huwelela Nga Tshigariki Ngei Paris (5:11)
Ndi zwifhio zwe Ṱhanzi dza Yehova vha zwi ita u itela u thusa vhathu vho shavhelaho kha maṅwe mashango?
Ipfani muṅwe a tshi amba uri ndi ngani zwi tshi mu takadza u ḓivhadza mafhungo maḓifha tshifhinga tshoṱhe.
Gudani nga ha dziṅwe phetho dza ndeme dze dza itwa nga khothe dze dza ita uri zwi ri lelutshele u ḓivhadza mafhungo maḓifha.
“Vhahuweleli Vha Muvhuso Vha Isa Mafhungo Avho Khothe” (Muvhuso wa Mudzimu U A Vhusa!, ndima ya 13)
a Mudzimu ndi ene ane a ri vhudza uri ri ḓivhadze mafhungo maḓifha, ndi ngazwo Ṱhanzi dza Yehova vha sa ṱoḓi thendelo kha vhavhusi ya uri vha ḓivhadze mafhungo maḓifha.
You May Also Like
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
