LIJIGANYO 21
Ana Ngani Syambone Sikusalalichidwa Mwamtuli?
Pamkaŵapa Yehofa chakamulichisye masengo Uchimwene wakwe kuti amasye yakusawusya yetu yosope. Jeleji jili ngani jambone jatukusosekwa kwasalilaga ŵane. Ni ligongo lyakwe Yesu jwasakaga kuti ŵakumkuya ŵakwe ŵasalileje ŵane ngani jamboneji. (Mateyu 28:19, 20) Nambo ana ŵa Mboni sya Yehofa akusatendaga yamtuli pakukuya yaŵalamwile Yesuyi?
1. Ana lilemba lya Mateyu 24:14 likukwanilichikwa mwamtuli masiku agano?
Yesu jwaŵechete chilepe kuti: “Ngani Syambone syakwamba ya Uchimwene wa Mlungu tisichilalichidwa pa chilambo chosope chapasi.” (Mateyu 24:14) Ŵa Mboni sya Yehofa akusasangalalaga kukamula masengo gakusosekwa mnopega. M’weji tukusalalichilaga ngani syambonesi pachilambo chosope mu yiŵecheto yakupunda 1,000. Nambo kuti masengo gekulungwaga gakomboleche, pakusasosekwa kulipeleka ni mtima wosope soni kuŵa ŵakamulana. Konjechesya pelepa masengoga nganigaŵa gakomboleche pali pangali chikamuchisyo cha Yehofa.
2. Ana tukusatenda yamtuli kuti twalalichile ŵandu?
Tukusalalichila kulikose kwampaka twasimane ŵandu. Mpela muŵatendelaga Aklistu ŵakalakala, m’wejisoni tukusalalichilaga “m’majumba ga ŵandu.” (Masengo 5:42) Litalali likusatukamuchisya kuti tulalichileje ŵandu ŵajinji chaka chilichose. Nambo ligongo lyakuti ndaŵi sine ŵandu ŵangasimanikwaga panyumba, tukusalalichilasoni mmalo gakusasimanikwa ŵandu ŵajinji. Ndaŵi syosope tukusakamulichisyaga masengo upile uliwose kuti twasalile ŵane yakwamba Yehofa soni yakulinga yakwe.
3. Ana ni ŵani ŵakusosekwa kukamula masengo gakulalichilaga?
Aklistu ŵasyesyene ni ŵakusosekwa kwalalichilaga ŵane ngani syambone. M’weji tukusagawonaga masengoga kuŵa gakusosekwa mnope. Myoyo tukusatendaga yiliyose yampaka tukombole kuti twalalichile ŵane. Tukusatendaga yeleyi ligongo lyakumanyilila kuti masengoga chakulinga chakwe chili kulupusya umi wa ŵandu. (Aŵalanje 1 Timoteo 4:16.) Chakulinga chetu patukukamula masengoga ngaŵa kupata mbiya, ligongo Baibulo jikusati, ‘Mwapochele mwalulele, myoyo mpelechesoni mwalulele.’ (Mateyu 10:7, 8) Nganaŵa ŵandu wosope ŵampaka apikanile utenga wetu. Nambope tukusapitilisya kulalichila ligongo lyakuti masengoga gali mbali ja utumiki watukusamtendelaga Mlungu. Soni jwalakwe asasangalalaga patukulalichila.
KULIJIGANYA YEJINJI
Amanyilile yejinji yakusatenda ŵa Mboni sya Yehofa pakulalichila mwakulipeleka pachilambo chosope. Soni alole yakusati Yehofa pakwakamuchisya.
Kulalichila pachilambo chosope: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Tukusalimbichilaga kuti twalalichile ŵandu ŵajinji
Kuti ŵayichile ŵandu kulikose kwali, ŵa Mboni sya Yehofa akusasosekwa kulipeleka ni mtima wosope. Alolele FIDIYO, kaneko akambilane chiwusyo achi.
-
Ana ni chichi chachikwasangalasya wawojo ni yakusatenda ŵa Mboni sya Yehofa pakulalichila mwakulipeleka?
Aŵalanje Mateyu 22:39 soni Aloma 10:13-15, kaneko akambilane yiwusyo ayi:
-
Ana masengo getu gakulalichila gakusalosyaga chamtuli kuti tukusitwanonyelaga achimjetu?
-
Ana Yehofa akusiŵawonaga mwamtuli ŵandu ŵakusalalichilaga ngani syambone?—Alole vesi 15.
5. Tuli ŵamasengo achimjakwe ŵa Mlungu
Pana yakutendekwa yejinji yayikulosya kuti Mlungu akulongolela masengo getu. Mwachisyasyo, jwa Mboni jwine jwa ku New Zealand, lina lyakwe Paulo, lisiku line musi ali mkulalichila kunyumba ni nyumba, jwasimene ni mayi ŵane. Kundaŵi kwa lisikuli, mayiŵa ŵaliji ali apopesile kwa Mlungu pakamulichisya masengo lina lyakuti Yehofa. Ni ŵam’ŵendaga kuti mundu jwine ayiche kukwalalichila. Paulo jwasasile kuti, “Pali pagambile kumala maawala gatatu, nakopochele panyumba ja mayiŵa.”
Aŵalanje 1 Akolinto 3:9, NWT kaneko akambilane chiwusyo achi:
-
Ana yayatendekwe ku New Zealand yikulosya chamtuli kuti Yehofa ni jwakusalongolela masengo gakulalichila?
Aŵalanje Masengo 1:8, kaneko akambilane chiwusyo achi:
-
Ana ligongo chichi tukusasosechela chikamuchisyo cha Yehofa kuti tukombole masengo gakulalichila?
Ana akumanyilila?
Misongano jatukusatendaga wiki jilijose tukusalijiganya mwampaka tulalichile. Naga pakwete pasongene nawo, ana ŵagaweni chamtuli majiganyoga?
6. Tukusapikanila lilamusi lya Mlungu lyakuti tulalichileje
Mu ndaŵi ja ŵandumetume, papali ŵakusisya ŵaŵalekasyaga ŵakumkuya ŵa Yesu kuti akalalichilaga. Nambope jemanjaji ŵalinjile kutenda yakuti ŵane akalekasya kulalichila. Ŵatesile yeleyi ‘mwakusichenjela . . . Ngani Syambone.’ (Afilipi 1:7) Yeleyi ni yakusatendasoni ŵa Mboni sya Yehofa masiku agano. a
Aŵalanje Masengo 5:27-42, kaneko akambilane chiwusyo chakuyichisyachi:
-
Ana ligongo chichi ngasituleka kulalichila?—Alolesoni vesi 29, 38, soni 39.
JWINE MPAKA ŴAWUSYE KUTI: “Ana ligongo chichi ŵa Mboni sya Yehofa akusajendagajendaga m’milango ja ŵandu?”
-
Ana mpaka ajanje uli?
YALIJIGANYISYE
Yesu ŵasalile ŵakumkuya ŵakwe kuti alalichile ngani syambone kwa ŵandu wosope. Yehofa akwakamuchisya ŵandu ŵakwe kuti akombole kukamula masengoga.
Yiwusyo Yakuwilisya
-
Ana masengo gakulalichila ngani syambone pachilambo chosope, gakukamulidwa mwamtuli?
-
Ana masengo getu gakulalichila gakusalosyaga chamtuli kuti tukusitwanonyelaga achimjetu?
-
Ana akuganisya kuti masengo gakulalichila mpaka gatutendekasye kuŵa ŵakusangalala? Ligongo chichi?
YAKULINGA YINESONI
Alole yakusati ŵa Mboni sya Yehofa kulalichila m’misinda jekulungwakulungwa.
Masengo Gakulalichila M’malo Gakusimanikwa Ŵandu Ŵajinji ku Paris (5:11)
Ana ŵa Mboni sya Yehofa atesile yamtuli pakusaka kwakamuchisya ŵandu ŵakutila kumangwawo?
Apikane yakuŵecheta mundu jwine ligongo lyakwe akusaŵa jwakusangalala pakukamula masengo gakulalichila.
Amanyilile yalwasasile luŵala lwa magambo yayakamuchisye kuti yikaŵaga yakusawusya kulalichila ngani syambone.
a Mlungu ni jwalamwile kuti tulalichileje. Myoyo ŵa Mboni sya Yehofa ŵangajawula kwa ŵakulamulila kukuŵenda kuti ŵakunde kulalichila.
You May Also Like
YIWUSYO YAKUSANONYELA ŴANDU KUWUSYA
Ana Ljiganyo lya Baibulo Lyakusatendesya Ŵamboni sya Yehofa Likusatendekwa Mwamtuli?
Muyakambilana ni Ŵamboniyi akwete ufulu ŵakamulichisya masengo Baibulo jawo. Yili yakomboleka kwaŵilanga achimjawo soni ŵamwiŵasa mwawo kuti atende nawo lijiganyoli.
