OZUMALƐDƖYƐ 22

Kɛ Ɩkɛyɛ Na Wʋahã Odwokɔba Yɩ Be Wʋahile Mmenii a?

BƆ́

Mmɩlɩ mɔ osumaa Bayɩbʋlʋ yɩ nɩ ebiye a ɛkɛdɩ nɣanlɩ kɛɛ, ‘Ɩsɛ kɛɛ abiyela ɩtɩ odwokɔ eyi be!’ Amba, ɩsɛ kɛɛ abiyela ɩtɩ odwokɔ eyi be! Naasʋ̃, ebiye a wu kunlu ikodu kɛɛ ɛkɛhã mɔɔ ozuma nɩ nwʋ odwokɔ ekehile mmenii. Ma yezunzu kezimɔ ekeli bɔlɔ eyi zʋ na wʋawɔ yɩ tʋ wʋahã Bayɩbʋlʋ nu odwokɔba eyi wʋahile mmenii.

1. Kɛ ɩkɛyɛ na wʋahã mɔɔ ozuma nɩ be wʋahile mmenii mɔɔ ezi bɛ nɩ a?

Gyisɛsɩ yɩ adʋwavʋlɔ yɩ hanlɩ kɛɛ: “Mɔɔ yɛdɩ nɩɩ mɔɔ yɛnwʋ yɩ nɩ yɛlɔ́kʋla yekeyiaki yɩ ɛhanlɛ.” (Egyima 4:20) Nɩ bɛ anyɩ ideli nɔhʋanlɛ yɩ nwʋ nkʋ̃ʋ̃ ma nɩ bɛpɛ kɛɛ abiyela ɩtɩ ebiye. Asʋ̃ ɔzɔ la yɛ ɛtɩ nɣanlɩ a? Sɛ ɔzɔ a, pɛ ɔhʋanɩ mɔɔ okoluwa annidi zʋ ɛkɛhã mɔɔ ozuma nɩ be ekehile wu mmusunwamaa nɩɩ wʋ ɔhɔnwʋmmɔ.—Kɩnga Kolosiyiamaa 4:6.

Kezimɔ ɔkɔwɔ yɩ tʋ

Sɛ ɛ nɩɩ wu mmusunwamaa bɔbɔɔ nkɔmmɔ a, sa ɔkʋla ɛkã kɛɛ: “Muzuma dɩyɛ be mɔɔ ɩyɛ anyɩnlɩlelɛ dapɛnɩ eyi” na wʋava wʋawɔ Bayɩbʋlʋ nu nkɔmmɔwɔlɛ tʋ.
Sɛ wʋ ɔhɔnwʋ be ɩádɩ pɔkɔ anzɛnyɩɩ adwɩnɩndwɩnɩ ɩhyɛ yɩ zʋ a, kã Bayɩbʋlʋ nu odwokɔ be mɔɔ ɩhyɛ ɛzɩzɩbɛ kile yɩ.
Sɛ wʋ egyima nu maa bebizia wʋ kezimɔ dapɛnɩ yɩ awielɩyɛ ɩhɔlɩ a, kã mɔɔ ozumanlɩ wɔ wʋ Bayɩbʋlʋ dɩyɛzumanlɛ yi nu anzɛnyɩɩ asafʋ ayiyialɩyɛ tʋ nɩ be kile bɛ.
Kã jw.org wɛbsayɩtɩ yɩ nwʋ odwokɔ kile wʋ ɔhɔnwʋmmɔ.
Sɛ ɛyɛɛ wʋ Bayɩbʋlʋ dɩyɛzumanlɛ a, tʋ salɛ fʋlɔ mmenii mvʋlɔ ma bɛɣɩla bɛhɩnla wʋ nwʋ anzɛnyɩɩ kile bɛ kezimɔ bekeɣizia Bayɩbʋlʋ dɩyɛzumanlɛ nwʋ nhyɩhyɛlɩyɛ wɔ jw.org zʋ.

2. Mɩnla ti mɔɔ mfasʋ wɔ ɔzʋlɔ kɛɛ yɛ nɩɩ asafʋ yɩ kɔwɔ numɔ kɛyɛ dasɩlɛlilɛ egyima yɩ a?

Kɛ mmenii mɔɔ Gyisɛsɩ yɩ adʋwavʋlɔ yɩ bezi bɛ nkʋ̃ la yɛ bɛhanlɩ odwokɔba yɩ behileli bɛ a. Gyisɛsɩ “ɩzʋ̃manlɩ bɛ anwɩ̃ anwɩ̃ ma belili yɩ anyunu bɔmʋnlɩ wɔ twonwa bela” nu bɔhɔ bɛhanlɩ odwokɔba yɩ. (Luuku 10:1) Ɔzɔ nhyɩhyɛlɩyɛ mɔɔ bɛyɛlɩ bɛva bɛhanlɩ odwokɔ yɩ nɩ, ɩmanlɩ mmenii sʋ̃maa bɛdɩlɩ odwokɔba nɩ. Odwokɔbahanlɛ egyima yɩ mɔɔ bɔwɔlɩ numɔ bɛyɛlɩ nɩ ɩmanlɩ adʋwavʋlɔ yɩ bɛ anyɩ ileli baaba. (Luuku 10:17) Asʋ̃ sa ɔkʋla ɛfa esiye wʋ anyɩ zʋ kɛɛ ɛ nɩɩ asafʋ yɩ kɔwɔ numɔ kɛyɛ dasɩlɛlilɛ egyima yɩ a?

SUMÁ SƲ̃MAA

Sumá kezimɔ ekeli bɔlɔ zʋ na wʋanyia anyɩnlɩlelɛ wɔ odwokɔbahanlɛ egyima yi nu.

3. Gyehova ɩkɔwʋwa wʋ

Abiyemmɔ pɛ kɛɛ bɛkã odwokɔba yɩ be naasʋ̃ bo kunlu ituli kezimɔ mmenii kowu bɛ anzɛnyɩɩ kezimɔ bɛkɛyɛ bɛ dɩyɛ nɩ nwʋ.

Ɩyɛ a wu kunlu itu kɛɛ ɛkɛhã mɔɔ ozuma yɩ nwʋ odwokɔ a? Mɩnla ti a?

Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.

VIDIYO: Mizianlɩ Gyehova Kɛɛ Ɩma Akɛnɣazɩzɩbɛ Mɩ (4:05)

Kɛ ɩyɛlɩ mɔɔ abɩlantɩyɛ yɩ nɩɩ nɣɛdɛkɛ yɩ belili bɔlɔ mɔɔ nɩ bɔwɔ nɩ zʋ a?

Kɩnga Ayɩzaya 41:10, na akʋ̃ bozunzú odwokɔɣizialɛ eyi nwʋ:

Sɛ wu kunlu itu kɛɛ ekeli dasɩlɛ a, mɩnla ɔhʋanɩ zʋ yɛ mpayɩwɔlɛ ɩkɔwʋwa wʋ a?

Ezi a?

Nɩ Gyehova Dasɩvʋlɔmaa sʋ̃maa bezi kɛɛ bɔlɔ́kʋla bɛkɛhã odwokɔba yɩ be bekehile mmenii kyɩ̃. Kɛ ndianwʋ nɩ, nɩ Sergey ɩtɩ nɣanlɩ kɛɛ mfasʋ íni yɩ zʋ meti nɩ ɩyɛ sɩ ɩma yɩ kɛɛ ɩ nɩɩ mmenii kɛdɩndɛ. Naasʋ̃ mmɩlɩ mɔ ɩwɔlɩ yɩ tʋ kɛɛ isumaa Bayɩbʋlʋ yɩ, ɩhanlɩ kɛɛ: “Nɩ mu kunlu itu dɩyɛ, naasʋ̃ mɩhanlɩ mɔɔ nɩ musumaa yɩ nwʋ odwokɔ mihileli mmenii mvʋlɔ. Na mɔɔ ɩyɛ nnwʋánlɩ yɛ lɛ kɛɛ, mɩ dasɩlɛlilɛ nɩ ɩmanlɩ miyianlɩ akɛnɣazɩzɩbɛ na ɩhyɛlɩ mi dedi ɛzɩzɩbɛ sʋ̃.”

4. Da annidi ali

Sɛ ɛkãã odwokɔba yɩ ekehile mmenii a, áma ɔdwɩnɩ mɔɔ ɛkɛhã nwʋ nkʋ̃ la mfomi kezimɔ ɛkɛhã yɩ sʋ̃. Kɩnga 2 Timoti 2:24 nɩɩ 1 Pita 3:15, na akʋ̃ bozunzú ndwokɔɣizialɛ eyimmɔ nwʋ:

Sɛ ɛkãã Bayɩbʋlʋ nu odwokɔ ekehile mmenii a, kɛ ɩkɛyɛ na wʋava ɛhɛlɛlɛ odwokɔ eyi wʋayɛ egyima a?
Wu mmusunwamaa nɩɩ wʋ ɔhɔnwʋmmɔ be wɔ ɛkɛnɩ mɔɔ bɛ nɩɩ wʋ ɩlɛ́yɛ adwɩnɩ. Mɩnla yɛ ɩsɛ kɛɛ ɛyɛ a? Mɩnla yɛ íni kɛɛ ɛyɛ a?
Mɩnla ti mɔɔ ɩkɛyɛ baaba kɛɛ yekoluwa nɣɛlɛbɛ ɔhʋanɩ zʋ yekeɣizia ndwokɔ tɛla kɛɛ yɛkɛva yɛkɛhyɛ bɔ zʋ a?

5. Ɛkã odwokɔba yɩ a ɩkɛma wʋ anyɩ ikele

Gyehova ɩvalɩ egyima iwulalɩ Gyisɛsɩ yɩ sa kɛɛ ɩhã odwokɔba yɩ ihile mmenii. Nɩ kɛ Gyisɛsɩ ibu egyima eyi ise a? Kɩnga Dwɔɔnʋ 4:34, na akʋ̃ bozunzú ndwokɔɣizialɛ eyimmɔ nwʋ:

Sɛ yedi alɩyɛ baaba a, ɩma yenyia nnwʋanlɩ na yɛ anyɩ ide. Mɩnla ti mɔɔ Gyisɛsɩ ɩvalɩ Nyamɩnlɩ yɩ apɛdɩyɛlɛ mɔɔ ebiye yɛ lɛ odwokɔbahanlɛ egyima nɩ idindianlɩ alɩyɛlilɛ nwʋ a?
Sɛ yɛkã odwokɔba yɩ yekile mmenii a ekila a, mɩnla anyɩnlɩlelɛ yɛ yekenyia a?

Adwɩnɩhilelɛ

Sɛ bɛyɛɛ dapɛnɩ avinli dɩyɛzumanlɛ yɩ a, pɛ ɔhʋanɩ mɔɔ ɛkɛva ɔkɔwɔ nkɔmmɔwɔlɛ tʋ.
Fá siye wʋ anyɩ zʋ kɛɛ ɛkɛva wʋ nwʋ okowula sukuulu egyimalilɛ mɔɔ yɛyɛ yɩ wɔ dapɛnɩ avinli dɩyɛzumanlɛ yi nu. Sukuulu egyimalilɛ eyi ikeziyeziye wʋ ma ɔkɔhʋla ɛkɛhã mɔɔ ozuma nɩ be ekehile mmenii mvʋlɔ.
Fá “Abiyemmɔ Bɛkã Kɛɛ” anzɛnyɩɩ “Ebiye a, Abiye Ikeɣizia Kɛɛ” ɔfʋã mɔɔ ɩwɔ buuku eyi nu nɩ suma kezimɔ okowuwa ndwokɔɣizialɛ nɩɩ ndwokɔ mɔɔ bɛkã bɛfa botualɩ nkɔmmɔwɔlɛ zʋ nɩ.

EBIYE A, ABIYE IKEƔIZIA KƐƐ: “Kɛ nninyeni ɩkɔɔ ise a?