Dzaw deuˆ 22
Aˬ dui laˬ kʼaˬ cehˇ˗eu guiˬ lahˬ dawˬ, aˬ joˆ˗ehˇ ja nehˬ nya˗eu nga?
Nawˇ Jaˇliꞈ laꞈ kʼoeˇ˗euˬ yaw tsaˬ yaw dawˇ jeˬ˗ahˇ siˬ nya laˇ ngeh, ‘Yawˬ gʼaˬ na luꞈ gaˇ kawˆ heu˗ahˇ siˬ nya˗eu loˬ nga’ lehˇ noeˬ laˇ˗eu paˬ. Tsaˬ meh. Yawˬ gʼaˬ na luꞈ gaˇ kawˆ heu˗ahˇ siˬ nya˗eu loˬ meh. Ehˇ kʼawꞈ nawˇ yawˬ ha neh ya siˬ˗euˬ jeˬ aˬ cawˬ˗ahˇ maˬ ehˇ nehˬ peuˬ ni guˆ miˇ˗a loˇ? Toˆ˗ehˇ naˇ guˆ˗eu nui ma teu˗ahˇ aˬ joˆ˗ehˇ gʼaˬ leˇ nya˗eu nga? Laˬ kʼaˬ cehˇ˗eu guiˬ lahˬ dawˬ, aˬ cawˬ˗ahˇ laˬ kʼaˬ tiˬ cehˇ aˬ joˆ˗ehˇ tsaꞈ gaˬ nya˗eu nga lehˇ haw ma.
1. Nawˇ dzaw luꞈ˗eu gaˇ kawˆ, nawˇ siˬ nya˗eu tsawˇ haˬ deuˬ˗ahˇ aˬ joˆ˗ehˇ ja nehˬ nya˗eu nga?
Yeˬsuˇ˗euˬ zaˬ lahˇ deuˬ ‘Nga maꞈ neh kʼaˇ ya gaˬ kʼaˇ ya mawˇ˗euˬ gaˇ kawˆ heu maˬ ja˗ehˇ maˬ jawˇ coeˇ nya’ lehˇ ehˇ˗eu meh (Gʼaˬkʼehˇ 4:20) Aˬ yawꞈ maꞈ yaw tsaˬ yaw dawˇ jeˬ˗ahˇ aˇ poeˬ taˬ baw dui dui˗eu miˇ neh, tsawˇ haˬ deuˬ˗ahˇ kʼaˇ gʼeh nya gaˇ neh ja nehˬ mawꞈ˗eu meh. Nawˬ˗ahˇ jiˇ teu loꞈ˗ehˇ gʼeh miˇ˗a laˬ? Toˆ˗ehˇ naˇ aˬ geu ngeh yehꞈ laˇ nga lehˇ haw˗awˇ, nawˬ neh ya dzaw˗euˬ jeˬ nymˇ jiˇ laꞈ kʼoeˇ˗euˬ deuˬ hawˇ˗eu cawˬ deuˬ˗ahˇ yaw zeu baw˗eu laꞈ kʼoeˇ ja nehˬ nya meh.—Gawˇlawˇsehˇ 4:6-ahˇ gui.
Heu loꞈ˗ehˇ jahˇ dahˬ beh nya
-
“Heu jaw˗ahˇ ngaˇ nui ma ahˇ laˇ paˬ˗ehˇ gʼeh˗eu gaˇ kawˆ tiˬ kawˆ˗ahˇ ya siˬ deˬ” lehˇ ehˇ˗awˇ, Jaˇliꞈ laꞈ kʼoeˇ˗euˬ gaˇ kawˆ tiˬ kawˆ ja nehˬ.
-
Jawˇ saˇ maˬ doˆ˗eu, maˬ ngeuˇ naˇ noeˬ shaˬ kʼahˬ lahˇ luꞈ˗eu cawˬ tiˬ gʼaˬ˗ahˇ, gʼaˬ bi ahˇ leˇ˗eu Jaˇliꞈ aˇ deuˆ tiˬ deuˆ gui nehˬ.
-
Nawˬ˗euˬ gaˇ mˇ cawˬ tiˬ gʼaˬ na, koꞈ nah jawˇ nah˗ahˇ aˬ gaˇ iˇ deˬ lehˇ naˇ haˬ laˇ ngeh, aˇ muˇ˗euˬ mehˬ bawˬ maˬ ngeuˇ naˇ Jaˇliꞈ dzaw˗euˬ gaˇ neh ya siˬ˗euˬ jeˬ ja nehˬ.
-
Cawˬ deuˬ˗ahˇ jw.org gʼoeˇsaiˇ bi haw.
-
Nawˇ Jaˇliꞈ dzaw ngeh tiˬ gʼaˬ na˗ahˇ jiˇ cawˬ laꞈ. Maˬ ngeuˇ naˇ jw.org gʼoeˇsaiˇ laꞈ kʼoeˇ ahˇ leˇ˗awˇ Jaˇliꞈ aˬ joˆ˗ehˇ shaˇ dzaw nya˗eu lehˇ mehˬ nehˬ.
2. Aˇ muˇ laꞈ kʼoeˇ˗euˬ deuˬ nehˬ˗ehˇ tsaꞈ gaˬ iˇ˗eu lehˇ noeˬ tsoˆ taˬ˗eu heu naˇ, aˬ jeˬ miˇ neh aˇ yeˇ huiˬ˗eu nga?
Yeˬsuˇ˗euˬ zaˬ lahˇ deuˬ aˬ yawꞈ maꞈ siˬ nya˗eu tsawˇ haˬ deuˬ˗ahˇ tehꞈ˗ehˇ laˬ kʼaˬ cehˇ˗eu guiˬ lahˬ dawˬ ja nehˬ˗euˬ maˬ ngeuˇ˗a. Yeˬsuˇ aˬ yawꞈ˗euˬ zaˬ lahˇ deuˬ˗ahˇ ‘nyiˬ gʼaˬ˗euˬ tiˬ muˇ bi muˇ˗awˇ meuˬ deuˬ hawˇ˗eu pu deuˬ doe ni, aˬ yawꞈ˗euˬ mehˬ hu kʼehˇ gʼeh˗awˇ’ bi tsaꞈ gaˬ˗iˇ˗euˬ meh. (Luˇkaꞈ 10:1) Teu loꞈ˗ehˇ yaw muiˬ˗ehˇ biˇ˗awˇ tsaꞈ gaˬ˗euˬ miˇ neh, tsawˇ haˬ gʼawˬ mya ni laˬ kʼaˬ cehˇ˗eu guiˬ lahˬ dawˬ ya gaˬ˗euˬ meh. Tiˬ kawˆ loꞈ˗ehˇ tsaꞈ gaˬ˗eu heu naˇ, zaˬ lahˇ deuˬ˗ahˇ jiˇ laˬ kʼaˬ bi cehˇ laˇ dui dui˗eu meh. (Luˇkaꞈ 10:17) Nawˇ jiˇ aˇ muˇ laꞈ kʼoeˇ˗euˬ deuˬ nehˬ˗ehˇ tiˬ kawˆ loꞈ˗ehˇ tsaꞈ gaˬ ma lehˇ noeˬ taˬ maˬ loˇ?
Naꞈ suiˇ ni dzaw
Guˆ˗eu nui ma˗ahˇ aˬ joˆ˗ehˇ gʼaˬ leˇ nya˗eu nga? Laˬ kʼaˬ cehˇ˗eu guiˬ lahˬ dawˬ, laˬ kʼaˬ tiˬ cehˇ aˬ joˆ˗ehˇ tsaꞈ gaˬ nya˗eu nga lehˇ haw.
3. Yeˬhawˇbaˬ nawˬ nehˬ˗ehˇ jawˇ meh
Tiˬ gʼaˬ na tsaꞈ gaˬ mawꞈ kʼawꞈ tsawˇ haˬ deuˬ aˬ joˆ˗ehˇ noeˬ˗eu maˬ siˬ, aˬ joˆ˗ehˇ ehˇ laˇ˗eu maˬ siˬ lehˇ kʼahˬ lahˇ˗eu meh.
-
Nawˇ yawˬ ha neh ya siˬ˗euˬ gaˇ kawˆ aˬ cawˬ˗ahˇ ya ja nehˬ gaˇ kʼahˬ lahˇ miˇ˗a laˬ? Aˬ jeˬ miˇ neh?
Biˬdiˬoˬ pah gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Zaˬ guˬ heu deuˬ guˆ˗eu nui ma˗ahˇ aˬ joˆ˗ehˇ gʼaˬ leˇ nya˗euˬ nga?
Iˇsaˬyaˇ 41:10-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Maˬ tsaꞈ gaˬ peuˬ ni guˆ ngeh, aˬ jeˬ miˇ neh guiˬ lahˬ shaˇ paˬ˗ehˇ gʼeh˗eu nga?
Nawˇ siˬ nya ma loˇ?
Yeˬhawˇbaˬ˗euˬ Saˇ kiˇ gʼawˬ mya gʼaˬ, aˬ cawˬ˗ahˇ laˬ kʼaˬ cehˇ˗eu guiˬ lahˬ dawˬ maˬ dzawˇ nehˬ nya nya lehˇ noeˬ haw˗euˬ meh. Yaw jeˬ ma jeˬ, Seuˇkeꞈ lehˇ kuˇ˗eu zaˬ yo aˬ li tiˬ gʼaˬ, zawˇ˗ehˇ shaꞈ dawˇ nya˗awˇ aˬ cawˬ˗ahˇ maˬ ngehˬ cawˬ peuˬ ni gʼeh˗eu meh. Ehˇ kʼawꞈ Jaˇliꞈ dzaw laˇ nyaˬ lehˇ˗aˬ, heu loꞈ˗ehˇ ehˇ˗eu meh. “Ngaˇ guˆ kʼawꞈ ni, aˬ cawˬ˗ahˇ ngaˇ dzaw luꞈ˗eu gaˇ kawˆ ja nehˬ˗euˬ ma. Teu loꞈ˗ehˇ jahˇ ngeh, ngaˬ˗ahˇ maˬ paˇ guˆ˗euˬ uˬ taꞈ, shaꞈ jiˇ maˬ paˇ shaꞈ dawˇ˗euˬ miˇ neh, zahˬ leˇ˗eu lehˇ miˇ˗a. Kʼoeˇ tehꞈ˗ehˇ maˬ gʼaˬ ni ngaˬ˗euˬ nui jah jiˇ ziꞈ laˇ nyaˬ.”
4. Yaw zeu baw
Aˬ cawˬ˗ahˇ laˬ kʼaˬ cehˇ˗eu guiˬ lahˬ dawˬ ja nehˬ ngeh, aˬ jeˬ˗euˬ gaˇ kawˆ ja nehˬ˗eu lehˇ tehꞈ˗ehˇ maˬ ngeuˇ˗eu, aˬ joˆ˗ehˇ ja nehˬ˗eu lehˇ jiˇ yaw muiˬ˗ehˇ ya shaˇ noeˬ˗eu meh. 2 Tiˆmoˇseˬ 2:24 hawˇ˗eu 1 Beˬtuˆluˆ 3:15-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Aˬ cawˬ˗ahˇ Jaˇliꞈ gaˇ kawˆ ja nehˬ ngeh, Jaˇliꞈ aˇ deuˆ heu deuˬ˗ahˇ aˬ joˆ˗ehˇ mˇ caw nya˗eu nga?
-
Nymˇ jiˇ laꞈ kʼoeˇ˗euˬ tiˬ gʼaˬ na hawˇ˗eu cawˬ deuˬ nawˬ neh ja nehˬ˗euˬ jeˬ˗ahˇ nui ma maˬ tsaˬ naˇ, aˬ jeˬ ya jahˇ˗eu nga? Aˬ jeˬ maˬ ya jahˇ˗eu nga?
-
Aˬ yawꞈ maꞈ˗ahˇ kʼoeˇ heu˗ahˇ ya jah˗a lehˇ maˬ ka tiˇ ni, naˇ haˬ˗eu jeˬ law muˇ zmˬ˗awˇ yaw muiˬ˗ehˇ ja sawˇ nehˬ naˇ, aˬ jeˬ miˇ neh muiˬ dzehˬ nga?
5. Laˬ kʼaˬ cehˇ˗eu guiˬ lahˬ dawˬ tsaꞈ gaˬ˗eu heu naˇ, aˬ dui˗ahˇ laˬ kʼaˬ bi cehˇ laˇ
Yeˬhawˇbaˬ Yeˬsuˇ˗ahˇ laˬ kʼaˬ cehˇ˗eu guiˬ lahˬ dawˬ tsaꞈ gaˬ˗eu gaˇ biꞈ˗euˬ meh. Yeˬsuˇ gaˇ heu˗ahˇ aˬ joˆ˗ehˇ noeˬ˗eu nga? Yoˇhaˬ 4:34-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.
-
Dzaˇ kuiˇ dzaˇ mehˇ dzaˬ˗eu heu naˇ, aˬ dui˗ahˇ yaw dehꞈ bi dehꞈ nya˗awˇ laˬ kʼaˬ jiˇ bi cehˇ laˇ˗eu meh. Yeˬsuˇ Miˬyehˇ nui kʼahˇ shiˇ˗eu jeˬ laꞈ kʼoeˇ neh tiˬ jeˬ pyeuꞈ˗eu laˬ kʼaˬ cehˇ˗eu guiˬ lahˬ dawˬ tsaꞈ gaˬ˗eu gaˇ˗ahˇ, aˬ jeˬ miˇ neh dzaˇ nehˬ˗ehˇ sheu cehˆ taˬ˗euˬ nga?
-
Jaˇliꞈ laꞈ kʼoeˇ˗euˬ gaˇ kawˆ tsaꞈ gaˬ˗eu heu naˇ, nawˬ˗ahˇ laˬ kʼaˬ aˬ joˆ˗ehˇ bi cehˇ laˇ˗eu nga?
Nawˬ˗ahˇ caw ba nehˬ nya˗eu jeˬ
-
Jawˇ nah yaw kaˬ˗euˬ mehˬ bawˬ˗ahˇ iˇ ngeh, aˬ joˆ˗ehˇ ya tsaꞈ gaˬ dahˬ beh˗eu nga lehˇ haw taˬ.
-
Jawˇ nah yaw kaˬ˗euˬ mehˬ bawˬ˗ahˇ dzaw zaˬ geuꞈ˗eu gʼaˇ duˬ, jaˇ laˇ dawˆ. Dzaw zaˬ geuꞈ˗eu heu naˇ, naw neh ya dzaw˗euˬ jeˬ aˬ cawˬ˗ahˇ ja nehˬ nya ni caw ba nehˬ meh.
-
Paˇ dmˬ heu dmˬ laꞈ kʼoeˇ ahˇ˗eu “Tiˬ gʼaˬ na ehˇ˗eu” maˬ ngeuˇ naˇ “Tiˬ gʼaˬ na naˇ haˬ˗eu” lehˇ ehˇ˗eu tsahˇ˗ahˇ haw˗awˇ, nawˬ˗ahˇ tiˬ gʼaˬ na teu loꞈ˗ehˇ ehˇ laˇ, pyehˇ laˇ ngeh, aˬ joˆ˗ehˇ ehˇ kʼoꞈ nehˬ˗eu lehˇ mˇ dzaw shaˇ dzaw taˬ.
Tiˬ gʼaˬ na naˇ haˬ˗eu: “Maˬ ya mawˇ˗euˬ myahˇ laˇ miˇ˗a tawˇ, jawˇ saˇ doˆ miˇ˗a laˬ?”
-
Nawˬ˗ahˇ teu loꞈ˗ehˇ naˇ haˬ laˇ ngeh, aˇ yamˬ teu˗ahˇ zmˬ˗awˇ Jaˇliꞈ˗ahˇ neh nawˬ neh ya siˬ˗euˬ jeˬ aˬ joˆ˗ehˇ ja nehˬ nya˗eu nga?
Kawˆ shawˆ
Laˬ kʼaˬ cehˇ˗eu guiˬ lahˬ dawˬ tsaꞈ gaˬ˗eu heu naˇ, aˬ dui˗ahˇ laˬ kʼaˬ bi cehˇ laˇ˗eu meh. Aˬ dui neh noeˬ˗euˬ loꞈ˗ehˇ maˬ shaˬ˗a.
Ja sawˇ poˆ˗eu
-
Aˬ dui laˬ kʼaˬ cehˇ˗eu guiˬ lahˬ dawˬ aˬ jeˬ miˇ neh ya tsaꞈ gaˬ˗eu nga?
-
Aˬ dui aˬ cawˬ˗ahˇ yaw zeu baw˗eu laꞈ kʼoeˇ aˬ joˆ˗ehˇ ja nehˬ nya˗eu nga?
-
Maˬ tsaꞈ gaˬ peuˬ ni guˆ naˇ, guˆ˗eu nui ma˗ahˇ gʼaˬ leˇ nya ni aˬ jeˬ ya jahˇ˗eu nga?
Haw lahˬ
jw.org ngehˬ cawˬ˗eu aˇ taꞈ zmˬ˗awˇ, laˬ kʼaˬ cehˇ˗eu guiˬ lahˬ dawˬ tsaꞈ gaˬ nya˗eu oeˬ jeˬ˗ahˇ haw.
Laˬ kʼaˬ cehˇ˗eu guiˬ lahˬ dawˬ tsaꞈ gaˬ ngeh, caw ba nehˬ nya˗eu seuˆ dzeuꞈ aˇ gʼehˇ oeˬ jeˬ˗ahˇ haw.
“Nawˇ tsawˇ haˬ poˆ˗eu tsawˇ haˬ geuꞈ˗eu dah laˇ maˬ loˇ?” (Loꞈ˗eu nymˇgoˇ, 2020 Gʼoeˬ siˬ ba la)
Jaˇliꞈ laꞈ kʼoeˇ ahˇ˗eu tiˬ gʼaˬ na˗euˬ gaˇ kawˆ heu naˇ, laˬ kʼaˬ cehˇ˗eu guiˬ lahˬ dawˬ tsaꞈ gaˬ peuˬ ni zaˬ deuˬ˗ahˇ kʼawꞈ aˬ joˆ˗ehˇ caw ba nehˬ˗eu nga lehˇ haw.
Yeˬhawˇbaˬ˗ahˇ maˬ siˬ nya˗eu nymˇ jiˇ laꞈ kʼoeˇ˗euˬ deuˬ˗ahˇ, Jaˇliꞈ gaˇ kawˆ aˬ joˆ˗ehˇ ja nehˬ nya˗eu nga lehˇ haw.
