JIʼTE 22
O fing ne sing tchoung pepoung bi pyeshe pô m tchi ge ke ?
Mouʼtchwe o gô pe ne lagne mnyenyô Bible ne ghô dze, pe sè ge : ‘A tcheng ge baya mo le jye ya !ʼ A nyenyô, A tcheng ge baya mo le jye ya ! Daʼge, o fing ne po bwôk ne ghôm nwe bi pyeshe pô ne ywe ye o dagne a. Pe naʼ gômte ne tchi paʼ o fing ne yaʼ ne ping bwôk, neng thoʼ ne le ŋwègne sing tchoung Bible bi pyeshe pô a.
1. O fing ne ghapte ywe ye o dagne a pou a pô pye o jye wap a m tchi ge ke ?
Pekhu Yéso le ghôm ge : “Pe pye le lète ne ywe ye pye djô bing djouʼ a” (Mfaʼ 4:20) Wap le koung nyenyô téʼ, te a ha ji bi pou ne ghapte ya pou a goung pô awè. O bo djouʼ ne o m tchi poʼ a ? A pe ge éé, o tcheng mtchwe mye o fing ne le mkhouʼ ne ne gôm nwe bi toundye o ba mso pou, ne ywe ye o dagne a.—Ké Kolosai 4:6.
Mtchi paʼ o fing ne ne thoʼ a
-
Tchwe ye o bo gôm nwe bi taʼ mo tchum toundye o a, ne toʼ ne ghôm nwe ne Bible, gôm ge : “Ge lagne taʼ ywe pepoung tchum gapdzu yeng.”
-
Ghapte taʼ khè Bible ye a bo ha kaktuô a, pou a taʼ so o ye é bo go ke bo jwing a le.
-
Pô pye po a pou faʼ a hente o tchi paʼ gapdzu bo ne tchyete a, o sing wap ywe ye o dagne ne you tchwe jiʼte, ke ne taʼ tchouʼte bemte a le.
-
Laʼte site jw.org bi mso pou.
-
Ké she pô ge po a pou pemte be si ne you jiʼte Bible, ke daʼte wap tchi paʼ wap fing ne hente taʼ jiʼte Bible ne jw.org a le.
2. Nweke ne toʼ ne sing Ghôm Si pou a bemte, be taʼ ywe pepoung ye a tcheng ge pou kem ne a ?
Pekhu Yéso late sing tchoung pepoung daʼ bi pô pye a le be wap jye wap a pe. Yéso “le tem wap pepue pepue dze é, tchum goung mtisoung awè” ne sing Ghôm Si. (Loukasi 10:1) Ne nyapte faʼ ne sing Ghôm Si m tchi poʼo, le ping ha sô bi medou pô ne youʼ tchoung pepoung. Ne pemte sing Ghôm Si le ha ba ŋwègne téʼ bi pekhu Yéso. (Loukasi 10:17) O fing you ne le khète ne toʼ ne sing Ghôm Si pou a bemte a ?
PING TCHENG NE GÔ DZE
Lagne tchi paʼ o fing ne ghe te o le ping bwôk téʼ, neng gre ŋwègne ye pou gre tchwe ye pou sing tchoung pepoung a.
3. Jéova gô pe pou a wou
She pô pye wap sing Ghôm Si a, fing ne pwôk tchwe ye wap sè nwe ne tchi paʼ pou gô ne yô wap a, ke tchi paʼ pou fing ne paʼ a le.
-
O bo bwôk ne ghôm nwe ne ywe ye o dagne a bi pyeshe pô a ? Nweke ?
Yô VIDÉO, neng gômte ne hente yenge.
-
Po msem penge ke ghe la te ne djaʼ ne ping be bwôk ?
Ké Izaya 41:10, neng gômte ne hente yenge :
-
Tchwe ye o bo bwôk ne sing Ghôm Si a, priya fing ne kwite o m tchi ge ke ?
A ke be o ji jye le ?
Medou Mkwithè Jéova tsèm sè be a daʼ taʼ tchum, ge wap ka fing ne laʼ khouʼgne ne sing tchoung pepoung bi pyeshe pô. Taʼ foʼte, Sergey le be djouʼ ne é paʼ tchwe ye é te be sômywe a pe, a neng be tchuô bii ne ghômte pou a pyeshe pô. Daʼge é le toʼ ne jiʼte Bible. É gôm ge : “Ba m paʼ de be bwôk a, de toʼ ne ghôm nwe ne ywe ye de be dagne a bi pyeshe pô. A le tchye a ne yô ge ne ghôm nwe ne Bible pou a pyeshe pô le ghe ge mye le ping bwôk. A le neng gre ba ge pintum a ping soumte.”
4. Laʼte mkouʼ
Tchwe ye o bo sing Ghôm Si a, ke sè nwe daʼ ne ywe ye o gô ghôm a, sè nwe ba m ne tchi paʼ o gô ne ghôm ya bô a. Ké 2 Timotio 2:24 ba 1 Pètro 3:15, neng gômte ne mhente menge :
-
O fing ne ying ne mkhè Bible menge tchwe ye o gôm nwe ne Bible pou a pyeshe pô a m tchi ge ke ?
-
She pô tchum toundye o ke she mso pou le, fing ne kengne ywe ye o bo gôm bi pou a. O fing ne ghe la ? A te tcheng ge o ghe la a ?
-
Nweke ne le mkhouʼ ha mhente bi pô fing ne poung, tse ne sing wap pe ywe ye a tcheng ge wap ping a ?
5. Ne sing tchoung pepoung ha ŋwègne
Jéova le ha faʼ ne sing tchoung pepoung bi Yéso. Yéso le djô faʼ bô m tchi ge ke ? Ké Yohané 4:34, neng gômte ne mhente menge :
-
Ne tsu ywetsu ye a poung a gre ge pe ghe ne tchuô, neng gre ge pe ŋwègne. Nweke Yéso le ghôm ge ne ghe ywe ye Si tcheng a—paʼ ne sing tchoung pepoung a—be paʼ ne tsu ywe a ?
-
O kwè ge ne sing tchoung pepoung fing ne ha ma mŋwègne ?
Mthôke
-
Ne tchwe mtchouʼte tchum gapdzu, lé mtchi paʼ o fing ne toʼ ne ghômte pou a pô ne Bible a.
-
Ghôm bi mo ye é gre you jiʼte a, ge o bo tcheng ne toʼ ne pe tchye sekou ne mtchouʼte tchum gapdzu. Ye jeng ye msekou tchye a fing ne kwite o ne nyapte ne o, ne ghôm nwe bi pyeshe pô ne ywe ye o bo dagne a, pe te pwôk.
-
Wim jeng “She pô gôm ge” ke jeng “Mo fing ne hente ge” le, ne ne nyapte ne o ne tchi paʼ o fing ne paʼ nwe ne she mhente mye pômneng gre a, ke ne she potse tsye pômneng gôm a le.
MO FING NE HENTE GE : “Tchoung m ge ke ?”
-
O fing ne le yeng sô, ne ne gôm ywe ye o dagne tchum you jiʼte Bible a bi mo m tchi ge ke ?
YE NE KHAMTE
Ne sing tchoung pepoung bi pyeshe pô gre ge pe ŋwègne, ne neng thoʼ ne ghe ya bô fing ne hwi te tchye paʼ o bo kwè a.
O lagne ke ?
-
Nweke a tcheng ge pe sing tchoung pepoung bi pyeshe pô ?
-
O fing ne le mkouʼ gre ya bô m tchi ge ke ?
-
O fing ne ghe la te o le ping bwôk tchwe ye o sè nwe ne ne sing Ghôm Si a ?
YÔ SHE POTSE NE
Yô mtchi mapfue mye o fing ne wim ne ne sing tchoung pepoung pou a mkarte de visit jw.org a.
Lagne m ma mapfue mye a fing ne kwite o ne sing tchoung pepoung bi pyeshe pô a.
“Es-tu prêt à devenir un pêcheur dʼhommes ?” (La Tour de Garde, septembre 2020)
Yô tchi paʼ taʼ foʼte Bible fing ne ha sôktum bi pe ne ne sing tchoung pepoung, ba m be ye pe be po msem a.
Yô tchi paʼ o fing ne ghôm nwe ne Bible pou a pô toundye o pye wap ka jye Jéova a.
“Touchons le cœur de nos parents non témoins” (La Tour de Garde, 15 mars 2014)
