LIKE SUANLƐ 22
?Wafa sɛ yɛ a kwla bo jasin fɛ’n kle ɔ wiengu mun-ɔn?
Kɛ á súan Biblu’n nun like kɔ́’n, atrɛkpa’n a se ɔ wun kɛ: “Ɔ fata kɛ sran kwlakwla si ndɛ nga!” Sɛ a bu i sɔ’n, ɔ ti su, afin ɔ fata kɛ sran kwlakwla si ndɛ sɔ’n. Sanngɛ atrɛkpa’n, kɛ ɔ ko yo naan w’a bo like nga a suan’n su w’a kle sran uflɛ’n, ɔ kwla kun wɔ srɛ kan. Maan e kan like ng’ɔ kwla uka wɔ naan w’a kan jasin fɛ ng’ɔ o Biblu’n nun’n i ndɛ w’a kle sran uflɛ’n i ndɛ.
1. ?Ngue yɛ á yó naan w’a kan like nga a suan’n i ndɛ w’a kle be nga a si be’n niɔn?
Zezi i sɔnnzɔnfuɛ’m be seli kɛ: “E liɛ’n, like nga e wunnin i’n, ɔ nin ndɛ nga e tili’n, e kwlá yaciman be ndɛ kanlɛ.” (Sa Nga Be Yoli’n 4:20) Ndɛ nanwlɛ’n ti be cinnjin dan ti’n, be kunndɛli kɛ bé kɛ́n i ndɛ bé klé sran kpanngban. ?Kɛ ɔ yo wɔ sɔ wie-ɔ? Sɛ ɔ ti sɔ’n, bu like nga a kwla yo naan w’a kan like nga a suan’n i ndɛ aɲinyiɛ su w’a kle ɔ awlofuɛ mun, ɔ nin ɔ janvuɛ mun’n i akunndan.—Kanngan Kolɔsufuɛ Mun 4:6 nun.
Ajalɛ wie mɔ a kwla fa’n
-
Kɛ a nin ɔ awlofuɛ mun amún kókó yalɛ’n, sɛ ɔ waan á bó Biblu’n nun ndɛ kun su’n, a kwla se kɛ: “Lemɔcuɛ nga nun’n n wunnin like cinnjin kpa kun i wlɛ.”
-
A kwla kanngan Biblu’n nun ndɛ mma kun nun kle ɔ janvuɛ kun m’ɔ kpinndinman’n annzɛ i wla w’a bo i wun’n.
-
Sɛ ɔ wiengu junman difuɛ kun usa ɔ like nga a yoli i lemɔcuɛ’n nun’n, a kwla kan like nga a suɛnnin i Biblu’n nun’n annzɛ aɲia’m be bo’n i ndɛ kle i.
-
A kwla fa e ɛntɛnɛti adrɛsi jw.org kle ɔ janvuɛ mun.
-
Kɛ á súan Biblu’n nun like’n, yia sran wie mun naan be wa trɛn i bo wie. Annzɛ kusu a kwla kle be wafa nga be kwla klɛklɛ be dunman jw.org su naan sran uflɛ wa kle be Biblu’n nun like’n.
2. ?Ngue ti yɛ sɛ a nin asɔnun’n nunfuɛ’m be bo jasin fɛ’n likawlɛ’n ɔ ti kpa-ɔ?
Nán be nga Zezi i sɔnnzɔnfuɛ’m be si be’n be ngunmin yɛ be boli jasin fɛ’n kleli be-ɔ. Zezi ‘sunmɛnnin i sɔnnzɔnfuɛ mun nɲɔnnɲɔn naan be dun mmua wɔ klɔ nin lika kwlaa nga i bɔbɔ ɔ́ wá kɔ́ lɔ’n be su’ naan be ko bo jasin fɛ’n. (Liki 10:1) I sɔ mɔ be yoli’n ti’n, be kwla boli jasin fɛ’n be kleli sran kpanngban. Kɛ Zezi i sɔnnzɔnfuɛ’m be nin be wiengu’m be boli jasin fɛ’n likawlɛ’n be dili aklunjɔɛ kpa. (Liki 10:17) ?Yɛ ɔ li, a kunndɛman kɛ a nin asɔnun’n nunfuɛ’m bé bó jasin fɛ’n likawlɛ wie?
SI NDƐ’N NUN KPA EKUN
Maan e kan like ng’ɔ kwla uka ɔ naan w’a bo jasin fɛ’n i juejue su, naan kusu w’a di aklunjɔɛ’n i ndɛ.
3. Zoova wá súan ɔ bo
Sran wie’m be liɛ’n, be kunndɛ kɛ bé bó jasin fɛ’n. Sanngɛ kɛ be bu wafa nga sran’m bé wá bú be’n, ɔ nin wafa nga bé wá sɔ́ be ndɛ nun’n i akunndan’n, srɛ kun be.
-
?Kɛ ɔ ko yo naan w’a kan like nga a suan’n i ndɛ w’a kle sran uflɛ’n srɛ kun wɔ? ?Ngue ti-ɔ?
An bo VIDEO’N, i sin’n an koko kosan yɛ’n i su yalɛ.
-
?Ngue yɛ Zoova i Lalofuɛ sɔ’m be yoli naan srɛ w’a kunman be jasin fɛ’n i bolɛ’n nun kun-ɔn?
An kanngan Ezai 41:10 nun, i sin’n an koko kosan yɛ’n i su yalɛ:
-
?Sɛ srɛ kun ɔ jasin fɛ’n i bolɛ nun’n, wafa sɛ yɛ Ɲanmiɛn srɛlɛ’n kwla uka wɔ-ɔ?
Nian nga wie
Zoova i Lalofuɛ’m be nun sunman be buli i kɛ be su kwlá boman jasin fɛ’n wie le. I wie yɛle aniaan bian kun mɔ be flɛ i kɛ Sɛɛgei’n i liɛ’n. Laa’n ɔ bumɛn i wun sran, yɛ kɛ ɔ ko yo naan ɔ nin i wiengu’m b’a koko yalɛ’n ɔ ti kekle. Sanngɛ ɔ wa suannin Biblu’n nun like. Ɔ seli kɛ: “Kannzɛ bɔbɔ srɛ kun min’n, n ma kannin like nga n suan’n i ndɛ n kleli min wiengu mun. N sieli i nzɔliɛ kɛ, kɛ n kan like nga n suan’n i ndɛ n kle min wiengu mun’n, min wun kpaja min. Yɛ i sɔ’n uka min maan n lafi like nga n suan’n su kpa ekun. Nanwlɛ i sɔ’n boli min nuan dan!”
4. Kan ndɛ’n aɲinyiɛ su
Kɛ á kán like nga a suan’n i ndɛ klé ɔ wiengu mun’n, ndɛ nga á kán’n ɔ ti cinnjin. Sanngɛ wafa nga á kán ndɛ’n ɔ ti cinnjin kpa wie. An kanngan 2 Timote 2:24 nin 1 Piɛli 3:15 nun, i sin’n an koko kosan yɛ’m be su yalɛ:
-
?Kɛ á kán like nga a suɛn i Biblu’n nun’n i ndɛ klé ɔ wiengu mun’n, wafa sɛ yɛ Biblu’n nun ndɛ mma nga’m be kwla uka wɔ-ɔ?
-
?Sɛ ɔ osufuɛ annzɛ ɔ janvuɛ wie’m be sɔman ɔ ndɛ’n nun’n, ngue yɛ a kwla yo-ɔ? ?Yɛ ngue yɛ ɔ fataman kɛ a yo-ɔ?
-
?Ngue ti yɛ sɛ a usa sran’n i kosan amanniɛn su naan ɔ kɛn i klun ndɛ’n ɔ ti kpa tra kɛ ɔ bɔbɔ a kan like ng’ɔ fata kɛ ɔ yo’n i ndɛ kle i-ɔ?
5. Kɛ e bo jasin fɛ’n e di aklunjɔɛ
Zoova seli Zezi kɛ ɔ bo jasin fɛ’n. ?Wafa sɛ yɛ Zezi buli junman sɔ’n niɔn? An kanngan Zan 4:34 nun, i sin’n, an koko kosan yɛ’m be su yalɛ:
-
Kɛ e di aliɛ kpa’n e ɲan wunmiɛn, yɛ e klun jɔ. ?Ngue ti yɛ Zezi fali Ɲanmiɛn i klun sa yolɛ’n, mɔ i wie yɛle jasin fɛ bolɛ’n ɔ fa sunnzunnin aliɛ dilɛ-ɔ?
-
?Kɛ e bo jasin fɛ’n i su ye benin yɛ e ɲɛn i-ɔ?
Ninnge wie mɔ a kwla yo’n
-
Lemɔcuɛ afiɛn aɲia’n i bo’n, fa ɔ ɲin sie i wafa nga e nin sran mun e kwla koko yalɛ’n i su ajalɛ nga be kle e’n su.
-
Maan a nin sran ng’ɔ kle wɔ like’n amun koko like nga a kwla yo naan w’a di junman lemɔcuɛ afiɛn aɲia’n i bo’n i su yalɛ. Sɛ a di junman aɲia’m be bo lɔ’n, i sɔ’n kwla uka wɔ naan w’a kan like nga a suan’n i ndɛ w’a kle ɔ wiengu mun.
-
Fa ɔ ɲin sie i fluwa’n i nun ndɛ ng’ɔ suan “Sran Wie’m Be Waan” annzɛ “Sran Kun Kwla Usa ɔ Kɛ” i su naan wun wafa nga a kwla tɛ kosan nga sran’m be ta be usa’n be su.
SRAN KUN KWLA USA Ɔ KƐ: “?Ngue yɛ a yo i siɛn’n niɔn?”
-
?Wafa sɛ yɛ a kwla jran kosan sɔ’n su kan like nga a suɛn i Biblu’n nun’n i ndɛ kle i-ɔ?
NDƐ’N I KPƆLƐ BOLƐ
Kɛ e bo jasin fɛ’n e di aklunjɔɛ. Sran wie’m be kwla bu i kɛ i sɔ yolɛ’n ti kekle, sanngɛ ɔ timan kekle sɔ liɛ.
Ndɛ’n i nun flanlɛ
-
?Ngue ti yɛ ɔ ti cinnjin kɛ e bo jasin fɛ’n e kle e wiengu mun-ɔn?
-
?Wafa sɛ yɛ a kwla yo sɔ aɲinyiɛ su-ɔ?
-
?Sɛ srɛ kun wɔ jasin fɛ’n i bolɛ’n nun’n, ngue yɛ ɔ kwla uka wɔ-ɔ?
NDƐ WIE MUN EKUN
Like nnan mɔ e kwla yo naan y’a fa fluwa kan ng’ɔ kan e ɛntɛnɛti adrɛsi jw.org i ndɛ’n y’a man sran mun’n.
Fluwa kpe kan ng’ɔ kan ɛntɛnɛti adrɛsi jw.org i ndɛ’n, i fa manlɛ’n (1:43)
Like nnan mɔ be kwla uka ɔ naan w’a bo jasin fɛ’n.
“?A kwla tra sran mun kɛ be fa tra jue’n sa?” (Sasafuɛ Tranwlɛ’n, afuɛ 2020, Sɛptanblu)
Biblu’n nun ndɛ kun m’ɔ kwla uka e naan kannzɛ e ti gbanflɛn annzɛ talua’n y’a bo jasin fɛ’n yakpa su’n.
Wafa nga a kwla kan like nga a suɛn i Biblu’n nun’n i ndɛ kle ɔ osufuɛ nga be siman Zoova’n.
“Wafa nga a kwla bo jasin fɛ’n kle ɔ osufuɛ mun’n” (Sasafuɛ Tranwlɛ’n nun ndɛ)
Ninnge wie mɔ be kwla yo ɔ fɛ ekun'n
KOSAN NGA SRAN’M BE TA BE USA’N
?Ngue yɛle Biblu’n nun like mɔ Zoova i Lalofuɛ’m be nin sran’m be suan’n?
A kwla fa Biblu’n nga a klo’n naan Zoova i Lalofuɛ kun w’a kle ɔ like. Ɔ osufuɛ mun nin ɔ janvuɛ’m be kwla tran like suanlɛ’n i bo wie. Be deman sika.
