LEKSIYON 22
Paano Mo Masasabi sa Iba an Maugmang Bareta?
Mantang naaaraman mo an mga katotoohan sa Bibliya, tibaad maisip mo, ‘Dapat maaraman man ini kan iba!’ Iyo, kaipuhan talagang maaraman iyan kan gabos! Pero, tibaad ninenerbiyos ka na sabihon sa iba an mga nanunudan mo. Pag-ulayan ta ngunyan kun paano malalabanan an nerbiyos na iyan tanganing maugma mong masabi sa iba an maugmang bareta kan Bibliya.
1. Paano mo masasabi sa mga kabisto mo an mga nanunudan mo?
Sinabi kan mga disipulo ni Jesus: “Dai mi magigibong magpundo sa pagtaram manungod sa mga bagay na samuyang nahiling asin nadangog.” (Gibo 4:20) Pinahalagahan nindang marhay an mga katotoohan na nanudan ninda, kaya gustong-gusto man ninda iyan na sabihon sa gabos. Arog man daw kaiyan an namamatian mo? Kun iyo, maghanap nin mga oportunidad na sabihon sa magalang na paagi sa mga kapamilya saka amigo mo an mga nanunudan mo.—Basahon an Colosas 4:6.
Kun paano makakapuon
-
Pag nakikipag-ulay sa kapamilya, punan an pag-uulay sa sarong tema sa Bibliya paagi sa pagsabing: “May magayon akong nanudan ngunyan na semana.”
-
Kun may hilang o problemado an sarong amigo, puwede mong sabihon saiya an sarong nakakapakusog na teksto.
-
Kun maghapot an katrabaho mo kun kumusta an weekend mo, sabihon saiya an mga nanudan mo sa saimong pag-Bible study o sa pagtiripon sa kongregasyon.
-
Ipahiling sa mga amigo mo an website na jw.org.
-
Agdahon an iba na umiba sa pag-Bible study saimo, o ipahiling sa sainda kun paano ma-request nin pag-adal sa Bibliya sa jw.org.
2. Taano ta marahayon na hinguwahon mong makaiba sa kongregasyon sa paghuhulit?
Bako sana sa mga kabisto ihinulit kan mga disipulo ni Jesus an maugmang bareta. “Isinugo sinda [ni Jesus] na manduwa-duwa saka pinainot sinda sa lambang siyudad” para maghulit. (Lucas 10:1) Huli sa organisadong paghuhulit na iyan, dakul pa an nagkaoportunidad na makadangog kan maugmang bareta. Nagtao man iyan nin dakulang kaugmahan sa mga disipulo huling iribanan sinda na naghulit. (Lucas 10:17) Gusto mo man daw na magin pasuhan na maghulit kaiba kan kongregasyon?
ARAMON PA
Aramon kun ano an magigibo mo para malabanan an saimong nerbiyos na maghulit asin mamatian an kaugmahan sa pagsabi sa iba kan maugmang bareta.
3. Tatabangan ka ni Jehova
May mga gustong maghulit na naghahadit sa kun ano an iisipon o magigin reaksiyon kan iba.
-
Pignenerbiyos ka daw na sabihon sa iba an mga nanudan mo? Taano?
I-play an VIDEO, dangan pag-ulayan an hapot.
-
Sa video, ano an ginibo kan mga hoben na Saksi para malabanan an saindang takot?
Basahon an Isaias 41:10, dangan pag-ulayan an hapot na ini:
-
Pag natatakot kang maghulit, paano makakatabang saimo an pamibi?
Aram mo daw?
Dakul na Saksi ni Jehova an nag-iisip kaidto na dai ninda makakayang maghulit. Halimbawa kaiyan si Sergey. Mayo siyang kumpiyansa sa sadiri saka nasusupog siyang makipag-ulay sa iba. Pero nag-adal siya nin Bibliya. Sinabi niya: “Dawa ngani natatakot ako, pinunan kong sabihon sa iba an mga nanunudan ko. Dai ko inaasahan na an pagsabi ko sa iba kan manungod sa Bibliya mas magpapakusog kan sakong kumpiyansa saka pagtubod.”
4. Magin magalang
Pag sinasabi sa iba an maugmang bareta, pag-isipan bako lang kun ano an sasabihon kundi kun paano mo man iyan sasabihon. Basahon an 2 Timoteo 2:24 asin 1 Pedro 3:15, dangan pag-ulayan an mga hapot na ini:
-
Paano mo maiaaplikar an mga bersikulong iyan?
-
Pag ipinapakipag-ulay sa iba an manungod sa Bibliya, tibaad dai mag-uyon saimo an ibang kapamilya o amigo. Ano an puwede mong gibuhon? Ano an dai mo dapat gibuhon?
-
Taano ta mas marahay na mataktikang haputon an kaulay mo kisa direktang sabihon saiya kun ano an dapat niyang paniwalaan?
5. An pagsabi sa iba kan maugmang bareta nagtatao nin kaugmahan
Sinugo ni Jehova si Jesus na ihulit an maugmang bareta. Paano iyan minansay ni Jesus? Basahon an Juan 4:34, dangan pag-ulayan an mga hapot na ini:
-
An pagkakan nin masustansiyang kakanon nakakapakusog sa satong hawak asin nakakapaugma sa sato. Taano ta ikinumparar ni Jesus sa pagkakan an paggibo kan kabutan nin Diyos—kaiba na an paghulit kan maugmang bareta?
-
Ano an mga maitataong kaugmahan kan pagsabi sa iba kan maugmang bareta?
Tips
-
Sa midweek na pagtiripon, maghanap nin mga ideya kun paano ka makakapuon nin pag-uulay manungod sa Bibliya.
-
Haputon an nagtutukdo saimo kun paano ka makakaenrol bilang estudyante sa midweek na pagtiripon. An pagtao nin presentasyon bilang estudyante makakatabang sa saimo na magin mas handa na sabihon sa iba an mga nanunudan mo.
-
Gamiton an seksiyon na “May mga Nagsasabi” o “Tibaad May Maghapot” para magpraktis kun ano an isisimbag mo sa mga parating ihinahapot asin pagkontra.
TIBAAD MAY MAGHAPOT: “Kumusta ka na?”
-
Paano mo puwedeng gamiton an pagkakataon na iyan para sabihon sa kaulay mo an mga nanudan mo sa pag-adal mo nin Bibliya?
SUMARYO
An pagsabi sa iba kan maugmang bareta nagtatao nin kaugmahan, asin tibaad bako man talaga iyan masakit arog kan iniisip mo.
Rebyu
-
Taano ta dapat mong sabihon sa iba an maugmang bareta?
-
Paano mo iyan magigibo sa magalang na paagi?
-
Ano an puwede mong gibuhon para malabanan an nerbiyos mo sa paghuhulit?
HILINGON MAN
Aramon an apat na simpleng paagi para masabi mo sa iba an maugmang bareta gamit an jw.org contact card.
Aramon an apat na kuwalidad na makakatabang sa saimo sa paghulit kan maugmang bareta.
“Andam Ka Daw na Magin Parasira nin Tawo?” (An Torrengbantayan, Setyembre 2020)
Hilingon kun paano makakatabang sa sato an sarong istorya sa Bibliya para magkaigwa kita nin kusog nin buot na ihulit an maugmang bareta, dawa aki pa kita.
Aramon kun paano mo masasabi an manungod sa Bibliya sa saimong mga kapamilya na mayo pang aram manungod ki Jehova.
Puwede Mo Man Magustuhan
PARATING MGA IHINAHAPOT
Ano an Pag-adal sa Bibliya na Iinaalok kan mga Saksi ni Jehova?
Sa interactive na programa nin pag-adal na iinaalok kan mga Saksi ni Jehova, puwede mong gamiton an arin man na traduksiyon nin Bibliya. Dai mag-alangan na imbitaran an saimong bilog na pamilya o an siisay man sa mga amigo mo na umiba saimo.
