FARKARKOR 22
Nyan fa Wakbaryas Abar Ḇepyum faro Snonggaku Ḇesesya
Fafisu wafarkor fa wafawi kakaku ro Refo ya kwar, imbude kwara radine, ’Roi nanema roi ḇefandun fa snonggaku ḇesesya sakfawi na!’ Imbo, fandun fa snonggaku ḇesesya sakfawi na ḇae! Imbape, imbude wamgak fa wakofenḇair rosai wafarkor kwar na faro snonggaku ḇesesya. Rwama komam nyan insama wamgak ḇa ma waryaḇ fa wakofenḇair abar ḇepyum ro Refo ya faro snonggaku ḇese.
1. Rariso na wakofenḇair rosai wafarkor kwar na faro snonggaku ḇesesya rai?
Yesus manfamyan ḇyesi sikofen radine, ”Nari inkomnai ḇaḇeri fa inkawawos ro roi inko mam ma inko mnaf kwar.” (Farfyar 4:20) Sesyowi kaku roi Yesus fyarkor yoḇ si na, inja simarisen sfawar na faro ḇesesya wer. Wakḇesyowi kaku rosai wafarkor kwar na ke? Rarirya ido, swewar swaf fa wakofenḇair roi wafarkor kwar ine kuker payamyum faro kina ma bati Besya.—Kowasya Kolose 4:6.
Nyan fa wafrur na
-
Fafisu kina Bansya mgokain mgofarfyare, bisa wakofenḇair roi ḇepyum oso ro Refo bo wakofen radine: ”Ras ḇarpur ine yafarkor boi yasmai roi ḇepyum oso.”
-
Mam bati Bedi iduf ḇaido imgakwarek kenem ḇyeja ido, wawasya mnuk oso ro Refo yoḇ i insama syambraḇ.
-
Mam min ro moḇ wafararur ro ya sifuken abar Bedi ido, fawar rosai wafarkor kwar ro Refo na ḇaido rosai wasmai ro fananjur ari ya faro si.
-
Fasnai situs jw.org ḇe bati Besya.
-
Wor ḇesesya fa sakso Au fafisu wafarkor Refo ya, ḇaido wakofenḇair ḇe si nyan fa siser formulir ro situs jw.org.
2. Rosai ḇefnai fa wakso ro fararur ḇaḇebaryas nari wasmai payamyum ya?
Yesus manfamyan ḇyesi sikofenḇair abar ḇepyum faro snonggaku sifawi kwar sya monda ḇa. Imboi ’iwan si fa sḇe suru-suru ḇo spon i ḇe mnu ma moḇ iḇe ryayoḇ na’ fa sbaryas ḇe kawasa ḇero diansya. (Lukas 10:1) Yesus fyasos pyum manfamyan ḇyesi fa sra sbaryas insama snonggaku ḇebor syadi sakrower abar ḇepyum ine. Sra sbaryas kayamyam, inja nane nafrur si fa siryaḇ syadi wer. (Lukas 10:17) Inja, wakkara kwar fa wabe wakso ro fararur ḇaḇebaryas ine ke?
SWEWAR KAKU WER
Nari kawos rosai wafrur kaku insama wamgak syadi ḇa ma wasmai raryaḇ ḇeba kukro wakso ro fararur ḇaḇebaryas abar ḇepyum ine.
3. Yahwe nari isaramper Au
Sia simarisen sakbaryas abar ḇepyum ine, fama simgak moḇsa na snonggaku sya skara ḇaido smam si rai.
-
Rya wamgak fa wakofenḇair rosai wafarkor kwar na faro snonggaku ḇese ke? Kwarem rarirya kukro?
Komam VIDIO, raimnai kawos fakfuken na.
-
Rosai ḇefnoḇek roma inai babo ro vidio insanja fa simgak ḇa siḇriwarek kakyar sena?
Kowasya Yesaya 41:10, raimnai kawos fakfuken ine:
-
Rofyor wamgak fa wakbaryas, rosai ḇefnai fa ipyum ya benadi?
Wafawi ke?
Randak ya, ḇebor ro Saksi Yahwe skara na jadi fa sbaryas abar ḇepyum faro snonggaku ḇesesya ḇa. Rupa ra, Sergey ima imakakak ma samswen ḇe i fa dawos ḇe snonggaku ḇese. Ḇape, ḇarpur mura fyarkor Refo ya. Sergey doḇe, ”Yamgak ḇae, mboi yasewar fa yakofenḇair roi yafarkor kwar na faro snonggaku ḇesesya. Yakara ḇaḇeri bo yafawar Wos Refo ya faro snonggaku ḇesesya kwar. Yabe yakofen kaku, roi nane nafnoḇek aya fa yamgak wer ḇa. Oso wer ido, roi nane nafrur fa kakyar ayeja syambraḇ syadi.”
4. Fasnai syowi
Fafisu wakofenḇair abar ḇepyum faro snonggaku oso ḇaime, kwara ḇepon rosai nari wakofen ya resari. Ḇape roi ḇefandun kako iso kwara ḇepon moḇsa na wakofen na rai. Kowasya 2 Timotius 2:24 ma 1 Petrus 3:15, raimnai kawos fakfuken nane:
-
Moḇsa na waso pyum wos ḇero mnuk nane rofyor wakofenḇair Wos Refo ya faro snonggaku ḇese?
-
Imbude kina karyer oroḇaido bati Bansya sia simarisen ḇa faro rosai wakyar na. Moḇsa na berai? Rosai wafrur awer na?
-
Rosai ḇefnai fa buk fakfuken faro snonggaku ḇesesya kuker payamyum iso nyan ḇepyum syadi ro wadif si fa sikyar?
5. Kobaryas abar ḇepyum ine nbuk marasrisen
Yahwe byuk fararur ḇe Yesus i fa byaryas abar ḇepyum ya. Moḇsa Yesus myam fararur ine rai? Kowasya Yohanes 4:34, raimnai kawos fakfuken suine:
-
Komarisen kan roḇean ḇepyum na insama kokenem monda ḇa mboi insama komarisen kako ḇae. Inja rosai ḇefnai fa Yesus doḇe ifrur Allah marisen Ḇyena fa byaryas abar ḇepyum ine imnis ra dan roḇean?
-
Kwara ido, rosai ḇefrur fa na wamarisen fafisu wakbaryas abar ḇepyum ya?
Angginem
-
Mam ro fananjur minggu fadu ya insama wafawi moḇsa korandak awawos ya rai.
-
Wafuken yoḇ ḇebuk farkarkor Refo ḇe Au rosai na wakfrur wer insama bisa wakso ro farkarkor minggu fadu ine. Wakso ro farkarkor ine kwar kada, na wafasos pyum Au ḇepon fa wakofenḇair rosai wafarkor kwar na ḇe snonggaku ḇesesya.
-
Ro syap ine, bar ”Sia Soḇe” ḇaido ”Sia Sifuken Au Radine” naisya. Bar suru suine bisa nafnoḇek Au fa wafawi moḇsa kwarem snonggaku ḇebor sya fakfuken sena ma wos sampampum sena.
SIA SIFUKEN AU RADINE: ”Yamam boi, rya wasnai ḇese kero.”
-
Rariso ine nbuk swaf ḇe Au fa wakofenḇair rosai wafarkor kwar ro Refo ya faro si?
FARKARKOR ḆYENA
Baryas abar ḇepyum fnoḇek snonggaku ḇesesya ido na wasmai marasrisen, ma roi ine syamswen ḇa.
Waswarepen Kaḇer
-
Rosai ḇefnai fa wakbaryas abar ḇepyum fnoḇek snonggaku ḇesesya?
-
Moḇsa fasnai syowi fafisu wakofenḇair rosai wafarkor kwar na?
-
Rosai na wafrur kaku insama wamgak fa wabaryas ḇe snonggaku ḇesesya ḇa?
SWEWAR NABOR WER
Nyan ri fyak buk kartu kontak jw.org fa bukibaryas abar ḇepyum.
Rari ḇepyum ri fyak naisya na nafnoḇek Au fa baryas abar ḇepyum ya.
”Wamarisen Wakḇe Mandaswan Snonggaku Ke?” (Syap Baryas paik September 2020)
Mam fawar ro Refo ḇefawarḇair inai mgun oso imgak ḇa fa byaryas abar ḇepyum ya.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
