NLÔ AJÔ 22

Aval avé ô ne kañete mbamba foé?

Vô’ôlô nkobô

Nté wo yé’é benya mejôô, ô ne jô womiene na, ‘Ke môt ase a yiane yeme mam ma!’ Wo bele, môt ase a yiane fo’o yeme mam me ne Bible. Ve ô ne wô’ ôsone ya kate bôte bevo’o mame wo yé’é. Bi tame zu yene mam me ne volô wo na ô dañe woñ ôte, a kate mbamba foé a mevak.

1. Aval avé ô ne kate bôte bevo’o mame wo yé’é?

Beyé’é be Yésus be nga jô na: “Bi se ngule ya bo te kobô mam bi nga yen a wôk.” (Mam Minlôman 4:20) Be nga nye’e mam Yésus a nga ye’ele be aval é ne na, be nga kômbô kate me môt ase. Ye wo fe wo wô’ôtane nalé? Nge é ne nalé, jeñe’e fane ya kate bivuvumane biôé a bemvôé bôé mame wo yé’é a ésemé ése.—Lañe’e Becolossien 4:6.

Aval ô ne taté na wo bo de

Éyoñe wo laan a môt éziñe ya nda bôte jôé, kañete’e nye mbamba foé ô jô’ô na: “Ye me ne wo laane mfefé jam ma te yé’é sondô nyi.”
Lañe’e mvôé jôé éziñ éfus é ne ve nye ngul nyul éyoñ a kon, nge ke éyoñe nlem ô tyele nye yôp.
Nge môte mia nye mia saé a sili wo avale wo te lôte sondô wôé, ô ne nye kate mame wo te yé’é Bible, nge ke bisulan.
Liti’i bemvôé bôé anjeñe mefoé dangan jw.org
Bañete’e ba bevo’o na be zu tabe ayé’é Bible dôé nge ke liti’i be avale bebiene be ne sili ayé’é Bible anjeñe mefoé dangan jw.org.

2. Amu jé é ne mfi na ô kañete fufulu a bobejañe ya akônda?

Beyé’é be Yésus be nji su’u ve na ba kañete bivuvumane biap a bemvôé bap mejô me Zambe. Yésus a nga “lôm be bebaé bebaé, be ke ôsu minlam mise” a kañete mbamba foé. (Luc 10:1) Fatan ésaé nkañete éte é nga ve abui bôte fane ya wô’ô mejô me Zambe. Beyé’é be nga wô’ abui meva’ éyoñe be nga kañete nsamba wua a bobenyañ bap ya nsisim. (Luc 10:17) Ye wo fe ô ne jeñe na ô kañete a bobejañ ya akônda?

TUKA’A FAK

Yene’ aval ô ne dañe woñe ya bo ésaé nkañete, a meva’a wé bi.

3. Yéhôva é su’u wo

Abui bôte da kômbô fo’o kañete, ve ba ko woñe na bôte ba ye sase be, nge yene be aval étam.

Ye wo fe wo ko woñe ya kate bôte bevo’o mame wo yé’é? Amu jé?

Futi’i VIDÉO, mvuse ya valé, yala’ane nsili wu.

VIDÉO: Me nga ye’elane Yéhôva na a ve ma ayo’o nlem (4:05)

Aval avé bisoé bite bi nga bi ayo’o nlem ya kañete mbamba foé?

Lañe’e Ésaïe 41:10, mvuse ya valé, yala’ane nsili wu:

Nge wo ko woñe ya kañete mbamba foé, aval avé meye’elane me ne volô wo?

Ye wo too ô yeme’ek?

Abui Bengaa be Yéhôva fe e nga taté simesane na be vo’o kañete mbamba foé môs éziñ. Sergey a ne môte wua ya été. A mbe a yene’ émiene zezé, a e mbe nye ayaé na a laan a bôte bevok. Ve mvuse ya valé, a nga yé’é Kalate Zambe. A jô na: “Akusa bo me mbe me ko woñ, me nga taté na ma kate bôte bevo’o mame me mbe me yé’é. Me nga viane teme na, nté me mbe me la’ane bôte mame ma yé’é Bible, me nga taté na ma bo ayo’o nlem, a mbunane wom ô nga tu’a yem.”

4. Bo’o ésemé

Éyoñ wo kañete mbamba foé, ô nji yiane fase ve mam wé jô, fase’e fe avale wé jô me. Lañe’e 2 Timothée 2:24 a 1 Pierre 3:15, mvuse ya valé, yala’ane minsili mi:

Aval avé bifuse bite bi ne volô wo na ô yeme kañete bôte mbamba foé?
Mia bibu’a biziñe ya nda bôte jôé nge bemvôé bôé béziñ mi ne bo teke kui tyiñ. Jé ô ne bo, a jé ô nji yiane bo?
Amu jé e ne mfi na ô belane mbamba minsili éyoñe wo laan a bôt, a lôte na ô kate be mame ba yiane buni?

5. Ésaé nkañete ja soo benya mevak?

Yéhôva a nga ve Yésus ésaé ya kañete mbamba foé. Aval avé Yésus a mbe a yene’ ésaé éte? Lañe’e Jean 4:34, mvuse ya valé, yala’ane minsili mi:

Éyoñe bia di mbamba bidi, bia bi ngule nyul, a bi ne mevak. Amu jé Yésus a nga jô na éyoñ a bo nkômbane Zambe, aval ane ésaé nkañete, a mbe ve ane a di bidi?
Meva’a mevé wo simesane na ésaé nkañete é ne soo bia?

Melebe me ne volô wo

Nté ésulane ya zañe sondô ja lôt, jene’e mame me ne volô wo na ô taté minlañ a bôt.
Sili’i môte mia nye mia yé’é Bible jam ô ne bo asu na ô taté na wo bo bisaé ésulan.
Bela’ane ngab é ne na: “Bôte béziñ ba jô na” nge ke “Môt éziñ a ne sili na” asu na ô yalane minsili abui bôte da sili.

MÔT ÉZIÑ A NE SILI NA: “Aya a môt, jé é ne mfefé?”