ARUFUDAHANI 22
Ida luba hapurichihani uganu buiti?
Eibu afurendeireina humani inarüni le tídanbei Bíbülia, másiñati samina humá: “Lunti hasubudiruni sun gürigia katei le!”. Ani ítara liña, mosu hasubudiruni sun gürigia katei le! Íbini ítara, háfuga belú lan anufudei hun láurügü hasaminarun luagu hayanuhan houn amu luagu le hafurendeirubei. Ariha waméi ida luba lan lagidarun anufudei le huéi lun hasandiruni ugundani le líchugubei hayanuhan houn amu luagu uganu buiti le tídanbei Bíbülia.
1. Ida luba hagumeserun ayanuha houn hasubudirágun luagu le hafurendeirubei?
Ariñagatiña lani Hesusu disipulugu: “Siñati wámanichun lau katei le ariha wamaalibei luma le aganba wamaalibei” (Adügaü 4:20). Kei meha weiri lan línsiñe inarüni houn, busentiña meha hayanuhan luagu houn sun gürigia ha hayara. Ítara liña giñe san hasandiragun hungua? Anhein ítara liña lubéi, áluaha humá chansi lun hayanuhan lau inebesei hama hiduheñu luma hama humadagu luagu le hafurendeirubei (aliiha huméi Kolosana 4:6).
Le gayaraabei hadügüni lun hagumeserun
-
Danme hayanuhaña lan luma somu hiduhe, gayaraati hatatirun ayanuha tuagu Bíbülia lau hariñagun aban katei ítarati: “Dimaasu le, furendeitina aban katei buiti”.
-
Anhein lauñein lubéi somu sandi aban humada o nidiheri lan luagu somu katei, arufuda humá aban bérusu tídangiñeti Bíbülia lun le gayaraati líchugun dǘgüdaguaü lun.
-
Danme le lálügüdünün somu hupaaná lidan wadagimanu ida liña lan lidin hun samudi o dimaasu, abahüdagua humá somu katei lun lídangiñe le hafurendeirubei lidan haturiahanu Bíbülia o lidan adamuridaguni.
-
Arufuda huméi wani páhina lidan internet jw.org houn humadagu.
-
Danme lichugún aturiahani tídangiñeti Bíbülia hun, agunbiraha humá amu gürigia lun hóundarun humoun o arufuda huméi houn ida luba lan hamuriahan aban aturiahani lidan wani páhina jw.org.
2. Ka uagu buidu lubéi lun háfaagun lun hagunfulirun lau le mégeiwabei lun háfuridun apurichiha hama lílana damuriguaü?
Mámarügüñein meha houn gürigia ha hasubudirubaña hapurichihei lani Hesusu disipulugu uganu buiti. Óunaha lumutiña meha Hesusu “lubarua, bián bián, lidoun sun ageiraü luma fulasu le lunbei lidin ñein” lun hapurichihan (Lúkasi 10:1). Ídehati ligaburi apurichihani le lun haganbuni saragu gürigia uganu buiti. Gúndaati giñe hasandiragun disipulugu houngua lau hapurichihan úara (Lúkasi 10:17). Ma buídubei hamuga giñe lun háfaagun lun hagunfulirun lau le mégeiwabei lun háfuridun apurichiha hama lílana damuriguaü?
SIGÍ HUMÁ AFURENDEIRA
Ariha waméi ka lan gayaraabei líderagunün lun manufude humá luma lun hasandiruni ugundani le líchugubei hapurichihani uganu buiti.
3. Húmabei Heowá
Añahein gürigia ha busentiña hapurichihan, lau sun lira hanufudetiña luéi le gayaraabei hasaminaruni amu hawagu o ida luba lan hóunabun gürigia.
-
Agia huguya, sanditün san anufudei láurügü hasaminarun hayanuhan houn amu luagu le hafurendeirubei odi manufudetün? Ka uagu?
Ariha huméi BIDÉU, ábameti hayanuhan luagu álügüdahani le:
-
Ida liña lagidarun anufudei hawéi nibureintiña ha áfuachubaña lidan bidéu le?
Aliiha huméi Isaíasi 41:10, ábameti hayanuhan luagu álügüdahani le:
-
Ka uagu lunti lubéi hafurieidun anhein hanufude hubéi hapurichihan?
Subuditi san hun?
Saminatiña meha saragu gefentiña luagu Heowá manigibaña lan lun hapurichihan. Kei hénpulu, sanditi meha aban wügüri gíriti Sergey mebegi lan ni kata ani hénrenguti meha lun lun layanuhan hama amu gürigia. Ábati lagumeserun aturiahoun Bíbülia. Ariñagati: “Lau sun meha hanufude nan, gumesetina ayanuha houn amu luagu le nafurendeirubei. Wagatina dan le narihinbei adüga lan lira lun buidu lan nasandiragun nungua luma lun léredun nafiñen”.
4. Inebehabu humá
Lubaragiñe hapurichihan lun somu gürigia, samina humá mámarügü luagu le lunbei hariñaguni, samina humá giñe luagu ida luba lan hariñaguni. Aliiha huméi 2 Timotéu 2:24 luma 1 Féduru 3:15, ábameti hayanuhan luagu álügüdahani burí le:
-
Ida luba hafalaruni le lariñagubei bérusu burí le dan le hayanuhan tuagu Bíbülia hama amu gürigia?
-
Másiñati múaranbaña lan hiduheñu o humadagu huma. Ka lunbei hadügüni? Ka moun lubéi lun hadügüni?
-
Lubaragiñe hariñaguni houn gürigia ka lan lunbei hafiñeruni, ka uagu buídutimabei lubéi lun hayanuhan hama lau inebesei?
5. Gúndaagüda lumutiwa wayanuhan luagu uganu buiti
Ru lumuti meha Heowá dasi lun Hesusu lun lapurichihani uganu buiti. Ida liña meha larihini Hesusu dasi le? Aliiha huméi Huan 4:34, ábameti hayanuhan luagu álügüdahani burí le:
-
Gúndaatiwa dan le weigin éigini buiti ani ágüdaha lumuti wabagari. Ka uagu lariñaga Hesusu ítara liña lan ladügǘn lugundan Bungiu kei éigini, apurichihani laganagua?
-
Ka katei buiti gayaraabei hibihini anhaün ayanuha luagu uganu buiti hama amu?
Le gayaraabei hadügüni
-
Lidan adamuridaguni le adügǘbei labadinagua dimaasu, furendei humá ida luba lan hagumeserun ayanuha hama gürigia.
-
Ayanuha humá luma humaisturun luagu ida luba lan híchugun yanu lidan adamuridaguni le adügǘbei labadinagua dimaasu. Lídehaba dasi le ichugúbei hun lun hasandiragun hungua aranseñu lun hayanuhan hama amu luagu le hafurendeirubei.
-
Yusu huméi fánreinti “Le hariñagubei fiu gürigia” luma “Álügüdahani le hadügübei fiu gürigia” le tídanbei líburu to lun hasayahan ida luba lan hóunabun álügüdahani luma ida luba lan hóunabun houn ha álugubaña hararamunün luéi hapurichihan houn.
ÁLÜGÜDAHANI LE HADÜGÜBEI FIU GÜRIGIA: “Ka iseribei?”.
-
Ida luba hamuga hayusuruni chansi le lun hayanuhan luma gürigia ligía luagu le furendei humaalibei lidan haturiahanu Bíbülia?
LE HAFURENDEIRUBEI
Adügati wayanuhan luagu uganu buiti lun gunda wamá ani gayaraati ménrenguntima lan hagumeserun sügǘ lau le hasaminarubei.
Águyuguagüdüni
-
Kaba ínchahaün lun hapurichihani uganu buiti?
-
Ida luba hadügüni lau inebesei?
-
Kaba íderaguaün lun lagidarun anufudei huéi?
FURENDEI HUMÁ LANWOUN
Ariha humá gádürü igaburi le ménrengunti lun hapurichihan tau tárüheta lánina jw.org.
Le gayaraabei wariñaguni lun wederegerunu tárüheta lánina JW.ORG (1:43)
Furendei humá gádürü igaburi le gayaraabei líderagunün lun hayanuhan luagu uganu buiti.
Ariha humá aban abahüdaguni tídangiñeti Bíbülia le gayaraabei líderaguniwa lun ganigi wamá lun wapurichihan íbini nibureingidiwa lan.
Aliiha humá luagu ida luba lan hayanuhan tuagu Bíbülia hama hiduheñu ha ibidiñegilibei Heowá houn.
Háfuga hínsiñebei lan giñe le hun
ÁLÜGÜDAHANI LE GABÜGÜRÜGUATI LADÜGǗN
Ida liña aturiahani tídangiñeti Bíbülia le híchugubei gefentiña luagu Heowá?
Gayaraati hayusurunu hibibülian lidan aturiahani le híchugubei gefentiña luagu Heowá maguburahanga luagu. Gayaraati hagunbirahaniña hiduheñu hama humadagu lidoun.
