LEKSIYON 22
Sa Unsang Paagi Isulti Nimo sa Uban ang Maayong Balita?
Samtang nagkat-on ka sa mga kamatuoran sa Bibliya, basin makahunahuna ka, ‘Kinahanglang mahibaloan ni sa tanan!’ Tinuod gyod nga kinahanglang mahibaloan ni sa tanan! Pero basig makulbaan ka nga isulti sa uban ang imong nakat-onan. Atong hisgotan kon unsay imong himoon aron mawala ang imong kakulba ug malipay ka sa pagsulti sa uban sa maayong balita sa Bibliya.
1. Sa unsang paagi isulti nimo sa imong mga kaila ang imong nakat-onan?
Ang mga tinun-an ni Jesus miingon: “Dili mi makahunong sa pagsulti bahin sa mga butang nga among nakita ug nadungog.” (Buhat 4:20) Gipabilhan nila pag-ayo ang kamatuoran mao nga gusto nila ning isulti sa mas daghang tawo kutob sa ilang maarangan. Kana pod bay imong gibati? Kon mao, pangitag mga kahigayonan nga masulti nimo sa imong pamilya ug mga higala ang imong nakat-onan sa matinahorong paagi.—Basaha ang Colosas 4:6.
Pipila ka paagi nga makasugod ug sangyaw
-
Dihang makig-estorya ka sa imong pamilya, hisgoti ang usa ka topiko sa Bibliya pinaagi sa pag-ingon: “Naa koy nindot nga nakat-onan aning semanaha.”
-
Basahi ug makapadasig nga teksto ang imong higala nga nasakit o nabalaka.
-
Sultihi ang imong mga kauban sa trabaho kon unsay imong nakat-onan sa imong pagtuon sa Bibliya o sa tigom sa kongregasyon dihang mangomosta sila nimo.
-
Ipakita sa imong mga higala ang jw.org nga website.
-
Imbitaha ang uban nga moapil sa imong pagtuon sa Bibliya, o ipakita kanila kon unsaon pag-request ug pagtuon sa Bibliya diha sa jw.org.
2. Nganong maayong tumong ang pagsangyaw uban sa kongregasyon?
Gawas nga gisulti sa mga tinun-an ni Jesus ang maayong balita ngadto sa ilang mga kaila, naa pa silay laing gihimo. “Gipadala sila [ni Jesus] nga tinagurha nga mag-una kaniya sa matag siyudad” aron mosangyaw. (Lucas 10:1) Tungod nianang organisadong pagsangyaw, mas daghang tawo ang nakadungog sa maayong balita. Ang pagsangyaw nga magkauban nakapalipay pod pag-ayo sa mga tinun-an. (Lucas 10:17) Puwede ba nimong himoong tumong nga mosangyaw pod kauban sa kongregasyon?
TUN-IG DUGANG
Sayra kon unsay imong himoon aron mawala ang imong kakulba ug malipay ka tungod sa pagsulti sa maayong balita ngadto sa uban.
3. Si Jehova mag-uban kanimo
Ang uban nga gustong mosangyaw makulbaan tingali kon unsay hunahunaon o reaksiyon sa mga tawo.
-
Makulbaan ba ka nga isulti sa uban ang imong nakat-onan? Nganong kanay imong gibati?
I-play ang VIDEO, ug dayon hisgoti ang mosunod nga pangutana:
-
Unsay gihimo niining batan-ong mga Saksi aron mawala ang ilang kahadlok?
Basaha ang Isaias 41:10, ug dayon hisgoti kini nga pangutana:
-
Dihang mahadlok kang mosangyaw, nganong makatabang nimo ang pag-ampo?
Nahibalo ba ka?
Daghang Saksi ni Jehova ang naghunahuna kaniadto nga dili gyod nila kayang mosangyaw. Pananglitan, si Sergey walay kompiyansa sa kaugalingon ug malisdan siya sa pagpakig-estorya sa uban. Unya nagtuon siyag Bibliya. Siya miingon: “Bisag nahadlok ko, misugod ko sa pagsangyaw sa uban bahin sa akong nakat-onan. Wala nako damhang kini ra diay ang makahatag nakog kompiyansa sa kaugalingon. Nalig-on usab niini ang akong bag-ong pagtuo.”
4. Magmatinahoron
Dihang isulti nimo sa uban ang maayong balita, konsideraha dili lang kon unsay imong isulti kondili kon unsaon pod nimo kini pagsulti. Basaha ang 2 Timoteo 2:24 ug 1 Pedro 3:15, ug dayon hisgoti kini nga mga pangutana:
-
Unsaon nimo pagpadapat kini nga mga teksto dihang makig-estorya ka sa uban bahin sa Bibliya?
-
Ang uban nimong higala o ubang membro sa imong pamilya dili tingali motuo nimo. Unsay imong himoon? Unsay dili nimo angayng himoon?
-
Nganong mas maayong mangutana sa matinahorong paagi imbes pugson ang uban nga motuo?
5. Ang pagsangyaw sa maayong balita makapalipay
Gisugo ni Jehova si Jesus nga isangyaw ang maayong balita. Unsay hunahuna ni Jesus niana nga buluhaton? Basaha ang Juan 4:34, ug dayon hisgoti kini nga mga pangutana:
-
Ang pagkaon ug sustansiyadong pagkaon makasustento sa atong kinabuhi ug makapalipay nato. Nganong ang pagbuhat sa kabubut-on sa Diyos—apil ang pagsangyaw sa maayong balita—gipakasama ni Jesus sa pagkaon?
-
Nganong malipay ka dihang isangyaw nimo ang maayong balita?
Sugyot
-
Panahon sa midweek nga tigom, pangitag mga paagi nga ikaw ang mosugod ug panag-estorya.
-
Pakig-estorya sa nag-Bible study nimo kon unsaon nga mahimo kang estudyante sa midweek nga tigom. Ang mga asaynment sa estudyante makatabang nimo nga mas maandam sa pagsulti sa uban sa imong nakat-onan.
-
Gamita ang mga seksiyon nga “Ang Uban Moingon” o “Kon Naay Mangutana” niini nga publikasyon sa pagpraktis kon unsaon pagtubag sa komon nga mga pangutana ug pagsupak.
KON NAAY MANGUTANA: “Komosta na man ka?”
-
Unsaon nimo paggamit kini nga kahigayonan nga isulti kaniya ang imong nakat-onan sa Bibliya?
SUMARYO
Ang pagsulti sa maayong balita ngadto sa uban makapalipay, ug dili ni lisod sugdan.
Review
-
Nganong isulti nimo sa uban ang maayong balita?
-
Unsaon nimo na paghimo sa matinahorong paagi?
-
Unsay imong himoon aron mawala ang imong kulba sa pagsangyaw?
SUSIHA
Sayra ang upat ka simpleng paagi nga imong masulti ang maayong balita gamit ang contact card sa jw.org.
Sayra ang upat ka hiyas nga makatabang nimo sa pagsulti sa maayong balita ngadto sa uban.
“Andam Ka Bang Mahimong Mangingisdag Tawo?” (Ang Bantayanang Torre, Septiyembre 2020)
Tan-awa kon sa unsang paagi ang ehemplo sa Bibliya makahatag natog kaisog sa pagsulti sa maayong balita, bisag bata pa ta.
Sayra kon unsaon nimo pagsulti ang bahin sa Bibliya ngadto sa mga membro sa imong pamilya nga wala pa makakat-on bahin kang Jehova.
“Pag-abot sa Kasingkasing sa Dili Magtutuong mga Paryente” (Ang Bantayanang Torre, Marso 15, 2014)
Basin Ganahan Pod Ka
KOMON NGA MGA PANGUTANA
Unsa ang Bible Study Program nga Gina-offer sa mga Saksi ni Jehova?
Sa libreng interactive program nga gina-offer sa mga Saksi ni Jehova, puwede nimong gamiton ang bisan unsang bersiyon sa Bibliya. Puwede nimong paapilon ang tibuok pamilya o mga amigo o amiga.
