LESEN 22

Ifa Usun Ka Tongeni Afalafala ewe Kapas Allim?

PLAY

Atun ka káé ewe enlet lón Paipel, eli ka ekieki, ‘A lamot án meinisin repwe pwal silei ei pwóróus!’ Ewer, a lamot meinisin repwe silei! Nge, eli ka pireir le ereni ekkewe ekkóch minne ka kákkáé. Sipwe ppii ifa usun ka tongeni pworacho ngeni óm na pireir me poputá le afalafala ewe kapas allim ngeni aramas fán pwapwa.

1. Ifa usun ka tongeni apwóróusa minne ka káé ngeni chókkewe ka sissileer?

Néún Jesus kewe chón káé ra apasa: “Aisap tongeni ükütiu le kapas won met aia püsin küna o rongorong.” (Föför 4:20) Ra fókkun aúcheani ewe enlet, ina popun ra mochen áiti ngeni aramas meinisin. A pwal ina usun meefiom? Ika ewer, iwe kopwe kútta alen óm kopwe ereni chón óm famili me chiechiom kewe fán súfél minne ka káé.—Álleani Kolose 4:6.

Ekkóch atun ka tongeni poputá

Atun ka fós ngeni chón óm famili, ka tongeni fósun och pwóróus lón Paipel ren óm erá: “Lón ei wiik ua káé och pwóróus mi apwapwa.”
Álleani ngeni emén chienom mi semmwen are nóm fán aúrek eú wokisin mi tongeni apéchékkúla.
Ika emén chienom chón angang a eisinuk pwóróusom, ereni met ka káé lón óm káéén Paipel are seni eú ach mwich.
Áiti ngeni chienom kewe ewe jw.org website.
Etiwa ekkóch ar repwe fituk le káé Paipel, are áiti ngeniir ifa usun repwe tingor wóón jw.org án emén epwe káé ngeniir.

2. Pwata a éch óm kopwe achocho le fiti chón ewe mwichefel le afalafal?

Néún Jesus kewe chón káé rese chék afalafala ewe kapas allim ngeni chókkewe ra sissileer. Jesus a “tiniirela akaruoman pwe repwe akomwola mwan lon ekewe telinimw me leni meinisin” pwe repwe afalafal. (Lukas 10:1) Ena kókkótun afalafal, a atufichi án chómmóng aramas repwe rong ewe kapas allim. Ar mwin lón ena angangen afalafal a pwal atoto ngeniir watteen pwapwa. (Lukas 10:17) Ka pwal tongeni achocho ngeni óm kopwe fiti chón ewe mwichefel lón ewe angangen afalafal?

KÚTTAFICHI

Ppii ifa usun ka tongeni pworacho ngeni óm pireir me meefi ewe pwapwa mi pop seni óm afalafala ewe kapas allim.

3. Jiowa epwe nónnóm reom

Ekkóch mi mochen fiti ewe angangen afalafal eli ra pireir ren met aramas repwe ekieki usur are met repwe ereniir.

Ka pireir le ereni aramas met ka kákkáé? Ika ewer, pwata? Ika aapw, pwata?

Fichi ei VIDEO, me mwirin pwóróusfengen wóón ei kapas eis.

VIDEO: I Prayed to Jehovah for Courage (4:05)

Ifa usun ekkeei sáráfé Chón Pwáraatá ra pworacho ngeni ar meefi pireir?

Álleani Aisea 41:10, me mwirin pwóróusfengen wóón ei kapas eis:

Ifa usun iótek epwe álisuk atun ka pireir le fiti ewe angangen afalafal?

En mi silei?

Chómmóng Chón Pwáraatá Jiowa ra piin meefi pwe rese tongeni afalafala ngeni aramas ewe kapas allim. Áwewe chék ren Sergey, i a meefi pwe ese wor aúchean me a weires ngeni an epwe fós ngeni aramas. Iwe, a poputá le káé Paipel. A erá: “Inaamwo ika ua pireir, nge ua chék poputá le ereni aramas usun met ua káé. Ua máirú, pún ai afalafal ngeni aramas usun ewe Paipel a alapaaló ai meefi lúkúlúk. Pwal ai féri ena, a pwisin anúkúchara ai lúkú.”

4. Pwári súfél

Atun sia afalafala ngeni aramas ewe kapas allim, sipwe túmúnú met sia eáni afalafal me pwal napanapen ach afalafal ngeniir. Álleani 2 Timoty 2:24 me 1 Petrus 3:15, 16a, me mwirin pwóróusfengen wóón ekkeei kapas eis:

Ifa usun kopwe apwénúetá ekkena wokisin atun ka fós ngeni aramas usun ewe Paipel?
Ekkóch chón óm famili are chienom kewe eli resap tipeeú ngonuk. Met ka tongeni féri? Nge met kosap féri?
Pwata a éch ach sipwe eáni kapas eis mi ésúfél nge sisap fen ereni aramas met itá repwe lúkú?

5. Ach afalafala ewe kapas allim a atoto pwapwa

Jiowa a ewisa ngeni Jesus an epwe afalafala ewe kapas allim. Met meefien Jesus usun wisan na? Álleani Johannes 4:34, me mwirin pwóróusfengen wóón ekkeei kapas eis:

Ika sia mwéngé mwéngé mi anné a apéchékkúlakich me a efisi ach pwapwa. Pwata Jesus a erá pwe ach féri minne Kot a tipeni, áwewe chék ren ach afalafala aramas, a usun mwéngé?
Óm ekiek nge met sókkun pwapwa sipwe meefi seni ach afalafala ewe kapas allim?

Minen álillis

Atun ewe mwich lón weekday, ppii met ka tongeni káé ren ifa usun kopwe poputááni óm pwóróus ngeni aramas.
Eisini ewe mi wisen káé ngonuk ifa usun ka tongeni eáni kinikin lón ekkewe mwich lón weekday. Ekkena esin kinikin repwe tongeni álisuk óm kopwe mmólnetá le ereni aramas minne ka káé.
Áeá ekkeei kinikin lón ei puk “Ekkóch Ra Erá” are “Eli Emén Epwe Eis” le asóssót met kopwe pélúwen ngeni án emén kapas eis me kapasen eppet.

ELI EMÉN EPWE EIS: “Pwata ke kerán pwáppwá?”