YOTAANTSI 22

¿Jaoka onkantyari pinkamantakotero kameetsari kamantaantsi?

REPRODUCIR EN

Piyotantakarori keariosanori Bibiria, pikoake pinkamanteri atiripee piyotabakeri, ¿tempa? Iro kantaincha timatsirika atsaroi, ¿jaoka onkantyari aimpeajero atsaroi ankamantakotantyarori okantayetiri Bibiria?

1. ¿Jaoka onkantyari pobayeneri atiripee piyotabakeri?

Ikantake iroamereni Jesoshi: “Tecatsi noncantea meeca nojocajero noquenquetsatacotiro oca noneasanotaqueri, aisati oca noquemasanotaqueri” (Itiancaneni Jesoshi 4:20). Inintasanotironi keariotatsiri, irotake ikamantantakariri atiri. Abiro, ¿pikoimpa pinkamantante? Ari pimatakero pinkamanteri pishaninka aisati pitsipabintsare (piñanatero Corosashisati 4:6).

Jaoka onkantyari añanatantyariri atiripee

Pinkenketsatakayeririka pishaninka, pinkanteri: “Kitaiteriranki, niyotabakero oka”.
Ariorika pitsipabintsare ijokiitaka orampa yobashiretaka, piñanateneri Bibiria oimoshirenkerineni.
Irisampitempirika pitsipabintsare: ¿Paita pantakeri kitaiteriranki? Pinkamanteri piyotabakeri Bibiriaki orampa piyotabakeri apatotaantsiki.
Piyotakayeri pitsipabintsare timayetatsiri interineki jw.org.
Pinkanteri pitsipabintsare inkaratempi ariorika irobameyeetempiro Bibiria, orampa pinkanteri inkie jw.org okantira ‘Pinkante obametempine’.

2. ¿Paita pinkaratantyariri kemisantatsiri pinkamantanterika?

Iroamereni Jesoshi te apinto inkamanteri atiri iyoyeetirini. Ikantajeitakeri Jesoshi: “Pijajeite, apitepee pincantayetanaquea […] nampitsipeequi” (Irocashi 10:1). Oka ikantakeriri Jesoshi iroamereni amitakotakeri ikamantajeitantakariri osheki atiri kameetsari kamantaantsi. Ikimoshirejeitanake ikaratabakaajeitaka apiteni (Irocashi 10:17). ¿Pikoirompa pinkarateri kemisantatsiri pinkamantantyariri atiripee?

PIYOTASANOTERO YOTAANTSIKA

Piyotero jaoka onkantyari poimajerentero pitsaroi, aisati pinkimoshirete pinkamantanterika.

3. Kiso irobakempi Yioba

Aparopee koatsiri inkamantante, isampita: “Ariorika nonkamantante, ¿jaoka inkantenari atiripee?”

Pinkamanteririka atiri, ¿pitsaroakaarimpa? ¿Paitakea pitsaroakantariri?

Pamenero SHIAKAANTSI aisati pinkenketsatabakaajeitya:

SHIAKAANTSI: Nokantakeri Yioba irishintsitakayena (4:05)

¿Jaoka okantakari yojokanakero ebankaripee itsaroi?

Piñanatero Ijorioririnte 13:6 aisati pinkenketsatabakaajeitya:

Pintsaroyerika pinkamantante, ¿paitakea pamanantyariri Yioba?

¿Piyoitimpa?

Osheki kemisantiriri Yioba ikantabeta ‘eiro nomatiro nonkamantante’. Kemisantatsiri Sergey ijitashitaka te inkanteji aisati eiro imatirotsi inkamantante, iñanatantakarori Bibiria oshintsitakaakeri ikamantakeri atiripee. Ikanti Sergey: “Otimabetaka notsaroake nomatakero nokamantantake, nojokanajiro notsaroake nokamantantakariri atiripee”.

4. Pinijantya pimpinkatsatante

Tekera pinkamantante, pinkenkeshiriempa paita pinkenketsateri aisati jaoka onkantyari pinkamantante. Piñanatero 2 Timoteo 2:24 aisati 1 Petero 3:15. Impoiji pinkenketsatabakaajeitya:

Ariorika pinkamantante, ¿jaoka onkantyari pimpankinatyaro okantiri Bibiria?
Terika inkemisantempiji pishaninkasanori aisati pitsipabintsare, ¿paita panteri? ¿Paita eiro pantiro?
Terika inkemisanteroji iriorijei okantiri Bibiria, ¿paita okameetsatantari eiro pikishiritsi?

5. Akamantakotiro kameetsari kamantaantsi oimoshirenkee

Ikantakeri Yioba Jesoshi inkamantakotero kameetsari kamantaantsi. ¿Paita ikantakotirori Jesoshi kamantaantsika? Piñanatero Joa 4:34 aisati pinkenketsatabakaajeitya:

Ariorika ayearo obanarontsi, ari obañakee aisati ankimoshiretanake. ¿Paita ikantantakari Jesoshi yantiniriri Tasorentsi okempeta iroyeari?
Ariorika pinkamantante, ¿paita kimoshiretaantsi timimotempine?

Pantayeteri

Ariorika pampatotya piyotero jaoka onkantyari pintyaro pinkenketsate.
Pinkanteri obametimpiri pantantyarori discurso apatotaantsiki. Oka amitakotempine pobametantyariri atiripee piyotabakeri.
Pankantyarori isampitari atiri pamenero sankenarentsi pajitachari “Aparopee atiri ikanti” aisati “Aparopee atiri isampita”.

APAROPEE ATIRI ISAMPITA: “¿Paita pantakeri kitaiteripeeki? ¿Jaoka okantari pantabeere?”.