NIKASEMƆ 22
Te Obaafee Tɛŋŋ Ogba Mɛi Sane Kpakpa Lɛ?
Be ni oyaa nɔ okaseɔ Biblia lɛ mli anɔkwalei lɛ, ekolɛ obaakɛɛ ohe akɛ, ‘Esa akɛ mɔ fɛɛ mɔ ale enɛ!’ Nakai ni, esa akɛ mɔ fɛɛ mɔ ale! Fɛɛ sɛɛ lɛ, ekolɛ obaashe gbeyei akɛ obaagba mɛi nɔ ni okaseɔ lɛ. Hã wɔkwɛ bɔ ni obaafee oye gbeyeishemɔ nɛɛ nɔ koni okɛ miishɛɛ agba mɛi Biblia lɛ mli sane kpakpa lɛ.
1. Te obaafee tɛŋŋ ogba mɛi ni ole lɛ nibii ni okaseɔ lɛ?
Yesu kaselɔi lɛ kɛɛ: “Wɔnyɛŋ wɔkpa nibii ni wɔna kɛ nibii ni wɔnu lɛ ahe wiemɔ.” (Bɔfoi 4:20) Amɛnya anɔkwalei lɛ ni amɛkase lɛ he waa aahu akɛ, amɛmiisumɔ ni amɛgba mɔ fɛɛ mɔ anɔkwalei nɛɛ. Ani bo hu nakai nɔŋŋ onuɔ he? Kɛ́ nakai lɛ, taomɔ bei ni obaanyɛ ojɛ bulɛ mli ogba owekumɛi kɛ onanemɛi nibii ni okaseɔ lɛ.—Kanemɔ Kolosebii 4:6.
Gbɛi komɛi ni obaanyɛ otsɔ nɔ oje shishi
-
Kɛ́ okɛ owekunyo ko miigba sane lɛ, kɛɛmɔ akɛ: “Mikase nɔ ko otsi nɛɛ ni miná he miishɛɛ waa, ani obaasumɔ ni magba bo?” ni okɛgbala ejwɛŋmɔ kɛba Biblia mli sane ko nɔ.
-
Okɛ onaanyo ko ni bɛ hewalɛ loo ehao lɛ asusu ŋmalɛ ko ni woɔ mɔ hewalɛ lɛ he.
-
Kɛ́ onanemɛi nitsulɔi bi bo bɔ ni otsi lɛ tee lɛ ehã lɛ, gbaa amɛ nɔ ni akɛ bo kase yɛ Biblia lɛ mli lɛ loo nɔ ni okase yɛ asafoŋ kpee ko shishi.
-
Wiemɔ jw.org wɛbsaiti lɛ he otsɔɔ onanemɛi lɛ.
-
Fɔ̃ɔ mɛi krokomɛi nine ni amɛbafata ohe kɛ́ akɛ bo miikase Biblia lɛ, loo tsɔɔmɔ amɛ bɔ ni amɛbaafee amɛtsɔ jw.org lɛ nɔ amɛbi ni akɛ amɛ akase nii.
2. Mɛni hewɔ esa akɛ okɛfee oti ni mã ohiɛ akɛ okɛ asafo lɛ baafee ekome kɛshiɛ lɛ?
Jeee mɛi ni Yesu kaselɔi lɛ le lɛ pɛ amɛgba amɛ sane kpakpa lɛ. Yesu ‘tsu amɛ enyɔnyɔɔnyɔ kɛtsɔ ehiɛ kɛtee maŋ fɛɛ maŋ’ koni amɛyashiɛ. (Luka 10:1) Bɔ ni Yesu to shiɛmɔ nitsumɔ lɛ he gbɛjianɔ lɛ hã mɛi pii ná amɛnu sane kpakpa lɛ. Agbɛnɛ hu, ekome ni kaselɔi lɛ fee kɛshiɛ lɛ hã amɛná miishɛɛ waa. (Luka 10:17) Ani bo hu obaasumɔ ni okɛfee oti ni mã ohiɛ akɛ okɛ asafo lɛ baafee ekome kɛshiɛ?
KASEMƆ PII OFATA HE
Obaana bɔ ni obaafee ni okashe gbeyei tsɔ, ni bo hu oná miishɛɛ ni mɛi ni shiɛɔ sane kpakpa lɛ náa lɛ eko.
3. Yehowa baafata ohe
Mɛi ni miitao amɛshiɛ lɛ ateŋ mɛi komɛi sheɔ gbeyei, ejaakɛ amɛsusuɔ akɛ amɛfeŋ lɛ jogbaŋŋ loo aboŋ amɛ toi.
-
Ani ooshe gbeyei akɛ obaagba mɛi nɔ ni okaseɔ lɛ? Kɛ́ okɛɛ ‘Hɛɛ’ lɛ, mɛni hewɔ, ni kɛ́ okɛɛ ‘Dabi’ hu lɛ, mɛni hewɔ?
Jiemɔ VIDIO lɛ, ni nyɛsusua sanebimɔ ni nyiɛ sɛɛ lɛ he.
-
Te oblanyo lɛ kɛ oblayei lɛ fee tɛŋŋ amɛye amɛgbeyeishemɔ lɛ nɔ?
Nyɛkanea Yesaia 41:10 lɛ, ni nyɛsusua sanebimɔ nɛɛ he:
-
Kɛ́ ooshe gbeyei akɛ obaashiɛ lɛ, mɛni hewɔ esa akɛ osɔle lɛ?
Ani ole akɛ . . .
Yehowa Odasefoi babaoo yɛ ni be ko ni eho lɛ amɛnu he akɛ amɛnyɛŋ amɛgba mɛi sane kpakpa lɛ? Akɛ nɔkwɛmɔnɔ lɛ, be ko ni eho lɛ, Sergey nu he akɛ ejeee mɔ ko, ni no hã ewa kɛhã lɛ akɛ ekɛ mɛi baagba sane. Kɛkɛ ni akɛ lɛ bɔi Biblia lɛ kasemɔ. Ewie akɛ: “Eyɛ mli akɛ mishe gbeyei moŋ, shi migba mɛi nɔ ni mikaseɔ Iɛ. Nɔ ni fee mi naakpɛɛ waa ji akɛ, Biblia lɛ he sane ni migba mɛi lɛ hã mifee ekãa waa. Ehã hemɔkɛyeli ni miyɔɔ lɛ hu mli bawa waa.”
4. Okɛ bulɛ awie
Dani obaagba mɛi sane kpakpa lɛ, jeee nɔ ni obaawie lɛ kɛkɛ esa akɛ osusu he, shi moŋ bɔ ni obaawie lɛ ohã lɛ hu. Nyɛkanea 2 Timoteo 2:24 kɛ 1 Petro 3:15 lɛ, ni nyɛsusua sanebimɔi nɛɛ ahe:
-
Kɛ́ okɛ mɛi miigba Biblia lɛ he sane lɛ, mɛɛ gbɛ nɔ obaanyɛ okɛ ŋaawoi ni yɔɔ ŋmalɛi nɛɛ amli lɛ atsu nii?
-
Ekolɛ owekumɛi loo onanemɛi komɛi kɛ bo kpaŋ gbee. Mɛni obaanyɛ ofee? Mɛni esaaa akɛ ofeɔ?
-
Mɛni hewɔ ehi waa akɛ obaajɛ bulɛ mli obi amɛ saji, moŋ fe ni obaakɛɛ amɛ nɔ ni esa akɛ amɛhe amɛye lɛ?
5. Kɛ́ ogba mɛi sane kpakpa lɛ, obaaná miishɛɛ
Yehowa kɛ nitsumɔ wo Yesu dɛŋ akɛ eshiɛ sane kpakpa lɛ. Te Yesu na nitsumɔ nɛɛ ehã tɛŋŋ? Nyɛkanea Yohane 4:34 lɛ, ni nyɛsusua sanebimɔi nɛɛ ahe:
-
Kɛ́ wɔye niyenii kpakpa lɛ, ehãa wɔnáa hewalɛ kɛ miishɛɛ. Mɛni hewɔ Yesu wie akɛ Nyɔŋmɔ suɔmɔnaa nii ni wɔbaafee, ni sane kpakpa lɛ shiɛmɔ hu fata he lɛ, tamɔ niyeli lɛ?
-
Mɛɛ gbɛi anɔ sane kpakpa lɛ shiɛmɔ baanyɛ ahã oná miishɛɛ?
Otii ni baawa bo
-
Kɛ́ aafee otsi teŋ kpee lɛ, taomɔ otii komɛi ni obaanyɛ okɛtsu nii kɛje sanegbaa shishi.
-
Bi otsɔɔlɔ lɛ bɔ ni obaafee otsɔ skulnyo yɛ otsi teŋ kpee lɛ mli. Skulbii anifeemɔi lɛ baanyɛ awa bo ni osaa ohe jogbaŋŋ koni ogba mɛi nɔ ni okaseɔ lɛ.
-
Kaa bɔ ni obaafee ohã saji ni mɛi baabi bo yɛ sane kpakpa lɛ he lɛ hetoo lɛ okwɛ; obaanyɛ okɛ saji ni ji, “Mɛi Komɛi Kɛɔ Akɛ” loo “Ekolɛ Mɔ Ko Baabi Bo Akɛ” lɛ ni yɔɔ wolo nɛɛ mli lɛ afee nakai.
EKOLƐ MƆ KO BAABI BO AKƐ: “Mɛni yaa nɔ?”
-
Te ooofee tɛŋŋ okɛ hegbɛ nɛɛ atsu nii kɛkɛɛ mɔ lɛ nɔ ni okase yɛ Biblia lɛ ni akɛ bo kaseɔ lɛ mli?
EMLI OTI
Kɛ́ ogba mɛi sane kpakpa lɛ, obaaná miishɛɛ, ni obaana akɛ, asomoaŋ bɔ ni obaafee oje shishi lɛ waaa kwraa.
Mɛni Okase?
-
Mɛni hewɔ esa akɛ ogba mɛi sane kpakpa lɛ?
-
Te obaafee tɛŋŋ okɛ bulɛ afee nakai?
-
Te obaafee tɛŋŋ oye gbeyei ni ekolɛ osheɔ akɛ obaashiɛ lɛ nɔ?
EHE SAJI KROKOMƐI
Obaana bɔ ni obaafee otsɔ jw.org kaadi lɛ nɔ ogba mɛi sane kpakpa lɛ.
Obaana sui ejwɛ ni baawa bo ni onyɛ ogba mɛi sane kpakpa lɛ.
“Ani Ofee Klalo Akɛ Obaatsɔ Wolɛɛnyo Ni Hɛɔ Gbɔmɛi?” (Buu-Mɔɔ, September 2020)
Obaana bɔ ni Biblia mli sane ko baanyɛ ahã wɔfee ekãa ni wɔgba mɛi sane kpakpa lɛ, kɛ́ wɔji gbekɛbii po.
Obaana bɔ ni obaafee okɛ owekumɛi ni jeee Odasefoi lɛ agba Biblia lɛ mli sane.
“Bɔ ni Wɔɔfee Wɔshɛ Wɔwekumɛi ni Heee Yeee lɛ Atsui He” (Buu-Mɔɔ, March 15, 2014)
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
