ƝAAKWƐLƐI 22

Ya tɛɛ ləi yɛ́ pɛli Yálá Lawoo laahəlii nu takpɛliɠaa diɛ ?

NWOO MƐN

Ə́ kaa lɔ kɛi ma yɛ́ Biblə ŋɔ teɲaɠaa kɔlɔn, yɛ́ mo ə́ kpɔ ɓa yɛ́ kɛ diɛ na maanɛɛ nu kəlee ə kɛ a deɲaɠaa ŋɛi kɔlɔnŋaa. Teɲa li nu kəlee maakpaan gaa ma ə kɛ a deɲaɠaa tii kɔlɔnŋaa. Kɛlɛɛ ɲɔu kaa kiɛ ə́ kɔlɔi yɛ hwilɛn na deɲa tii hukulɔ mɛni ɓa. Gaa pələi ə́ yee a pɛli ə tɛɛ la ɲɔui tii ɓa, ə lɛɛ ə́ kwəinɛɛ hɔlɔɓoYálá Lawoo laahəliɛ hu.

1. Yii ə́ kaa maakwɛlii ya pɛli ɉukulɔi ləi ə́ kwɛlɛ nua diɛ ?

Zesu ŋɔ kalan nea di mo diɛ ma “ kɛlaa, ku wɛi yii ku mɛn, yii ku gaa, ku ho pai lənəi yili ɓo mɛni ɓa ” (Gɛlaɠaa 4:20). Mɛniɠaa di maakwɛli Zesu yəi nwɛli ə too diɛ kpɔ kɛnɛ ə lɛɛ di kɛ bɔ di yili hukulɔ nu kəlee ɓa. Bələ ɓə yɛ́ kpɛliman ya kɛ ə́ kiliŋahiɛi la ? Akɛ pələ ɓə ya kɛ ə́ kiliŋahiɛi la, mɛniɠaa ya kɛ maakwɛlii, kpaaləɠaa kwɛli yɛ́ pɛli ɉukulɔi a maawiɛlaa ə́ yəi bɛlɛn nua diɛ da ə́ ɓəlaa (Kolosə 4:6 ɓo).

Pələi ya pɛli gɔwɔtɔɔi la

Ka ə́ yəi bɛlɛnmun da ka kɛi lono kɛ, ya pɛli ə́i laahwilɛn Biblə hu mɛni ta mɛi ə́ mo yɛ́ ma : “ Nɔwɔi ŋɛi ɓa ŋi mɛni ta maakwɛli yii nwɛli aa too máá kpɔ kɛnɛ. ”
Ə́ ɓəlan da yii gɔlɔi ho pono li awala kɛtii liihɛlɛn da yɛ ɓo ma, vɛlisɛɛ ta ɓo ma yii a vaŋalɔ.
Pələi nɔwɔ laa ə kulɔ la, ə́ kólókɛyɔwɔ ta a ə́ maaləngɛ, mɛniɠaa ə́ maakwɛli ə́ wɔ Biblə kalan ɉii lowai awala kɛtii mɛniɠaa ə́ maakwɛli ŋaakpɔn ma, ɉukulɔ ma.
Gwɛli yɛli lɛ ə́ ɓəlaa diɛ.
Nu takpɛliɠaa təli di pa di di wəlitɔɔ, ə́ wɔ Biblə kalan ɉii lowai awala kɛtii ə́ ɉu kulɔ diɛ pələi da pɛli di Biblə kalanŋaa hu hwɛli la gwɛli yɛli ɓa.

2. Lə mɛni ɓa maanɛɛ ə́ ɉəɠə ɉu ka galangbɔn ɉu nua kaa Yálá Lawoo laahəli ?

Zesu ŋɔ kalan nea di ho lɔ kɛ Yálá Lawoo laahəli nua di di kɔlɔn diɛ. Zesu “ ə di tɔɔ hweelɛ-hweelɛ diɛ li taaɠaa ” hu Yálá Lawoo laahəli mɛni ɓa (Lukə 10:1). Bələi tii di kɛi Yálá Lawoo laahəli la, ɉeɛi kpɔ kɛ gbaŋa a neelee di yəi ə lɛɛ yili ə gɛ diɛ pɛli hwaai nu tamaa pɔ. Yálá Lawoo laahəliɛ gee ɓa ə kwəinɛɛ kɛnɛ tɛɛ Zesu ŋɔ kalan nea pɔ (Lukə 10:17). Yɛ́ kpɛliman, ya pɛli ə́ ɉəɠə ɉu ka galangbɔn ɉu nua kaa kulɔ kaa Yálá Lawoo laahəli ?

Ə́ WƆ MƐNIKƆLƆNŊAA TA PƐLƐ MA

Gaa pələi ya pɛli ɲɔu kulɔi la ə́ kɔlɔi yɛ́ pɛli Yálá Lawoo laahəlii ə lɛɛ pələi ya pɛli kwəinɛɛ hɔlɔɓoi la Yálá Lawoo laahəliɛ hu.

3. Zehova kaa pai kɛi ə́ pɔ

Nutaɠaa da kɛ bɔ di Yálá Lawoo laahəli, kɛlɛɛ pələi nua kaa pai di kiliŋahiɛi la diɛ, ə lɛɛ pələi di kaa pai tuwɔi la a diɛ, da kɛ ɲɔui yili hu.

Yii ə́ kaa maakwɛlii, ɲɔu kaa kiɛ ə́ hu yɛ́ pɛli ɉukulɔi nu takpɛliɠaa diɛ. Lə mɛni ɓa ?

VIDIO kaa, ə lɛɛ ka lono kɛ gɛɛmaalən ŋɛi mɛi.

VIDIO : Ŋa Zehova hwɛli yii yaan ə liikpələlaa tɛɛ bɔ́ (4:05)

Muhəɠəninɛɠaa tii di tɛɛ ləi diɛ ɲɔu kulɔ di hu ?

Esai 41:10 ɓo, ə lɛɛ ka lono kɛ gɛɛmaalən ŋɛi mɛi.

Ya kɛi ɲɔu Yálá Lawoo laahəlii, Yálá hwɛliɛ a pɛli kpɔnmaa tɛɛ ləi ə́ pɔ ?

Ə́ kili kaa ɉu ?

Zehova ŋɔ Kəla tamaa di kɛi di kiliŋahiɛ toloo diɛ kɛ ma di ho pai pɛlii Yálá Lawoo laahəlii kpɔ tɔnɔ kpɛli. Gwa gɔɔmaa həɠə Sergey ɓa, ə kɛ a nu yii ho kɛ laa li gbɔɔ la, ə lɛɛ ho kɛ a nu yii vaa laa nɛɛ nu takpɛliɠaa pɔ. Kɛlɛɛ pulu ɓa ə Biblə maakwɛli. Ə mo yɛ ma : “ Pələi ma ŋa kɛi ɲɔu la, mɛniɠaa ŋa kɛi maakwɛli, ŋa gɔwɔtɔɔ kea gɛ ɉukulɔ nu takɛliɠaa diɛ, ə lɛɛ yili ə gɛ ŋa gɔwɔtɔɔ gɛ laa gbɔ́ɔ́ la ə lɛɛ yili ə kulɔ dɛɠii kpɔ kɛnɛ. Ə lɛɛ mɛniɠaa tii ŋa kɛi ɉukulɔ, ə ŋɔ laanalaa huwala-wala kpɔ a neelee. ”

4. Gɛ a maawiɛlaa

Ya kɛi pa Yálá Lawoo laahəlii, mɛnii ə́ kaa pai moi, yili lɔ hwəi ə́ kaa pai ə́ kiliŋahiɛi ma, kɛlɛɛ ya ə́ kiliŋahiɛ pələi ə́ kaa pai moi la. Timote veelɛ 2:24 da Piɛrə dɔlɔɔ 3:15, 16 ɓo ə lɛɛ ka lono kɛ gɛɛmaalənŋaa ŋɛi mɛi.

Ka nuta ka kɛi lono kɛ yɛ hwilɛn na Biblə ɓa, ya pɛli vɛlisɛɛɠaa ŋɛi pɔ tuwɔ ɓoi ləi ?
Ə́ yəi bɛlɛn nua taɠaa awala kɛtii ə́ ɓəlaa di ho kiɛ pai hwaa ə́ woo ɓa, yili akɛtii maanɛɛ ə́ tuwɔ ləi ? Ə lɛɛ lə ɓə maahonɛɛli ə́ gɛ ?
Lə mɛni ɓa maanɛɛ yɛ́ kɛɛmaalənŋaa həɠə ɉu yɛ́ gɛ nua diɛ a nɛlɛɛ, hɛnigɛ ə́ haŋa ə́ hwaa di pɔ yɛ́ diɛ na yii ɓə maanɛɛ di laana ?

5. Yálá Lawoo laahəliɛ a kwəinɛɛ tɛɛ nu pɔ

Zehova ə kɛ Zesu ɓa ə nwɛlɛɛ lɛlɛɛ laahəli. Zesu ə kɛi góló tii kaa ləi ? Ɉaan 4:34 ɓo, ə lɛɛ ka lono kɛ gɛɛmaalənŋaa ŋɛi mɛi.

Gwa kɛi kɔnɔn nɛlɛɛ mɛɛ, yili a gu wɔ yɛnɛɛ laahɔnmo ə lɛɛ yili a gu kwəinɛɛ. Yálá liiɓa kɛɛ yii lɔ nwɔnɔ vilɛnŋaa Yálá Lawoo laahəliɛ ɓa, lə mɛni ɓa Zesu ə gɔɔn kɔnɔn miɛ ɓa ?
Ə́ wɔ kili ɓa kwəinɛɛ ləkɛɛ ɓə ya pɛli ɉɔlɔɓoi ya kɛi Yálá Lawoo laahəli ?

Liɛwoo

Ɓɛlowai ya kɛ la nɔwɔ kuu mu ŋaakpɔn ma, gaa pələi ya pɛli lono kɛ pələ kɔwɔtɔɔi la.
Nui a kɛ Biblə kalan ɉii yɛ́, mo ma ə ɉukulɔ yɛ́ pələi ya pɛli ə́ kɛ la a nɔwɔ kuu mu ŋaakpɔn ŋɔ lakwəlilon da. Ya kɛ a nɔwɔ kuu mu ŋaakpɔn ŋɔ lakwəlilon da, mɛniɠaa ə́ kaa maakwɛlii, ə́ kaa pai pɛlii ɉukulɔi nu takpɛliɠaa diɛ hwá ɲɔu.
Gɛɛnaa ŋɛi gaa laa pɛɛn ni “ Nutaɠaa da kɛ kɛi ma ” awala kɛtii “ Nuta a pɛli əi maaləngɛ yɛ ma ”, kɛɛmaalənŋaa kaa laa kɛ́ pai di mɛi kɛlɛ-kɛlɛ yɛ́ tɔnɔ. Yili ɓə pai gɛi nuta a gɛɛmaalənŋaa tii da kɛ yɛ́ holo ta, yɛ́ pɛli mukulɔ pələ kaai.

NUTAƓAA DA KƐ KƐI MA : “ Lə ɓə yiihu ya kɛ gɛi ? ”

Nuta a gɛɛmaalən tii kɛ yɛ́, ya pɛli tɛɛ ləi yii yaan mɛniɠaa ya kɛ maakwɛlii ə́ wɔ Biblə kalan ɉii lowai, yɛ́ pɛli da hukulɔi ma ?

YII GU GALAN

Yálá Lawoo laahəliɛ a kwəinɛɛ tɛɛ nu pɔ, ə lɛɛ gɔwɔtɔɔ laa ho pai walai kpɔ tii kɛnɛ yɛ pələi ya kɛ ə́ kiliŋahiɛi la.

Nɛɛ ə́ kili pɔ

Lə mɛni ɓa maanɛɛ guɔ Yálá Lawoo laahəli nu takpɛliɠaa diɛ ?
Ya pɛli yili kɛ pələ kɛi ləi a maawiɛlaa ?
Ɲɔu a kɛ ə́ hu Yálá Lawoo laahəli mɛni ɓa, lə ɓə ya pɛli gɛi ?

Voloi ɲaakwɛlɛi 22 naa ə kpɛɛ la :

Yii maanɛɛ ə́ gɛ

Ə́ kiliŋahiɛ nuta ɓa yii ya pɛli ə́ nwɛlɛɛ lɛlɛɛ laahəli ma. Yii ə́ kaa pai moi ma, pələi ə́ kaa pai moi la da ɓɛlowai ə́ kaa pai moi la, ə́ kiliŋahiɛ nwɔnɔ yili ɓa.

Mɛni takpɛli yii ya pɛli gɛi :

Your other goal