SOMO LYA 22

Nka Gurhe Wakakola oku Kasi k’Okuhubiri Emyazi Minja?

ZIHA

Ok’oli wagenderera kumenya obukweri bwe Biblia, hali oku wakawaza, ‘buli muntu akwanene amenye kw’ebila bintu!’ Bukweri. Buli muntu akeneere kubumenya! Aliko, hali oku wakayunva obuba b’okubwira abandi oku biwayigire. Leka rhulole gurhe wakachimala m’obola buba, n’okurhondera kubwira abandi oku myazi minja eli omu Biblia ey’onasimire.

1. Nka gurhe wakabwira abandi oku biwayigire?

Abanafunzi ba Yesu baliderhere: “Rhurhakaleka kubwira abandi oku birhwabwene n’okuyunva.” (Matendo 4:20) Balihere obukweri kachiro kanene omu kuntu balilonzeze kububwira ku bantu banene nk’oku bakanagala koshi. Nawe ochiyunvirhe ntyo si? Akaba nechi, oyinje walola akasanzi wakabwira abantu b’omulala gwawe na bera-bawe oku biwayigire n’obukenge.—Osome Wakolosai 4:6.

Hala njira ziguma-ziguma wakarhonderamo

Amango oli waganira n’abantu b’omulala gwawe, orhonderese enganiro ye Biblia omu kuderha ntya: “Hali echintu chisimisize nayigire mw’elila boso.”
Oganire na mwira wawe ogayire changw’olwere oku lwandiko luhirire omurhima.
Obwire abamunakola nabo bakubazize emyazi yawe, oku biwayigire omu funzo lyawe lye Biblia changwa oku mbuganano z’echibaga.
Oyereke bera-bawe esite yerhu jw.org.
Obwire abandi bayinje oku funzo lyawe lye Biblia, changwa obayereke gurhe bakahema -elyabo oku jw.org.

2. Bulagurhe okuhubiri haguma n’echibaga guli muhigo guherhe akachiro?

Abanafunzi ba Yesu barhalimenyeseze emyazi minja oku bantu bamenyene nabo bonyine. Yesu “arhuma babiri-babiri bamurhange mu buli vile yewe yenyine ali ajamo” kuhubiri. (Luka 10:1) Akola kasi k’okuhubiri kapangirwe bwinja kaha bantu banene orozo l’okuyunva emyazi minja. Okuhubiri haguma kwashuba kulerhera abanafunzi mwishingo gunene. (Luka 10:17) Nawe si orhakahigirira kuhubiri haguma n’echibaga?

HUMBA BWENENE

Lola gurhe wakahima obuba, n’okupata oku mwishingo okuhubiri emyazi minja kunalerha.

3. Yehova aba haguma nawe

Hali baguma banaba basimire kuhubiri aliko banayubaha okuntu abandi bababona, n’echibabakolera hano bahwanza akola kasi.

Onayunva oyubahire okubwira abandi oku biwayigire si? Akaba nechi, bulagurhe? N’akaba nanga, bulagurhe?

Ziha EVIDEO, muje mwaganira kw’echila chibazo.

VIDEO: Naliri Nahema Yehova Obushiru omu Sala (4:05)

Nka gurhe abala bahamirizi bachili misole bahimaga obuba bwabo?

Osome Isaya 41:10, muje mwaganira kw’echila chibazo:

Bulagurhe okwanene kusalira nka wamayunva obuba b’okuhubiri?

Walimenyere si?

Oku burhanzi, Bahamirizi ba Yehova banene banarhanga kuyinja bawaza ku ntako bakapata obushiru b’okuhubiri. Omufano, Sergey aliri ayunva eshoni n’okubona nka bikomere okuganira n’abandi. Aliko lero arhondera kuyiga Ebiblia. Aderhere ntya: “Chiro akaba oku naliherhe obuba, narhondera kubwira abandi oku binaliri nayiga. Ech’okusomeza kuli kubona oku zene, inkala njira bushiru bunene n’enyorha y’okubwira abandi oku bukweri bwe Biblia. Okujira ntyo kwashubire seza obola buyemere omu murhima gwani nani.”

4. Ochikenge

Amango oli wabwira abandi emyazi minja, ololereze, arhali ebiwaderha byonyine si n’okuntu wabiderha. Osome 2 Timoteo 2:24 na 1 Petro 3:15, muje mwaganira kw’ebila bibazo:

Gurhe wakakolesa amala mandiko amango oli wabwira abandi oku by’omu Biblia?
Hali oku bantu baguma b’omulala gwawe na bera bawe, barhakayemera ebiwababwira. Bichi okwanene kujira na bichi orhakwanene kujira?
Bulagurhe kuli kwinja okubaza ebibazo n’amayeri ahali h’okufi yinja wabwira abantu ebi bakwanene kuyemera konyine?

5. Okubwira abandi oku myazi minja kunalerha omwishingo

Yehova alihere Yesu akasi k’okubwira abandi oku myazi minja. Gurhe Yesu aliri abona akola kasi? Osome Yohana 4:34, muje mwaganira kw’ebila bibazo:

Okulya ebilyo binja kunarhuma rhwagenderera kulama n’okugwarha obusime. Charhumaga Yesu ahuzanya okujira obulonza bwa Mungu—buheberwe m’okubwira abandi oku myazi minja—n’okulya ebilyo?
Busime bungana gurhe owazize omuntu akapata omu kubwira abandi oku myazi minja?

Tala amahano wakakolesa

Oku mbuganano z’ahagarhi k’eboso, olole njira ehe nawe wakarhonderesa mw’enganiro.
Obaze mwalimu wawe gurhe wakachiyandikisa nawe orhondere kugeza ebipindi oku mbuganano z’ahagarhi k’eboso. Ebipindi by’abanafunzi byakakurhabala ochiyunve oli tayari kubwira abandi oku by’oli wayiga.
Okolese ebigabi “Hali Abantu Banaderha” na “Hali Owakabaza” bili mu chinola chitabu omu kulola gurhe wakashubiza oku bibazo abantu bazigana kubaza n’obuhaka bazigana kulerha.

HALI OWAKABAZA: “Emyazi yawe?”