LEKSION 22
Paano Mo Masugid sa Iban ang Maayong Balita?
Samtang ginatun-an mo ang mga kamatuoran sa Biblia, mahimo magsiling ka, ‘Dapat mabal-an ini sang tanan!’ Insakto ka, pero basi nakulbaan ka nga isugid ini sa iban. Tun-an naton kon ano ang himuon mo para indi ka makulbaan kag malipay ka sa pagsugid sang maayong balita sa Biblia.
1. Paano mo masugid sa mga kilala mo ang imo natun-an?
Ang mga disipulo ni Jesus nagsiling: “Indi kami mag-untat sa paghambal tuhoy sa mga butang nga amon nakita kag nabatian.” (Binuhatan 4:20) Nanamian gid sila sa ila natun-an amo nga gusto man nila ini isugid sa iban. Amo man bala sina ang imo ginabatyag? Kon huo, isugid sing matinahuron sa imo pamilya kag mga abyan ang imo natun-an.—Basaha ang Colosas 4:6.
Kon paano mo ini himuon
-
Kon nagaistorya sa imo pamilya, isugid sa ila ang isa ka topiko sa Biblia paagi sa pagsiling: “Kanami sang akon natun-an sini nga semana.”
-
Sugiri ang imo abyan nga nagamasakit ukon may problema sang isa ka makapaumpaw nga bersikulo.
-
Kon ang imo kaupod sa obra nagapangamusta sa imo, sugiri sia sang imo natun-an sa Biblia ukon sa miting sang kongregasyon.
-
Ipakita sa imo mga abyan ang jw.org nga website.
-
Hagara ang iban nga mag-upod sa inyo pagtuon sa Biblia, ukon ipakita sa ila kon paano mag-request sang pagtuon sa Biblia sa jw.org.
2. Ngaa malipay ka gid kon tinguhaan mo nga makabantala upod sa kongregasyon?
Ang mga disipulo ni Jesus wala lang nagsugid sang maayong balita sa mga kilala nila. Kundi ‘ginpadala sila ni Jesus sing tagduhaduha sa pag-una sa iya sa tagsa ka siudad’ para magbantala. (Lucas 10:1) Bangod organisado ang ila pagbantala madamo nga tawo ang nakabati sang maayong balita. Nalipay gid ang mga disipulo kay ululupod sila sa pagbantala. (Lucas 10:17) Puede mo man bala tinguhaan nga magbantala upod sa kongregasyon?
USISAA PA GID
Usisaon naton kon ano ang himuon mo para indi ka makulbaan kag malipay ka sa pagsugid sa iban sang maayong balita.
3. Buligan ka ni Jehova
Ang iban nakulbaan magbantala kay nahadlok sila sa isiling ukon reaksion sang ila maistorya.
-
Nakulbaan ka bala nga isugid sa iban ang imo natun-an? Ngaa?
Tan-awa ang VIDEO, dayon binagbinaga ang masunod nga pamangkot.
-
Ano ang ginhimo sang mga pamatan-on nga Saksi para indi na sila makulbaan?
Basaha ang Isaias 41:10, dayon binagbinaga ini nga pamangkot:
-
Paano ang pangamuyo makabulig sa imo kon nakulbaan ka sa pagbantala?
Kabalo ka bala?
Madamo nga Saksi ni Jehova ang nagapensar sang una nga indi gid nila masarangan ang pagsugid sang maayong balita sa iban. Halimbawa, si Sergey nahuya sadto mag-istorya sa iban kay kulang sia sing kompiansa. Pero sang nagtuon sia sa Biblia, nagsiling sia: “Bisan pa nakulbaan ako, ginasugid ko sa iban ang akon natun-an. Wala gid ako nagpaabot nga samtang ginasugid ko sa iban ang parte sa Biblia, nagdugang man ang akon kompiansa. Nakabulig man ini nga mangin kumbinsido pa gid ako sa akon ginapatihan.”
4. Ipakita ang respeto
Kon nagasugid sang maayong balita sa iban, pamensara indi lang kon ano ang imo ihambal kundi kon paano mo ini ihambal. Basaha ang 2 Timoteo 2:24 kag 1 Pedro 3:15, dayon binagbinaga ini nga mga pamangkot:
-
Paano mo masunod ang ginasiling sini nga mga bersikulo kon nagaistorya sa iban parte sa Biblia?
-
Mahimo ang pila ka miembro sang imo pamilya ukon mga abyan indi magpati sa imo ginasiling. Ano ang himuon mo? Ano ang indi mo dapat paghimuon?
-
Ngaa mas maayo nga ipakita mo ang respeto kon ginasugid mo ini sa iban sangsa piliton mo sila nga magpati sa imo?
5. Malipay ka kon isugid mo ang maayong balita
Ginsugo ni Jehova si Jesus nga isugid ang maayong balita. Ano ang ginbatyag ni Jesus sa sini? Basaha ang Juan 4:34, dayon binagbinaga ini nga mga pamangkot:
-
Ang pagkaon sang masustansia nga pagkaon nagapapagros kag nagapalipay sa aton. Ngaa ginkumparar ni Jesus ang paghimo sang kabubut-on sang Dios—lakip ang pagsugid sang maayong balita—sa pagkaon?
-
Sa banta mo, ano ang mabatyagan mo kon isugid mo sa iban ang maayong balita?
Tip
-
Sa midweek meeting, magtuon kon paano makasugod sa pagpanaksi sa iban.
-
Pamangkuta ang nagatudlo sa imo kon paano ka mahatagan sang bahin sa midweek meeting. Ang mga bahin nga ginahatag makabulig sa imo nga mangin handa sa pagsugid sa iban sang imo natun-an.
-
Gamita ang mga seksion nga “Kon Magsiling ang Iban” ukon “Kon Pamangkuton Ka” sa sini nga libro para mapraktis mo kon ano ang imo isabat sa mga pamangkot kag pagpamatok sang mga tawo.
KON PAMANGKUTON KA: “Kamusta ka?”
-
Ano ang himuon mo para masugid mo sa iya ang imo natun-an sa Biblia?
SUMARYO
Malipay ka gid kon isugid mo sa iban ang maayong balita, kag indi mabudlay ang paghimo sini.
Rebyu
-
Ngaa dapat mo isugid sa iban ang maayong balita?
-
Paano mo ini mahimo nga may pagrespeto?
-
Ano ang himuon mo para indi ka makulbaan sa pagbantala?
DUGANG NGA IMPORMASYON
Binagbinaga ang apat ka simple nga paagi nga masugid mo ang maayong balita nga ginagamit ang jw.org contact card.
Hibalua ang apat ka kinaiya nga makabulig sa imo nga masugid ang maayong balita.
“Handa Ka Na Bala Mangin Mangingisda sang mga Tawo?” (Ang Lalantawan, Septiembre 2020)
Tan-awa ang halimbawa sa Biblia nga makahatag sa aton sing kaisog para mabantala ang maayong balita, bisan bata pa kita.
Hibalua kon paano mo masugid ang imo natun-an sa Biblia sa imo miembro sang pamilya nga wala pa nakatuon parte kay Jehova.
“Paglab-ot sa Tagipusuon sang Indi Tumuluo nga mga Paryente” (Ang Lalantawan, Marso 15, 2014)
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
