PELAJAR 22
Nuan Ulih Bekunsika Berita Manah ngagai Orang Bukai.
Pengudah belajarka utai ti manah ari Bup Kudus, nuan engka berunding, ‘Orang bukai pan patut nemu pasal utai tu!’ Tang, nuan engka berasai takut bekunsika utai ti udah dipelajarka nuan ngagai orang bukai. Aram kitai meda chara nuan ulih mutarka asai ati ti takut lalu nginjil enggau berani.
1. Baka ni nuan ulih madah ngagai orang bukai pasal utai ti udah dipelajarka nuan?
Bala murid Jesus madahka: “Kami enda ulih nagang diri bejakuka pasal utai ti udah dipeda enggau didinga kami.” (Surat Kereja Rasul 4:20) Baka sida, nuan engka amat rinduka pemendar ari Bup Kudus nyentukka nuan deka bekunsika utai nya ngagai orang bukai. Nya alai, uji meh ngiga peluang ngambika nuan ulih bekunsika nya enggau kaban belayan sereta bala bakih nuan. Bebendar meh ngereja pengawa nya enggau chara ti basa.—Bacha Kolosi 4:6.
Uji meh sekeda chara tu
-
Ngambika ulih bekunsika sekeda utai ari Bup Kudus ngagai kita sebilik, nuan ulih madah: “Aku bisi belajarka utai ti ngalitka ati minggu tu.”
-
Nuan ulih bekunsika ayat Bup Kudus ti meransang ngagai kaban ke benung sakit tauka bisi pengirau.
-
Enti orang ke sama gawa enggau nuan nanya pasal utai ti digaga nuan ba ujung minggu, kunsi meh utai ti udah dipelajarka nuan ba gempuru tauka maya nuan belajarka Bup Kudus.
-
Uji tunjuk ngagai bala bakih nuan laman web jw.org.
-
Bai orang bukai enggau nuan belajarka Bup Kudus tauka tunjuk ngagai iya chara minta belajarka Bup Kudus nengah jw.org.
2. Nama kebuah nuan diperansang nginjil begulai enggau bala menyadi ba eklisia?
Bala murid Jesus enda nginjil ngagai orang ke dikelala sida aja, tang sida ngereja pengawa nginjil enggau chara ti teratur. Jesus “ngasuh sida bejalai . . . dua-dua iku begulai, ngagai genap buah nengeri enggau endur bukai.” (Luke 10:1) Enggau nya, sida ulih nginjil ngagai mayuh agi orang. Ketegal sida nginjil begulai, sida mega ulih ngasaika pengaga ati ti besai agi. (Luke 10:17) Kati nuan deka enggau pengawa ti ngemuaska ati tu?
BELAJAR MAYUH AGI
Peratika chara nuan ulih mutarka asai ati ti takut sereta ngasaika pengaga ati lebuh nuan nusui berita manah.
3. Jehovah deka enggau nuan
Sekeda orang berasai takut lebuh nginjil laban sida irauka runding orang tauka chara orang nerima berita ari Bup Kudus.
-
Kati nuan takut nusuika utai ti udah dipelajarka nuan? Nama kebuah?
Mainka VIDEO, lalu kerandauka tanya tu.
-
Baka ni bala Saksi ke biak tu mutarka asai ati ti takut?
Bacha Isaiah 41:10, lalu kerandauka tanya tu:
-
Enti nuan ngasaika diri takut deka nginjil, baka ni sampi ulih nulung nuan?
Nemu nuan?
Mayuh Saksi-Saksi Jehovah mega kala ngasaika diri enda ulih nginjil ngagai orang bukai. Ambika chunto, Sergey mega ngasaika diri tusah bejaku ngagai orang bukai sereta ngasaika diri nadai guna. Pengudah iya belajarka Bup Kudus, ku iya: “Aku bebendar mutarka asai ati ti takut lalu berengkah nusui berita ari Bup Kudus ngagai orang bukai. Asil iya, aku majak andal agi ke diri empu. Lalu, pengarap aku mega majak tegap.”
4. Ayanka basa
Sebedau nginjil, nuan ukai aja berunding pasal nama utai ti deka dipadah nuan, tang mega chara nuan deka ngenataika pesan nya. Bacha 2 Timoti 2:24 enggau 1 Peter 3:15, lalu kerandauka tanya tu:
-
Baka ni nuan ulih nitihka jaku lalau tu lebuh nusui berita manah?
-
Nama ulih digaga nuan enti sema diri sebilik tauka bala bakih enda setuju enggau nuan? Nama utai ti enda patut digaga nuan?
-
Nama kebuah nya manah ngena tanya sereta nanya runding sida lalu ukai mejal sida pechayaka utai ti dipadah nuan?
5. Pengawa nginjil mai pengaga ba ati
Nama asai ati Jesus pasal pengawa nginjil ke diasuh Apai iya? Bacha John 4:34, lalu kerandauka tanya tu:
-
Kitai gaga ati sereta bulih mayuh pengering enti makai pemakai ti manah ke pengerai. Nama kebuah Jesus nyemaka peneka Petara sereta pengawa nginjil nya, baka pemakai?
-
Ba runding nuan, nama kebuah pengawa nginjil ulih mai pengaga ba ati?
Poin ti beguna
-
Ba gempuru tengan minggu, belajar meh chara deka ngepunka randau ba pengawa nginjil.
-
Berandau enggau pengajar Bup Kudus nuan pasal baka ni nuan ulih sama enggau begian pemelajar ba gempuru tengan minggu. Latih tu deka nulung nuan besedia agi kena nginjil.
-
Kena begian “Bisi Orang Madah” tauka “Orang Engka Nanya” dalam litaricha tu ngambika ulih belatih chara nyaut tanya sereta sakal ke suah dipadah orang.
ORANG ENGKA NANYA: “Apu! Lama enda meda nuan! Dini nuan diatu?”
-
Baka ni nuan ulih ngena peluang tu madah ngagai iya utai ti benung dipelajarka nuan?
LANSA
Pengawa nginjil enda kelalu tusah. Pengawa tu mega mai pengaga ati ti besai.
Ulang Kaji
-
Nama kebuah nuan diperansang bekunsika berita manah ngagai orang bukai?
-
Baka ni nuan ulih ngereja tu enggau basa?
-
Baka ni nuan ulih mutarka asai ati ti takut ngambika ulih nginjil?
ARAM BELAJAR
Belajarka empat iti chara ti senang kena nginjil ngena kad jw.org.
Belajarka empat iti kualiti ke ulih nulung nuan bekunsika berita manah.
Peratika baka ni siti teladan ari Bup Kudus ulih meri kitai pemerani bekunsika berita manah taja pan kitai agi biak.
Belajarka chara nuan ulih bejaku pasal berita ari Bup Kudus ngagai diri sebilik ke enda ngelala Jehovah.
“Nyapai Ati Kaban Belayan ke Enda Sepengarap” (Menara Jaga, 15 Mac 2014)
Nuan Engka Rindu Meda Tu
UTAI KE SUAH DITANYA
Nama Reti Kursus Belajarka Bup Kudus ke Diatur Saksi-Saksi Jehovah?
Nengah kursus ke pechuma ti diatur Saksi-Saksi Jehovah, nuan ulih ngena sebarang salin Bup Kudus ke dikembuan nuan. Nuan mega diperansang mai semua diri sebilik sereta bala kaban nuan sama enggau kursus tu.
