ƐLĀ Ō NWU ƆMƐ 22

Ɛgɛnyá Nɛ A Géē Tɔɔna Ku Ɔkoolɔhi A?

GBƆƆ

Abɔ a yɔ i nwu ɔkwɛyi ku Ubáyíbu a, a lɔfu gbɛlá kahinii: ‘Ɛjɛɛji ācɛ cika ō jé lɛyikwu ɛlā nyā!’ Ku ɛlā ɔkwɛyi, ɛjɛɛji ācɛ cika ō jé lɛyikwu ɛlā nyā! Naana kpɔ a, a lɔfu yuufi ō da ācɛ lɛyikwu ɔdā nɛ a nwu a. Alɔ nwu ɛgɛ nɛ a géē ya ufi nɛ a lɛ ɔɔma lé ku a klla gbɔɔ ō tɔɔna ɔkoolɔhi ku Ubáyíbu a mla eeye.

1. Ɛgɛnyá nɛ a lɔfu da ācɛ lɛyikwu ɔdā nɛ a yɔ i nwu a?

Ayikpo ku Ujisɔsi kahinii: “Alɔ í lɔfú habɔ̄ ō yɔ̄ ī kɛlā kú ɔdā nɛ̄ alɔ abɔ̄yī alɔ má ā klla pó ā tá glá ŋ́.” (Úklɔ́ kú Ācotɛ̄hɔ̄ 4:20) Ɔdā néē nwu ŋma ɛgiyi Ujisɔsi a he uwa ɔtu nɛhi néē dɔka ō ka lɛ ɛjɛɛji ācɛ. Ó gē ya uwɔ lɛ a duu? Ɔdaŋ kóō lɛ a, dɔka ɛga nɛ a géē ka aɔdā nɛ a nwu a mla ācɛ apɔlɛ mla aɔkpa ku uwɔ.—Jé Ācɛ Ukólōsi 4:6.

Ɔwɛ ōhī nɛ a lɔfu gbɔɔ ɔka ō ka

Ɔdaŋ ku a yɔ i kɛla mla ācɛ apɔlɛ ku uwɔ, a lɔfu ya ku aa gbɔɔ ō kɛla lɛyikwu ikpɛyi ɛlā ku Ubáyíbu ŋma lɛ ō ka kahinii: “N nwu ɔdā ō cɛgbá nɛhi éyi ipu alaadi nyā.”
A lɔfu bi ɛlā ō tu ɔtu kwu ɔtu ŋma ipu Ubáyíbu le ta oklobiya amāŋ ɔncɛnya uwɔ nōo yɔ i doōcē amāŋ nōo lɛ ɔtoplico a abɔ.
Da ācɛ nɛ a gē yuklɔ tɔha mla uwa nōo da uwɔ ɔka lɛyikwu ɛgɛ nɛ alaadi ku uwɔ yɔ i nyɔ lɛ a lɛyikwu ɔdā nɛ a nwu ipu oklɔcɛ ku Ubáyíbu amāŋ ōjila ku ujɔ.
Lɛ uwɛbsait ku jw.org a mafu lɛ oklobiya amāŋ ɔncɛnya uwɔ.
Da ācɛ ɔhá kéē wa i ba uwɔ iyē eko nɛ a yɔ i ya oklɔcɛ ku Ubáyíbu a amāŋ lɛ mafu lɛ uwa ɛgɛ néē géē ta odee lɛyikwu iyi uwa ipu jw.org ka ɔcɛ éyi kóō gā klɔcɛ ku Ubáyíbu mla uwa a.

2. Ɔdiya nɛ ō yuklɔ ku ɔna ō ta tɔha mla ujɔ a wɛ ōmiya olɔhi a?

Ó wɛ ācɛ nɛ ayikpo ku Ujisɔsi jé foofunu a néē tɔɔna ku ɔkoolɔhi a lɛ uwa a ŋ. Ujisɔsi “lɛ uwa ɛpɛɛpa tɛ̄hɔ̄ kéē nyɔ̄ gɔbū ga igelī mɛ́mla ɛga dóódu” kéē tɔɔna ku ɔkoolɔhi a. (Ulúku 10:1) Ōmiya ku uklɔ ku ɔna ō ta ɔɔma je ɛga lɛ ācɛ alɛwa kéē po ɔkoolɔhi a. Uklɔ ku ɔna ō ta néē ya tɔha a klla bi eeye gē lɛ uwa. (Ulúku 10:17) A lɔfu miya ō yuklɔ tɔha mla ujɔ ipu uklɔ ku ɔna ō ta gla a?

JÉ GƆBU

Leyi yɛ ɔdā nōo géē ta uwɔ abɔ ku a lɛ ufi ku uwɔ yale, ku a klla jɔɔnyɛ eeye nōo gē wa ŋma ō tɔɔna ku ɔkoolɔhi a.

3. Ujehofa géē yɔ mla uwɔ

Ācɛ ōhī nōo dɔka ō tɔɔna a gē yuufi ohigbu ɛgɛ néē géē ya lɛ amāŋ ɛdɔ ohi néē géē miyɛ ŋma ɛgiyi ɔcɛ néē yɔ i kɛla Ɔwɔico lɛ ɔ a.

A yɔ i yuufi ō da ācɛ lɛyikwu ɛlā nɛ a nwu a nɛɛ? Ɔdiya nɛ a ka lɛ a?

Lɛ UVIDIO nyā mafu, cɛɛ ku aa kɔka lɛyikwu ɔka nyā.

UVIDIO: N Gbɔɔkɔ Lɛ Ujehofa Kóō Je Ɔtu Ō Lɛ Gā Um (4:05)

Ɛgɛnyá nɛ aɛdrɔ ku Ācɛ Ocijali Ku Ujehofa nyā ya ufi ku uwa lé a?

Je Ayisáya 41:10, cɛɛ ku aa kɔka lɛyikwu ɔka nyā:

Ɔdaŋ ku ufi yɔ i ya uwɔ ō tɔɔna lɛ ācɛ, ɔdiya nɛ a cika ō gbɔɔkɔ a?

A je?

Ācɛ Ocijali Ku Ujehofa alɛwa lɛ eko éyi néē gbɛla ku aa i gáā tɔɔna lɛ ācɛ ɔhá gla ŋ. Ocabɔ mafu, Sergey gbɛla ku anuɔ i cika jɛ ŋ, ohigbu ɛnyā ó tɔɔtɛ lɛ ɔ ō kɔka mla ācɛ ŋ. Amáŋ, ó lɛ Ubáyíbu klɔcɛ. Ó kahinii: “Naana nɛ um yɔ i yuufi a, n gbɔɔ ō kɛla lɛ ācɛ ɔhá lɛyikwu ɛlā nɛ um yɔ i nwu a. Ó le hɛ um idaago abɔ um gā má ka ō yɔ i kɛla lɛ ācɛ cɛ gā um gbɔɔ ō lɛ ɔtu a. Ó da ācɛ ɔhá lɛyikwu ɔdā nɛ um kpɔtuce ɔ a gē cɛ lɛ ɔtu okpoce ku um kóō lɔfu iyē.”

4. Lɛ ojilima ce ācɛ

Eko duuma nɛ a yɔ i tɔɔna ku ɔkoolɔhi a, leyi yɛ ɛlā nɛ a gē ka a mla ɛgɛ nɛ a géē ka ɔ a duu. Jé 2 Utímōti 2:24 mla 1 Upíta 3:15, cɛɛ ku aa kɔka lɛyikwu aɔka nōo ba nyā:

Ɛgɛnyá nɛ a géē bi aɛga ku Ubáyíbu nyā le yuklɔ ɔdaŋ ku a yɔ i kɛla lɛ ācɛ ɔhá lɛyikwu Ubáyíbu a?
Aoklobiya mla ancɛnya amāŋ ācɛ apɔlɛ ku uwɔ ōhī i kóō lɔfu cɛ mla ɛlā nɛ a yɔ i ka a ŋ. Ɔdi nɛ a géē ya a? Ɔdi nɛ a kē cika ō ya ŋ ma?
Ɔdiya nɛ a cika ō da uwa ɔka ɔwɛ ku ijeeyi ikɔkɔ ō da uwa ɔdā néē cika ō kpɔtuce ɔ a?

5. Ō yɔ i da ācɛ ɔhá ɔkoolɔhi a gē bi eeye wa

Ujehofa je uklɔ lɛ Ujisɔsi kóō tɔɔna ku ɔkoolɔhi a. Ɛgɛnyá nɛ Ujisɔsi má uklɔ ɔɔma lɛ a? Jé Ujɔ́ni 4:34, cɛɛ ku aa kɔka lɛyikwu aɔka nōo ba nyā:

Ō yɔ i le ɔdole olɔhi gē ya ku alɔ lā oyeeyi gɔbu klla gē gweeye. Ɔdiya nɛ Ujisɔsi lɛ ō ya ɔdā nɛ Ɔwɔico dɔka ku alɔ ya bɛɛka uklɔ ku ɔna ō ta a gbla ɔdole ō lé a?
Ɛdɔ eeye nyá nɛ a gbɛla ku ɔcɛ géē lɛ ɔdaŋ ka ó yɔ i yuklɔ ku ɔna ō ta a?

Aɔdā nɛ a lɔfu ya

Ipu ōjila ku ɔtahɛ alaadi, dɔka ɔwɛ nɛ a géē bi le gbɔɔ ɔka ō ka mla ācɛ.
Kɛla lɛ ɔcɛ nōo yɔ i klɔcɛ mla uwɔ a lɛyikwu ɛgɛ nɛ a géē je piya ɔcɛ ō tɔɔna a. Uklɔ ō ya ɛyi ede géē tu uwɔ abɔ ku a ya otutu ō tɔɔna lɛ ācɛ lɛyikwu ɔdā nɛ a yɔ i nwu a.
Bi ɛga ku ɔkpá nyā nōo kahinii “Ācɛ Ōhī Gē Ka” amāŋ “Ɔcɛ Lɔfu Da Ɔka Ka” a le ya otutu ku ɛgɛ nɛ a géē cila ohi ku ɔka nɛ ācɛ alɛwa gē da mla ɔdā néē gē ka nōo mafu ka é dɔka ō jahɔ ŋ ma.

ƆCƐ LƆFU DA ƆKA KA: “Ó gboji nɛ alɔ má ɛ, abɔ á kē yɔ lɛ?”