ANG ỌJẸ́JẸ 22
Ányị A Tị́ ka Bwu Ya Ẹrụ Ọnyịịla Je Angịkịla?
‘Ọ chịla ká ọng myị́ ọng ka jẹ́ ẹlẹwẹ!’ Ịnyị a ka ya pyii jaabwọ ká wẹẹ jẹ́ ẹlịlẹhị ịlẹpwụ nya ịBayịbụụ lẹ. Ịlẹhị ịnyị, ọ chịla ká ọng myị́ ọng ka jẹ́! À tị ka juhi nyọka ya ẹla ọlẹ ká jẹ́ je angịkịla myị́. Ahị ya ẹla u-uhye nya abwọlẹ ká ka bwu kụrụ uhi ojuju nyang bala ọ-ka dọmwụ nya ẹrụ ọnyịịla oyaya la ọkẹkẹnị wẹẹ.
1. Ányị a tị́ ka bwu ya ẹla ọlẹ ká jẹ́ je angịkịla?
Angịjụgbẹyị nya iJisọsị yẹkẹẹ: “Áhị́ ka jẹ́-ẹ tụ ọnụ nyahị pịrị myị́, hi ọ-ka juwa kpa ya ẹla dodehe rụ́ . . . ang ịlẹ kahị yẹ lẹhị nya ịlọhị bala ọ-kpa ụrụ nyahị wo pyii kaka.” (Ụkụrwọ nya Alẹrụ 4:20) Ẹlịlẹhị ọlẹ kị jẹ́ háa yẹẹyẹẹ dudu kị tịtọ nyọka ya je ọng myị́ ọng wuu. Ịnyị ọ lang lẹ? Kori kọ lịnyị aalẹ à mwahị nya iwe ịlẹ ká ka jẹ́-ẹ kpa ya ẹla ọlẹ ká jẹ́ je alugbeiyegu bala aligu nyang ụ-ụgbẹyị olihi.—Wa Ala iKolosi 4:6.
Agbẹyị ịhyẹ ịlẹ ká ka bwu dọmwụ
-
Ụka ká ja ya ẹla bala ọngọhẹ ugbiyegu nyang, dọmwụ nya ẹla nya ịBayịbụụ oyaya bwula ọ-yẹkẹẹ: “M̀ jẹ́ ịngịhyẹ ọlẹ kọ kpụm ịpyọ yẹẹyẹẹ epwihi ọlẹ.”
-
Ya ẹla bwu ụpwụ ịgọgọ ọhẹ je oligu nyang ọlẹ kọ jụ ẹdụrụ lee o-juwa chị uko.
-
Ya ẹla ọlẹ ká jẹ́ bwu ịBayịbụụ ọjẹ́jẹ lee ọjịra-jịra je ọngọhẹ ọ-ọlụkụrwọ nyang kori kọ tọng wo jaabwọ ká epwihi nyang la.
-
Mẹ intanẹtị nya jw.org jẹ aligu nyang.
-
Wụrụ angịkịla wẹ ịBayịbụụ ọjẹ́jẹ nyang lee mẹjáa jaabwọ kị ka bwu tọ wo nya ịBayịbụụ ọjẹ́jẹ bwu jw.org.
2. Ịyẹ tị́ du ká ẹrụ ọnyịịla ọ-kpa pyẹ bala ala ọjịra-jịra ri ẹta ẹdịyẹ ọnyịịla?
Angịjụgbẹyị nya iJisọsị á ya ẹrụ ọnyịịla je angịlẹ kị jẹ́ kem ka. IJisọsị “daa ẹrụ kpehe ji ịlahị nyamwụ angị imimiimiiye ka epweji . . . wuu” ka kpa ẹrụ ọnyịịla pyẹ. (ILuku 10:1) Ụkụrwọ ọ-họ lawụlẹ ya iwe ha iru nya angịnyị gụ ọọwa nyọka wo ẹrụ ọnyịịla. Ọ myịmyị du ká angịjụgbẹyị ịwẹ chị ọkẹkẹnị yẹẹyẹẹ. (ILuku 10:17) Ahụ ịnyịnyị ka jẹ́-ẹ maga nyọka ya ẹrụ ọnyịịla bala ala ọjịra-jịra?
JẸ́ GỤ ỌỌWA
Jẹ́ jaabwọ á ka bwu kụrụ uhi ojuju nyang bala ọ-ka yé ọkẹkẹnị nya ẹrụ ọnyịịla ọ-kpa pyẹ.
3. IJihova ka juwa balang
Angịhyẹ ịlẹ kị tịtọ nyọka ya ẹrụ ọnyịịla kaa juhi nya ẹhị ọlẹ ká angịnyị ka kpa yaa lee kori kị ka myị ke ụrụ.
-
À kaa juhi nyọka ya ẹla ọlẹ ká jẹ́ je angịkịla? Ịyẹ tị́ du?
Yẹ IFIM ọwẹ, kanụ ya ẹla u-uhye nya ịtọ ẹla ọlẹ kọ tọọ da.
-
Ányị anjwo nya Alibeenu nya iJihova ịwẹ à tị́ bwu kụrụ uhihi nyaa?
Wa Ayịsaya 41:10, kanụ ya ẹla u-uhye nya ịtọ ẹla ọlẹ:
-
Ụka ká juhi nyọka ya ẹrụ ọnyịịla, ịyẹ tị́ du ká ka raabwọ?
À jẹ́ ẹla ọlẹ?
Iru nya Alibeenu nya iJihova me irya ene-ene nyori ịwa nyị́ ka jẹ́-ẹ ju ugbodu nyọka ya ẹrụ ọnyịịla ẹnẹnẹhẹ myị́ ka. Ọ-chụ pwokwita, Sergey kaa yẹ ịlọmwụ lala ọngọ ju apyobwuna ka, ọ myịmyị kaa lọọ ujwo nyọka ya ẹla bala angịkịla. Ọọwa lẹ, ọ jẹ́ ịBayịbụụ lẹlẹ. O yẹkẹẹ: “Nanana nyori m̀ juhi, m̀ dọmwụ nyọka ya ẹla ọlẹ kam wẹẹ jẹ́ je angịkịla. Ọ lam ẹbyẹbyị ụka ohyẹẹkpẹ nyori ẹla nya ịBayịbụụ o-ya je angịkịla du kam yẹ ịlọm lala ọngọ ju apyobwuna. Ịnyịnyị, o-ya ẹla ọlẹ kam wẹẹ jẹ́ je angịkịla ju ọmyịmyị nyam am ayịdang ọngịrị.”
4. Chị ihi jwaa
Ene á ka ya ẹrụ ọnyịịla je ọngịnyị, á ka me irya ju ẹla ọlẹ ká wẹẹ ka ya kem ka, ma à baba nyọka kụ ẹhị yẹ ụgbẹyị ọlẹ ká ka bwu yoo ịnyịnyị. Wa 2 iTimoti 2:24 bala 1 iPita 3:15, kanụ ya ẹla u-uhye nya ịtọ ẹla ịlẹ:
-
Ányị a tị́ ka kpa ẹla ịlụpwụ ịgọgọ ịwẹ họ ụkụrwọ ụka ká ja ya ẹla je angịkịla u-uhye nya ịBayịbụụ?
-
Alugbiyegu bala aligu nyang ịhyẹ á ka myị jung ka myị́. Ịyẹ a tị́ ka jẹ́-ẹ họ? Ịyẹ a tị́ ka họ ka?
-
Ịyẹ tị́ du kọ há gụ nyọka ya ẹla balaa ụ-ụgbẹyị olihi ọkọkọ nyọka ya ẹla la ọngịrị-ọngịrị balaa?
5. Ẹrụ ọnyịịla ọ-kpa pyẹ kaa ya ọkẹkẹnị ha ọngịnyị
IJihova ya ụkụrwọ nya ẹrụ ọnyịịla ọ-kpa pyẹ ju iJisọsị ụ-ụbwọ. Ányị iJisọsị à tị́ yẹ ụkụrwọ ọwẹ? Wa ịJọn 4:34, kanụ ya ẹla u-uhye nya ịtọ ẹla ịlẹ:
-
Ang oriri ọnyịịla du kahị kaa hịhị bala ọ-chị ọkẹkẹnị. Ịyẹ tị́ du ká iJisọsị chụ irya nya Ohe ọhọhọ, lala ẹrụ ọnyịịla ọ-kpa pyẹ, ka pwoku ang oriri?
-
Ịyẹ a tị́ me irya kọ ka họ kori kahị ya ẹrụ ọnyịịla?
Ang ịlẹ kị ka dang ụbwọ
-
Ụka nya ọjịra-jịra ọla arịrị nya epwihi, maga nyọka jẹ́ ang u-uhye nya agbẹyị ịlẹ ká ka jẹ́-ẹ bwu dọmwụ nya ẹla oyaya bala angịnyị.
-
Ya ẹla bala ọngọmẹjẹ nyang u-uhye nya abwọlẹ ká ka bwu la ụpa ọọjịra-jịra ọla arịrị nya epwihi.
-
Kpa ụpa nya “Angịhyẹ Kaa Yẹkẹẹ” lee “Ọngịnyị ka Tọng Wo Myị́” ọlẹpwụ nya ụpwụ ọlẹ nwụla ịlọng nọ nyọka wẹ ịtọ ẹla ịhyẹ ịlẹ ká angịnyị lụmẹ-lụmẹ kaa tọhị.
ỌNGỊNYỊ KA TỌNG WO MYỊ́: “Ang wuu bẹẹ”?
-
Ányị a tị́ ka bwu kpa iwe ọwẹ ya ẹla ọlẹ ká jẹ́ bwu ịBayịbụụ joo?
ẸLỊYẸ A TỊ́ JẸ́?
Ẹrụ ọnyịịla o-ya je angịkịla kaa ya ọkẹkẹnị ha ọngịnyị, ọ tị ka chịkpẹẹ la ọhọhọ gụ abwọlẹ ká me irya myị́.
Ẹlịyẹ A Tị́ Yụbwọ Chị?
-
Ịyẹ tị́ du ká ka ya ẹrụ ọnyịịla je angịkịla?
-
Ányị a tị́ ka bwu họ ịnyị ụ-ụgbẹyị olihi?
-
Ányị a tị́ ka bwu kụrụ uhi ojuju nyang u-uhye nya ẹrụ ọnyịịla ọ-kpa pyẹ?
JẸ́ ANG ỊLẸ DỌỌ U-UHYE
Kụ ẹhị yẹ agbẹyị ine ịhyẹ ịlẹ á ka jẹ́-ẹ ya ẹrụ ọnyịịla la ụpwụ ọ-da angịnyị ụbwọ ka jw.org.
Agbẹyị Ịlẹ á ka Bwu Ya Ẹla la Ụpwụ ọ-Da Angịnyị Ụbwọ ka JW.ORG (1:43)
Jẹ́ ang u-uhye nya abwẹla ine ịlẹ kị ka dang ụbwọ nyọka kpa ẹrụ ọnyịịla pyẹ.
“À Nwụlanọ Nyọka Ri Ọngọ Durwe nya Angịnyị Ehe lẹ?” (Ẹpwang ọ-Kụ Gbeji nya Ọya Ohikichu, 2020)
Jẹ́ jaabwọ ká ọgụ-ẹpẹtẹ nya ọngọhẹ ẹ-ẹpwụ nya ịBayịbụụ ka jẹ́-ẹ ya ugbodu ojuju hang nyọka ya ẹrụ ọnyịịla, kori ká dọmwụ ri onjwo.
Yẹ jaabwọ á bwu ya ẹla u-uhye nya ịBayịbụụ bala alugbiyegu nyang ịlẹ kị jẹ́ ang u-uhye nya iJihova lẹka.
