ILUẸMHIN 22
Be Uwẹ Ha Rẹ Sabọ Ha Tẹmhọn Osẹnobulua Yẹ?
Beji uwẹ ha rẹ ha luẹ ẹmhọanta ne ribhi Baibo, uwẹ sabọ ha taman egbe ẹ, ‘Ẹmhọn nọn khẹke nin ẹbho rebhe họn khọnan!’ Ẹmhọanta nọn. Ọ gene khẹke nin ẹbho rebhe hẹnmhọn Agbejele. Ọrẹyiriọ, ofẹn sabọ ha mun uwẹ rẹ ha taman ẹbho emhin nin uwẹ luẹ. Ji mhan zilo nyan emhin nin uwẹ ha lu, nin uwẹ da sabọ re eghọnghọn bi izebhudu ha tẹmhọn Osẹnobulua.
1. Be uwẹ ha rẹ ha tẹmhọn Osẹnobulua man eria nin uwẹ lẹn yẹ?
Edibo nesi Jesu da yọle: “Mhan ida sabọ miẹn ghe mhan bha yẹ tẹmhọn emhin nin ẹlo mhan miẹn bi emhin nin mhan họn.” (Acts 4:20) Emhin nin ele luẹ bhi obọ iJesu wo manman ti ele bhọ. Ọnan zẹle nọn da ha hu ele bhi udu nin ele rẹ ha tale man ọrebhe. Iriọ ọ be yẹ dia uwẹ bhi egbe? Ahamiẹn iriọ nọn, guanọ uwedẹ nin uwẹ ha rẹ re ekpẹn-ekpẹn ha tẹmhọn emhin nin uwẹ sẹ luẹ man ene ribhi azagba-uwa nọnsẹ bi imọẹ ẹ.—Tie Colossians 4:6.
Uwedẹ eso nin uwẹ ha sabọ rẹ munhẹn ha tẹmhọn Osẹnobulua
-
Ahamiẹn uwẹ ne ọria bhi azagba-uwa nọnsẹ talọ, uwẹ sabọ taman ọlẹn yọle: “Emhin esili ọkpa ribhọ nin mẹn luẹle ọne uzana nan.”
-
Ahamiẹn ọmọẹ ẹ ribhọ nọn khọnmhọn la nọn ribhi ọnọghọ, tie ijanlẹn ọkpa man ọlẹn bhi Baibo nọn ha re ikoudure nanlẹn.
-
Ene ibha ko wẹnna ha nọọn uwẹ ebi ọne uzana diayẹ, uwẹ sabọ taman ele emhin nin uwẹ luẹle bhi ikolo oga la iluẹmhin iBaibo nọnsẹ.
-
Re jw.org man imọẹ ẹ.
-
Taman ọria nin uwẹ lẹn nọn dọ deba bhi iluẹmhin Baibo nọnsẹ, la uwẹ taman ọlẹn ebi ọle ha rẹ je uhọnmhọn re yẹ bhi jw.org, nan dọ ha man ọlẹn iBaibo.
2. Bezẹle nọn da khẹke nin uwẹ khu ọbhọ nin uwẹ rẹ deba ene ribhi agbotu ha tẹmhọn Osẹnobulua?
Ọ iyi eria nin edibo nesi Jesu lẹnlẹn ọkpa ele ha tẹmhọn Osẹnobulua man. Jesu da yẹ ‘gha ele eva-eva yẹ je ele ha khian agbaẹbho kẹkẹ’ nin ele dọ tẹmhọn Osẹnobulua. (Luke 10:1) Iwẹnna itẹmhọn Osẹnobulua nin ele kugbe ha lu da re isẹhoa nin ẹbho ne bunbun rẹ hẹnmhọn Agbejele. Ọ da yẹ wo re ene edibo ha ghọnghọn. (Luke 10:17) Uwẹ dẹ yẹ sabọ khu ọbhọ nin uwẹ rẹ deba agbotu ha tẹmhọn Osẹnobulua.
MANMAN LẸN OTỌLE NỌNSẸN
Fẹ ebi uwẹ ha lu nin ofẹn hẹi yẹ mun uwẹ rẹ ha tẹmhọn Osẹnobulua. Yẹ luẹ ẹmhọn eghọnghọn nin uwẹ ha miẹn bhọ sade uwẹ deba ha tẹmhọn Osẹnobulua.
3. Jehova dẹ rẹkpa uwẹ
Ọ rẹ wo ha yẹẹ ẹbho eso rẹ ha tẹmhọn Osẹnobulua. Ọkpakinọn, ofẹn sabọ ha mun ele, la ẹkhọle sabọ ha lo ele.
-
Ofẹn be mun uwẹ rẹ taman ẹbho emhin nin uwẹ sẹ luẹ bhi Baibo? Bezẹle?
Ghe ọne IVIDIO, bha ha zilo nyan inọnta nọn rẹkhan ọlẹn.
-
Be ene elasẹre nan lu nọn zẹle ofẹn bha yẹ ha mun ele rẹ ha tẹmhọn Osẹnobulua?
Tie Isaiah 41:10, bha ha zilo nyan ọne inọnta nan:
-
Ahamiẹn ofẹn mun uwẹ rẹ tẹmhọn Osẹnobulua, be erọnmhọn ha rẹ sabọ rẹkpa uwẹ yẹ?
Uwẹ be rẹ lẹn?
Esali Jehova ne bunbun ribhọ ne rẹ ha riale ghe, ele ida sabọ lu iwẹnna itẹmhọn Osẹnobulua. Ọkpa bhi eria ne sẹ inian hi okpea ọkpa natiọle Sergey. Ọria nin ẹkhọle manman lo ọle khin. Ọle isabọ manman ne ẹbho talọ. Sergey da yọle: “Arẹmiẹn ofẹn ha mun mẹn, mẹn da munhẹn ha taman ẹbho ebi mẹn ha luẹ. Mẹn da dọ kere ghe beji mẹn rẹ ha taman ẹbho emhin nin mẹn luẹ bhi Baibo, mẹn da kie manman ha mhọn izebhudu. Urẹọbhọ nọnsẹmhẹn da yẹ wo ha ziẹn ọbhọ.”
4. Ha re ekpẹn talọ
Ọkuẹsẹ mhan tẹmhọn Osẹnobulua man ọria, ọkhẹke nin mhan ria ẹmhọn ebi mhan ha taman ọne ọria. Ọ yẹ khẹke nin mhan ria ẹmhọn ebi mhan ha rẹ tale yẹ. Tie 2 Timothy 2:24 bi 1 Peter 3:15, bha ha zilo nyan ene inọnta nan:
-
Be uwẹ ha rẹ re obọ rẹkhan ẹmhọn ne ribhi ene iBaibo nan yẹ sade uwẹ tẹmhọn Osẹnobulua man ọria?
-
Asabọmiẹn ghe eso bhi ene ribhi azagba-uwa nọnsẹ, la imọẹ ẹ bha rẹọ bhi ebi uwẹ ta. Be uwẹ ha lu yẹ? Be ọ bha khẹkẹ nin uwẹ lu?
-
Bezẹle nan da miẹn ghe, nin uwẹ rẹ re ekpẹn ha ne ele zilo, ọle ha mhẹn gbera uwẹ wo ha taman ele ebi ele ha rẹọ i?
5. Iwẹnna itẹmhọn Osẹnobulua rẹ mhan ghọnghọn
Jehova hi ọnọn mun iwẹnna itẹmhọn Osẹnobulua nin Jesu. Ẹlo nela Jesu rẹ ha ghe ọne iwẹnna? Tie John 4:34, bha ha zilo nyan ene inọnta nan:
-
Ebale esili mhẹn mhan bhi egbe. Ọ yẹ rẹ mhan ghọnghọn. Bezẹle nin Jesu da re iwẹnna nọnsi Osẹnobulua rẹ khọkhọ ebale?
-
Elele nela uwẹ riale mhan dẹ miẹn bhọ sade mhan tẹmhọn Osẹnobulua?
Emhin ne ha sabọ rẹkpa ẹ
-
Uwẹ ha yo ikolo oga nan do bhi ẹkẹ uzana, gbẹlokotọ nin uwẹ daghe uwedẹ eso nin uwẹ ha rẹ sabọ munhẹn ha tẹmhọn Osẹnobulua man ẹbho.
-
Taman ọnọn man uwẹ iBaibo ghe ọ dẹ yẹẹ uwẹ rẹ deba ẹbho ne re ọta man bhi ọne ikolo nan. Ọnan dẹ rẹkpa uwẹ rẹ manman guẹ ebi a rẹ tẹmhọn Osẹnobulua yẹ.
-
Noo ẹmhọn nọn ribhi obọ natiọle “Ẹbho Eso Sabọ Yọle” la “Ọria Sabọ Nọọn Uwẹ Yọle” rẹ luẹ ebi uwẹ ha rẹ ha wanniẹn inọnta nin ẹbho ha sabọ nọọn uwẹ le.
ỌRIA SABỌ NỌỌN UWẸ YỌLE: “Ọmọẹ, be emhin ki diayẹ?”
-
Be uwẹ ha rẹ noo ọne isẹhoa nan yẹ, rẹ taman ọne ọria emhin nin uwẹ sẹ luẹ bhi Baibo?
EBI MHAN LUẸLE
Eghọnghọn nabhọre sade mhan tẹmhọn Osẹnobulua man ẹbho. Sẹyẹ, ọ iyi ẹsọn nọn kaka gbe. Uwẹ dẹ sabọ lu ọle.
Uwẹ Be Yẹ Yere?
-
Bezẹle nọn da khẹke nin mhan ha tẹmhọn Osẹnobulua man ẹbho?
-
Be uwẹ ha rẹ sabọ re uwedẹ ekpẹn ha lu ọle yẹ?
-
Be uwẹ ha lu nin uwẹ da sabọ ha mhọn izebhudu rẹ ha tẹmhọn Osẹnobulua?
FẸ ENE EMHIN NAN GHE
Fẹ uwedẹ enẹn ghe nin uwẹ ha rẹ sabọ noo ikadi nan rẹ taman ẹbho ẹmhọn jw.org rẹ tẹmhọn Osẹnobulua man ẹbho.
Ebi Uwẹ Ha Sabọ Ta Nin Uwẹ Rẹ Re Ikadi Nan Rẹ Taman Ẹbho Ẹmhọn JW.ORG Nin Ọria (1:43)
Luẹ ikpẹ esili enẹn ne ha sabọ rẹkpa uwẹ bhi iwẹnna itẹmhọn Osẹnobulua.
“Uwẹ Be Muegbe Nin Uwẹ Rẹ Rẹkpa Ẹbho Kiẹn Edibo Nesi Jesu?” (Ọne Ọkhẹughe, September 2020)
Ghe ọne ividio nan nin uwẹ daghe ebi ijiẹmhin ọsi ọmanmhẹn ọkpa bhi Baibo ha rẹ re izebhudu nin mhan rẹ ha tẹmhọn Osẹnobulua yẹ, aharẹmiẹn ibhokhan mhan khin.
Luẹ ebi uwẹ ha rẹ sabọ ha tẹmhọn Osẹnobulua man ẹbho ne ribhi azagba-uwa nọnsẹ yẹ.
Emhin Ebhebhe Ne Ha Yẹ Ti Uwẹ Bhọ
INỌNTA NIN ẸBHO KẸ NỌỌN
Bebhọ Iluẹmhin IBaibo?
Min ewanniẹn rẹji inọnta rẹji iluẹmhin iBaibo nin man nẹn ẹbho luẹ ọsọhẹ.
