LESN 22

Ou Yu Kyan Tel Ada Piipl Bout Di Gud Nyuuz?

PLIE

Wen yu a lorn aal a di sitn dem we yu a lorn fram di Baibl, yu a-go fiil se evribadi fi lorn bout dem tu. An a chuu, dem fi ier bout it tu! Bot yu mait-a fiil fried fi tel dem bout di sitn dem we yu a lorn. Wi a-go luk pan wa kyan mek yu no so fried fi tel ada piipl bout di sitn dem we yu a lorn. An yu a-go api fi tel ada piipl bout di gud nyuuz.

1. Ou yu kyan tel di piipl dem we yu nuo bout di sitn dem we yu a lorn?

Jiizas falara dem se: “Wi kyaahn tap taak bout di sitn dem we wi did si an ier.” (Aks 4:20) Dem did lov di sitn dem so moch we dem did a lorn dat dem did waahn fi tel uol iip a piipl bout it. A so yu fiil? Ef a so yu fiil, luk out fi wen it luk laik se yu kyan get a chaans fi taak tu yu fambili an yu fren dem bout wa yu a lorn, an yu fi dwi’it iina wan nais wie.—Riid Koloshan 4:6.

Si som sitn ya we kyan elp yu fi dwi’it

Wen yu waahn fi taak tu yu fambili bout sitn we yu a lorn fram di Baibl, yu kyan se sitn laik: “Mi lorn sopm nais da wiik ya ino.”
Ef yu fren sik ar a fret bout sitn, yu kyan tel dem bout wan skripcha we yu tingk mait-a mek dem fiil beta.
Ef nobadi we yu wok wid aks yu bout ou yu wiik a go, yu kyan tel dem bout sitn we yu lorn fram yu Baibl stodi ar sitn we yu lorn a di miitn.
Shuo yu fren dem di jw.org websait.
Tel yu fren dem se dem kyan kom wid yu fi kom lorn wa yu lorn pan yu Baibl stodi tu. Ar yu kyan shuo dem ou dem kyan aks fi dem uona Baibl stodi pan di jw.org websait.

2. Wa mek fi priich wid di breda an sista dem iina di kanggrigieshan a sopm gud fi sumadi waahn fi du?

Jiizas falara dem neva jos priich tu piipl uu dem did nuo bout di gud nyuuz. Wa Jiizas did du a “sen dem out tuu tuu” fi go iina evri siti we im did plan fi go fi go priich tu piipl. (Luuk 10:1) Kaaz Jiizas did plan ou dem fi du di priichin wok, it mek uol iip a piipl kuda ier bout di gud nyuuz. An wen Jiizas falara dem get fi du di priichin wok tugeda, it mek dem api. (Luuk 10:17) Yu tingk yu kuda chrai fi du tingz so dat yu kyan priich wid di kanggrigieshan tu?

LORN SOM MUO

Luk pan wa yu kyan du so yu no so fried wen yu a priich di gud nyuuz an kyan api wen yu a du it tu.

3. Jeuova a-go elp yu

Som a uu waahn fi go priich mait-a fried kaa dem no nuo wa piipl mait-a tingk bout wa dem a du, ar ou piipl a-go gwaan wen dem chrai fi taak tu dem.

Yu fried fi tel ada piipl bout di sitn dem we yu a lorn? Wa mek yu fried, ar wa mek yu no fried?

Plie di VIDIYO, an den wi a-go taak bout di neks kwestiyan.

VIDIYO: Mi Prie Tu Jeuova Fi Elp Mi Fi No So Fried (4:05)

Wa dem yong piipl ya did du so dat dem no so fried fi taak bout Jeuova?

Riid Aizaiya 41:10, an den wi a-go taak bout da kwestiyan ya:

Wen yu fiil fried fi go priich an yu prie tu Jeuova, ou dat kyan elp yu?

Yu did nuo se?

A uol iip a Jeuova Witnis did fiil laik se dem kuda neva gu out de go taak tu piipl bout di sitn dem we dem a lorn. Wan man we niem Sergey did fiil laik im no wot notn, an im did fain it aad fi taak tu piipl. Bot den im stodi di Baibl wid di Jeuova Witnis dem. Im se: “Iivn duo mi did fried, mi staat fi taak tu piipl bout di sitn dem we mi a lorn. An mi did fraitn fi si se wen mi staat fi tel piipl bout wa mi a lorn fram di Baibl, mi fiil beta bout miself laik se mi wot sitn. It did aal mek mi staat fi biliiv di nyuu sitn dem we mi a lorn muor tu.”

4. Taak tu piipl nais

Wen yu a priich bout di gud nyuuz, yu no fi jos tingk bout wa yu a se, bot yu fi tingk bout ou yu a se it tu. Riid 2 Timoti 2:24 an 1 Piita 3:15, an den wi a-go taak bout dem kwestiyan ya:

Ou yu kyan du laik wa dem vors ya se wen yu a taak tu piipl bout di Baibl?
Som a yu fambili an yu fren dem mait-a no laik wa yu a du. Bot wa yu kyan du? An wa yu no fi du?
Wa mek it beta fi wi taak tu piipl nais an aks dem ou dem fiil bout sitn dan jos a tel dem wa dem fi biliiv iina?

5. Wen yu tel piipl bout di gud nyuuz, it a-go mek yu api

Jeuova tel Jiizas fi priich bout di gud nyuuz. Ou Jiizas did fiil bout da wok de? Riid Jan 4:34, an den wi a-go taak bout dem kwestiyan ya:

Wen wi nyam som gud fuud, it mek wi kyan gwaan liv an it mek wi api tu. Wa mek Jiizas se wen wi du wa Jeuova waahn wi fi du—laik fi priich tu piipl—it komiin laik wen wi a nyam som gud fuud?
Kaa yu a priich tu piipl bout di gud nyuuz, wa a som a di gud sitn dem we kyan apm?

Si Som Likl Sitn Ya We Yu Kyan Du

Wen yu go a di miitn iina di wiik, luk pan wa a gwaan wen di breda an sista dem a shuo wi ou dem staat taak tu piipl wen dem a priich tu dem, an chrai an du laik dem.
Tingk bout fi staat gi taak a di miitn we gwaan iina di wiik. Dis wi mek yu no so fried fi tel ada piipl bout di sitn dem we yu a lorn, kaa yu a-go nuo wa yu a taak bout.
Yuuz di “Sumadi Mait-a Se” ar di “Sumadi Mait-a Aks” paat dem iina da buk ya fi praktis ou yu wuda ansa som kwestiyan we piipl wuda naamali aks di Jeuova Witnis dem. An yu a-go nuo ou fi ansa piipl wen dem se sitn wen dem no waahn wi fi taak tu dem tu.

SUMADI MAIT-A AKS: “Wa a gwaan wid yu nou?”

Wen dem aks yu da kwestiyan de, ou yu kyan yuuz it fi tel dem bout di sitn dem we yu a lorn iina yu Baibl stodi?

DIS A WA YU FI MEMBA

Wen yu tel ada piipl bout di gud sitn dem we yu a lorn, it wi mek yu api. An fi staat fi dwi’it mait-a iiziya dan yu tingk.

Wa yu did lorn iina da lesn ya?

Wa mek yu fi tel ada piipl bout di gud sitn dem we yu a lorn?
Ou yu kyan du it iina wan nais wie?
Wa a som a di sitn dem we yu kyan du so dat yu no so fried fi priich tu piipl?

Rait dong di diet wen yu don da lesn ya:

Du Dis

Tingk bout wan sumadi we yu kyan tel bout som a di gud sitn dem we yu a lorn, an tingk bout wa yu kyan se tu dem, ou yu a-go se it, an wen yu fi se it tu dem.

Sitn Els We Yu Fi Du:

Sitn Els We Yu Fi Du