ĨSOMO YA 22
Ũtonya Kũtavanyʼa Ũvoo Mũseo Ata?
O ũndũ ũendeee kwĩmanyĩsya Mbivilia, nũtonya kwendeewʼa mũno nginya ũkasya, ‘Kĩla mũndũ nĩwaĩlĩte kwĩwʼa ũvoo ũũ!’ Na kwa wʼo, kĩla mũndũ nĩwaĩlĩte kũmanya ũwʼo ũsu! Ĩndĩ o na vailye ũu, nũtonya kũkĩa kũtavya andũ angĩ maũndũ ala wĩmanyĩĩtye. Eka tũneenee ũndũ ũtonya kwĩka ũsinde wia ũsu na ũyambĩĩa kũtavya angĩ ũvoo mũseo ũla wĩ Mbivilianĩ.
1. Ũtonya kwĩka ata ũtavye andũ ala wĩsĩ maũndũ ala wĩmanyĩĩtye?
Amanyĩwʼa ma Yesũ maisye atĩĩ: “Tũitonya kũeka kũneena ĩũlũ wa maũndũ ala twonete na kwĩwʼa.” (Meko ma Atũmwa 4:20) Nũndũ nĩmendete ũwʼo mũno, maĩ na wendi wa kũtavya andũ aingĩ ũndũ vatonyeka maũndũ ala meesĩ. We ũu nĩwʼo wĩwʼaa? Ethĩwa ũu nĩwʼo vailye, mantha myanya ya kũtavya andũ maku ma mũsyĩ na anyanyau maũndũ ala wĩmanyĩĩtye, na ũyĩka ũu wĩ na ndaĩa.—Soma Akolosai 4:6.
Ũndũ ũtonya kwambĩĩa kũtavanyʼa
-
Yĩla ũneena na andũ maku ma mũsyĩ, ambĩĩsya ũneenanyʼa kwa kwasya: “Ve ũndũ wa kwendeesya mũno nĩmanyĩisye kyumwanĩ kĩĩ.”
-
Ethĩwa ve mũnyanyau ũmwe mũwau kana wĩmakĩĩte, no ũmũsomee ĩandĩko ya kũmwĩkĩa vinya.
-
Yĩla ala ũthũkũmaa namo maũkũlya ũndũ wikendi yaku yĩĩilye, no ũmatavye ũndũ mũna wĩmanyĩisye ĩmanyĩsyonĩ yaku ya Mbivilia, kana o ũmbanonĩ wa kĩkundi.
-
Onyʼa anyanyau kĩsese kitũ kya jw.org.
-
Thokya angĩ yĩla ũkwĩmanyĩsya Mbivilia na mwalimũ waku, kana ũmonyʼe ũndũ matonya kusũsya vomu ĩla yĩ kĩsesenĩ kya jw.org makũlĩtye mamanyĩwʼe Mbivilia.
2. Nĩkĩ nĩ ũndũ wa vata kwĩka mũvango ũkatavanasya na kĩkundi?
Amanyĩwʼa ma Yesũ nĩmeekie ũndũ ũngĩ wa vata eka o kũtavya ũvoo mũseo andũ ala mamesĩ. Yesũ nĩwamatũmie “elĩ elĩ mathi mbee wake malike kĩla ndũa” maitavanyʼa. (Luka 10:1) Mũvango ũsu mũseo wa kũtavanyʼa nĩwanengie andũ aingangĩ mwanya wa kwĩthukĩĩsya ũvoo mũseo. O na ĩngĩ, kũtavanyʼa vamwe nĩkwatumie amanyĩwʼa asu matana mũno. (Luka 10:17) We no wĩke mũvango ũkambĩĩa kũtavanyʼa na kĩkundi?
ĨMANYĨSYE MŨNANGO
Ĩmanyĩsye wone ũndũ ũtonya kũolanga wia na ũyambĩĩa kũkwata ũtanu ũla umanaa na kũtavanyʼa ũvoo mũseo.
3. Yeova akaũtetheesya
Andũ amwe nĩmakĩaa kũtavanyʼa maisengʼa andũ makamonaa ata, kana mayĩkũlya ethĩwa andũ nĩmeũmethukĩĩsya.
-
We nũkĩaa kũtavya angĩ maũndũ ala wĩmanyĩĩtye? Nĩkĩ wĩwʼaa ũu?
Ĩloelei VITIO, na ĩndĩ mũineenea ĩkũlyo yĩla yĩatĩĩe.
-
Andũ asu ma mũika meekie ata nĩ kana masinde wia ũla maĩ nawʼo?
Somai Isaia 41:10, na ĩndĩ mũineenea ĩkũlyo yĩĩ:
-
Yĩla ũkwĩwʼa ũikĩa kũtavanyʼa, mboya ĩtonya ũkũtetheesya ata?
We nĩwĩsĩ?
Andũ aingĩ ala ũmũnthĩ nĩ Ngũsĩ sya Yeova, mbeenĩ masũanĩaa kana maitonya kũtavya andũ angĩ ũvoo mũseo. Kwa ngelekanyʼo, Sergey mbeenĩ ewʼaa ataĩlĩte, na wĩ ũndũ wĩ vinya mũno kũneena na andũ. Ĩndĩ ĩtina nĩwesie kwĩmanyĩsya Mbivilia. Aĩtye atĩĩ: “O na kau naĩ na wia mwingĩ, nĩnambĩĩie kũtavya ala angĩ maũndũ ala neemanyĩasya. Ĩndĩ ũndũ wa kũsengyʼa nĩ kana, yĩla nambĩĩie kwĩka ũu, nĩnambĩĩie kwĩyĩĩkĩĩa mũnango. O na ĩngĩ, kwĩka ũu nĩkwatumie nĩĩkĩĩa mũnango maũndũ ala neemanyĩasya.”
4. Ĩthĩwa na ndaĩa
Yĩla ũũtavya angĩ ũvoo mũseo, ndũkasũanĩe o kĩla ũũneena, ĩndĩ sũanĩa ũndũ ũũkĩneena. Somai 2 Timotheo 2:24 na 1 Vetelo 3:15, na ĩndĩ mũineenea makũlyo aa:
-
Ũtonya kũtũmĩa mĩsoa ĩsu ata yĩla ũneena na andũ angĩ ĩũlũ wa Mbivilia?
-
Andũ amwe ma mũsyĩ kana anyanyau nĩmatonya kũlea kwĩtĩkĩlana naku. We ũtonya kwĩka ata? Na nĩ kyaũ ũtaĩlĩte kwĩka?
-
Nĩkĩ nĩ ũndũ wa vata kũkũlya makũlyo kwa nzĩa ya ũĩ vandũ va kũtavya andũ kĩla maĩlĩte kũĩkĩĩa?
5. Kũtavanyʼa ũvoo mũseo nĩkũtumaa tũtana
Yeova nĩwanengie Yesũ wĩa wa kũtavanyʼa ũvoo mũseo. We Yesũ oonaa wĩa ũsu ata? Somai Yoana 4:34, na ĩndĩ mũineenea makũlyo aa:
-
Kũya lĩu mũseo nĩkũtumaa tũendeea kwĩthĩwa thayũ na kũkatũetee ũtanu. Nĩkĩ Yesũ waelekanilye kwĩka kwenda kwa Ngai, kũla nĩ vamwe na kũtavanyʼa ũvoo mũseo, na kũya lĩu?
-
Wĩona nĩ maũndũ meva mũndũ ũtonya kũtanĩa yĩla watavya angĩ ũvoo mũseo?
Maũndũ ũtonya kwĩka
-
Wathi ũmbanonĩ wa katĩ katĩ wa kyumwa, sisya wone nzĩa ila ũtonya kũtũmĩa kwambĩĩsya ũneenanyʼa na andũ.
-
Kũlya mwalimũ waku kĩla ũtonya kwĩka ũtwʼĩke mũmanyĩwʼa ũmbanonĩ wa katĩ katĩ wa kyumwa. Ilungu sya amanyĩwʼa nitonya ũkũtetheesya ũkethĩwa wĩyũmbanĩtye kũtavya angĩ maũndũ ala wĩmanyĩĩtye.
-
Tũmĩa kĩlungu kya “Andũ Amwe Maasya” kana “Andũ Amwe no Makũlye,” ila syĩ ĩvukunĩ yĩĩ, nĩ kana ũmanye ũndũ ũtonya kũsũngĩa makũlyo amwe makũlawʼa mũno.
ANDŨ AMWE NO MAKŨLYE: “Kwĩ kyaũ kĩeni?”
-
Ũtonya kũtũmĩa mwanya ũsu ata kũtavya mũndũ maũndũ ala wĩmanyĩĩtye kuma Mbivilianĩ?
KĨLA TWEEMANYĨSYA
Kũtavanyʼa ũvoo mũseo nĩkũetae ũtanu, na kwĩka ũu nĩkũtonya kwĩthĩwa kwĩ laisi kwĩ ũndũ ũsũanĩa.
Makũlyo ma Kũsyokeleela
-
Nĩkĩ waĩle kũtavya angĩ ũvoo mũseo?
-
Ũtonya kwĩka ata wonanyʼe kana wĩ na ndaĩa yĩla ũũtavanyʼa?
-
Ethĩwa nũkũkĩa kũtavanyʼa, ũtonya kwĩka ata ũsinde wia ũsu?
MAŨNDŨ ANGĨ MA KWĨMANYĨSYA
Sũanĩa nzĩa inya syĩ laisi ũtonya kũtũmĩa kũtavya andũ ũvoo mũseo ũtũmĩĩte kaati ya kwelekelya andũ kĩsesenĩ kya jw.org.
Ũndũ Tũtonya Kũnengane Kaati ya Kũmanyĩthya Andũ Ĩũlũ wa Kĩsese kya jw.org (1:43)
Ĩmanyĩsye ĩũlũ wa nguma inya itonya ũkũtetheesya kũtavanyʼa ũvoo mũseo.
“We Nĩwĩyũmbanĩtye Kũtwʼĩka Mũtei wa Andũ?” (Mũsyaĩĩsya, Mwei wa 9, 2020)
Ĩloele vitio wone ũndũ ngelekanyʼo ĩmwe yĩ Mbivilianĩ ĩtonya kũtũtetheesya tũkethĩwa na ũkũmbaũ wa kũtavanyʼa ũvoo mũseo o na ethĩwa twĩ o syana.
Soma wone ũndũ ũtonya kũtavya andũ ma mũsyĩ ala matemanyĩĩtye ĩũlũ wa Yeova maũndũ ala me Mbivilianĩ.
“Kũvikĩa Ngoo sya Andũ ma Mũsyĩ Ala Mate Ngũsĩ” (Mũsyaĩĩsya, Matukũ 15, Mwei wa 3, 2014)
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
