LƐSIN 22

Aw Yu Go Prich di Gud Nyuz?

PLE

As yu de lan di tru tin dɛn na di Baybul, yu go de tink se ‘Ɔlman fɔ yɛri bɔt dis!’ Na tru, ɔlman nid fɔ yɛri! Bɔt sɔntɛm yu go de fred fɔ tɛl ɔda pipul dɛn bɔt wetin yu dɔn lan. Lɛ wi tɔk bɔt aw yu go lɛf fɔ fil da we de ɛn gladi fɔ bigin prich di gud nyuz.

1. Aw yu go tɛl pipul dɛn we yu sabi bɔt wetin yu dɔn lan?

Jizɔs in disaypul dɛn bin tɔk se: “Wi nɔ go stɔp fɔ tɔk bɔt di tin dɛn we wi dɔn si ɛn yɛri.” (Akt 4:20) Dɛn bin so valyu di trut dat dɛn bin want fɔ mek plɛnti pipul dɛn yɛri bɔt am. Yusɛf de fil da sem we de? If na so i bi, luk fɔ we dɛn we yu go tɛl yu fambul dɛn ɔ padi dɛn bɔt wetin yu dɔn lan wit rɛspɛkt.—Rid Koloshians 4:6.

Sɔm we dɛn fɔ bigin tɔk bɔt wetin yu dɔn lan

We yu de tɔk to pɔsin na yu famili, stat fɔ tɔk bɔt wan Baybul tɔpik bay we yu se: “A lan fayn tin dis wik.”
If yu padi sik ɔ de wɔri, sho am wan skripchɔ we go ɛnkɔrej am.
We yu wokmet aks aw yu de du, tɛl am bɔt wetin yu lan na yu Baybul stɔdi ɔ na kɔngrigeshɔn mitin.
Sho yu padi dɛn di jw.org wɛbsayt.
Invayt ɔda pipul dɛn fɔ jɔyn yu pan yu Baybul stɔdi, ɔ sho dɛn aw dɛn go aks fɔ Baybul stɔdi na jw.org.

2. Wetin mek na fayn gol fɔ prich wit di kɔngrigeshɔn?

Jizɔs in disaypul dɛn nɔ bin jɔs prich di gud nyuz to pipul dɛn we dɛn sabi. Jizɔs “bin sɛn dɛn tu-tu fɔ go na ɔl di siti dɛn” fɔ prich. (Lyuk 10:1) Da ɔganayz we aw dɛn bin de du di prichin wok bin mek bɔku pipul dɛn gɛt di chans fɔ yɛri di gud nyuz. We di disaypul dɛn bin de prich togɛda, dat bin mek dɛn gladi. (Lyuk 10:17) Yu go ebul mek am yu gol fɔ prich wit di kɔngrigeshɔn?

LAN MƆ

Lan bɔt aw yu go lɛf fɔ fred ɛn gɛt di gladi-at we pɔsin kin gɛt we i de prich di gud nyuz.

3. Jiova go ɛp yu

Sɔm pipul dɛn we want fɔ prich go fred wetin pipul dɛn go tink bɔt dɛn ɔ wetin dɛn go du to dɛn.

Yu de fred fɔ tɛl pipul dɛn bɔt wetin yu dɔn lan? Wetin mek yu de fred? Ɔ wetin mek yu nɔ de fred?

Ple di VIDIO, dɔn una tɔk bɔt di kwɛstyɔn we de dɔŋ.

VIDIO: A Pre to Jiova fɔ Kɔrej (4:05)

Aw dɛn yɔŋ Jiova Witnɛs dɛn ya bin stɔp fɔ fred?

Rid Ayzaya 41:10, dɔn una tɔk bɔt dis kwɛstyɔn:

We yu de fred fɔ prich, aw prea go ɛp yu?

Yu bin no?

Bɔku Jiova Witnɛs dɛn bin de tink se dɛn nɔ go ɛva ebul fɔ prich di gud nyuz to ɔda pipul dɛn. Fɔ ɛgzampul, Sage bin de fil se i nɔ gɛt wan valyu, ɛn i nɔ bin izi fɔ am fɔ tɔk to ɔda pipul dɛn. Leta, i stɔdi di Baybul. I tɔk se: “Pan ɔl we a bin de fred, a bin bigin fɔ tɔk to ɔda pipul dɛn bɔt wetin a bin de lan. A bin sɔprayz fɔ si se we a de tɔk to ɔda pipul dɛn bɔt di Baybul, dat bin mek a gɛt mɔ kɔnfidɛns. Ɛn i mek bak a gɛt strɔng fet.”

4. Tɔk wit rɛspɛkt

We yu de tɛl ɔda pipul dɛn bɔt di gud nyuz, nɔ jɔs tink bɔt wetin yu go tɔk, tink bak bɔt aw yu go tɔk am. Rid 2 Timoti 2:24 ɛn 1 Pita 3:15, dɔn una tɔk bɔt dɛn kwɛstyɔn dɛn ya:

Aw yu go fala wetin de na dɛn vas dɛn ya we yu de tɔk to ɔda pipul dɛn bɔt di Baybul?
Sɔm pan yu fambul ɔ padi dɛn nɔ go gri wit yu. Wetin yu go du? Wetin yu nɔ fɔ du?
Wetin mek i bɛtɛ fɔ tek tɛm aks pipul dɛn kwɛstyɔn dɛn pas fɔ tɛl dɛn wetin dɛn fɔ biliv?

5. Di prichin wok de mek yu gladi

Jiova bin gi Jizɔs di wok fɔ prich di gud nyuz. Aw Jizɔs bin si da wok de? Rid Jɔn 4:34, dɔn una tɔk bɔt dɛn kwɛstyɔn dɛn ya:

Gud it de mek wi kɔntinyu fɔ liv, ɛn i de mek wi gladi. Wetin mek Jizɔs bin se fɔ du wetin Gɔd want, fɔ ɛgzampul, fɔ prich di gud nyuz tan lɛk fɔ it?
Us gud tin dɛn yu tink se go apin we yu tɛl ɔda pipul dɛn bɔt di gud nyuz?

Tin dɛn we go ɛp yu

Na di mitin dɛn we wi kin gɛt insay di wik, luk fɔ we dɛn we yu go stat fɔ tɔk to pipul dɛn.
Tɔk to yu Baybul ticha bɔt aw yu go bi studɛnt na di mitin we wi kin gɛt insay di wik. Studɛnt asaynmɛnt dɛn go ɛp yu fɔ rɛdi gud gud wan fɔ tɛl ɔda pipul dɛn wetin yu de lan.
Yuz di say dɛn na dis buk we se “Sɔm Pipul dɛn Kin Se” ɔ “If Pɔsin Aks Yu” fɔ praktis aw yu go ansa kɔmɔn kwɛstyɔn dɛn we pipul dɛn kin aks ɛn wetin dɛn kin se we dɛn nɔ want fɔ lisin.

IF PƆSIN AKS YU: “Aw yu de du?”