SOMO 22

Ni ká ka ni d’ra hwè dhi lo i ngbaribbai?

Á KPA

Biblia nǎ lo ni chú nari bbai, ni ka ni ddiri, ‘Riji krʉ kʉ ná ndrŭ rr fø lo rr!’ Bbʉbbʉ dhé krʉ ndrŭ dho ringani ndima rr ri rr! Ro, njaro ni chu ná lo ni d’ra nja ndrŭ dho nari dho do ka ndi njí ni. Akonja ngbaribbai ma ni ka ni si fø do djolu ndirigoti ngbaribbai ma ni ka ni ngá lod’radha tso hwè na nari.

1. Ni ká ka ni d’ra ni chu ná lo ngbaribbai chu ni chu ná ndrŭ dho?

Yesu unakpa pongʉeri: “Ko nzá ka ko bbá lotidha tso ro nja ko njangʉe ndirigoti rr ko rrngʉe ná lo djo ri.” (Matendo 4:20) Kpa njangʉe bbʉbbʉlo mana na bbo nari dho, kpa jingʉeri ndima d’ra ri bí kʉ ná ndrŭ dho. Ni ma ká adi rinja fø i? Njati rie fø ni adi rinja ri ró, ane ngbathonga ná saa ndiro ni d’ra ni chu ná lo heshima na nidhó familia dho ndirigoti nidhó kau dho.—Azø Wakolosai 4:6.

Lo tso le ka le nga ná nja chu

Nidhó familia ma na ni loti ró, anga lo tso iri bbai: “I yenga ddo kana ma ba ddikpa bbo thonga ná lo.”
Azø kpakpa ka ndi li le ná maandiko, dhe nji ná kau dho inga njedha na thí kʉ ná kau dho.
Njati nidhó bbakau dhu ngbaribbai ma nidhó lo kʉ nari ró, ad’ra Biblia nǎ ro ni chu ná lo, inga njudha dhi ngana ro ni chu ná lo ro kpa dho.
Adho jw.org djó kʉ ná lo nidhó bbakau dho.
Anzi nja ndrŭ ro maddi Biblia nǎ longa ni ne ná saa na inga adho ngbaribbai ma kpa ka ndima neri le ne Biblia nǎ longa ndima na nari jw.org djó.

2. Kutaniko nǎ ndrŭ ma na le lod’ra nari ká kʉ bblo kʉ ná muradi addudho?

Yesu unakpa nzɨ ngʉ adi hwè dhi lo i d’ra chu ndima chu ná ndrŭ dho dhé ri. Yesu “chongʉe kpa ro ro rò krʉ kʉ ná bbagʉ lu” lod’radha dho. (Luka 10:1) Fø ke kpengʉe lod’radha dhi njí nari lingʉeri bí kʉ ná ndrŭ rr hwè dhi lo i. Ddinga Yesu unakpa ngʉ lod’ra nari ngʉ adi hwè bbʉ bbo kpa dho. (Luka 10:17) Føri bbai, ni ká ka ni li lod’radha dhi muradi ro nzá ni nji nidhó kutaniko nǎ ndrŭ na?

ANE LONANGA BBO

Anja ngbaribbai ma ni ka ni si do djolu ndirigoti ni ka ni ba hwè lod’radha dhi njí nǎ ro nari.

3. Yova sie ni na nì

Nja ndrŭ do adi nji lod’radha dho nja ndrŭ nyǒ djó nga ndima nja inga njaro ndrŭ si ndima dhó lo rr nzɨ nari dho.

Ni ká do adi nji ni chu ná lo ni d’ra nari dho? Ká addudho, inga nzɨ addudho?

Aninja VIDEO, ndirigoti anitilo i ngadhudha djo.

VIDEO:Ma nzingʉe nga Yova tso ndiro nzɨ ma nji do ró (4:05)

Yova dzá Dimu kʉ ná fø jadda kpa ká singʉe ndima do ngʉ adi nji nari djolu ngbaribbai?

Azø Isaya 41:10, ndirigoti anitilo i ngadhudha djo:

Ni do di nji lod’radha dho ró, sala ká ka ndi kó ni tsotso ngbaribbai?

Ni ká churi ngbà?

Bí kʉ ná Yova dzá Dimu ngʉ adi riddi nari kʉ ndima dho nzá ri ro ka ndi ka ndima d’ralo nja ndrŭ dho ri. Loroji na, Sergey ngʉ adi ndi nja nga na mana kʉ ri ndirigoti ke dho ringʉe kpakpa ndi tilo nja ndrŭ na. Ro Biblia ke jifunza nari goti, ke pori: “Ni mai do ngʉ adi ma nji ro, ma ngangʉe Biblia nǎ ro ma jifunza ná lod’radha tso nja ndrŭ dho. Bbo kengʉe ma nanga ná lo kʉ, nja ndrŭ dho má ma chu Biblia nǎ ro ná lod’ra nari lingʉeri ma nǎ do sini si ndirigoti føri lingʉe madhó udha kpakpa.”

4. Adi heshima bbʉ ndrŭ dho

Nja ndrŭ dho ni lod’ra ró, nzɨ ddinga ni ka ni d’ra ná lo djo dhé, ro addinga ngbaribbai ma ni ka ni d’ra ri nari djo maddi. Azø 2 Timoteo 2:24 ndirigoti 1 Petro 3:15, ndirigoti anitilo i ngadhudha djo:

Ni ká ka ni njinjí ngbaribbai fø maandiko na nja ndrŭ na ni loti Biblia djo ná saa na?
Nja kʉ ná familia inga nja kʉ ná kau nzá ka ndima u nidhó lo ro ri. Fø ro ká ni ka ni njí addu? Nidho ká ringani nzɨ ni nji addu?
Addudho ká ringani ni di ngadhu nyodyu na, ndrŭ dho ringani ndima u ná lo ni d’ra kpakpanga na nari djolu?

5. Hwè dhi lo-i le d’ra nari adi hwè bbʉ bbo

Yova bbʉngʉe hwè lo i d’radha dhi njí Yesu dho. Yesu dhó nganjadha ká ngʉe ngbaribbai fø njí djo? Azø Yohana 4:34, ndirigoti anitilo i ngadhudha djo:

Bblo kʉ ná nyo ko nyò nari adi kodhó afya tsotso kó ndirigoti ri adi rili ko e hwè na. Mungu ji ná lo le nji nari ma, lo le d’ra nari ma na ká Yesu ddingʉe nyo na addudho?
Ni ká riddi hwè dhi lo i le d’ra nari nǎ ro le ka le ba ngbá hwè?

Ni tsotso ka ndi kó ná lo

Yenga ddo kana le adi nji ná njudha nǎ, aneri ni chu ngbaribbai ma ni ka ni ngá lod’radha tso nari.
Atilo ngbaribbai ma ni ka ni njí kipindi yenga ddo kana le adi nji ná njudha dhi ngana nari djo nidhó mwalimu na. Kipindi ni nji nari ka ndi tayarisha ni ndiro ni d’ra ni chu ná lo ro nja ndrŭ dho d’e.
Anjinjí i buku nǎ “Nja ndrŭ adi ripo” inga “Nja ndrŭ ka ndima dhuri” ná ngana kʉ ná lo na ndiro ni chú ngbaribbai ma ni ka ni ngʉ nja logoti inga ni ka ni si nja lo djolu nari d’e.

NJA LE KA NDI DHURI: “Ni ká riji ni d’ra ngbá lo?”

Fø saa na ká ni ka ni njiri ngbǎ ndiro ni d’ra ni chu Biblia nǎ ro ná lo ro nja ndrŭ dho d’e?

LO DZÁ DɄNGA

Hwè dhi lo i le d’ra nja ndrŭ dho nari adi hwè bbʉ bbo ndirigoti njaro ri ka ndi e sʉsʉ ni nga lo tso.

Lo djolu le ngʉ nari

Nja ndrŭ dho ká le adi hwè dhi lo i d’ra addudho?
Ko ká ka ko dho heshima nja ndrŭ dho ngbaribbai fø njí ko nji nari kana?
Njati rie do adi ni nji lod’radha dho ri ró, ká ni ka ni si fø kpakpalo djolu ngbaribbai?

Somo tso dyani ná ddo:

Muradi

Addinga hwè dhi lo i ni ka ni d’ra dho ná ddikpa le djo. Addinga addu ma ni ka ni po nari djo, ngbaribbai ma ni ka ni pori nari djo ndirigoti ngbá saa na ma ni ka ni pori nari djo.

Nja muradi:

Your other goal