CIIYO 22
Mbweenga Mwashimikila Bamwi Makani Abotu
Ndyemutokwiiya cancine camu Baibo, inga mwayeeya ayi, ‘Uli woonse alyeelete kushiba cancine ici!’ Ncakwiila, uli woonse alayandika kushiba cancine! Nacibi boobo, mpashi inga mwaloonda kulwiitako bamwi nshomutokwiiya. Amuleke tubandike nsheenga mwaciita kwaamba ayi mutanoloonda, sombi calusangalalo mutalike kushimikila makani abotu.
1. Ino inga mwacita buyani kwaamba ayi mucikoonshe kulwiitako bamwi nshomutokwiiya?
Bashikwiiya bakwe Yesu bakaamba ayi: “Swebo inga tatucilekiiwo kwaamba shintu nshetwakalinga kubona akunyumfwa sobeene.” (Milimo 4:20) Bakalinga kucisuni abuumbi cancine ncobakeeya kuswa kuli Yesu cakwaamba ayi bakalinga kusuni kushimikila bantu boonse. Sa amwebo mbomulinyumfwa? Na mbomulinyumfwa, mubulemu amweeleshe kulwiitako beshikamukowa abeshicibusa banu cancine ncomweeya.—Amubelenge Bene Kolose 4:6.
Nsheenga mwaciita
-
Ndyemutobandika amukwashi, amubalwiiteko makani amu Baibo kwiinda mukwaamba ayi: “Kuli cintu cimwi cisangalasha ncondeeya nsondo ino.”
-
Amuyuminishe shicibusa walisukama na mulwashi kwiinda mukumubelengelako lilembo liyuminisha.
-
Amulwiiteko mbomusebensaabo nshomwakeeya paciiyo ca Baibo na kumabungano, abo beenga bamwiipusha mboshitomweendela shintu.
-
Amutondeshe beshicibusa banu shicanika pa webusaiti ya jw.org.
-
Amwiiteko bamwi ndyemutokwiiya Baibo na kubatondesha nsheenga bacita na balisuni kusenga ciiyo ca Baibo pa jw.org.
2. Ino nceebonshi ncintu cibotu abuumbi kuyeeya pamakani akweelela kushimikila pomwi alibungano?
Bashikwiiya bakwe Yesu tabakwe kweelabo pa kushimikila makani abotu kubantu mbobakalinga kushi. Yesu ‘wakabatuma bobilo bobilo kwaamba ayi batanjile kuya mumandabala oonse’ mukushimikila. (Luka 10:1) Bubaambo ubu bwakapa kwaamba ayi bantu baanji banyumfwe makani abotu. Alimwi kushimikila pomwi abamwi kwakapa bashikwiiya bakwe Yesu kusangalala abuumbi. (Luka 10:17) Sa amwebo inga mwayeeyawo pamakani akweelela kushimikila pomwi alibungano?
AMWIIYILEWO ASHIMWI
Amwiiye nsheenga mwaciita kwaamba ayi mutanoloonda, sombi mucane lusangalalo mukushimikila makani abotu.
3. Yehova alaakumucafwa
Bamwi balaloonda kushimikila ceebo cakuyeeya bamwi mbweenga bababona na kubakumbula.
-
Sa mulaloonda kulwiitako bamwi nshomweeya? Ino nceebonshi?
Amweebele VIDYO, lyalo akubandika mwiipusho utokonkelaawo.
-
Ino Bakamboni bacanike aba bakacita buyani kwaamba ayi bacileeke kuloonda?
Amubelenge Isaya 41:10, akubandika mwiipusho uyu:
-
Ino nceebonshi mulyeelete kupaila na mutoolonda kushimikila?
Sa mulishi?
Bakamboni Bakwe Yehova baanji kabatana kutalika kushimikila, bakalinga kuyeeya ayi inga tabacikoonshi kushimikila bamwi makani abotu. Kucakubonenaako, ba Sergey bakalinga kulinyumfwa anga taakuwo mbobabete, aboobo cakalinga ciyumu kubandika abantu. Ano ishi shakaaluka ndyebakatalika kwiiya Baibo. Bakaamba ayi: “Nabi kwaamba ayi ndakalinga kucite boowa, ndakatalika kushimikilako bamwi nshendakalinga kwiiya. Ndakakankamana kwaamba ayi pesule lyakutalika kulwiitako bamwi makani amu Baibo, boowa bwakamana. Alimwi cakancafwa kuyumya lushomo lwangu mucancine ncendakalinga kwiiya.”
4. Amutondeshe bulemu
Ndyemutooshimikila makani abotu, mutabikilibo maano ku nsheshi mwaambe sombi amubikile maano ambweshi mwaambe. Amubelenge 2 Timoti 2:24 alimwi a 1 Pita 3:15, akubandika miipusho iyi:
-
Ino shaambwa mumavesi aya inga mwashikonkela buyani ndyemutobandika abamwi makani amu Baibo?
-
Ino inga mwacita buyani na beshikamukowa abeshicibusa bakaka kusumina nshomushoma? Ino nshiinshi nshomuteelete kucita?
-
Ino nceebonshi cili kabotu kwiipusha miipusho munshila yeenga taikalashi bamwi, muciindi ca kubalwiitabo nshobeelete kucita?
5. Kushimikila bamwi makani abotu kulaleta lusangalalo
Yehova wakapa Yesu incito yakushimikila makani abotu. Ino Yesu wakalinga kwiibona buyani ncito iyi? Amubelenge Joni 4:34, akubandika miipusho iyi:
-
Kulya shakulya shibotu kulatupa buumi bubotu akutunyumfwisha kabotu. Ino nceebonshi Yesu wakaamba ayi kucita kuyanda kwakwe Lesa, uko kwiilikaawo akushimikila makani abotu—kuli anga nkulya shakulya?
-
Ino mbubotu nshi mbweenga mwacana na kamushimikilako bamwi makani abotu?
Sheenga shamucafwa
-
Ndyemuli kumabungano amukati kansondo, amubone nsheenga mweeya isho sheenga shamucafwa kushiba bwakutalika mubandi.
-
Amubandike abatomwiisha pamakani akwaabanamo lubasu mukwaamba makani pakubungana kwamukati kansondo. Kwaabanamo lubasu kwaamba makani kumabungano aya inga kwamucafwa kwiiya mbweenga mwalwitako bamwi nshemutokwiiya.
-
Amusebenseshe lubasu lwa “Bantu Bamwi Balaamba ayi” na “Bamwi Inga Bamwiipusha ayi,” ulo luli mulibuku ili kwaamba ayi mulibambile nsheenga mwaamba na bamwi bamwiipusha miipusho bantu baanji njobeepusha na shaamba baabo bakaka.
BAMWI INGA BAMWIIPUSHA AYI: “Shitokweenda buyani shintu?”
-
Ino coolwe ici inga mwacisebensesha buyani kulwiitako umwi nshomweeya kuswa mu Baibo?
CITEENTE CINENE
Kushimikilaako bamwi makani abotu kulaleta lusangalalo, alimwi kutalika kushimikila teshi ciyumu abuumbi.
Kwiindulukaamo
-
Ino nceebonshi mulyeelete kushimikilaako bamwi makani abotu?
-
Ino inga mwacita buyani kwaamba ayi mutondeshe bulemu kubamwi ndyemutooshimikila?
-
Ino inga mwacita buyani kwaamba ayi mutanoloonda kushimikila?
AMULANGWETEEWO ASHIMWI
Amwiiye nshila shuubu shili 4 sha mbweenga mwashimikila makani abotu kwiinda mukusebensesha kakaadi ka jw.org.
Amwiiye mibo yone yeenga yamucafwa kushimikila makani abotu.
Amweebele akubona cakubonenaako camu Baibo mbweenga catucafwa kutaloonda kushimikila makani abotu nabi ndyetuli banike.
Amwiiye nsheenga mwaciita kwaamba ayi mucikoonshe kubandika makani amu Baibo abeshikamukowa bateshi Bakamboni.
“Mbweenga Mwashimikila Beshikamukowa Bateshi Bakamboni” (Njashi Yamulindilishi, March 15, 2014)
You May Also Like
MIIPUSHO LIINJI BANTU NJOBEPUSHA
Ino Nshiinshi Nsheenga Mweeya Ndyemutokwiiya Baibo a Bakamboni Bakwe Yehova?
Ndyemutokwiiya Baibo a Bakamboni Bakwe Yehova kwakubula kulipila, inga mwasebensesha Baibo ili yoonse. Mulyangulukite kwiitako bamumukwashi wanu na beshicibusa banu bali boonse mbweenga mwasuna kucanikaawo paciiyo.
