Awˬ lawn 22
Nawˬ shu htaꞈ daꞈ ve awˬ lawn sha tanˇ hto piˇ gʼa ve
Liꞈ hpu hkʼaw maˍ laˇ ve awˬ ceuˬ nawˬ gʼa henˇ leh na gʼa la htaˇ, ‘daꞈ ve awˬ lawn chi hkʼe ve shu htaꞈ kaꞈ kʼoˆ piˇ cawˇ ve neˬ!’ tehꞈ nawˬ dawˇ tuˬ yoˬ hehˉ. Awˬ tehˬ kʼo chi lehˬ teˇ gʼaˇ le le shiˍ cawˇ ve yoˬ. Yaꞈ hkʼaˇ, nawˬ gʼa henˇ taˍ ve awˬ lawn shu htaꞈ kʼoˆ piˇ maˇ haˆ ve yoˬ hehˉ. Nawˬ haꞈ hanˉ ve nyi ma cawˬ maˇ la tuˬ hkʼaˬ hkʼe gʼa te ve le? Leh Liꞈ hpu hkʼaw ve daꞈ ve awˬ lawn sha tanˇ nawˬ shu htaꞈ hkʼaˬ hkʼe te kʼoˆ maˍ piˇ gʼa tuˬ le? Teˇ geh henˇ tuˬ yoˬ.
1. Nawˬ gʼa henˇ taˍ ve awˬ lawn shu htaꞈ hkʼaˬ hkʼe te kʼoˆ maˍ piˇ gʼa tuˬ le?
Yeˍsuˆ ve awˬ laꞈ gʼawˇ kʼoˆ ve, ‘ngaˬ hui lehˬ, gʼa kaˇ gʼa mawˬ ve awˬ lawn teˇ hpaˍ htaꞈ maˇ hto maˇ maˍ ve kʼo, chehˇ maˇ hpehꞈ tehꞈ kʼawꞈ kʼoˆ piˇ ve yoˬ.’ (Tcuh yaˇ 4:20) Awˬ laꞈ gʼawˇ hui Yeˍsuˆ geh gʼa henˇ taˍ ve awˬ lawn htaꞈ dawˇ cawˇ jaˇ. Chi htaꞈ pa taw, yawˇ hui shu htaꞈ kaꞈ kʼoˆ maˍ piˇ gaˇ ve yoˬ. Nawˬ˗ehꞈ, chi hkʼe dawˇ˗aw laˇ? Chi hkʼe dawˇ ve kʼo, nawˬ ve yehˬ kʼa maˇ heˆ leh awˬ chawˇ htaꞈ nawˬ gʼa henˇ taˍ ve awˬ lawn nyi ma nuˇ nehˬ ve leh yawˆ yan ve hkʼaw kʼoˆ piˇ sheˍ.—Kawˇlawˇsehˇ 4:6 gʼaw sheˍ.
Nawˬ chi hkʼe te nyi sheˍ
-
Liꞈ hpu hkʼaw ve awˬ lawn teˇ lawn lawn nawˬ ve yehˬ kʼa hkʼaw ve chaw htaꞈ kʼoˆ maˍ piˇ nyi sheˍ. Nawˬ chi hkʼe kʼoˆ gʼa ve, “chi teˇ shinˉ hkʼaw ngaˬ daꞈ ve awˬ lawn teˇ lawn gʼa henˇ ve nawˬ htaꞈ kaꞈ kʼoˆ maˍ laˇ gaˇ ve yoˬ.”
-
Awˬ chawˇ naˬ htaˇ maˇ heˆ leh nyi ma maˇ sha htaˇ, awˬ gʼaˇ piˇ tuˬ Liꞈ hpu awˬ tawn gʼaw maˍ piˇ ve maˇ heˆ leh yawˇ htaꞈ feu piˇ sheˍ.
-
Nawˬ ve awˬ chawˇ hkawꞈ nyi leh shinˉ nyi htaˇ aˬ htoꞈ ma te ve le tehꞈ na laˇ ve kʼo, yawˇ htaꞈ Liꞈ hpu hkʼaw gʼa henˇ ve awˬ lawn maˇ heˆ leh hpawnˬ daꞈ ve hkʼaw gʼa henˇ ve awˬ lawn kʼoˆ maˍ piˇ sheˍ.
-
Vehˆsaiˉ jw.org nawˬ ve awˬ chawˇ htaꞈ hpaw maˍ piˇ sheˍ.
-
Nawˬ Liꞈ hpu henˇ htaˇ, nawˬ shiˍ daꞈ ve chaw ca na la tuˬ jehˬ piˇ sheˍ. Maˇ heˆ leh yawˇ vehˆsaiˉ jw.org hkʼaw Liꞈ hpu henˇ tuˬ lawˬ ve awˬ hkʼaˇ kʼoˆ maˍ piˇ sheˍ.
2. Aˬ htoꞈ ma pa taw Hkriꞈ yaˇ awˬ moˍ hkʼaw teˇ geh hto toˇ ve lehˬ a yeˇ uiˍ ve le?
Yeˍsuˆ ve awˬ laꞈ gʼawˇ shiˍ daꞈ ve chaw htaꞈ daꞈ ve awˬ lawn sha tanˇ kʼoˆ piˇ ve awˬ hkʼoˆ kaꞈ, awˬ nu ve chaw htaꞈ kaꞈ kʼoˆ piˇ ve yoˬ. Yeˍsuˆ yawˇ hui htaꞈ “venˇ hkʼaˆ teˇ kaˬ le le lo 2 gʼaˇ teˇ kaˬ 2 gʼaˇ teˇ kaˬ” ca hto toˇ tcuh ve yoˬ. (Luˉkaꞈ 10:1) Hto toˇ ve awˬ hkʼaˇ chi hkʼe te ve pa taw, awˬ laꞈ gʼawˇ hui chaw laiˉ gʼaˇ htaꞈ daꞈ ve awˬ lawn sha tanˇ hto maˍ piˇ gʼa ve yoˬ. Leh yawˇ hui teˇ geh gʼa hto toˇ ve ha lehˬ jaˇ. (Luˉkaꞈ 10:17) Nawˬ kaꞈ Hkriꞈ yaˇ awˬ moˍ hkʼaw ve chaw geh hto toˇ gaˇ˗aw laˇ?
Henˇ shiˍ maˇ la tuˬ
Nawˬ haꞈ hanˉ ve nyi ma cawˬ tuˬ hkʼaˬ hkʼe gʼa te ve le, leh nawˬ daꞈ ve awˬ lawn sha tanˇ hto toˇ ve hkʼaw hkʼaˬ hkʼe te ha lehˬ gʼa tuˬ le, teˇ geh henˇ sheˍ.
3. Yaˬhoˉvaˬ nawˬ htaꞈ ga laˇ tuˬ yoˬ
Chaw teˇ hpaˍ hto toˇ gaˇ ve htawˇ, nyi ma maˇ haˆ ve yoˬ hehˉ. Awˬ lawn kʼo, shu maˇ na gaˇ ve htaꞈ kawˆ ve yoˬ.
-
Nawˬ gʼa henˇ ve awˬ lawn shu htaꞈ kʼoˆ piˇ haˆ˗aw laˇ? Aˬ htoꞈ ma pa taw le?
VDO hpaw leh na hkawˇ chi htaꞈ tawˇ yaw daꞈ sheˍ:
-
Yaˬhoˉvaˬ ve Shaˉhkiˆhkanˍ ve chaw yaˇ nehˬ teˇ hpaˍ yawˇ hui haꞈ hanˉ tuˬ aˬ htoꞈ ma te ve le?
Iˉsaˍyaˆ liꞈ 41:10 gʼaw leh na hkawˇ chi htaꞈ tawˇ yaw daꞈ sheˍ:
-
Nawˬ hto toˇ ve maˇ haˆ htaˇ, aˬ htoꞈ ma pa taw bon lawˬ cawˇ ve le?
Nawˬ shiˍ˗aˬ laˇ?
Yaˬhoˉvaˬ ve Shaˉhkiˆhkanˍ ve chaw laiˉ gʼaˇ shu htaꞈ daꞈ ve awˬ lawn sha tanˇ kʼoˆ piˇ maˇ gʼa tehꞈ dawˇ jaw ve yoˬ. Tawˇ pa haˉ te kʼo, She˗hke meh ve hawˉ hkʼaˆ teˇ gʼaˇ nyi ma maˇ haˆ ve chaw hpehꞈ leh shu geh tawˇ yaw daꞈ tuˬ haˍ jaˇ tehꞈ dawˇ ve yoˬ. Yaꞈ hkʼaˇ, yawˇ Liꞈ hpu henˇ peuˬ hkʼawꞈ nawˉ yawˇ kʼoˆ ve, “ngaˬ kawˆ ve htawˇ, ngaˬ gʼa henˇ taˍ ve awˬ lawn shu htaꞈ tanˬ hto maˍ piˇ ve yoˬ. Leh shu geh Liꞈ hpu awˬ lawn yaw daꞈ ve ngaˬ haꞈ hanˉ ve chaw hpehꞈ la tuˬ ga laˇ ve yoˬ. Chi hkʼoˆ kaꞈ, ngaˬ yonˍ ve awˬ ceuˬ htaꞈ hkʼa dehꞈ kʼawꞈ yonˍ maˇ la tuˬ ga laˇ ve yoˬ.”
4. Yawˆ yan piˇ ve
Nawˬ daꞈ ve awˬ lawn sha tanˇ shu htaꞈ maˇ kʼoˆ maˍ piˇ sheˍ htaˇ, nawˬ aˬ htoꞈ ma awˬ lawn kʼoˆ tuˬ ve htaꞈ ceh tiˉ dawˇ nyi ve maˇ heˆ. Yaꞈ hkʼaˇ, hkʼaˬ hkʼe kʼoˆ tuˬ ve htaꞈ kaꞈ dawˇ nyi sheˍ. 2 Tiˆmoˉseˍ liꞈ 2:24 leh 1 Peˍtruˆ liꞈ 3:15 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Liꞈ hpu awˬ tawn chi teˇ hpaˍ beˆ maˍ laˇ ve htaꞈ, nawˬ shu geh Liꞈ hpu awˬ lawn yaw daꞈ htaˇ, hkʼaˬ hkʼe te yuˬ yehˇ gʼa tuˬ le?
-
Nawˬ ve yehˬ kʼa maˇ heˆ leh nawˬ ve awˬ chawˇ nawˬ kʼoˆ piˇ ve awˬ lawn htaꞈ maˇ haꞈ yuˬ ve kʼo, nawˬ aˬ htoꞈ ma te cawˇ ve le? Leh nawˬ aˬ htoꞈ ma maˇ te cawˇ ve le?
-
Yawˇ aˬ htoꞈ ma gʼa yonˍ cawˇ ve kʼoˆ piˇ ve aꞈ kehˉ, aˬ htoꞈ ma te ngaˬ hui nuˇ nehˬ ve hkʼaw na hkawˇ yehˇ leh a yehˉ yehˉ kʼoˆ maˍ piˇ cawˇ ve le?
5. Shu htaꞈ daꞈ ve awˬ lawn sha tanˇ hto piˇ ve lehˬ ha lehˬ tuˬ te laˇ ve
Yaˬhoˉvaˬ lehˬ Yeˍsuˆ htaꞈ daꞈ ve awˬ lawn sha tanˇ hto toˇ tcuh ve yoˬ. Yeˍsuˆ kanˉ chi gʼa te ve yawˇ hkʼaˬ hkʼe dawˇ ve le? Yoˇhanˬ liꞈ 4:34 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Awˬ bon cawˬ ve caˇ tuˬ htaꞈ caˇ ve lehˬ ngaˬ hui a shaꞈ teꞈ chehˇ gʼa leh ha lehˬ ve cawˬ tuˬ te laˇ ve yoˬ. Yeˍsuˆ kʼoˆ ve Gʼuiˬ sha ve a loˍ htaꞈ gʼaꞈ te ve, leh daꞈ ve awˬ lawn sha tanˇ hto toˇ ve lehˬ caˇ tuˬ caˇ ve htaꞈ shuˍ ve yoˬ. Aˬ htoꞈ ma pa taw Yeˍsuˆ chi hkʼe kʼoˆ ve le?
-
Nawˬ dawˇ kʼo, daꞈ ve awˬ lawn sha tanˇ hto toˇ ve lehˬ hkʼaˬ hkʼe te ha lehˬ tuˬ te laˇ gʼa ve le?
Ga laˇ gʼa ve awˬ ceuˬ
-
Mvuhˇ hpeuꞈ haˉ hpawnˬ daꞈ chehˇ htaˇ, nawˬ shu htaꞈ hkʼaˬ hkʼe tanˬ hto maˍ piˇ gʼa ve htaꞈ dawˇ nyi sheˍ.
-
Nawˬ htaꞈ maˍ laˇ ve chaw geh nawˬ mvuhˇ hpeuꞈ haˉ hpawnˬ daꞈ ve hkʼaw liꞈ henˇ yaˇ te gʼa tuˬ, aˬ htoꞈ ma gʼa te cawˇ ve le tehꞈ na piˇ sheˍ. Liꞈ henˇ yaˇ te ve lehˬ nawˬ gʼa henˇ taˍ ve awˬ lawn shu htaꞈ kʼoˆ maˍ piˇ gʼa tuˬ ga laˇ gʼa ve yoˬ.
-
Liꞈ kʼoˆ chi hkʼaw cawˬ ve “Chaw teˇ hpaˍ kʼoˆ ve” maˇ heˆ leh “Chaw teˇ hpaˍ na nyi laˇ ve” awˬ tawn htaꞈ yehˇ leh tawˇ gʼawˬ laˇ ve htaꞈ nawˬ hkʼaˬ hkʼe te hkʼawꞈ piˇ gʼa tuˬ awˬ hkʼaˇ te jawˬ sheˍ.
Chaw teˇ hpaˍ na nyi laˇ ve: “Awˬ chawˇ˗oˬ, chi teˇ tcuhˉ hkʼa dehꞈ maˇ gʼa mawˬ daꞈ, nawˬ hkʼaˬ hkʼe kʼai le?”
-
Shu chi hkʼe na laˇ htaˇ, nawˬ Liꞈ hpu hkʼaw gʼa henˇ taˍ ve awˬ ceuˬ yawˇ hui htaꞈ hkʼaˬ hkʼe te kʼoˆ maˍ piˇ gʼa tuˬ le?
A yeˇ uiˍ ve awˬ lawn
Nawˬ shu htaꞈ daꞈ ve awˬ lawn sha tanˇ hto piˇ ve lehˬ ha lehˬ tuˬ te laˇ ve, leh nawˬ dawˇ taˍ ve aꞈ kehˉ sha ve yoˬ.
Kʼawꞈ gʼaꞈ na ve
-
Aˬ htoꞈ ma pa taw ngaˬ hui shu htaꞈ daꞈ ve awˬ lawn sha tanˇ kʼoˆ piˇ gaˇ ve le?
-
Nawˬ shu htaꞈ daꞈ ve awˬ lawn sha tanˇ kʼoˆ piˇ htaˇ, yawˆ yan ve hkʼaw hkʼaˬ hkʼe te kʼoˆ piˇ gʼa tuˬ le?
-
Nawˬ hto toˇ ve hkʼaw nyi ma haꞈ hanˉ ve cawˬ tuˬ hkʼaˬ hkʼe te gʼa ve le?
Kʼawꞈ caˉ nyi gʼa ve
Shu htaꞈ daꞈ ve awˬ lawn sha tanˇ hto piˇ tuˬ, jw.org htaꞈ caˉ daꞈ tuˬ ve liꞈ yehˇ gʼa ve awˬ hkʼaˇ 4 maˬ htaꞈ nyi sheˍ.
JW.ORG htaꞈ caˉ daꞈ tuˬ ve liꞈ piˇ tuˬ te maˍ laˇ ve awˬ hkʼaˇ (1:43)
Nawˬ daꞈ ve awˬ lawn sha tanˇ hto toˇ ve hkʼaw ga laˇ gʼa ve 4 ceuˬ htaꞈ gʼaw nyi sheˍ.
Yaˇ ehˉ leh ngaˬ hui teˇ gʼaˇ le le hto toˇ ve hkʼaw haꞈ hanˉ ve cawˬ tuˬ, Liꞈ hpu hkʼaw ve awˬ lawn hkʼaˬ hkʼe ga laˇ gʼa ve le, nyi sheˍ.
Yaˬhoˉvaˬ ve awˬ lawn htaꞈ maˇ shiˍ ve nawˬ ve yehˬ kʼa hkʼaw ve chaw geh Liꞈ hpu awˬ lawn hkʼaˬ hkʼe te yaw daꞈ gʼa tuˬ le?
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
