KJOAʼMIYA 22
Jókoa̱n sʼiain nga kʼuínyalai xi kjaʼaí je énnda xi tʼatsʼe Niná
Nga jeʼyai jmeni xi tso je Biblia, tsakui nichxin i̱si: “Machjénjin nga skoe̱ ngatsʼi chjota xi tʼatsʼe jebi”. Nʼio nda tsa kʼoasʼin nikjaʼaitsjain nga̱ machjén kjoaixile chjota nga sʼe̱jinle. Tonga tsakui nichxin tsín tso tokuin nga kʼoaʼmilai xi kjaʼaí jmeni xi kjimajinli. Kataʼyala jokoa̱n sʼiain nga nʼiojin koai̱n kʼoa nga tsjoacha koai̱n nga kʼuínyalai xi kjaʼaí je énnda xi nroatʼa ya Biblia.
1. Jókoa̱n sʼiain nga kʼuínyalai je chjota xi ʼyaxkuin jmeni xi kjimajinli
Je chjotale Jesús i kitso: “Alikui koa̱n nga jyó kuiyuijin xi tʼatsʼe xi tsaʼyaijin, xi kinoʼyaijin” (Hechos 4:20). Nʼio chjí tsabe je Énle Niná kʼoa kui xi koanmele nga kitsoyale toʼya chjotani. Tsa kʼoati tjín tokuin tsanda ji koaan kʼoéyanajmílai je xíngi kʼoa kao miyoli jmeni xi kjimajinli (tʼexkiai Colosenses 4:6).
Jókoa̱n kʼuínlai nga chja̱kaonajmí
-
Tsakui chja̱kaoni xíngi jmeni xi tso Biblia koaan i̱ kʼuínlai: “Xomana jebi kui koanjinna nga...”.
-
Tsa jngo miyoli tímʼe kʼoa tsa jme xi kjimakjáojinle, koaan jngo texto koakolai xi tsjoánganʼiole.
-
Tsakui skónangili je xi ñatjen nixái jméni xi kinʼiai nga tífe xomana, koaan kui kʼoéyanajmílai jmeni xi koanjinli nga tsakʼaili estudio kʼoa tsakuije̱ jmeni xi koanjinli kʼianga kʼin kjoajtín.
-
Takolai je miyoli je página xi tíjnaná ya Internet ya jw.org.
-
Kʼoatʼinlai xi kjaʼaí nga kʼoati katabatio nga bʼaili estudio kʼoa tsa maije̱ koaan kʼuínyalai josʼin sijé ya jw.org nga katabʼaile estudio.
2. Ánni ndatjínsíni nga kuitjokʼinyasuin kao je jtín
Je chjotale Jesús alikui toje kitsoyale Énle Niná je chjota xi bexkon. Je Jesús “jaojao [kisikasén] ngakijnda naxinandá” nga katatsoyason (Lucas 10:1). Nga kʼoakisʼin nkjín chjota kinrʼoé je Énle Niná kʼoa je chjotatjenngile Jesús nʼio tsjoa kisatio kon nga ñatjen kitsoyason (Lucas 10:17). Tsí meli nga kʼoati ñatjen kʼuínyasuin kao je jtín.
KATAʼYASAI JME XI TÍNCHJA̱NI
Kataʼyala jméni xi koasenkaoli nga nʼiojin koai̱n kʼoa nga kao kjoatsjoa kʼuínyasuin je Énle Niná.
3. Jé Jeobá koasenkaoli
Tjínkʼa chjota xi mele nga kuitsoyason tonga tsokjón nga̱ tsín be jókuitso je chjota.
-
A nokjonní ji nga chjakaonajmí je chjota tʼatsʼe xi kjimajinli. Ánni.
Chótsenlao VIDEO kʼoa cho̱bayaño jebi:
-
Jmé xi kisʼin nga nʼiojin koan je xti xi kafaʼa ya video.
Tʼexkiao Isaías 41:10 kʼoa cho̱bayaño jebi:
-
Kʼiatsa nokjuin nga ʼmiyasuin, ánni machjénsíni nga kʼoétsʼoai.
A ʼyaní
Nkjín je xi testigole Jeobá ma ndʼaibi xi kʼoasʼin kisikjaʼaitsjen tsakai nga tsínkʼia kuitso kon nga kuitsoyason. Tobʼelañá, je Sergey nʼio tsokjón ngasʼa kʼoa alikui tso kon nga ʼya xi fákaonajmí. Tonga chaan kiskotʼaya Biblia kʼoa itso: “Ningalani tsokjoan, chaan kitso tokoan nga kixinyale je chjota jme xi kjimajinna. Nga kʼoakisʼian alikui tikitsokjonña kʼoa ngisaa tsjoake̱ koan nga kixinyale je chjota jotso Biblia”.
4. Takui kjoaxkóntokon
Kʼianga jngo chjota kʼuínyalai, ali tokuijin nikjaʼaitsjain josí, kʼoati chósonnilai josʼin chja̱kaonajmí. Tʼexkiao 2 Timoteo 2:24 kao 1 Pedro 3:15 kʼoa cho̱bayaño jebi:
-
Jósʼin si̱chjáin kjoafaʼaitsjen jebi kʼianga chja̱kaoni xi tʼatsʼe Biblia je chjota.
-
Tsa tsín sa̱sén kʼale je xíngi kʼoa tsa miyoli jmeni xi sí, jméni xi koa̱n sʼiain kʼoa jméni xi tsín koa̱n kʼoasʼiain.
-
Ánni nga kao kjoaxkóntokon chja̱kaoñá je chjota ʼndele nga kjoanʼio kʼoakʼuínle josʼin tjínnele koa̱nkjainle.
5. Tsjoa sʼe tokoán nga ʼmiyasoán je Énle Niná
Je Jeobá kui xá kitsjoale je Jesús nga katatsoyason je Énle. Jósʼin tsabekon xá jebi je Jesús. Tʼexkiao Juan 4:34 kʼoa cho̱bayaño jebi:
-
Nga kui chinee je tsojmi xi nda, tsjoánganʼioná kʼoa nda sʼe tokoán. Ánni kui kisingósonkaoni je Jesús je tsojmi xi chinee kʼianga kʼoakisʼin josʼin mele je Nʼaile, jolani kʼianga kitsoyason.
-
Jósingái ji, jósʼin kuichomani tsakui kuinókjoakaoni je chjota jotso je Énle Niná.
Xi koa̱n sʼiain
-
Kʼianga sʼejna kjoajtín nga jinle xomana kuenta tʼiain jmeni xi sakóya josʼin ma chjakaonajmiá je chjota.
-
Kʼoatʼinlai je xi títsoyali jméni xi koa̱n sʼiain nga koa̱n kuitjái ya kjoajtín xi satío nga jinle xomana. Kʼianga kuitjái jmeni xi kʼoakaoli ya jinjtín, koasenkaoli nga ngisa koa̱nli josí nga chja̱kaonajmí je chjota tʼatsʼe jme xi kjimajinli.
-
Chótsenlai jñani “Tjínkʼa xi i̱ tso” tso xi faʼaitʼa libro jebi, ánni nga jchasíni josí kʼiatsa jme xi skónangili je chjota.
TJÍNKʼA XI I̱ TSO: “Kʼoa jmé xi totinʼiai ndʼai”.
-
Tsa ʼya xi kʼoakuitsoli jókʼuínlai nga kui chja̱kaonajmíni jmeni xi kjimajinli nga tichotʼayai Biblia.
XI KACHOTʼAYÁ
Tsjoa sʼe tokoán nga kui nokjoañá jmeni xi tso je Énle Niná kʼoa alikuini jotoñʼai nga chjakaonajmiá je chjota.
Jmé xi kamajinli
-
Ánni machjénsíni nga kʼuínyasoán je Énle Niná.
-
Jókoa̱n sʼiain nga kao kjoaxkóntokon chja̱kaonajmí je chjota.
-
Jókoa̱n sʼiain nga sʼe̱li kjoanʼiojin.
XI KOASENKAOSALI
Ño koya josʼin koa̱n si̱chjén je tarjeta de contacto xi tsʼe jw.org.
Ño koya xi tjínnele sʼiaan nga kʼuínyalee Énle Niná je chjota.
“A jetijnandai nga kʼuínyasuin” (Xo̱n xi Bájinkonná, septiembre 2020)
Jmeni xi tso je Biblia basenkaoná nga nʼiojin maa nga ʼmiyasoán ninga sʼa xtiaa.
Jókoa̱n sʼiain nga chja̱kaonajmíni jmeni xi tso Biblia je xíngi xi kje bejin xi tʼatsʼe Jeobá.
“Jósʼin chja̱kaonajmíñá Énle Niná je xíngiaa xi tsín makjainle” (La Atalaya, 15 de marzo de 2014)
Tsa kʼoati meli jchai xi tʼatsʼe jebi
XI NʼIO KJONANGI CHJOTA
Jósʼin bakoyalaijin Énle Niná je chjota
Nga kʼuínyali Biblia koaan si̱chjain tojñanile Biblia xi kijnali, koaan kʼoakʼuínlai familiali, miyoli kʼoa toʼyani xi meli.
