MPANTTA 22

Manannani nyuuva cinhaleenyu ukhitiri waahimyeera atthu ihapari comaana?

TOCAR

Mpaka nna, nyuuva nheetthuca ikhweeli cinci co mbiiblyani. Masi atthunaka nnawuupuwelaka co: ‘Nnya citthunnya atthu otheene yaalamuliya ucuwela!’ Khweeli, atthu otheene ahaana yacuwelaka nnyo citthunnyo. Masi hataa ukhalaka commo, nyuuva atthunaka nnawoova awula nnawoona ihaaya waahimyeera atthu citthu cineetthuceenyu. Nhina ula mpanttoola, ninaahala wiitthuca mananna ookhitiri umalihaca nwo woovanwo ni ukhala ootteeliya nlalyeeraka ihapari comaana.

1. Manannani cinlamuliyeenyu waahimyera atthu citthu cineetthuceenyu?

Atthari a Yesu Kristu yahoolumaca yeeraka: “Khaninlamuliya uhiya wuuluma citthu coonaleehu ni ciiwileehu.” (Miteko 4:20) Ayo caanaacivela cinene ikhweeli co mbiiblyani, phimaana yaanaapheela waahimerya atthu otheene. Nyuuva ciicammo phineecooneenyu? Paasi, mwaavye ukati wiira nimananna omaana, mwaahimerye asimuciinyu ni asipatthaniinyu citthu cineetthuceenyu.—Nsome Akolosu 4:6.

Miruku cikhwaawe

Ukati ummoopaneenyu mwaha mmuciinyu, nyuuva pooti umwiirela co: “Ila isumaneela kihiitthuca itthu yookicivela cinene.”
Mwamoonaka mpwaniinyu wiira naawerennya awula ri niiwasiwaasi, munthoonyere iveerusu yo mbiiblyani wiira mummaalihe.
Wakhalaka wiira ntthu nonsomaneenyu awula nonvaraneenyu nteko nawuukohani isalaama, munhimyeere citthu ciitthucileenyu ukati waasomihiyeenyu Ibiiblya awula umikutthaanoni.
Mwaathoonyere asipatthaniinyu isayiti jw.org.
Munlattule ntthu ukhala wamoca ni nyuuva ukati unsomihiyeenyu Ibiiblya, awula munthoonyere mananna oolepela usomihiya Ibiiblya nsayitini jw.org.

2. Kontha isiyani unaareera ulalyeera wamoca ni mayamunna o wanlokoni?

Atthari a Yesu khayaaca paasi waahimyera ihapari comaana atthu yaacuwelaaya. Ayo ciicammo yanlalyeera nimananna oothotokannya. Yesu ahaaruma attharyaawe uvira yalalyeeraka “eeli-eeli . . . mmasittatti.” (Luka 10:1) Iyo itthwiiyo yahowiiriha atthu enci wiiwa ihapari comaana. Uhiya commo, ulalyeera nkhayi waanaaphwanyiha utteeliya nrima. (Luka 10:17) Nyuuva nnoonela cani wiikurumica wiira nlalyeere nkhayi ni mayamunna o wanlokoni?

MUNCERERE WIITTHUCA WINYU

Moone mananna cinlamuliyeenyu umalihaca woova ni ukhala ootteeliya nvaraka nteko woolalyeera.

3. Yehova naahala wuukaviherani

Akinaku ampheela ulalya anaakhalaka niiwasiwaasi yuupuwelaka mananna cinhalaaya uweheriya nlattu wo nteko unvaraaya awula yuupuwelaka mananna cinhalaaya waakhuliya naatthu anhalaaya uwuulumana.

Nyuuva nnaasoovaka waahimyera akhunaninyu citthu cineetthuceenyu? Kontha isiyani?

Moone IVIDIYU, ni mwamalihaka woona, moopele mwaha nna nikohonna:

IVIDIYU: Mi kahonlompa Yehova ni kahonlepela ulipa nrima (4:05)

Manannani amirawo Masaahiti a Yehova awoonileehu nvidiyuni cimalihalyaaya woova waarinaaya?

Nsome Isaiya 41:10, ni mwamalihaka usoma, moopele mwaha nna nikohonna:

Mweecoonaka woova ulalyeera kontha isiyani unaahala ureera nyuuva ulompa?

Mwaanaacuwela?

Atthu enci nna co akhanle Masaahiti a Yehova yooniha wiira khayaahala ukhitiri ulalyeera ihapari comaana. Moone ntakihero nimoca na munneehu Sergey nokhala u Rússia. Uyo kheecoona ukhalana ifayita ni waanonrika uwuulumana atthu akhwaawe. Masi wahoolo waya, uyo ahancera usoma Ibiiblya. Uyo neera co: “Waahookhalaru wiira kaanawoova, mi kahancera waahimyeera atthu citthu ceetthucaaka. Vano yaheerannya itthu yaakitikhinihile cinene. Waahimyeera atthu nnyo citthu co mbiiblyaninnyo wahokiiriha wiicoona ukhalana ifayita. Ciicammo, waahimyeera atthu citthu caakupalyaaka waholipihaca waamini waka.”

4. Muulume saana

Ukati wo waahimyera atthu ihapari comaana, muupuwele kahi paasi itthu inlamuliyeenyu wuuluma, masi ciicammo mananna cinlamuliyeenyu wuuluma. Nsome 2 Timotiyu 2:24 ni 1 Peturu 3:15. Mwamalihaka usoma, moopele mwaha ala makohwaala:

Ukati woowuulumana atthu myaha co mbiiblyani, manannani cinlamuliyeenyu uvarela nteko citthu cinhimyaaya nnya iveerusunnya?
Pooti ukhalaka wiira ahaavo asipatthaniinyu awula amuciinyu ahinhala wuukupalini. Isiyani inlamuliyeenyu upanka? Ni isiyani ihinlamuliyeenyu upanka?
Isiyani yooreera upanka: uwuulumana saana awula waakhanyereriha ukupali citthu cinoolumeenyu? Kontha isiyani?

5. Waahimyera atthu ihapari comaana unaaphwanyiha utteeliya nrima

Yehova ahonvaha Yesu nteko woolalyeera ihapari comaana. Yesu oonenle cani uyo ntekooyo? Nsome Joau 4:34, ni mwamalihaka usoma, moopele mwaha ala makohwaala:

Ulya, uhiya paasi unikavihera ukhala akumi, ciicammo unaanikavihera ukhala ootteeliya nrima. Nlattuni Yesu waalattanihilyaawe ulya nuupanka citthu cimpheelaawe Nluku (toko ulalyeera)?
Nyuuva woonela winyu, kontha isiyani ulalyeera ihapari comaana unaaphwanyiha utteeliya?

Miruku

Wankutthaanoni weeriyari isumana, nviriyane sana-saana malakihero anvahiya nhina mananna o waahimyera atthu ihapari comaana.
Munkohe ule noosomihani Ibiiblya mananna o wancera upanka miphantte wankutthaanoni weeriyari isumana. Miphantte cinvahiyaaya anacikola cinaahala wuukaviherani uhoova waahimyeera akhwiinyu citthu cineetthuceenyu.
Nvarele nteko ikwaaturu “Atthu akiina aneera” awula “Ntthu akohaka” wiira mwiitthenkace mananna o waakhula makoho ni itthu yowuuluma ntthu aahikupaliki itthu inonhimyeryeenyu.

NTTHU AKOHAKA: “Salaamani! Mahuku menci?”